Ruka 2

Yesu medac fingerec

Mat 1:18-25

1-2Kwiriniungo Siria bangecac gawana kefec, naso imohai Roma bangecac ngictau Sisa Agustongo bangeha bangeha kpacarengngina mengeregecdeac yoac faiu kendarec. Nga imocngo osokporeng hanac hanahea anec. 3Ifi anu ngicngac sasawango kpacarengngina mengeregecdeac taongngina fekenec, imocacsoc kendacgec. 4Yosefe ye Dawidiac kisicfunac, imocac amma yeng Gariraia provinsiunac erema Nadzarete wama Yudaia provinsiu Dawidiac taongbisic kpara Betereheng, ihai kenec. 5Nga enembingeha Maria ye hereagoc anu yegoc yerahafoc kpacngira kpacarennu ohogecdeac kenoc. 6Yeri ihai kecmaec sabacac fingec fingecnaso haec. 7Anu yeri amatatacfu titinga mong mi feecac yeri ngadeau tacmaec morocmedacngira fingeru Mariango sangohoma ramaburumaka otou ihai faiu keema feec.

Angero nga ramagareng

8Anu toforecfu ramagareng goa yeni Betereheng ama wegenacfu ramafocngina garengyunuma kecgec. 9Kecmagec Kebuac angero mongngo fingecyemmeu Kebuac kibikperagitoayango mekperagiyunuu yeni kengec ebiria anggec. 10-11Ifi anggec yeng edeyunuec, “Ngeni kengec mi anggec. Imoc yofiac, yaguc yombong ngeneac amma Dawidiac taonnu Messia Kebungina fingecdac, ye ebicnginaunac mesingunuude. Nga ngicngac sasawa yeac amma ebiriangoc sogaigecde, ni siduc gombung imoc dekperagingemmeduae. 12Sabac ye merac imoc negenggecdeac ma yomoc ngemmebade, ngeni kemma ramaburumaka otou sabac mong kporucngo birac biranggea feu meficgegecde.” 13Ye ifi demanu imohaingoc kurumenggac angerohabu kuneng, yeneng fingecma yegoc namma Anutu dengerema yofi degec, 14#Ruk 19:38“Anutu ohec, wi kurumennu febeso nga bangecfu ruae fingecbeso. Anutungo ngicngac wosoefac ayemmede.”

15Ifi dema angero yeni kurumennu dzigenema enggec ramagareng yeni yenaocngoc denegeng amma degec, “Betereheng taonnu faka fingeru Kebungo edenunudac, imoc bic kemma henni.” 16Ifi dema yeni bic kemma Maria nga Yosefe amma sabac oto manau feec, yeni meficyunuma yenenggec. 17Yenemma angerongo sabac yeac yoac deecmoc, imoc edeyunugec negendacgec. 18Nga ramagareng yeneng siduc anggec nga ngicngac imoc negenggec, yeni kerectegec andacgec. 19#Ruk 2:51Mariango ine faka fingechaec, imoc hereau faima negensima kefec. 20Nga angerongo yoac ramagareng edeyunuec, yeni imoc sasawa fora hemma negemma dzigenema Anutu afec afehe kenggec.

Yesu sebi tosea herecgegec

21 # Ruk 1:31 Uameme 8 wisickeu sabac sebi tosea herecgegecdeac nasoya hau yeni kpara Yesu kpacgec. Kpac imoc ye nonggeango mi kpenanggemanu angerongo bic kparec.

Anutuac womonnu

22 # Sese 12:1-8 Kecma Moseac dedeseriyoac modacma dzuac dzuacnasoac mitikibiu oho ohoya nande, nasongina imoc wisickeu yeni sabacngo Kebuac kicfu fingerudeac Yerusalennu meenoc. 23#Mke 13:2, 12Kebuac dedeseriyoacfu yoac yofi oho ohoya fede, “Waracmedac fingeckecgecdesoc yeni Kebuac kpataning areng.” 24#Sese 12:8Nga sese faibesonga, imoc kebesac yohockang me gomoc gomocmedaha yohockang faibesonga, imoc Kebuac dedeseriyoacfu fede nga yeri imoc modacma mekenoc.

