Matayu 14

Yesu Wane Ra More Herotŋo Rake. Eŋe Yohane Doku Tau Tauŋo Wisikae Wiyeke

1Naso yewao Herot, Galili wane ŋei waom eŋe Yesu wane don kisi detke. 2Paki ketkele koune edane rake, “Eŋe yemo welekatne Yohane Doku Tau Tau, oŋo koso wisikae wiye more, zinge sarimaike. Yalinane zonom togogole iwaŋo eŋane kutno waki masi togolerop urata mamaike.”

3Herot eŋe raki Yohane malipka more, meteretkine wokomgeu paki, mulap urumgo birakakoi, eŋe eya okankake yemo iwa yale, Herotŋo eŋine ŋole Pilip wane ŋanomine ŋerep eya kobu make, ŋerep eya wane eŋetine Herodiyas. Yohaneŋo Herot ŋanominane ra more don okankake. 4Yohane Doku Tau Tau eŋe tako rakot Herot olale rake, “Ge ŋerep iwa mamaine, eyamo mi menaŋmaike!” 5Herot eŋe Yohane qeyakane okange, ŋo siluŋ eŋe Yuda ŋei eŋane kaetkake, onoka wane Yuda ŋei eŋe Yohane wane propet mane rakoi, eya wane.

6Herot wane wako wakon nasoino ŋei natne eŋe ŋara nekei wane weneŋ sari metkoi, ŋanomine Herodiyas wane borasine eŋe Herot wane lewet ŋei eŋane kaitko lawam tanik worikoken eŋet oreke. Oreki Herotŋo kaki siminkake. 7Paki eŋe ra togole olale rake, “Na qeliwo more ra togolemaile, ge kine kine mane wane gangi, ranom na baŋ ginikale!”

8Eso nagaine eŋe wetko ket okangi borasine eŋe rake, “Ge Yohane Doku Tau Tau wane lewine iwaka peletko more ninnom kawe.”

9Yale raki Herot eŋe detki zok umareke, ŋo eŋe siluŋ done dere tewekke onoka wane ŋo eŋe mo ŋei suwaine kimakoune eŋane kaiteno okora weti qeliwo raki paki don ra togoleke, eya wane detki qekaki, siluŋ ŋerep eŋine so borasine erane donetne dere aŋaetne teweke, qelit ŋeikoune raongi arikoi. 10Ari Yohane mulap urumgo ebine kitatkoi. 11Kitareso, lewine peletko more ma sariu, ŋerep yewa mangoi, pakiso oŋo ma more nagainano ma arike. 12Yohane dokoine eŋe sari pareŋine ma ari dukkakoi, paki eŋe ari Yesu donkisi olatkoi.

Yesuŋo Ŋei Ŋerep 5,000 Ŋara Gumeonge

13Yesu eŋe don kisi eya detki paki, mat eya qelige seki maneo waso sai maneo eŋineka geyakane arike. Ŋei ŋerep eŋe don kisiine yale detpi paki, ket matene qelige more, kepoka ŋadino esopka arikoi. 14Yesu eŋe seki kutno ŋine ketki paki, ŋei ŋerep magu suwaine yewa one more, eŋane wetine boriki zomaene maki menaŋgoi.

15Kepe ketki rarapko, dokoine eŋe eŋano sari olale rakoi, “Kepe ketki naso mo qeyaumaike, so iwa yemo sai togole. Ge ra onnom, ŋei ŋerep eŋe ariu, me bira onnom, matko matko ari edomka ŋara kakiyene qoleu.”

16Yesuŋo edane rake, “Eŋe maine mi arikei, ŋine ŋidom kine kine mane ka more ebonbi neu.”

17Edangi eŋe rakoi, “Ŋene ŋara korop mi ma gemaine, yemo kasap mete mane so zawon etke.”

18Yesuŋo rake. “Eya iwa naŋano ma sariu.” 19Eŋe ra ongi rau, ŋei ŋerep eŋe tomok zikotne tola kutno ket dara wuruk pese met warekoi, pakiso eŋe kasap mete mane so zawon etke maki paki, qeliwo deine potki waki, Kaisale bakomine kitoke. Eŋe kasap mapokki waki, dokoine ebongiso, edo damo qe ŋei ŋerep ebon-warekoi. 20Ŋei ŋerep eŋe korop neu ŋatene qewareke, pakiso dokoine eŋe kasap so zawon natne wouwene suwaki qeligeu metke, yewa mau ket kela 12 watkeke. 21Ŋeiwa ŋara nekoi, eŋane zale ene 5,000. Ŋerep so medep natne yemo mi dapot-ongoi.

Yesuŋo Namuŋ Kutno Gesoke Arike

22Pakiso Yesu eŋe dokoine ebuki, seki koto wau paki, edo lewine alakane matko namuŋ kitare arikoi, ariuso Yesu eŋine yemo ŋei ŋerep eya qebin-ongi mateno ariwarekoi. 23Qebin-ongi, ŋei ŋerep ariwareu, eya wane ŋadino eŋe meŋo maneo eŋineka wa more meŋenkake. Ruwo kereyakane okangiso, Yesu eŋe eŋineka eya meŋo geke. 24Naso yewao seki mo doku namuŋ wisino ariki, dibomŋo mawa maket main qein make, onoka waneŋo yemo momo suwaine zok manerop qeke, eya wane.

25Naso 3 kilok so 4 kilok erane keuetno sakoka, Yesu eŋe dokoine eŋano doku kutnoka gesoke ariki. 26Dokoine eŋe kau doku kutno gesoke sariki kakak kakoi, paki eŋe kaet-ongi aroke rakoi, “Iwa mo osoŋa mane!”

27Yale okanbi, Yesuŋo esatka edane more rake, “Togoleu! Iwamo noŋo, misuk kaet-ŋungep!”

28Rakiso Petoroŋo rake, “Waom, iwa welekatne goŋo, yemo ranom na saket uwe paki, doku kutno gesoka geŋano sariwe.”

29Raki Yesuŋo olatke, “Sarinom!” Eso Petoro eŋe sekiwo ŋine saket more, kiyeke doku kutno gesoke Yesu wano arike. 30Eŋe ariki momo suwaine qeki detki paki, eyaka kaetkake, pakiso eyaka wetine qorodoŋgi doku koto qorodoge ketke, paki boka rake. “Waom, neunom!”

31Rakiso, eyaka Yesuŋo biraki ketki metino maki paki rake, “Ge mali malipŋone nigagatne magemaine! Ge onoka wane wet etkeka okanmaine?” 32Pakiso ere eretnarek seki koto waketpikso, momo mo eyaka doŋ mange. 33Dokoine eŋe seki koto mere umi qe Yesu bakomine kito mawaka rakoi, “Welekatne, ge Kaisale wane Gipole!”

Yesuŋo Ŋei Zomaenerop Genesaret Eyao Ebuki Menaŋgoi

34Eŋe doku namuŋ yuwane more, sari Genesaret eya kepo ketkoi. 35Yewao ŋei ŋerep eŋe Yesu mo detkakoi, eso eŋe mo eya don motpi zoma ŋei eŋane mat loli lolik korop ariwareki ebu peikone, Yesu wano sarikoi. 36Eŋe Yesuŋo detongi, zoma ŋei eŋe takotine mezene eyaka uwakau paki, zomaene menaŋ-oniyakane ra olatkoi, pakiso eŋe detongi, takotine mezeno uwakakoi, eŋe korop, eya wane rokop okane more menaŋ-warekoi.

المحددات الحالية:

Matayu 14: onsNT

تمييز النص

نسخ