Maatteeo 6
6
Heelit pĩĩrnattiaak
1“Ĩcĩnĩt jurrung, ma hadticannu ‘thooꞌthiok ꞌcĩg abũnnaa’ hĩcĩnĩt eeta. Má ĩdĩmattu hoti, aitiõõ hatĩ Maaꞌnyu hẽẽtahujjieen hõllõngaa adũmannuunga.
2“Nẽẽthĩ, ma eellu pĩĩrnattiaak, ma haduhaaku eet, hĩcĩ adĩman oloꞌngiaaha ꞌCieethinii cĩg Laiittak hĩ ꞌgoolliohĩ, aĩ hátĩ hitingolli eeta ĩhõõggõ. Haduhaakuung dĩdĩ, ummuddia nẽẽg dũman cĩnĩĩng ẽlẽk. 3Nẽ ma eellu niig hullaha, ma haduhaaku tananga ꞌgoonogu cugguung cĩg ꞌthinneetinu, 4hátĩ ĩdĩmanit eliinit cunuung ko ꞌgõõlaa ꞌcĩ hõllõngaa acĩn eeta. Ĩnõõ ꞌcĩ hatĩ adũmannuung Maaꞌnyu ꞌcĩ acĩn thõõth ꞌcĩ adĩmanni burkiitina.”
Illimaneek Yeesu eet ꞌgõõl ꞌcĩ alaiini
(Tigiil ꞌLuuka 11:2-4)
5“Nẽ má alaiinnu, ma hattiyyu hĩ oloꞌngiaaha aag gõõng ammĩnan ngaatĩ alaiini abĩllĩ ꞌjieena ꞌCieethinii cĩg Laiittak hĩ ꞌgoolliohĩ ngadihẽẽtĩ, aĩ hátĩ hĩcĩtteet eeta. Haduhaakuung dĩdĩ, ũdũmattĩ nẽẽg ẽlẽk. 6Nẽẽthĩ, ma alayyi, duhun ꞌcieeth cunni nẽ uꞌnyuugu hattũũg, nẽẽthĩ alau Maaꞌnyu ꞌcĩ hõllõngaa edeeꞌnyia. Ĩnõõ ꞌcĩ hatĩ adũmanni Maaꞌnyu ꞌcĩ acĩn thõõth ꞌcĩ adĩmanni burkiitina.
7“Ma alayyi, ma hara halayyi hũnũũk au hĩ eeta ꞌcĩg hõllõngaa aga Nyekuc, ammuk nẽẽg aĩ athĩhĩ hatĩ Nyekuci laiinit cĩnnĩĩng, hĩnĩngĩtĩ laiinit cĩnnĩĩng ꞌcĩ uuni ho. 8Ma hattiyyu hĩ nẽẽgĩ, hĩnĩngĩtĩ aga Maaꞌnyu ꞌgii ꞌcĩ adiimmu niig nga alaac ĩnõõnnõ.
9“ꞌGõõl ꞌcĩ occa alaiinnu niig cieeni,
“ ‘Baangeet ꞌcĩ aaĩ hẽẽtahujjieen,
hubulli ꞌthaara cugunnig,
10hikia habuccieet cunnẽẽnĩ,
hĩdĩmanĩ tabiiniti cunni
loota hĩcĩ adĩmanni hẽẽtahujjieen.
11Anyeet ngagĩĩt iyyieni, ꞌgẽẽn cĩ kõr nicci.
12Tamaatĩheet ngagĩĩt, hĩnĩngĩtĩ ꞌthẽccanẽẽt cĩggaang,
hĩcĩ hammaannĩka naag eet ꞌcĩg adĩmanneet ngagĩĩt ꞌbuth.
13Ma haaꞌnyeet ngagĩĩt hĩttĩmaneet ꞌThĩttaanĩ,
nẽẽthĩ, õgaaeet ngagĩĩt ꞌtĩmmaniittaa cĩ ꞌThĩttaanõ.’
