Kananet 18
18
E̱re̱nno̱k i̱i̱yo̱
1I̱ye̱le̱k Manyi Aburaham ele ngati anyak keen cik a̱ddi̱ki̱re̱ cik Mamre, aave enne ojongzo ki tatug ci ti̱ti̱ cinne koore ci a̱bu̱re̱ wazin kenga. 2Baling okko Aburahami acin ta̱dde̱n, edenya ol cik een i̱i̱yo̱ ming abile ojonun. Baling icin enne nogo, i̱yi̱ha̱k enne nogo tatuge ci ti̱to̱, kar ku̱ru̱me̱k gool kar ku̱lu̱le̱ kicin lo̱o̱c.
3Ize zin Aburahami ne, “Manyi cinanni, ming kabunna anna ngu̱me̱ cunno̱ng, ma ozoroyu du̱ca̱i̱t cunno̱ng. 4Inya kanyaha maam u̱gge̱ cik uudentak kar ocokte e̱le̱tti̱ kar i̱ye̱be̱zi̱t arrak do̱yo̱i̱t keete cu. 5Anycang kanyahaung gi̱i̱ imma kar adait, kar alalte zi̱nze̱tti̱ kar oot gool cunno̱ng, i̱yo̱ko̱ zin icinntu niga du̱ca̱i̱t cunno̱ng.”
O̱bo̱dde̱k zin nege nonno, “Abunna, tu̱gu̱ ki ming a̱du̱wa̱ ko̱.”
6I̱yi̱k zin Aburahami uk ngati Sarah ti̱ta̱ kar zin kizek ne “Damuta ovou necu imma ataman ngonyek kar puran umune imma.”
7I̱yi̱k bo̱do̱k uk tiine kar zin katahala mo̱o̱le̱t ci adiye kar zin kanyik du̱cca̱k kidimantek ol ne̱ke̱ da̱i̱ne̱t. 8Kar zin kanyahak e̱re̱nno̱k i̱ra̱ cik alibe ki cik caalek ki i̱di̱ng wanai kar zin kanyik ol ne̱ke̱ kadakto. Baling ngen ol ne̱ke̱ adakce, abile enne ojonun keeta vu̱rrta̱.
9I̱jji̱nne̱t zin e̱re̱nno̱wa̱ ne̱ke̱ nonno izettek ne, “I̱nno̱ ngaa waunne Sarah?”
O̱bo̱de̱k enne izek ne, “Aave ti̱ta̱.”
10Ize zin Manyi ne, “Kobodaki atin lola i̱i̱te̱n cu ele e̱rki̱ta̱, kar atin ngaa cunne Sarah kanyak do̱le̱c ci maci.”
I̱yo̱ko̱ zin azikne da̱ enne Sarah ti̱ta̱, bo̱i̱ce̱ ci Aburahami. 11Anyatito ba̱li̱ye̱ Aburahami ki Sarah, ozoroc Sarah e̱rki̱to̱wa̱ wagon anyaine ngaai. 12Atararek zin Sarah ele, kar zin kozoz zinina kize ne, “Ngati kanyata anna, okko e̱e̱ti̱ cinanne ize ma̱ti̱yo̱c, ngen atin wo̱ye̱ anna ka̱ri̱ti̱?”
13Izek zin Manyi#18:13 Manyi: E̱re̱nno̱we̱ cik e̱e̱ggi̱n i̱i̱yo̱ ko̱, een co̱de̱ Manyi Ta̱mu̱ta̱dde̱n. Aburaham ne, “Nya ming arari Sarah kar kize ne, ‘Kanyai atin anna de̱de̱ do̱le̱c, i̱yo̱ko̱ ming kanyata ko̱?’ 14Anyak gi̱i̱ imma ci okkomi kommog Manyi? Kobodaki atin lola nye̱lo̱we̱ cu kar atin Sarah kanyak do̱le̱c ci maci.”
15O̱to̱ngo̱o̱le̱ zin da̱ Sarah kar kovolong kize ne, “Ngen anna katararu.”
Ma̱i̱je̱ enne Manyi a̱nne̱k nonno ne, “Atararu bai i̱nna̱ ke̱.”
Ilalek Aburahami Ta̱mu̱ta̱dde̱n zo̱ze̱ ci orog ci Sodomi
16Baling itingazzo e̱re̱nno̱wa̱ orongit keronit rok orog ci een Sodom, kar zin Aburahami ki̱nya̱ma̱ne̱k nogo gool. 17Ize zin Manyi ne, “Nya wo̱ye̱ ka̱lu̱gu̱nyi̱ zoz ci korong ku̱tu̱gu̱ ko̱ ngati Aburahami? 18Ovvo atin dooli cik Aburahami e̱e̱ggi̱n ol cik okkomi, kar i̱do̱ngi̱ do̱o̱k lo̱o̱ta̱ ngatu kurubta ma̱yu̱we̱ne̱t ngatinne. 19Eci katahala anna nonno, kar atin enne ki̱ye̱le̱k dooli ciginnek ki ol cik a̱li̱ngli̱ngi̱ ce̱e̱ze̱ cinne gool ci Manyi, ngati ogone nege kaal cik abunna, kar atin anna Manyi kanyahak Aburaham zoz bali ku̱du̱wa̱ anna ke̱.”
