Mose I, 1
1
Je ɔ bɔmi sane
1Sisije ɔ, benɛ Mawu bɔ hiɔwe kɛ zugba a, 2je ɔ be su pɔtɛɛ ko; e fɔɔ si gu. Diblii kpii ha muɔ voo kɛ e mi nyu babauu ɔ nya, nɛ Mawu mumi ɔ#1.2 Mawu mumi: Nɔ́ nɛ ɔ ngɛ sisi tsɔɔmi slɔɔto enyɔ. Kake ji kɔɔhiɔ nɛ nya wa, nɛ kake hu ji kɔɔhiɔ nɛ je Mawu ngɔ. ngɛ si bɔlee ngɛ nyu ɔ hɛ mi. 3#Kor II, 4.6 Kɛkɛ nɛ Mawu fa ke, “La nɛ ba”; nɛ la ba. 4Mawu na la a, nɛ la a muɔ e hɛ. Lɔ ɔ se ɔ, Mawu je la a kɛ je diblii ɔ he. 5E wo la a biɛ ke “Piani” nɛ e tsɛ diblii ɔ ke “Nyɔ.” Nɛ je jɔ, nɛ je na; nɛ e pee kekleekle ligbi.
6-7 #
Pet II, 3.5
Enɛ ɔ se ɔ, Mawu fa ke, “Nɔ́ ko nɛ ba nɛ e ba gba nyu ɔ mi enyɔ”. Nɛ e ba mi ja. Kɛkɛ nɛ Mawu pee nɔ́ ko kɛ gba nyu ɔ mi; nyu ɔ fa ba je nɔ́ ɔ sisi, nɛ fa ba je e yi mi. 8Mawu wo nɔ́ ɔ biɛ ke “Hiɔwe”. Nɛ je jɔ, nɛ je na; nɛ e pee ligbi nɛ ji enyɔ.
9Enɛ ɔ se ɔ, Mawu fa ke, “Nyu ɔ nɛ ngɛ hiɔwe ɔ sisi ɔ nɛ bua e he nya ngɛ he kake, konɛ zugba gbigbli nɛ je kpo.” Nɛ e ba mi ja. 10Mawu wo he nɛ gbli ɔ biɛ ke “Zugba”, nɛ nyu ɔ nɛ bua e he nya a, e tsɛ lɛ ke “Wo”. Mawu na, nɛ e muɔ e hɛ. 11Jehanɛ Mawu fa ke, “Tso slɔɔtoslɔɔtohi nɛ a puɛ ngɛ zugba a nɔ: tsohi nɛ woɔ ngma loo wu, kɛ ní nɛmɛ nɛ woɔ yiblii.” Nɛ e ba mi ja. 12Ba kɛ tso slɔɔtoslɔɔtohi puɛ ngɛ zugba a nɔ, eko tsuaa eko kɛ e yiblii. Mawu na ní nɛ ɔmɛ, nɛ a muɔ e hɛ. 13Nɛ je jɔ, nɛ je na; nɛ e pee ligbi nɛ ji etɛ.
14Enɛ ɔ se ɔ Mawu fa ke, “Kanehi nɛ a ba hiɔwe konɛ a kɛ na slɔɔto ngɛ piani kɛ nyɔ a kpɛti, nɛ́ a tsɔɔ jeha mi gbamihi jehahi, kɛ be nɛ a kɛ yeɔ nyami ligbihi pɔtɛɛ komɛ. 15Kane ɔmɛ nɛ a tso ngɛ hiɔwe, nɛ a la a nɛ kpɛ kɛ hyɛ zugba a nɔ.” Nɛ e ba mi ja. 16Mawu pee kane ngua enyɔ: e pee kane nɛ tsoɔ wawɛɛ pe kulaa a nɛ e ye piani nɔ, kɛ kaketsɛ ɔ hu nɛ e ye nyɔ nɔ. E pee dodoehi hulɔ. 17Mawu ngɔ kane ɔmɛ ngɔ to hiɔwe, konɛ a tso kɛ hyɛ zugba a nɔ, 18nɛ́ a ye piani kɛ nyɔ a nɔ, nɛ́ a gba la kɛ diblii a mi. Mawu na ní nɛ ɔmɛ, nɛ a muɔ e hɛ. 19Nɛ je jɔ, nɛ je na; nɛ e pee ligbi nɛ ji eywiɛ.
