Kananet 23

Daiz ci Sarah

1Abak Sarah kizeto e̱rki̱to̱wa̱ o̱bo̱n co̱de̱ ki moten ram ki turgerem (127). 2A̱da̱i̱ zin enne ngati een Hebron lo̱o̱ce̱ ci Kanaani, kar zin Aburahami ku̱tu̱lu̱ u̱lu̱wa̱ ci Sarah nginati.

3Utungek Aburahami ol cik u̱lu̱wa̱nu̱ lo̱o̱c o̱rge̱ bali a̱da̱kne̱ ngaa cinne ke̱, kar zin kuk rok ol cik een Hittites, kar ki̱jji̱n kizek ne, 4“Ke̱e̱ni̱ ja i̱do̱nge̱ni̱t ci reng, kabai lo̱o̱ce̱ cunno̱ng. U̱tu̱ye̱yya̱ng ngin imma kar kuk kadawek ngaa wananni.”

5O̱bo̱dde̱k zin ol cik een Hittites Aburaham a̱nne̱k ne, 6“Ddi̱ki̱ryo̱i̱t, zik zoz cinna̱ng. E̱e̱ni̱ i̱nna̱ ddi̱ki̱ryo̱i̱t ci ommog veelek orgene cinna. Dawek miningit cunne nginti ahala zinin cunne. Iróng wo̱ye̱ e̱e̱ti̱ imma ngatinna̱ng a̱ju̱ra̱ki̱ nginti een ilomi.”

7U̱lu̱le̱ zin Aburahami ngati olli lo̱o̱c ci Hittites. 8Kar kizek nogo ne, “Ming orongnyang ka̱da̱ daizoit ngatu; i̱jji̱nte̱yya̱ng da̱ Ephron ngerrti Zohari, 9kar atin enne kataliya annit ngi̱lo̱m ci een Machpelah aave ma̱ne̱ cinne abanyca ko̱, korongi kutuweya annit kar ku̱ru̱k o̱ro̱bi̱ya̱ do̱o̱k, kar gon kadawek ol cigannik.”

10Aave da̱ Ephroni ci olli Hittites ko̱ lo̱o̱ta̱ orgene ci ol ciginnek kar zin kabariz zoz ci Aburahami ngati azikne olli Hittites balik a̱vvu̱na̱k aran ci o̱rgu̱ ke̱. 11A̱nne̱k ne, “Iróng een niko ddi̱ki̱ryo̱i̱t, ziya arrak annita; kaanyi anna i̱nne̱t ma̱na̱, ki nginti adawe ol cigunnek. Kaanyi kicinnet ol cigannik do̱o̱k. Bit dawek ol cigunnek a̱da̱i̱ ngin neci.”

12U̱lu̱le̱ zin Aburahami ngati olli lo̱o̱c neci 13kar zin enne kizek Ephron kiziyet ol do̱o̱k ne, “Ziya da̱ nger, ming elemi i̱nna̱; ka̱ru̱i̱ atin o̱ro̱bi̱ya̱ cik ma̱na̱ necu. Lema zoz necu ngatinanni kar anna kadawek ol cigannik a̱da̱i̱ ngin neci.”

14O̱bo̱de̱k zin Ephroni Aburaham izek ne, 15“Ziyan Manyi wananni, adak ma̱na̱ neci obet we̱c (400) ziik cik ataltali, iróng o̱ro̱bi̱ya̱na̱ ne̱ke̱ e̱e̱ggi̱n gi̱i̱ imma ngatinanni ki i̱nne̱ta̱. Bit dawek daizoit cunne nginati.”

16Elema zin Aburahami kaal cik a̱du̱wa̱ Ephroni kiziyet ol cik Hittites ko̱, kar zin ki̱ti̱gltta̱ obet we̱c (400) ziik cik ataltali go̱o̱le̱ ci da̱ gon ataline ol ne̱ke̱ kaal la̱du̱n.

17Utuwa zin Aburahami ma̱na̱ bali Ephroni ngati een Machpelah je̱e̱ne̱ ci Mamre. Uuta Aburahami lo̱o̱c neci aruma ma̱na̱ ki ngi̱lo̱m ci da̱ aave nginati ki keen. 18A̱gga̱c olli Hittites balik aavtte nginati ke̱ do̱o̱k ming ize ma̱na̱ ci Aburahami. 19Kar zin Aburahami ka̱da̱ ngaa cinne Sarah ngi̱lo̱me̱ ci aave ma̱ne̱ ci Machpelah ngati ojono ki Mamre azi ol ne Hebron, lo̱o̱ce̱ ci Kanaani. 20Ize ma̱na̱ ki ngi̱lo̱m bali nginati ke̱ do̱o̱k cik Aburahami kar kize nginti ilomettu, ka̱gga̱c olli Hittites do̱o̱k.

المحددات الحالية:

Kananet 23: tex

تمييز النص

نسخ