Génesis 39

José jare Potifar jembireko rewa

1Jokua Ismael iñemoñaa reta wɨraa uruwäe yawe José ɨwɨ Egipto pe, mburuwicha wasu#39.1 Jae reta jei mburuwicha wasu Egipto pewa pe “Faraón.” Kua yandeɨwɨ Bolivia pe yae chupe “Presidente.” isɨndaro reta itenondewa, Potifar jee wae, owa yuapɨ ye chuwi reta uyeyokui chupe waerä.

2Erëi Tumpa iko José ndiwe jare omborɨ. Jáeramo opaete José iparawɨkɨ uyapo iya jëta pe wae ikawiete. 3Ɨmambaeño iya uecha kërái Tumpa iko José ndiwe, jare kërái opaete José uyapo wae ikawiete ko, echa’ä Tumpa omborɨ iko José ramo. 4Jáeramo Potifar uyerowia umae José re. Jayawe oñono José iko waerä imborɨarä, jare jukuärái oñono ipo pe opaete imbaembae jëta pe oï wae.

5Jokua ara wiwe Tumpa umbɨpɨ umbɨyekou kawi opaete Potifar imbaembae reta José jeko pewa. Opaete mbarawɨkɨ reta Potifar jëta rupi oï wae ikawiete iko. Jare iko reta pe yawɨye kawiete temitɨ reta, jare jɨmba reta uñemoña kawiete wi.

6-7Potifar uikuaa José uyandareko kawi opaete imbaembae reta re. Jáeramo uyembɨpɨa’ä mbae re awe, jaeño mbae nunga tembiu jouta oï wae re.

Erëi jae jembireko uecha José taurusuete jare maepöra. Jáeramo ipɨa pe uipotaete umae jese. Jayawe pëti ara jae jei José pe: “Eke che ndiwe,” jei chupe.

8Erëi José jei kuña pe: “¡Aipota’ä!” jei. “Mase, cheya uyembɨpɨa’ä mbae re awe, echa’ä oñono chepo pe opaete imbaembae reta,” jei. 9“Cheya umee chewe mbaepuere opaete ïru uyeyokui chupe wae reta re jare opaetei imbaembae reta re. Umbɨete’ä chewe mbae awe – jaeño nde, echa’ä nde ko jae jembireko ramo. Aipota’ä etei ayapo kua mbae kachi wae, echa’ä kua mbae kachi wae rupi ayawɨta Tumpa kotɨ etei,” jei José kuña pe.

10Jare opa ara rupi kuña jekuaeño jei chupe: “Eke che ndiwe,” jei. Erëi José uyapɨsaka’ä jese jare uipota’ä etei iko jae ndiwe.

11Pëti ara, mbaetɨ ïru uyeyokui wae reta ñonoï iya jëta pe rambuewe, José uike oo pe uyapo waerä iparawɨkɨ. Jaeño iya jembireko oï jëta pe. 12Jayawe kuña ou uipɨsɨ José jemimonde wi, jare jei ye chupe: “Eke che ndiwe,” jei. Erëi José uipota’ä. Jare kuña uipɨsɨ jare opoi’ä José jemimonde wi. Jáeramo José ueya jemimonde kuña ipo pe jare oë osi oo oka pe chuwi.

13-14Jayawe kuña uecha yawe José osi oë oo chuwi oka kotɨ jare ueya jemimonde ipo pe wae, ueni ïru ime pe uyeyokui wae reta jare jei chupe reta: “¡Mase! Cheme ueru yandewe pëti kuimbae hebreo#39.13-14 Hebreo reta ko jae Israel iñemoñaa reta. ambɨe ɨwɨ pewa, erëi jae yandeyoyai oï,” jei. “Jae uike ou che aï wae pe, jare uipota tëi chepɨsɨ. Erëi che täta cheräse,” jei. 15“Jare cheräse yawe, jae ukɨye jare oë osi kua wi oka pe,” jei. “Mase, kua pe ueya jemimonde cheyɨpɨ pe,” jei chupe reta.

16-17Jayawe kuña uyandareko José jemimonde re ime ou ye rewa. Jare ime ou uwäe jëta pe yawe, jembireko imiäri chupe ïru wae reta pe imiäri rami kuärái: “Jokua hebreo uyeyokui ndewe wae nderu ñanerëta pe wae uike ou che aï wae pe jare uipota chepɨsɨ,” jei. 18“Erëi che täta cheräse yawe, jae oë osi kua wi oka pe jare ueya kua pe jemimonde.” Jukuärái imiäri ime pe.

19Jayawe José iya uyandu yawe jembireko jei chupe wae opaete kua teko rewa, pochɨete José kotɨ. 20Jáeramo uipɨsɨka José jare oñonoka woi peresorɨru pe, mburuwicha wasu ipereso reta ñonoï wae pe.

Jukuärái peresorɨru pe iko José. 21Erëi Tumpa jekuaeño iko José ndiwe jare ipɨakawi chupe. Jáeramo uyapo peresorɨru iyandarekoa umae kawi waerä jese. 22Jáeramo peresorɨru iyandarekoa umee José pe uyandareko waerä opaete peresorɨru pe ñonoï wae reta re. 23Joko wiwe peresorɨru iyandarekoa uyembɨpɨa’ä mbae re awe peresorɨru pe, echa’ä Tumpa omborɨ José uyandareko kawi waerä opaete re. Tumpa iko jae ndiwe; jáeramo opaete José uyapo wae ikawiete ko.

المحددات الحالية:

Génesis 39: gnwPB

تمييز النص

نسخ