Chivkeeb 3
3
Noobneej Tsi Nooglug
1Naab yog tug tsaj kws ntse tshaaj txhua yaam tsaj qus kws tug TSWV kws yog Vaajtswv tau tsim lug. Naab txhaj nug tug quaspuj has tas, “Vaajtswv yeej txwv kuas meb tsi xob noj txhua yaam txivntoo kws nyob huv lub vaaj nuav tag lov?” #Tshwm 12:9; 20:2
2Tug quaspuj teb tas, “Wb yeej noj tau txhua yaam txivntoo kws nyob huv lub vaaj nuav, 3tsuas tshwj tsob kws nyob huv plawv vaaj xwb txhaj noj tsi tau. Vaajtswv yeej txwv tsi pub wb noj lossis kov tej txiv ntawd le; yog wb noj, wb yuav tuag.”
4Naab txawm has rua tug quaspuj has tas, “Tej ntawd tsi muaj tseeb, meb yeej yuav tsi tuag. 5Vaajtswv has le ntawd, ruaqhov Nwg paub tas thaus twg kws meb noj tsob txiv ntawd, tes meb qhovmuag yuav pumkev, hab meb yuav zoole Vaajtswv,#3:5: Vaajtswv; lossis tej nyuas vaajtswv. yuav paub qhov zoo hab qhov phem.”#3:5: paub qhov zoo hab qhov phem; lossis paub txhua yaam.
6Tug quaspuj pum tas tsob ntoo ntawd zoonkauj hab tej txiv ntxim qaab kawg le, hab nwg xaav tas tej txivntoo ntawd tseem yuav ua rua nwg ntse ntxiv hab. Tes nwg txawm moog dle ib cov lug noj hab nwg kuj muab rua nwg tug quasyawg kws nrug nwg nyob ntawd noj hab. 7Thaus obtug noj taagnrho xwb, obtug ob lub qhovmuag txawm qheb tuaj hab paub tas obtug labqaab; yogle ntawd obtug txhaj moog dle nplooj txiv ncuavpas lug xaws naav npug obtug lub cev.
8Thaus yuav tsausntuj kws muaj cua tuaj txag zag, obtug nov tug TSWV kws yog Vaajtswv moog kev huv lub vaaj, obtug txhaj tsiv moog nkaum rua huv cov ntoo kuas tug TSWV kws yog Vaajtswv tsi xob pum. 9Tabsis tug TSWV kws yog Vaajtswv tau hu tug txivneej has tas, “Koj nyob qhovtwg?”
10Nwg teb tas, “Kuv nov Koj moog kev huv lub vaaj, kuv ntshai kuv txhaj tsiv moog nkaum lawm, ruaqhov kuv labqaab.”
11Vaajtswv nug has tas, “Leejtwg has rua koj tas koj labqaab? Puas yog koj noj tsob txivntoo kws Kuv xaaj tsi pub koj noj ntawd lawm?”
12Tug txivneej teb tas, “Tug quaspuj kws Koj muab rua kuv ntawd yog tug muab cov txivntoo lug rua kuv noj, kuv txhajle tau noj lawm.”
13Tug TSWV kws yog Vaajtswv nug tug quaspuj has tas, “Uacaag koj txhaj ua le ntawd?”
Nwg teb tas, “Naab ntxag kuv, es kuv txhajle noj.” #2Klt 11:3; 1Tim 2:14
Vaajtswv Qha Txug Kev Txavtxim
14Tug TSWV kws yog Vaajtswv txhaj has rua naab has tas, “Taagnrho txhua yaam tsaj huv tuabsi, koj yog tug kws raug lulug foom phem vim koj dlaag tug quaspuj nuav; txij nubnua moog, koj yuav ndlaug ntawm koj lub plaab hab yuav noj moov aav moog taag koj simneej. 15Kuv yuav ua kuas koj hab tug quaspuj nuav sisntxub; koj caajceg hab nwg caajceg yuav ua yeebncuab moog le. Nwg tug xeebntxwv yuav tsoo koj taubhau kuas ntsoog, hab koj yuav tum tug xeebntxwv#3:15: xeebntxwv; lossis puab. ntawd lub laujtaws.”
16Vaajtswv has rua tug quaspuj tas, “Kuv yuav tsub teebmeem ntau heev rua koj thaus koj suab mivnyuas hab thaus koj yug mivnyuas yuav mob koj heev. Txawm le ntawd los koj txuj kev ntshaw yeej tseem yog rua koj tug quasyawg, hab nwg yuav ua tug tswjfwm koj.”
17Vaajtswv has rua Adaas has tas, “Vim koj noog koj tug quaspuj lug hab noj cov txiv ntawm tsob ntoo kws Kuv tau xaaj tsi pub koj noj. Vim koj tau ua le ntawd aav txhaj raug foom phem. Koj yuav tau siv zug khwv moog taag simneej mas koj txhaj yuav muaj noj muaj haus. 18Aav yuav tuaj nroj hab tuaj xuavpaug, hab koj yuav tau dle tej nrojtsuag lug ua zaub noj. #Henpl 6:8 19Koj yuav siv zug khwv txug lub fws nrug mas koj txhaj muaj noj muaj haus moog txug thaus koj rov moog rua huv cov aav kws siv lug puab koj. Koj yog tsim lug ntawm aav, tes koj yuav tau rov moog ua aav.”
20Adaas#3:20: Adaas: Lulug nuav lug Henplais txhais has tas “txhua tsaav tuabneeg.” tis nwg tug quaspuj npe hu ua Evas,#3:20: Evas: Lub npe nuav has muaj ntsiv thooj le lulug Henplais kws has tas “muaj sa nyob,” kws txhais has tas yog “nplajteb tuabneeg.” ruaqhov nwg yog txhua tsaav tuabneeg leejnam. 21Tug TSWV kws yog Vaajtswv txawm muab tawv tsaj lug ua tsoogtsho rua Adaas hab nwg tug quaspuj obtug naav.
Adaas Hab Evas Raug Ntab Tawm Huv Lub Vaaj Edees
22Tug TSWV kws yog Vaajtswv has tas, “Nwgnuav tug txivneej nuav zoole peb lawm hab nwg paub qhov phem hab qhov zoo.#3:22: paub qhov phem hab qhov zoo; lossis paub txhua yaam. Yuav tsi pub nwg moog dle tsob txivntoo kws muaj txujsa lug noj, es muaj sa nyob moog ibtxhis.” #Tshwm 22:14 23Yogle ntawd, Tug TSWV kws yog Vaajtswv txhaj ntab nwg tawm huv lub Vaaj Edees hab kuas nwg moog khawb aav ua noj ua haus ntawm dlaim aav kws tau muab lug puab nwg. 24Thaus Vaajtswv muab nwg ntab tawm lawm, Vaajtswv tso ib cov khelunpees#3:24: khelunpees: Tej phoo sau has tas cov kws cajsa; Saib Cov Lug Txhais kws teev rua tomqaab. hab muaj ib raab ntaaj nplaimtawg kws tig tau rua txhua phaab lug zuv lub Vaaj Edees saab nubtuaj, tsi pub leejtwg moog tau ze rua ntawm tsob txivntoo kws ua rua muaj txujsa.
المحددات الحالية:
Chivkeeb 3: HNJ2022
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2022 United Bible Societies. All rights reserved.