14Má ammaanniku niig eet ꞌcĩg adĩmannuung ngagiit ꞌbuth, ammaannĩk hatĩ ngagiit buúk Maaꞌnyu ꞌcĩ aaĩ hẽẽtahujjieen, ꞌthẽccanẽẽt cugguung. 15Nẽẽthĩ, má hõllõngaa ammaanniku niig ꞌthẽccanẽẽt cĩg eet ꞌcĩg adĩmannuung ngagiit ꞌbuth, aitiõõ hatĩ Maaꞌnyu hõllõngaa ammaannikuung ngagiit buúk, ꞌthẽccanẽẽt cugguung.”
Alliman Yeesu ꞌgõõl ꞌcĩ hẽdẽtaanĩ eleeti ꞌgẽẽna
16“Ma ẽdẽtaannu niig eleeti ꞌgẽẽna, ma haaꞌnyiku muumti cugguung huꞌngurruunyti hĩ oloꞌngiaaha aag gõõng eterꞌtheek eet aĩ, hẽdẽtaanna eleeti ꞌgẽẽna. Haduhaakuung dĩdĩ, ummuddia nẽẽg dũman cĩnĩĩng ẽlẽk. 17Ma ẽdẽtaannu eleeti ꞌgẽẽna, ũtũũnyĩt muumti cugguung, arraacit ĩma nẽ uuddieu thõng, 18hátĩ hiittiõõ hõllõngaa aga eeta aĩ ẽdẽtaannu eleeti ꞌgẽẽna, acĩn Maaꞌnyu thõõth ꞌcĩ adĩmannu burkiitina nẽ hatĩ ũdũmanuunga.”
Baliinit ꞌcĩ aaĩ hẽẽtahujjieen
(Tigiil ꞌLuuka 12:33-34)
19“Ma hitiangiꞌthu baliinit cunuung loota nĩnga, ngaatĩ aduhẽẽkĩ hurubo hĩ hẽlẽggĩ ꞌcĩg aaꞌnyĩk ꞌthĩĩk hohonooꞌthi, hĩ ngaatĩ avvahanĩ igorriaaha ꞌcieethi nẽ igorithita. 20Aarrik baliinit cunuung hẽẽtahujjieen, ngaatĩ hõllõngaa aduhẽẽkĩ hurubo hĩ ngaatĩ hõllõngaa ohonoothini ꞌthĩĩha, hĩ ngaatĩ hõllõngaa avvahanĩ igorriaaha ꞌcieeth nẽ igorithita. 21Hĩnĩngĩtĩ aaĩ ꞌthĩnĩt cunni ngaatĩ aayyi baliiniti cunnẽẽnĩ.”
Lanyit ẽllaa cĩ eeto
(Tigiil ꞌLuuka 11:34-36)
22“Ĩĩn hẽbẽrẽẽcĩ lanyit cĩ ello. Má abũnnaa hẽbẽrĩ cugunnẽẽgĩ, abbĩꞌthĩĩ hatĩ lanyit ẽlẽ cunni vẽlẽk. 23Nẽẽthĩ, má rubettĩg nganiit hẽbẽrĩ, abbĩꞌthĩĩ hatĩ muguuri ẽlẽ cunni vẽlẽk. Nẽ má ĩĩn lanyit ꞌcĩ ammuhi nii aini aaĩ ẽllaa cunni ho muguur, ĩĩn occa hinnia muguuri ẽllaa cunni hutuno?”
Nyekuc hĩ ꞌrabbẽẽt
(Tigiil ꞌLuuka 16:13)
24“Aitiõõ ẽẽtĩ ꞌcĩ occa adticanoothĩk makayyiook ꞌramma tõõ! Ma adĩman noho, occa hinnia hatĩ aaburreek makayyioohit umwa nẽ ĩmmĩnan umwa, hode occa hinnia hatĩ adticanoothĩk makayyioohit hõdẽẽthõng nẽ aabureek umwa. Aitiõõ niig hõllõngaa occa adticanoothiku Nyekuc hĩ ꞌrabbẽẽt hõdẽĩ.”
