Génesis 40
40
José uikuaaka mokui pau rewa
1-2Pëti ara mokui kuimbae uyeyokui mburuwicha wasu Egipto pewa pe wae uyawɨ reta iya kotɨ. Mburuwicha wasu pe vino umeeñoi wae jare mburuwicha wasu pe mbɨyape uyapo wae reta itenondewa ombopochɨ iya mburuwicha wasu. Jayawe mburuwicha wasu pochɨete jokua mokui reta pe. 3Jáeramo wɨraaka reta isɨndaro reta itenondewa Potifar#40.3 Potifar ko jae owa José uyeyokui chupe waerä. Emɨngeta Génesis 39.1 pe. Jare jae ko mburuwicha wasu iperesorɨru iyandarekoa imburuwicha wi. pe oñonoka waerä peresorɨru pe. Jokua peresorɨru pe oï wi José. 4Jayawe Potifar oyokui José uyandareko waerä jese reta. Jare ɨma katu rupi upɨta reta joko pe.
5Pëti pɨ̈tu jokua mokui mburuwicha wasu pe uyeyokui wae reta upau reta. Jare pëti pëti ipau reta ime wɨreko mbae uipota jei iko wae.
6Pɨarewe ndimbowe José uecha ipɨatɨtɨ ñonoï wae. 7Jayawe upɨrandu chupe reta: “¿Maera pa pepɨatɨtɨ peï kua ndimbowe?” jei chupe reta.
8Jayawe jae reta jei chupe: “Ore ndupau pɨare, jare nduipota tëi nduikuaa orepau rewa. Erëi kua pe mbaetɨ kiawe uikuaaka waerä orewe,” jei reta chupe.
Jayawe José jei chupe reta: “Pemiäri chewe pepau wae, echa’ä Tumpaño ko uikuaaka yandewe yandepau uipota jei wae. Jare Tumpa uikuaakata chewe pepau rewa,” jei chupe reta.
9Jayawe mburuwicha wasu pe vino umeeñoi wae imiäri José pe ipau rewa jare jei chupe: “Chepau pe aecha pëti uva iyɨpɨ oï cherowai,” jei. 10“Jare jokua uva iyɨpɨ re ñonoï mbapɨ jäka reta. Aramoiño umbɨpɨ jeñɨ jare ipotɨ, jare ɨmambaeño yawɨye,” jei. 11“Jare chepo pe ime anoi mburuwicha wasu icopa, jare aipoo uva ía jare aitami copa pe. Jayawe amee copa mburuwicha wasu pe,” jei imiäri José pe.
12Jayawe José jei chupe: “Kua ko jae ndepau uipota jei wae: Jokua mbapɨ jäka wae reta uyembɨjaanga mbapɨ ara reta re,” jei. 13“Jáeramo kua wi mbapɨ ara pe, mburuwicha wasu nerenoekata oï kua wi jare umee yeta ndewe ndiyeyokui ye waerä chupe. Nemee yeta neï mburuwicha wasu pe vino icopa pe tenonde ndiyapose wae rami,” jei chupe.
14Jare José jei wi chupe: “Erëi nemandúa mii cheré kuri ikawi ma neï ye yawe,” jei chupe. “Tayerowia mii nderé. Emɨmbeu mburuwicha wasu pe che rewa, cherenoeka waerä kua peresorɨru wi. 15Echa’ä chereru reta aipota mbae rewe cheɨwɨ wi, hebreo reta iɨwɨ wi. Jare añawe kua peresorɨru pe aï ayapo’ä mbae ikawi mbae rewe,” jei José chupe.
16Uyandu yawe José uikuaaka mbae ikawi wae jokua ïru pe, mburuwicha wasu pe mbɨyape uyapo wae reta itenondewa uñemɨkɨrëɨ jare imiäri wi José pe ipau rewa. Jare jei chupe: “Che apau wi. Chepau pe aecha chäka iáramo ñonoï mbapɨ canasta reta,” jei. 17“Jare canasta iaramoete oï wae tɨnee oï opa yea mbɨyape mburuwicha wasu uyúe wae. Erëi wɨra reta yuweru jou jokua canasta chäka iáramo oï wae wi,” jei José pe.
18Jayawe José jei chupe: “Kua ko jae ndepau uipota jei wae: jokua mbapɨ canasta reta uyembɨjaanga mbapɨ ara reta re,” jei. 19“Jáeramo kua wi mbapɨ ara pe, mburuwicha wasu nerenoekata oï kua wi jare kɨsepuku pe ndayumondookata. Jare nderetekue uesɨ̈rokata pëti ɨwɨra re. Jare joko wi uruwɨ reta yuweruta jou ndewi nderetekue,” jei José chupe.
20Joko wi mbapɨ ara pe, mburuwicha wasu iara uwäe. Jayawe jae uyapo arete opaete chupe uyeyokui wae reta itenondewa reta ndiwe. Jare arete uyapo iko rambuewe, onoeka peresorɨru wi mburuwicha wasu pe vino umeeñoi wae jare mbɨyape uyapo chupe wae reta itenondewa, jare ueruruka opaete arete pe ñonoï wae reta jowai. 21Jayawe mburuwicha wasu umee ye mbarawɨkɨ vino umeeñoi chupe wae pe. Jukuärái ipuere umee ye vino chupe icopa pe. 22Erëi uyayumondooka kɨsepuku pe mbɨyape uyapo wae reta itenondewa, jare jetekue uesɨ̈roka ɨwɨra pe kërái José uikuaaka chupe wae rami ipau rewa.
23Erëi mburuwicha wasu pe vino umeeñoi wae iñakañɨ José wi jare umɨmbeu’ä mburuwicha wasu pe jesewa.
المحددات الحالية:
Génesis 40: gnwPB
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2017, Ethnos360 (New Tribes Mission). All rights reserved.