20Iizek zin Manyi Aburaham ne, “Kiziya anna zoz ci gerze o̱rge̱ ci Sodomi ki Gomorrah ming a̱ppwa̱ oroot kar mu̱nye̱na̱ cigge̱k kizeto gerze oroot. 21Korongi kuk lo̱o̱ta̱, kar kuk kicin zoz cinne̱ng gerze ci azucana annit ko̱. Ming i̱llo̱i̱, ka̱gga̱ atin anna.”
22Utuhuye zin ol ne̱ke̱ kar zin koot o̱to̱ne̱ ci Sodomi, imma Aburahami ngen abile ngu̱me̱ ci Manyi. 23Uk zin Aburahami ngatinne kar kizek ne, “Adita atin i̱nna̱ ol cik abunna ki cik gerzek bu̱k nga̱to̱de̱? 24Ogon atin ku̱ ming aavtte ol cik abunna e̱e̱ggi̱n moten tu̱r o̱rge̱ neci? Adita wo̱ye̱ i̱nna̱ de̱de̱ orog necu, ci iróng ungnek ol cik abunna e̱e̱ggi̱n moten tu̱r ko̱? 25Iróng wo̱ye̱ i̱nna̱ a̱ru̱i̱ ol cik abunna ki cik gerzek nga̱to̱de̱, iróng wo̱ye̱ i̱nna̱ ogonni ol cik abunna ki cik gerzek kutubto. Iróng een niko. Abunna i̱nna̱ Manyi ettedi lo̱ki̱ko̱ ci lo̱o̱tu̱ go̱o̱le̱ ci abunna.”
26A̱nne̱k Manyi Aburaham ne, “Ming kamuda anna ol cik abunna e̱e̱ggi̱n moten tu̱r o̱rge̱ ci Sodomi, kalalnek atin orog do̱o̱k zo̱ze̱ cinne̱ng.”
27Ozoz zin bo̱do̱k Aburahami dee, “I̱yo̱ko̱ kinima zoz kozozik Manyi, ming nu̱nu̱n iróng anna ke̱e̱ni̱ e̱e̱t imma abarik ke̱e̱ni̱ todowac ki bbu̱u̱r, 28ma wo̱ye̱ ming izeto ol ne̱k abunna ko̱ moten we̱c ki tu̱r? Adita atin i̱nna̱ orog do̱o̱k zo̱ze̱ ci ol cik abunna e̱e̱ggi̱n moten we̱c ki tu̱r ko̱ niko?”
O̱bo̱de̱k zin Manyi nonno, “Ming kuruba ol cik e̱e̱ggi̱n moten tu̱r nginati, iróng atin anna kadita orog.”
29Ozozek zin Aburahami bo̱do̱k nonno dee, “Ming amuda i̱nna̱ ol moten we̱c cik abunna nginati?”
Izek zin Ta̱mu̱ta̱dde̱n nonno ne, “Okko zin zo̱ze̱ ci ol cik e̱e̱ggi̱n moten we̱c ko̱, iróng atin anna kadita orog.”
30Ize zin Aburahami ne, “Maya ming iróng Manyi abure nong, abarik ja annit kozoz. Nya atin ci ogonni i̱nna̱ ming aruba ol cik abunna e̱e̱ggi̱n moten i̱i̱yo̱ nginati?”
O̱bo̱de̱k zin Manyi nonno, “Iróng atin anna kadita orog ming karuba ol cik abunna e̱e̱ggi̱n moten i̱i̱yo̱ ko̱ nginati.”
31Ize zin Aburahami ne, “I̱yo̱ko̱ zin kinima anna zoz oroot ngati kozozike Manyi, nya atin ci a̱kku̱ ming aruba i̱nna̱ ol cik abunna e̱e̱ggi̱n moten rama nginati?”
O̱bo̱de̱k zin Ta̱mu̱ta̱dde̱n Aburaham, “Eci zo̱ze̱ ci ol cik e̱e̱ggi̱n moten rama ko̱, iróng atin anna kadita orog.”
32Kar zin Aburahami kize ne, “Maya ming iróng Manyi abure nong, abarik ja kozoz bo̱do̱k dee. Nya atin ci a̱kku̱ ming aruba i̱nna̱ ol omoto cik abunna nginati?”
O̱bo̱de̱k zin Ta̱mu̱ta̱dde̱n nonno, “Eci zo̱ze̱ ci ol cik abunna e̱e̱ggi̱n omoto ko̱, iróng atin anna kadita orog.”
33Baling edeca Manyi zoz ki Aburaham, utungek zin enne nonno lo̱o̱c, kar zin Aburahami ki̱mi̱re̱ kuk ce̱e̱za̱.
المحددات الحالية:
Kananet 18: tex
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2018, Wycliffe Bible Translators, Inc. All rights reserved.