25Naso imohai ngic mong Yerusalennu kefec, kpara Simeong. Ye ngic dindingac amma Anutu eweheimima Tiri Asugoc kefec. Amma ye Israengic yenearu memeseri fingerudeac tomai anec. 26Nga Asungo warac yofi deficgema edeec, “Ge mi homemana Anutuac Messia fingeru hennade.” 27Nga Yesuac nonggomama yereng dedeseriyoac feec, imoc modacma sabacngira Anutuac womonnu meenoc. Meenec Asungo Simeong bic wangeru womong manau emma 28sabac menamma Anutu dengerema yofi deec, 29-30#Yes 52:10; Ruk 3:6; Tit 2:11“Kuctoa minginna, ni wanacngicga kicnango Memengerecga hembadeac denec, imoc bic henduaac ruaegoc kekecna mewegenena kembade. 31Ge ngicngac sasawa yeneac kicfu sing imoc bic mengeredang. 32#Yes 42:6; 49:6; 52:10Nga yeng bangeha bangeha ngicngac ge mi negensinggudae, yeni mekperagiyunuma kperagingina ambesande amma ye israengicngacfocga yeneac kibikperagitoa.”

33Ifi deu sabac nonggomama yeri yeac yoac imoc negemma kerectegec anoc. 34#Yes 8:14; Mat 21:42; 1Pe 2:8Nga Simeongngo kenecyunuma sabac nonggea Maria yofi edeec, “Negenna, Israengic homacngo medac yomocac amma mayunuude nga homacngo yeac amma yacma nanggecde, ifi fingerudeac Anutungo meisinggeec. Nga ngic homac yeni ye hemma yeac ngaba amma deendema ammigecde. 35Ammigec geac ubaherega ifingoc dzikacac beangngo herecgeude. Ifi anu ngicngac homac yeneac negen negeng sufuma feec, imoc didiu fingecbesande.”

36Anu profete ngac mong kpara Hanna, ye ifingoc womonnu kefec. Ye Fanuereac naroang Aseac kisicfunac. Amma ye ngic mema yegoc kifa 7 kecmanu ewea homeec. 37Homeu ye hotsec kecmanu kifaya 84 anec. Amma yeng womong mi wawa hadzing toforec yaka segekecma Anutu numumikefec. 38Kecma naso imohaingoc yenigoc wegenac namma Anutu dengereec. Dengerema ngic Yerusalenggac tembuckekecngina fingerudeac tomai kecdacgec, yeni sabacac siduc dekperagiyemmeec.

Nadzarete taonnu

39 # Mat 2:23 Yosefe nga Maria yeri Kebuac dedeseriyoacngo dede, imoc sasawa andarec wisickeu Gariraia provinsiu dzigenema Nadzarete amanginau kemma kecgec. 40Kecgec medacngo yadiu Anutuac ubangerecngo yearu feu yeng kuc nga negen negentegec wake wakea meec.

Yesu medac Anutuac womonnu

41 # Mke 12:24-27; 23:14-17; Dser 16:1-8 Yesuac nonggomama yeri makekenggac hombang henecdeac kifasoc Yerusaleng taonnu engkefoc. 42Amma yeni hombanggac faka modacma Yesungo kifaya 12 ammanu yenahafoc hombannu kenggec. 43Kemma kecmagec hombang naso wisickeu dzigene hagec Yesungo Yerusalennu tarec. Taru nonggomama yereng imoc mi negemma hama 44yofi negenoc, “Ye habu yenigoc sinnu kecde.” Ifi negemma yeri uameme mocgu sinnu eng kenggec wisickeu Yesu hoforoc. Hofocma tosofocngina nga arengfocngina yenearu yerecgema 45mong mi meficgeocac monggoc dzigenema Yerusalennu meficgeecdeac kenoc.

46Uameme harebec wisickeu Anutuac womong manau emma Yesu meficgeoc. Meficgeec yeng kpoukpou yeneac botucfu womonnu tacma negengyemmema dekpesi ayemmeec. 47Amma Yesungo negen negenggoc yombong ngic sasawa yoacngina merenecac yeni kpidohoma imoc wiac engena ande, ifi negenggec. 48Nga nonggomama yereng ye hemma kpidohoma nonggeango yofi edeec, “Medac, ge nocac faka ifia anecmenec? Manggagoc nereng negengyohoc amma hofocgukecdic.” 49Ifi deu yeng edeyuruec, “Ngeri nocac hofocnudape? Mannango ua mekecde, ua imoc mebadeac denenec, imoc mi negendape me?” 50Ifi deu yeri yoac imocac obohooc.

51 # Ruk 2:19 Nga ye nonggomama yerigoc dzigenema Nadzarete taonnu kemma imohai enacngira tofohoma kefec. Nga nonggeango faka sasawa fingerec, imoc negen negengau faiu feec. 52#1Sm 2:26; Yneg 3:4Nga Yesungo negen negeng nga kifayaac arennu yadiseri anu Anutu nga ngic yeni yenahafoc hendzidziegec.

المحددات الحالية:

Ruka 2: Ded

تمييز النص

نسخ