Kananet 26

I̱sa̱ko̱ ki alaan Abimelech

1I̱yo̱ko̱, anyak looci magiz ci ommog magiz bali ngen Aburahami aruge ke̱, kar zin I̱sa̱ko̱ kuk rok alaan Abimelech ci ol cik een Philistines o̱rge̱ ci een Gerar. 2Ozozek zin Manyi I̱sa̱ko̱ o̱no̱zo̱we̱, “Ma aluce okko Masire; bak lo̱o̱ce̱ ci ka̱du̱wa̱ki̱ abunna ming abahe ko̱. 3A̱vvu̱ lo̱o̱ce̱ necu do̱yo̱i̱t, kaave atin anna ki i̱nne̱ta̱ kar atin ka̱mu̱yu̱i̱ i̱nne̱ta̱. Eci kanyike atin anna i̱nne̱t ki dooli ki dooli cigunnek lo̱o̱cco̱k ne̱ko̱, kar atin nege ku̱zu̱tte̱ olom bali ku̱du̱wa̱ anna baatunne Aburaham ke̱. 4Kanyike atin dooli cigunnek ki̱ti̱rre̱t kizeto meele ki i̱yo̱ko̱ munyunya, kar bo̱do̱k kanyik nogo lo̱o̱c necu do̱o̱k, eci zo̱ze̱ ci dooli cigunnek, amuda atin ol cik lo̱o̱tu̱ do̱o̱k ma̱yu̱we̱ne̱t, 5ma̱rri̱t Aburahami o̱ngo̱o̱li̱na̱n kar kuzute zoz ci ka̱du̱wa̱ anna, ti̱lo̱wi̱ne̱t cinanni, ki lo̱ti̱nno̱k cigannik.” 6Abak zin I̱sa̱ko̱ o̱rge̱ ci een Gerar.

7Baling I̱jji̱nne̱t ol cik orog neci nonno zoz ci ngaa cinne, izek enne nogo ne, “Een enne ngoona,” eci enne o̱ngo̱o̱le̱ kize ne, “Een enne ngaa cinanni.” I̱no̱n enne azi ne, “Ovvo wo̱ye̱ atin ol cik orog necu a̱ru̱ka̱ annita ka̱da̱k zo̱ze̱ ci Rebekah, eci enne a̱zi̱ze̱.”

8Baling abak I̱sa̱ko̱ nginati u̱u̱mu̱c, edeva zin Abimelechi alaani ci olli Philistines lopildinga kar kicin I̱sa̱ko̱ ming amice ki Rebekah. 9Utu zin Abimelechi I̱sa̱ko̱ kar kizek ne, “Een Rebekah de̱de̱ ngaa cunne! Nya i̱nna̱ ming azi ne, ‘Een enne ngoonu ko̱’?”

O̱bo̱de̱k zin I̱sa̱ko̱ nonno, “Eci ko̱ngo̱o̱le̱ kokolozi wo̱ye̱ anna ruget cinanni zo̱ze̱ cinne.”

10O̱bo̱de̱k zin Abimelechi nonno, “Nya ci ogonikket i̱nna̱ agit ko̱? Ming atangwei i̱yo̱ko̱ weda da̱ e̱e̱ti̱ imma co̱de̱ ngatinna̱ng ki ngaa cunne, anyahaet weete i̱nna̱ agit mu̱nye̱n.”

11I̱ti̱lo̱wo̱ zin Abimelechi zu̱wa̱ do̱o̱k: “Ming aminye e̱e̱ti̱ imma e̱e̱t cu icima ngaa cinne a̱ru̱we̱ atin enne de̱de̱ ka̱da̱k.”

12Eev zin da̱ I̱sa̱ko̱ ma̱na̱ lo̱o̱ce̱ neci kar e̱rki̱te̱ neci eliya etteda labi cik meelek, eci Manyi u̱mu̱yu̱k nonno. 13Ize enne jaitot, imma kaala ciginnek otorye zee kize enne jaitot oroot. 14Abala da̱ enne kaal ciginnek ko̱, anyak zin enne a̱zza̱ ki tiin ki du̱cca̱k cik meelek giir. Emederanit zin ol cik Philistino nonno. 15Icannit zin nege iitani cik I̱sa̱ko̱, balik a̱da̱ du̱cca̱ha̱ cik baatinne Aburahami ke̱.

16U̱du̱wa̱k zin alaani Abimelechi I̱sa̱ko̱, a̱nne̱k ne, “Lu̱g bit o̱rge̱ emani eci i̱nna̱ anyai doiz ci ommoget agit do̱o̱k.”

17U̱lu̱k zin I̱sa̱ko̱, uk tolol ci Gerari, uk abak nginati. 18Obodozik dawinet iitani balik a̱da̱ baatinne ke̱, iitani balik aican ol cik een Philistines baling a̱da̱k Aburahami. Akatek bo̱do̱k I̱sa̱ko̱ zar balik akannek Aburahami ke̱.

