Yohane 1

Anutuac enacyoac

1 # Yoh 17:5; 1Yoh 1:1-2; Yhkp 19:13 Hanac hanaheaunacngoc enacyoacngo kefec nga enacyoac ye Anutugoc kefec amma enacyoac ye Anutu. 2Amma yennoc hanac hanaheau Anutugoc kefec. 3#1Kor 8:6; Kol 1:16-17; Heb 1:2Nga Anutungo enacyoacfu deu wiac sasawa fingecdarec, wiac sasawa fingecma fekende imoc yea kpac mong mi fingerec. 4#Yoh 5:26Yearunoc kekec feec nga kekec imocngo ngicngac yeneac kperagi anec. 5#Yoh 3:19Nga kperagingo kundung mekperagiu kundungngo kperagi imoc semeudeac ambibiema waec.

Kekec nga kperagiaac hania

6 # Mat 3:1; Ruk 1:13-17, 76 Anutungo ngic mong sueu haec, yeac kpara Yohane. 7Yeng kperagi imocac hepucngic amma dedekperagi imoc ngicngac mekperagiyemmeudeac haec. Yeng ifi hau ngicngac sasawango yeac amma kperagia imoc negensinggegecdeac negenec. 8Ye yengenaoc kperagi imoc mi kefec, kpac. Ye ine kperagi imoc mekperagiudeac haec.

9 # Yoh 8:12 Anu kperagi fora yombong, yeng bangecfu ngicngac sasawa mekperagiyemmebeso haudeac anec. 10Anutu ye kperagiango bangec nga wiac sasawa meficgedaru kperagia imocngo bangecfu kefu ngicngac yeneng ine ye mi hensigec. 11Ye bangehau dzigenemanu arengfora yeneng ama mi heimigec. 12Nga ngicngac ama heimima kpara negensinggegec, yeni Anutuac nambaracfora anggecdeac deyemmeec. 13#Yoh 2:11; 3:3-6; 1Pe 1:23Deyemmeu ngicngac imoc yeni ngic sacfusiunac me sebiac songounac me ngic monggac songounac mong mi fingecgec, kpac. Yeni Anutu yengenaarunac fingecgec.

14 # Frp 2:7 Anu enacyoacngo sebifusiagoc amma botucninau kefec. Kefu medac mocgungo fingecma Manggacarunac kuc nga kibikperagia mekefec, kuc nga kibikperagia imocnoc hening. Henni yearu danggunuc nga yoac fora wake wakea fede.

Yesuac simmeme

15Yohanengo yeac hepuc amma dekperagima kpacma yofi deec, “Ni yeacnoc yofi deai, ngadenau hama kecde, ye kunenna, nocac ni mi fingecbarengoc ye kechakefec.” 16-17#Mke 34:28; Rom 6:14Dedeseriyoacngo Mosegoc hau yearunac meing nga danggunuc amma yoac fora imoc Yesu Kristogoc haec. Amma ye danggunuc hafoangoc femide, imocngo nenannu wisic wisickea kpac hakecde. 18#Mke 33:20; Yoh 6:46; 1Tim 6:16Ngic mongngo Anutu mong mi henec, kpac. Medaha mocgusac Mamaac hoannu kecande, ye Anutungoc. Yeng Manggac dekperaginemmeec.

Yohane uayaac hania

Mat 3:1-12; Mrk 1:7-8; Ruk 3:15-17

19-20Yudangic Yerusaleng taonnu kecgec, yeneng womonggareng nga womonggareng yeneac memefic sueyunugec Yohanearu kemma kpesimigec, “Ge merac?” kpesimigec, yeng haniaya mi hesonggema yofi dekperagiyemmeec, “Ni Messia kpac.” imocngo Yohaneac dedekperagi. 21#Dser 18:15, 18; Mat 11:14Ifi deu yeneng monggoc kpesimigec, “Ge merac, ge Eria me?” kpesimigec yeng deec, “Ni ye kpac.” deu degec, “Ge profete yombong me?” degec merenec, “Kpac.” 22Ifi deu degec, “Anu ge merac? Suenunudau, yenearu yoac turunga dafi mekemma edeyununide? Ge geanggaac dafi deannec?” 23Ifi degec Yohanengo yofi merenec,

“Bangec kisiu ubaudumeng fingerec imoc nennoc yofi kpacduae, ‘Ngeni Kebuac sing heitumeigec.’ (Yes 40:3)

Profete Yesaiango neac ifi deec.”