20Jehanɛ Mawu fa ke, “Nyu ɔ nɛ wo lo slɔɔtoslɔɔtohi babauu, nɛ́ lohwe pɛlitsɛmɛ nɛ a hi tee ngɛ hiɔwe.” 21Kɛkɛ nɛ Mawu bɔ wo mi lohwe nguanguahi, pa mi lo munomunohi, kɛ lohwe pɛlitsɛ slɔɔtoslɔɔtohi. Mawu na ní nɛ ɔmɛ, nɛ a muɔ e hɛ. 22Mawu gbaa mɛ, nɛ e de ke, “Nyɛ fɔ babauu nɛ nyɛ he nɛ hiɛ; nyɛ hyi wo ɔ mi, konɛ lohwe pɛlitsɛmɛ hu nɛ a hiɛ babauu ngɛ zugba a nɔ.” 23Nɛ je jɔ, nɛ je na; nɛ e pee ligbi nɛ ji enuɔ.
24Enɛ ɔ se ɔ, Mawu fa ke, “Lohwe slɔɔtoslɔɔtohi nɛ a ba zugba a nɔ: we mi lohwehi kɛ pu mi lohwehi, lohwe agboagbohi kɛ lohwe wawihi.” Nɛ e ba mi ja. 25Mawu bɔ lohwe tsuaa lohwe: pu mi lohwehi, we mi lohwehi, kɛ ní nɛmɛ nɛ sãã si. Mawu na ní nɛ ɔmɛ tsuo, nɛ a muɔ e hɛ.
26 #
Kor I, 11.7
Mawu de ke, “Jehanɛ lɛɛ nyɛ ha nɛ waa pee nɔmlɔ adesa; a maa hi kaa bɔ nɛ wa ngɛ ɔ, nɛ a maa je wɔ. A maa ye lo ɔmɛ, lohwe pɛlitsɛmɛ ɔmɛ, we mi lohwe ɔmɛ, pu mi lohwe ɔmɛ, kɛ ní nɛmɛ nɛ sãã si ngɛ zugba a tsuo a nɔ.” 27#Mat 19.4; Mar 10.6 Kɛkɛ nɛ Mawu bɔ nɔmlɔ, nɛ e pee lɛ kaa bɔ nɛ lɛ nitsɛ e ngɛ ɔ; e bɔ nyumu kɛ yo. #Mose I, 5.1-2 28Mawu gbaa mɛ nɛ e de mɛ ke, “Nyɛ fɔ babauu nɛ nyɛɛ hiɛ; nyɛɛ hyi zugba a nɔ tsuo, nɛ nyɛɛ ye zugba a tsuo nɔ. Nyɛɛ ye lo ɔmɛ, lohwe pɛlitsɛmɛ ɔmɛ, kɛ zugba a nɔ lohwe ɔmɛ tsuo a nɔ.” 29E ya nɔ nɛ e de ke, “I ngɔ tsohi kulaa nɛ woɔ ngma, loo wu, kɛ ní nɛmɛ nɛ woɔ yiblii ngɛ zugba a nɔ ngɔ ha nyɛ nɛ nyɛɛ ye. 30Se pu mi lohwe ɔmɛ, lohwe pɛlitsɛmɛ ɔmɛ, ní nɛmɛ nɛ sãã si ngɛ zugba a nɔ, kɛ lohwe kpa amɛ tsuo lɛɛ i ha mɛ nga nɛ a kpe, kɛ ba mumu nɛ a ye.” Nɛ e ba mi ja. 31Mawu na nɔ́ tsuaa nɔ́ nɛ e pee ɔ, nɛ a muɔ e hɛ saminya. Nɛ je jɔ, nɛ je na; nɛ e pee ligbi nɛ ji ekpa.
المحددات الحالية:
Mose I, 1: Dangme
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Bible in Dangme © Bible Society of Ghana, 2018.
