Fingec fingec 14
14
Tumiatoau dzikac fingerec
1Anu Sinecar ngictau Amerafel nga Ellasar ngictau Arioc nga Elam ngictau Kedor Lacomer amma Goyim ngictau Tidecal 2yeni ngictau yomoc yenigoc ewekpekpe anggec, Sedom ngictau Bera nga Amora ngictau Biresa nga Adema ngictau Sinecaw nga Tsewoyim ngictau Semecewer amma Bela ngictau. Bela imoc Tsocarac kpara mong. 3Ngictau imoc sasawa yeni Siddim#14:3 Siddim Yaguc dzohong mong imohai fede nga imocac kpara Dzohong homemea. tumiau kpedzucnedacgec. 4Yeni kifa 12 Kedor Lacomer yeac bageu kecma kifa 13 ammanu ine heremiacfaka ammima ye wagec. 5Anu kifa 14 ammanu Kedor Lacomer nga ngictau yegoc kecgec yeni kemma Aseterot Karenayim imohai refaingic#14:5 Refaingic yeni ngicngac herea yombong nga yeni Yeredan dokuac wenac ere ereaubigeng kecgec. yunugec. Yunuma imohacnac kemma Ham imohai idzudzingic yunugec nga imohacnac kemma Kiriatayim tumiau emingic yunugec. 6Yunuma imohacnac kemma Secir sifecfu#14:6 Secir imoc Dokudzohongtoa home homea, imohacnac sautbigeng kemma Akaba doku meficgeec. Esaw ye naso goau imohai kefec. horingic yunukporac kengkecma El Paran bangecfu kenggec. Bangec imoc ngiha kpac. 7Anu imohacnac dzigenema En Misepat#14:7 Misepat imoc Kades amaac kpara mong. imohai kemma firang amma amalekngic yeneac bangec ifingoc megec. Mema amoringic Hatsetson Tamar imohai kecgec yeni momoc yunuma bangecngina megec.
8Anu Sedom ngictau, Amora ngictau, Adema ngictau, nga Tsewoyim ngictau amma Bela#14:8 Bela imoc Tsocarac kpara mong. ngictau imoc yeni wasaingicfocngina kpedzucyunuma Siddim tumiau yenigoc dzikac kpegecdeac arenggegec. 9Kensikema noboc nammagec Elam ngictau Kedor Lacomer nga Goyim ngictau Tidecal nga Sinecar ngictau Amerafel amma Ellasar ngictau Arioc, imoc yeni noboc nanggec. Noboc 4 nga noboc 5. 10Nga Siddim tumiau bangecsopeaac#14:10 Imoc icsopea oilngo memea isoc nga imoc ine bangec manau tennu engsac fingeckefec. teng homac nangkenec. Anu ngaba yeni Sedom nga Amora ngictau wasaifocngiragoc yeni yunukporac ayemmema kisangyunugec worama kemma goa yeni teng imohai kemegec nga tosea yeni kengec amma kemma sifecbangecfubigeng woragec. 11Woragec yeni Sedom nga Amora yeneac finacngina nga yakangina sasawa mema kendacgec. 12Amma yeni Awram daraac medac Lot Sedom amau tacyac anec ye yengena nga finaha sasawa ifingoc meyunudacma kenggec.
Awramngo Lot mesiec
13Anu ngic mong ye dzikacac ebicfunac worama kemma hebiraiongic Awram siduc ammiec. Awram ye naso imohai amoringic Mamere yeac terebint icguru nanggec imohai tacyac anec. Anu Mamere nga dacmunahora Esekol nga Aner yeri Awramgoc dzadzahac amma kecgec. 14Anu yeni sactosea mema kenggec Awram ye ine siduc imoc negemma imohai ngic yeac amau fingecma kecgec amma dzikackpekpe negendae yeneac kpetecngina 318 ifi meyunuu ngaba kisangyunu kengkecma Dan bangecfu sikegec. 15Amma ngicfora mendzicyunuu habu yohockang anggec ye amma enac tofoc tofohongicfora yeni tofocnau ewema kengkecma Awram ngicfora yeneng firang amma yunukporac ayemmema kengkecma Howa amau Damasek amaac nortbigeng meficyunugec. 16Meficyunuma finacngina megec imoc momoc sasawa wangecyunudacma sactosoya Lot enengnaroangforagoc nga yeac ramaburumakahabu amma ngicngac momoc sasawa yegoc kecgec imoc yeni mingingnginaaru monggoc merengyunudacgec.
Maleki Tsedekngo Awram keneheec
17Anu Awram ye firang amma Kedor Lacomer nga ngictau ogofora yunuma dzigenemanu Sedom ngictau ye yacma Sawe tumia#14:17 Sawe tumia imocac kpara mong ngictau tumia. imohai meficgeudeac kenec. 18#Heb 7:1-10Ammanu Salem ngictau Maleki Tsedek ye Anutu Engenatoa yeac sesememe kefec. Nga yeng Awranggac icsogong nga waing mema kenec. 19#Fing 14:22; Heb 7:6Kemma kenehema yofi edeec, “Anutu Engenatoa bangec nga kurumenga kurumenga meficyunuec yeng Awram ge kenecgubeso. 20#Myeg 9:3; 57:3; Heb 7:2, 4, 6Anutu Engenatoa kenehebesonga. Yeng ngabafocga marigau faiyunudac.” Nga Awram ye wiac sasawa tennunac mocgu imocacsoc hendzicma Maleki Tsedek midarec.
21Anu Sedom ngictau ye Awram yofi dema edeec, “Ngicngacfocna monggoc merennendacna nga finac imoc ine wana fegenu.” 22#Fing 14:9; Dser 10:14; Yhkp 10:5-6Ifi deu Awramngo yofi deec, “ Kebu Anutu Engenatoa, bangec nga kurumenga kurumenga meficyunuec yeac kpacfu marina sinema yofi deseriduae. 23‘Neng finac sasawa Awram desimidarai,’ ge ifidebanggac ni wambagaac witihanec mong me hanitabe witiha mewiac mong gearunac naric mi mebade. 24Medac yeneng wiac nedauimocsac febeso amma ngic nigoc kecdau Aner, Esekol nga Mamereyenengsac wiac tosea mebisia. Ni ine wiac mong mi mebade.”
المحددات الحالية:
Fingec fingec 14: Ded
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© (Active), Wycliffe Bible Translators, Inc. All rights reserved.
