Génesis 13
13
Lot Abram ikꞌaawaapa uchiada
1Abram Egiptodeepa chi wẽra ome mãikꞌaapa jõma chi netꞌaa iru bada ome wãdakꞌãri, waya chejida Néguev eujãdee. Ichi ɨ̃pema warra Lot ãchi ome aukꞌa wãji. 2Abram pꞌaratꞌara baji, nẽe, pꞌaratꞌa, ne–animalaarã iru bada perã. 3Neguevdeepa piakꞌãa chejida Betel pꞌuuru kꞌaitꞌa ichi naaweda bapariidamãi; Betel pꞌuuru, Hai pꞌuuru esajĩakꞌa. 4Mama baji ma altar ichia naaweda ooda. Mama Tachi Akꞌõremaa ɨtꞌaa tꞌɨ̃ji.
5Chi chĩapa Abramkꞌa Lot jida pꞌaratꞌara baji, ovejaarã, pꞌakꞌaarã mãikꞌaapa esclavoorã iru bada perã. 6Mamĩda ãra pꞌanadapꞌedaamãi pꞌũajara makꞌɨara wẽ–e paji. Araa–e paji ãchi omeerã ne–animalaarã–itꞌee. 7Maperã Abram ne–animal akꞌɨpataarã Lotdeerã ome chõopachida. Ma awara cananeorã, ferezeorã ome atꞌãri ma eujãde pꞌanapachida.
8Maperã ewari aba Abrampa Lotmaa mãgaji:
—Mɨ pɨ ome ëreerãda aji. Pia–e bɨ chõodaitꞌee mɨ pɨ ome maa–e pɨrã mɨ ne–animal akꞌɨpataarã përeerã ome. 9Jãma bɨ eujã. Jɨrɨtꞌeráji pɨchia kꞌiniata. Mɨ ikꞌaawaapa wãpáde aji. Pɨ juaraare wãru pɨrã, mɨ juabi eere wãitꞌee. Jõdee pɨ juabi eere wãru pɨrã, mɨ juaraare wãitꞌeeda aji.
10Mãga jarakꞌãri, eede pꞌanajida. Maperã Lotpa tꞌɨmɨ́ akꞌɨji eujã jewedaa Jordán to ikꞌaawa bada Zoar pꞌuuru parumaa. Ma jõmaweda pia unuji pania paraada perã Tachi Akꞌõrepa Edende ne–uudakꞌa mãikꞌaapa Egipto eujãkꞌa. (Maapai Tachi Akꞌõrepa waide jõtꞌaa–e baji Sodoma pꞌuuru Gomorra pꞌuuru ome.) 11Mãgá ma eujã pia unuda perã, Lotpa eujã jewedaa jõmaweda Jordán to ide bada jɨrɨtꞌeraji. Maapꞌeda oriente eeree wãji. Mãgá Abram, Lot ome awara–awaraa pꞌaneejida. 12Abram Canaán eujãde beeji. Jõdee Lot banaji ma eujã jewedaade pꞌuuru kꞌaipee beemãi, Sodoma pꞌuuru kꞌaitꞌa. 13Sodoma pidaarã kꞌachia–idaa pꞌanapachida. Audú ne–inaa kꞌachia kꞌĩra tꞌãdoo oopachida Tachi Akꞌõre kꞌĩrapite.
14Lot wãda tꞌẽepai, Tachi Akꞌõrepa Abrammaa mãgaji:
—Pɨ akꞌɨnɨ̃ bɨmãiipa akꞌɨpáde aji, norte eere, sur eere, oriente eere; occidente eere paara. 15Na eujã jõmaweda pɨa unu bɨ mɨa teeitꞌee pɨmaa mãikꞌaapa pɨdeepa uchiadaitꞌeerãmaa, ichita iru pꞌanadamerã. 16Warrarã pɨdeepa uchiadaitꞌeerã pꞌoyaa juasia–e paitꞌee. Audú chokꞌara paraaitꞌee ipu tau nãusaakꞌa. Eperãarãpa ipu tau nãusaa pꞌoyaa juasiadakꞌaakꞌa, mãga pɨkꞌa pɨdeepa uchiadaitꞌeerã pꞌoyaa juasiadakꞌaa paitꞌee. 17Wãpáde aji, na eujã jõmaweda akꞌɨde, mɨa pɨmaa teeitꞌee perã.
18Mãgá Abram wãji. Mata Hebrón pꞌuuru kꞌaitꞌa banaji. Beeji pakꞌurura jẽra bɨmãi eperã tꞌɨ̃jarapatapꞌedaa Mamré eujãde. Arii Tachi Akꞌõre–itꞌee altar ooji.
المحددات الحالية:
Génesis 13: sjaB
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
©2005, 2010, 2015 Wycliffe Bible Translators, Inc. All rights reserved.
