Fingec fingec 32
32
Yacakow ye Esaw henudeac efaiec
1 #
Fing 48:16; 2Ngt 6:17; Myeg 34:8 Anu Yacakow ye ifingoc kenec. Kemmanu Anutuac angero yeneng sinnu meficgegec 2yenemma yofi deec, “Anutuac wasaifora yeneac habu yomoc.” Ifi dema amabangec imocac kpara Mahanayim#32:2 Mahanayim imocac titiha “Habu yohockang.” kparec.
3Yacakow ye dara Esaw Secir bangecfu Edom amabangec imohai kefec. Imocac amma Yacakowngo siducdedengicfora yofi dema edeyunuma sueyunuu waraima yearu kenggec. 4“Ngeni kemma kunenna Esaw yofi dema edebisia, ‘Enac tofoc tofohongicga Yacakow ye yofi dede, Ni Lawanggoc kuric kecerekefai. Kecma yaguc monggoc dzigenema haduae. 5#Fing 30:43Ni burumaka, donggi nga rama habuya habuya amma wanacngicngac homac meyunukecduae. Amma kunenna geng neac negenna ngereeudeac yoacsiducna imoc faiba hade.’ ” 6Nga siducdedengic yeni Yacakowaru monggoc dzigenema yofi dema edegec, “Neni dacga Esaw yearu kemma meficgeing. Anu ye ine ge meficguudeac ngicfora 400 yenigoc hama kecdae.” 7-8Ifi degec Yacakow ye kengec kuneng kpeu ebic kuneng mema yofi negenec, “Esaw ye hama habu mong yunuudeu ine habu mong yeni naric woragecde.” Ifi negemma ngicfora nga ramaburumakafora amma kamelefora sasawa mendzicyunuu habu yohockang anggec.
Yacakow ye ebic witiau Anutu numumiec
9 #
Fing 31:3, 13, 42 Anu Yacakow ye yofi dema numuec, “Anutu, mangesahocna Awraham nga Itsak yereac Anutu, Kebu geng yofi dema edenunec. Ge bangecgau nga sactosofocga yenearu dzigenema kenna gombunga anggembade. 10#Fing 18:27; 2Sm 7:18; Mat 8:8Nga ge enac tofoc tofohongicnecga makpekpea, ni yasunasac mekecma Yarden doku yomoc ferecge kenai anu ge nigoc yoac dedzege amma imoc modackecnec. Amma ge yoacga modacma nigoc kecnecac yaguc ine habu yohockang yenigoc haduae. 11Nga dacna Esaw ye yaguc hama ni nga enengnambaracfocna sasawa kpebucnunubacac kengecnude. Imocac amma ge onggonnuma dacnaac mariunac mesinunadeac numugenduae. 12#Fing 12:2; 22:17; 28:14Anu ge warac geanggaoc yofi denec, ‘Foracngoc ni gombunga anggemma bangecfocga mesaheyunuba kondunnu sangi fede ifi isoc homac yombong anggecde. Ifi anggecdeac imocac kpete mongngo naric mi osodarude.’ ”
Ramaburumakafora habusoc arengyunuec
13Anu Yacakow ye tofocnac ihai feec. Feu ama wereckenu ine wiara femiec imohacnac goa dara Esaw miudeac yofi meisinggeec, 14noningngagera 200 nga ngiwa 20 amma ramangagera 200 nga ngiwa 20, 15kamele namunginagoc nga medacfora 30 nga burumakangagera 40 nga ngiwa 10 amma donggicngagera 20 nga ngiwa 10. 16Meisinggema habu harebec imoc tembuc tembuc enac tofoc tofohongicfora maringinau faima yofi dema edeyunuec, “Ngeni warainemma habu botucnginau sawea herea herea kembisia.”
17Nga ngic waraiec ye ine yofi anudeac edeec, “Dacna Esaw ye meficguma ge meracac enac tofoc tofohongic nga dahai kembeso hanec nga ramaburumaka waraidae imoc meracac?” 18Ifi kpesigenu yofi dema edebesena, “Imoc enac tofoc tofohongicga Yacakowngo kunenga Esaw ge genudeac fau hade nga negennec yengena ifingoc ngade modacnunuma hama kecde.” 19Anu enac tofoc tofohongic namba 2 nga namba 3 nga imocac habugareng kendacgec yeni sasawa yoac imocngoc edeyunuma yofi deec, “Ngeni kemma Esaw meficgema yoac imoc sasawa ededacbisia. 20Anu torokpema yofi debisia, ‘Negennec, enac tofoc tofohongicga Yacakow ye ngade hama kecde.’ ” Yacakow ye yofi negemma wiac imoc andarec, “Ubangerecac wiac faiba waraima kenu Esawngo imoc hemma herea nomanemanu kengkecma meficgeba ogo anembeso.” 21Amma ifi negensima ubangerecac wiac fau waraiec. Waraiu yengena ine tofocnac ngicngacfora yenigoc feec.
Yacakow ye Anutugoc eweoc
22Anu Yacakow ye ama mi wereckemmanu tofocnacngoc yacma enenghora nga wanacngachora nga medacfora 11 yeni meyunuu kemma doku ferec ferecgea kpara Yabbok imohai ferecgegec. 23Ye wiacfora meyunudacma doku ferec ferecgea imohai ferecgegec nga finacgedanga imoc momoc sasawa fau kendarec. 24#Hos 12:3-4Yacakow yengena ine dzigenema tembuha noboc tarec. Tacmanu ngic mongngo fingecmiu yegoc ewekpekpe amma kecmaec ama wereckenec. 25Anu ngic imocngo Yacakowac kuc memaudeac ambibiema kecma fekinga kpeu fotockeec. 26Fotockeu ngic ye yofi dema edeec, “Ama wereckendeac wanuna kemba.” Ifi deu Yacakowngo yofi meremmiec, “Eng mi waguba kennade, ge kenecnunaguc ine waguba kennade.” 27Ifi deu ngic imocngo yofi dema kpesimiec, “Ge kpacga merac?” Kpesimiu meremmiec, “Ni kpacna Yacakow.” 28#Fing 35:10; 1Ngt 18:31; Hos 12:3-4Ifi deu yofi dema edeec, “Ge Anutu nga ngic yenigoc momoc dzikac kpema firang andanggac geac kpacga Yacakow monggoc mi kpacbesonga. Geac kpacga imoc Isracel#32:28 Isracelac titiha imoc “Anutugoc ewede.” ifi debesonga.” 29#Mke 3:13; Des 13:17-18Ifi deu Yacakowngo kpesimima yofi deec, “Ge kpacga naric edenubang me?” Ifi kpesimiu ye yofi deec, “Ge nocac kpacnaac kpesinec?” Ifi dema imohaingoc keneheec. 30#Fing 16:13; Mke 20:19; 33:20; Des 6:22-23; 13:22Keneheu Yacakow ye yofi deec, “Ni Anutuac kicmesuya yombong hendua anu mi homedua.” Ifi dema amabangec imocac kpara Penicel#32:30 Penicel imoc titiha “Anutuac kicmesu.” kparec.
31Anu ye Penicel bangec wama kemmanu wenac ereec. Nga ye fekinga fotockeecac tiwirindzic tima kenec. 32Imocac amma Isracel ngicngacareng yeni naso imohacnac erekecma yaguc yang neandae imohai fekinnu ginoma tacde imoc mi neandae. Ngic imocngo warac Yacakow imohai kpeecac ifi angandae.
المحددات الحالية:
Fingec fingec 32: Ded
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© (Active), Wycliffe Bible Translators, Inc. All rights reserved.