24Anu farisaio yeneng ngic goa sueyunugec kemma 25Yohane kpesimigec, “Ge Messia kpac nga Eria kpac amma profete kpac. Ge nocac ngic doku nadzicyemmeannec?” 26Ifi degec Yohanengo yofi merengyemmeec, “Ni doku nadzicngemmeanduae. Nga botucnginau ngic mong kecde, ngeni ye mi negemmidae. 27#Yoh 1:15Yeng ngadenau hama kecde nga ni ifiango yeac hanitabe witiha yungecba naric mi ngereeude.” 28Yohanengo Betania amau Yordang doku nobocgengau doku nadzicyemmekefec, imohai faka imoc fingerec.#1:28 Betania ama yohockang feoc. Mong Yerusaleng wegenac nga mong Yordang wegenac.

Yesuac hania

29 # Yes 53:6-7; 1Pe 1:18-19 Wereckengau Yohanengo namma henu Yesungo yearu hau ngicngac yofi edeyunuec, “Henggec, imoc Anutuac ramamedaha, yeng bangectoa bangec imocac ngicngac sasawa yeneac kopocsic meickeude.” 30#Yoh 1:15Yeacnoc negemma yofi deai, “Ngic mong ngadenau hama kecde, yeng ni mi fingecbare bicngoc yombong kefecac ni feracnude. 31Neng ye mi negemmiai. Nga israengicngac ngeneng ye hentegecgecdeac neng hama doku nadzicngemmebade.”

32 # Mat 3:16 Yohanengo yofi dekperagiec, “Ni Tiri Asu hemba yeng kebesacac siric isoc kurumennunac mama yeac witiau taru henai. 33Nga ni ye mi negemmibare suenuec, yeng yofi edenuec, ‘Asungo mama ngic yearu taru hennade, yeng Tiri Asungo nadzicngemmeude.’ 34#Mat 3:17Ni imocnoc hemma hepuc amma yofi dekperagiai, ngic yomocngo Anutuac medac.”

Yesuac medacfora

35Anu wereckengau Yohane ye medacfora yenearunac yohockang yerigoc imohai monggoc nanggec. 36#Yoh 1:29Nammagec Yesungo kenu hemma medachora yofi edeyuruec, “Henec, imoc Anutuac ramamedaha.” 37-38Ifi deu negemma medachora yereng Yesu modacma kenec Yesungo dzigene yeremma yofi kpesiyemerec, “Ngeri noc wiacac angecmede?” kpesiyemeru deoc, “Rabbi, (imocac titiha kpoukpou) ge dahai kecnec?” 39Deec yofi edeyuruec, “Ngeri hama henec.” ifi deu yeni yenahafoc kemma ama kefec, imoc hemma wenac imoc yegoc taroc. Faka yomoc marai 4 kiroc fingerec.

40 # Mat 4:18-20 Anu Yohaneac yoac negemma Yesu modaroc, yerearunac mong Anderea, Simong Petoroac munea. 41Yeng Yesu hemma dzigenema warac warac yengena munea Simong meficgema yofi edeec, “Neri Messia meficgedic.” (Messia imocac titiha Kristo.) 42#Mat 16:18Ifi dema Simong hesickeu Yesuaru kenec Yesungo ye hemma yofi deec, “Ge Simong Yohaneac medac, geac kpacga Kefa debesonga.” (Imocac titiha hoc amma grikyoacfu Petros.)

43Wereckengau Yesungo Gariraia bangecfu kembesonga negemma Firipo meficgema yofi edeec, “Ge hama modacnuna.” 44Nga Firipo nga Anderea amma Petoro yeni Besaida taonnunac.

45 # Dser 18:18; Yes 7:14; 9:6; Yer 23:5; Edz 34:23 Anu Firipongo Natanae meficgema yofi edeec, “Mosengo dedeseriyoac kibiu ohoec nga profete yeneng ifingoc ohogec, neni ngic imoc meficgeding. Imoc Yesunoc, Yosefeac medac, Nadzarete taonnunac.” 46Ifi deu Natanaengo deec, “Nadzarete taonnunac wiac gombunga mong mi fingecande.” ifi deu Firipongo deec, “Ge hama henna.”

47Nga Yesungo Natanae henu yearu kenu yofi deec, “Henggec, ngic yomoc israengic fora, yearu ikoc nga faitobang faka mong mi fede.” 48Ifi deu Natanaengo kpesimiec, “Ge dafi negennunec?” Ifi deu Yesungo yofi edeec, “Firipongo mi kpacgumanu fig ic haniau tacmana bic gendua.” 49#Mat 14:33; 16:16; Mrk 3:11Ifi deu Natanaengo yofi edeec, “Rabbi, ge Anutuac medac, Isracel neneac Ngictau.” 50Ifi deu Yesungo yofi meremmiec, “Ge fig ic haniau tacna gendua deduaeac negensinnunec. Kecma faka yofia monggoc ferahema fingeru hennade. 51#Fing 28:12Negenggec, kurumeng anggeu ngeni Anutuac angerofora yeneng Ngicac Medac yearu engemmama anggec yenenggecde, imoc fora yombong edengunuduae.”

المحددات الحالية:

Yohane 1: Ded

تمييز النص

نسخ