Ma haaꞌnyiku ꞌthinneeti hupuppudit
(Tigiil ꞌLuuka 12:22-31)
25“Nẽẽthĩ, haduhaakuunga, ma hapuppuddu, hĩnĩngĩtĩ rũgẽt cunuung, hode hĩnĩngĩtĩ ꞌgii ꞌcĩ hatĩ adaku hĩ ꞌcĩ ahuddu, hĩ ceremwa ꞌcĩg ahimittu. Hõllõngaa nooyyia aaddi rũgẽtĩ hĩllõõan ꞌgẽẽn nẽ ĩllõõan ẽlẽ ceremwa? 26Ĩcĩnĩt nõõ hĩbaallĩ cĩg hẽẽtkujjieen, hõllõngaa akannĩ nẽẽgĩ hode ajanni, hode aꞌnyak ĩragẽẽt cĩg haalu nẽ aalla irohĩt Maaꞌnyu cĩ hẽẽtkujjieen ĩhõõggõ noho. Hõllõngaa nooyyia ĩllõõannu niig hĩbaallĩ?
27“Nganĩ hõrggẽẽnaa cunuung ꞌcĩ occa ĩttõõrĩkĩ hayũngĩ kõr hõdẽẽthõng rũgẽtaa cĩnnĩ? 28Inni ahayũngattĩ niig, hĩnĩngĩtĩ ceremwa haaga ho? Ĩcĩnĩt nõõ ꞌgõõl ꞌcĩ alĩꞌthĩ nyetturi cĩg moru, aitiõõ nẽẽg hõllõngaa adticanni hode ẽhẽnyta ceremwa. 29Tananga ꞌThõlõmõõnẽ baliittaa cĩnnĩ vẽlẽk, nga hitihimi haau hĩ nyetturi cieegi. 30Aaꞌnyĩk Nyekuci ꞌlẽẽmĩth ꞌcĩ aaĩ noho ho artĩ vẽlẽk ꞌcĩg alĩꞌtha mõrõtõõ, tananga aaĩ kõr nicci, ma lohotha udhuhoothĩk ꞌgwoyyiatõõ. Adĩmaneekuung ꞌthẽk hatĩ Nyekuci ngagiit hẽlẽggĩ ꞌcĩg mẽẽlĩg! Inni ꞌthẽk aꞌnyahit lemiinit ꞌcĩ hidici haaga ho?
31“Ma hahayũnganiinnu nẽ ijittu eleeti iittu, ‘Hammũda occa hatĩ ꞌgii ꞌcĩ hadak ĩĩna?’ Hode ‘Hattiha occa hatĩ ꞌgii ꞌcĩ hahũd ngaana?’ Hode ‘Hammũda occa ꞌthẽk hatĩ ceremwa ꞌcĩg hahimit ĩĩna?’ 32Eet ꞌcĩg hõllõngaa aga Nyekuc diooni, ꞌcĩg aꞌnyak muhẽẽnĩt ꞌcĩ aaĩ nohota. Aga Maaꞌnyu cĩ hẽẽtkujjieen ngaatĩ adiimmu niig hẽlẽggĩ iccig vẽlẽk. 33Nẽẽthĩ, hẽlẽggẽẽnnĩĩ cĩg vẽlẽk, idiimit nõõ habuccieet cĩ Nyekuci hĩ thõõth cĩnnĩ ꞌcĩ aũlan ĩĩcĩ oou. Nẽẽthĩ hatĩ aaꞌnyuung hẽlẽggĩ vẽlẽk ꞌcĩg adiimmu niiga.
34“Ma hapuppuddu, hĩnĩngĩtĩ waathĩn cĩ lohotha. Agawa hatĩ kõrra cĩ lohotha ꞌgõõl cĩnnĩ ẽmmẽn. Hĩnĩngĩtĩ waathĩnĩ ma aaĩ ho, aꞌnyak pĩĩrnanĩt cĩnnĩ ꞌcĩ ẽllẽẽnnõõ.”
المحددات الحالية:
Maatteeo 6: did
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2017, Wycliffe Bible Translators, Inc., All rights reserved.