19A̱da̱yya̱ zin bo̱do̱k du̱cca̱ha̱ cik I̱sa̱ko̱ iit nginati kar kurubta maam cik caalek. 20I̱vi̱ta̱ zin abarik tuwayowa cik Gerari adangto ki tuwayok cik I̱sa̱ko̱ kar kizeto ne, “Een ne̱ko̱ maam cigga̱k!” Akatek zin I̱sa̱ko̱ iit kize Esek, eci nege adangto ki nonno. 21A̱da̱yya̱ zin bo̱do̱k du̱cca̱ha̱ cik I̱sa̱ko̱ iit imma abarik anyaha bo̱do̱k dango dee. Akatek zin I̱sa̱ko̱ iit neci kize zara Sitnah#26:21 Sitnah: Utuge ci I̱bu̱ru̱, azi keng cik zar ne̱ko̱ ne, walwali icima gerza zinin.. 22U̱lu̱k zin enne uk ngamani, a̱da̱yya̱ zin bo̱do̱k du̱cca̱ha̱ cik I̱sa̱ko̱ iit imma kar i̱llo̱i̱ e̱e̱t imma ci adang nonno. Akatek zin I̱sa̱ko̱ iit neci kize Rehoboth,#26:22 Rehoboth: Utuge ci I̱bu̱ru̱, azi keng cik zar ne̱ko̱ ne, ka̱vvu̱t labak icima ka̱vvu̱t ju̱rru̱m. kar I̱sa̱ko̱ kize ne, “I̱yo̱ko̱ aanyyet Manyi nginti a̱ppwe̱, kabala atin kaal ngatu.”

23Imma nginati u̱lu̱k I̱sa̱ko̱ uk o̱rge̱ ci een Beersheba. 24Okko ba̱a̱li̱n neci, i̱ye̱le̱k Manyi I̱sa̱ko̱ ele kar kize ne, “Ke̱e̱ni̱ anna Ta̱mu̱ta̱dde̱n ci baatunne Aburaham. Ma o̱ngo̱o̱le̱, eci anna kaave ngatunne; ka̱mu̱yu̱ki̱ atin anna i̱nne̱ta̱ kar atin kanyik dooli cigunnek kizeto meele zo̱ze̱ ci du̱ca̱i̱t cinanni Aburaham.”

25Idiman zin I̱sa̱ko̱ i̱te̱le̱ nginati kar kala Manyi. Kar keteehenyek ti̱te̱t cigge̱k ngin neci, kar du̱cca̱ha̱ ciginnek ka̱da̱c iit nginati.

Olom ci I̱sa̱ko̱ ki alaan Abimelech

26I̱vi̱tta̱k zin alaani Abimelech ki lo̱ddi̱ki̱re̱ ngati Gerari, ki Ahuzzat ki Phicol ddi̱ki̱ryo̱i̱t ci aciir ciginnek. 27I̱jji̱n zin I̱sa̱ko̱ nogo azi ne, “A̱vvu̱na̱kka̱ng ette nya? Iróng eroni cu een ci labak, eci i̱nna̱ otowa ba̱li̱ye̱ o̱rge̱ cunne.”

28O̱bo̱dde̱k zin nege azi ne, “Kicinnta de̱de̱ aave Manyi ki i̱nne̱ta̱. Ki̱no̱na̱ zin korongnya ming kanyak olom ki i̱nne̱ta̱, 29du̱l da̱ illa ize ne iróng atidic ogonikket gi̱i̱ ci gerze, ki i̱yo̱ko̱ ming iróng kogonikku̱ng gi̱i̱ ci gerze. Ki̱tto̱nnu̱ng ba̱li̱ye̱ labak. I̱yo̱ko̱, cin zin, aanyi Manyi ma̱yu̱we̱ne̱t!”

30Idimanek zin I̱sa̱ko̱ nogo da̱i̱ne̱t cik meelek, kar kadakto kar bo̱do̱k kuudde.

31Imma nge̱rre̱ti̱n ci reng, aganto, u̱tu̱gu̱zzo̱ olom nege do̱o̱k, kar zin I̱sa̱ko̱ kanyik koot o̱rge̱ cinne̱ng labak.

32Imma i̱i̱te̱n neci ele, i̱vi̱ta̱ zin du̱cca̱ha̱ cik I̱sa̱ko̱ u̱du̱ktta̱k nonno zoz ci iit bali a̱da̱ nege ke̱, azi ne, “Kurubta maam!” 33Akatek zin I̱sa̱ko̱ iit neci kize Shiba#26:33 Shiba: Utuge ci I̱bu̱ru̱, azi keng cik zar ne̱ko̱ ne, iit ci olomo. kar zin kakatek orog neci kize Beersheba rok i̱yo̱ko̱.

34Baling izeto e̱rki̱nya̱ cik I̱sa̱u̱ moten we̱c, i̱ti̱k zin buweenyi Beeri ci een zara Judith ci a̱kku̱ olle cik Hittites dee kar bo̱do̱k ki̱ti̱k Basemath buweenyi Eloni ci olli Hittites dee. 35I̱li̱bbe̱t zin abarik ngaai cik I̱sa̱u̱ baiz ci I̱sa̱ko̱ ki ngaa cinne Rebekah.

المحددات الحالية:

Kananet 26: tex

تمييز النص

نسخ