Kabavelamu 6
6
Tomo'otoqa dikapoina
5Iave tomo'otoqa dikapoina ikisedi bwaigiotoqina. Vakai kapoidi puedi ivavalabubunidi, wete tutuya puena kapoina paipaina inuanuana. 6Beqa nuana ikapo ivo, “Uvale dede tomo'otoqa avalabubunidi pwayepwayeye ayatodi?” Beqa Iave nuapouna iveviqa tomo'otoqa paipaidi. 7Beqa ivo, “Deqoina tomo'otoqa pwayapwaya tabwaneye aikavekapoidi. We nuagu ikapo avalabubunidi. Beqa no waineye vakai puepuena, tomo'otoqa, kaisaya bwaigidi, siaidi pwayepwayeye idaledale, manuqa kawasaseye iyaveyaveqa aikavekapoidi.” 8We Noa tutuya puena Iave mataneye giamaina beqa Iave imwasaneni.
Noa vesipusipupuna
9-10Dede Noa wete tubuleleleqinavo vesipusipupudi dede mesaida:
Noa natunavo kadikaitonu kadiwavaqa Semi, Ami, Iepeti. Noa kaisena tomoqo tonotonovina. Natutuya waineye gumanina kaiseotoqina kaia tomoqo giamaina pwayapwaya tabwaneye. Tutuya puena Yaubada taiauda ieiaiana. 11Yaubada mataneye tomo'otoqa pwayepwayeye kapoina ivavalabubunidi, wete tutuya puena ietalaqa. 12Beqa Yaubada pwayapwaya ikiseni ikapo-otoqa, paina tomo'otoqa matatabudi valabubuna kapoidi ivavalabubunidi.
13Beqa Yaubada Noa ivoneni ivo, “Tomo'otoqa kapoidi no waineye imiamia, pwayapwaya vetalaqa iveadaqi. Beqa Yau ainuanua tomo'otoqa puepuedi pwayepwayeye imiamia aikavekapoidi, wete vakai puepuena pwayapwaya tabwaneye matatabudi aikavekapoidi.
14“Beqa wayaqigu dede mesaida kivalabubunedi: Waga bwaigina kutalaqi kuyoqoni komu paipaimu. Welavi pakalidi beqa kuyoqoni. Matautauda tutudaba wageye kuyatodi. Kukaibaia maleweye wete naqeneye. 15Kuyoqoni dede mesaida: katumasi 82 kanakaniakwana, katumasi 13 kanadagadaga wete katumasi 8 kanalaga.#6:15 140 mita kanakaniakwana, 22 mita kanadagadaga wete 14 mita kanalaga. 16We kanasailaka kuyoqoni. Kawasasa nebonebo kuyatodi maqeta paipaina, pita nakabatomana wete sailaka kawasasadie inakapavivila. Awa kuvalabubuni waga doleneye. Somala kaitonu kuvalabubunidi: tabwaneye, gamwaneye wete dibuneye.
17“Kukiseni! Yau wayaqata aimaieni pwayapwaya kanamatatabu tabwaneye vakai puepuena meyawaidi inakavekapoidi. 18We vonadabadaba agiavepakali waimue aiketoyavumi. Komu memwanemu, natumwavo memwanediavo taiauda kwadodoqa wageye. 19-20Kaisaya sulidi waidie'eqa kailuqa kailuqa kukewadi kumaiedi kudodoqidi wageye komu taiauda. Kaisaya sulina sulina bwaigidi, siaidi, daledaledi, yaveyaveqidi waidie'eqa tamoqana lamoqina, tamoqana vavinena kukewadi kuvekisabodebodedi meyawaidi ge inawapa. 21We wete kanikani puedi kukewadi kumaiedi wageye kudodoqidi komu, mususuvo wete kaisaya taiauda kami.”
22Beqa Noa vakai puepuena mesaida Iave ivesipupuyedi waineye ivalabubunidi.
المحددات الحالية:
Kabavelamu 6: mzz
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2023 (Active), Wycliffe Bible Translators, Inc. All rights reserved.
