KO SĒNESI 13
13
Ko e Māvaea ‘Epalame mo Lote
1PEA ‘alu hake ‘a ‘Epalame mei ‘Isipite ki he feitu‘u ko Tonga, ‘a ia mo hono uaifi mo ‘ene me‘a kotoa pē; pea na‘e ō mo ia foki ‘a Lote. 2Pea na‘e moū ‘aupito ‘a ‘Epalame ‘i he fanga manu, pea ‘i he siliva mo e koula. 3Pea ne hikihiki holo mei Tonga, ‘o ne a‘u ki Pēteli, ki he potu na‘e tu‘u ai hono tēniti ‘i mu‘a, ‘i he vaha‘a ‘o Pēteli mo ‘Ai, 4‘a e potu na‘e tu‘u ai ‘a e ‘ōlita ne ne ngaohi ‘i he kamata anga: pea na‘e fai ai ‘e ‘Epalame ‘ene lotu ‘i he huafa ‘o Sihova.
5Pea ko Lote foki ‘a ia na‘e ‘alu ‘ia ‘Epalame, na‘a ne sipi‘ia mo pulu‘ia mo tēniti‘ia. 6Pea na‘e ‘ikai utangi kinaua ‘e he fonua, ke na nofo fakataha; he ko ‘ena koloa na‘e lahi, ko ia na‘e ‘ikai te na lava ke nofo fakataha. 7Pea na‘e faifai pea kē ‘a e kau tauhi manu ‘a ‘Epalame mo e kau tauhi manu ‘a Lote; ko ha‘a Kēnani foki mo ha‘a Pēlisi na‘e nofo ