Kananet 12

Awu Ta̱mu̱ta̱dde̱n Aburam

1Iizek zin Manyi Aburam ne, “Tungek orog cunne lo̱o̱c, ki boor cigunnek ki olli baatunne, kar bit lo̱o̱ce̱ ci kokko atin anna ki̱ye̱le̱ki̱n.

2“Kokko atin anna kadimani i̱nne̱t ize zu̱we̱ ci a̱ddi̱ki̱re̱

kar atin ku̱mu̱yu̱wi̱n;

kanyik atin zar cigunnek ku̱bu̱lte̱,

anyahak atin i̱nna̱ ol ma̱yu̱we̱ne̱t.

3Ka̱mu̱yu̱i̱ atin anna ol cik a̱mu̱yu̱ki̱ i̱nne̱ta̱,

kar e̱e̱ti̱ ci otoryi i̱nne̱ta̱, kotori atin anna nonno bu̱k;

kar ol lo̱o̱ta̱ ngatu do̱o̱k

ku̱mu̱dda̱ atin ma̱yu̱we̱ne̱t zo̱ze̱ cunne.”

4U̱lu̱g zin Aburami ki bali a̱du̱wa̱k Manyi nonno ke̱; kar Loti kunu nonno bu̱k. Anyak ba̱li̱ye̱ Aburami e̱rki̱nya̱ moten turgerem ki tu̱r, baling utungek enne orog ci een Haran lo̱o̱c ke̱. 5Okkoye Aburami ki ngaa cinne Sarai, ki ngerrti gotononi ci een zara Lot, ovvoye ki kaal cigge̱k ki ol cik abak ki nogo o̱rge̱ ci een Haran, kar zin ku̱lu̱ge̱t koot lo̱o̱ce̱ ci een Kanaan, kar zin ku̱zu̱cca̱ ngineci.

6Owo zin Aburami zee kuzuca nginti anyak keet ci een zara Moreh ngati een Shechem. Abak ba̱li̱ye̱ olli Kanaani lo̱o̱ce̱ neci. 7I̱ye̱le̱k zin Manyi Ta̱mu̱ta̱dde̱n Aburam ele kar kizek ne, “Lo̱o̱c ci kokko atin anna kanyik dooli cik dooli cigunnek icu.” Eteehenyek zin Aburami i̱te̱le̱ ngineci kize ci Manyi bali i̱ye̱le̱k nonno ele ke̱.

8Imma zin nginati uk enne biyene o̱to̱ne̱ ci je̱e̱ni̱ o̱rge̱ ci een Bethel kar zin kidiman ti̱ti̱ cinne, aave Betheli nyigja okko Ai aave je̱e̱na̱. Eteehenyek zin enne Manyi i̱te̱le̱ kar zin kutu zare cik Manyi. 9Itinga zin bo̱do̱k Aburami uk ki lo̱o̱c ci een Negev.

Aburam ki Sarai Masire

10Anyak da̱ magiz ci a̱ddi̱ki̱re̱ lo̱o̱ce̱ neci, uluce zin Aburami orong kuk kabak lo̱o̱ce̱ ci een zara Masir arrak do̱yo̱i̱t ma̱rri̱t magiz a̱ppwa̱ oroot. 11Baling ize enne ojon ngati i̱zzo̱we̱ Masir, izek zin enne ngaa cinne Sarai ne, “Ka̱gga̱ ming e̱e̱ni̱ i̱nna̱ ngaa ci a̱zi̱zi̱ oroot. 12Ming ovvo olli Masiro acinnin, ovvo nege azi ne, ‘Een necu ngaa cinanni.’ Ovvo atin nege a̱ru̱ka̱ annita ka̱da̱u̱, kar kutungti i̱nne̱ta̱. 13Ming a̱jji̱nni̱ nege du̱wa̱k nogo izek ne e̱e̱ni̱ i̱nna̱ ngoona, kar atin nege ki̱ti̱ri̱ztta̱ annita ju̱rru̱m zo̱ze̱ cunne, kar anna kurugo.”

14Baling ovvo ciko Aburam arawa Masir, icinnet zin olli Masiro ming a̱zi̱ze̱ ngaa cinne oroot. 15Baling ovvo ol wak a̱li̱ngli̱ng ki alaan ci Masiro#12:15 Alaan ci Masiro: Awu ol alaan ci Masiro utuge ci ol cik ozoz Ingilic ko̱ azi ne Pharaoh. acin ngaa neci, u̱du̱kta̱k zin zoz cinne alaan, kar zin ol ko̱o̱tte̱ nonno ce̱e̱ze̱ ci alaano. 16I̱ti̱ri̱z alaani ci Masiro Aburam ju̱rru̱m zo̱ze̱ ci ngaa cinne, aanyik zin nonno eeza ki tiin ki zi̱gi̱re̱ cik nga̱a̱ye̱k ki cik macik, naganaget ki du̱cca̱k cik nga̱a̱ye̱k ki cik macik.

17Aanyik zin Manyi alaan ci Masiro ki ol cik ce̱e̱zu̱ do̱o̱k komorrit moriz ci gerze zo̱ze̱ ci ngaa ci Aburami, Sarai. 18Utu zin alaani ci Masiro Aburam kuk ngatinne. I̱jji̱n zin enne nonno, “Ogonika i̱nna̱ annita nya? Nya iróng i̱nna̱ a̱du̱wa̱ka̱ ming een enne ngaa cunne ko̱? 19Nya ming a̱nne̱ka̱ ne, ‘Een enne ngoonu ko̱,’ kar anna ki̱ti̱k nonno kize ngaa cinanni ko̱? I̱yo̱ko̱ zin, icu ngaa cunne. Bite nonno kar u̱lu̱ge̱t!” 20Oobek zin alaani ci Masiro ol waginnek zoz, kar ku̱du̱wa̱k nogo ki̱nya̱ma̱ni̱t Aburam ki ngaa cinne ki kaal cik anyak nege do̱o̱k.

المحددات الحالية:

Kananet 12: tex

تمييز النص

نسخ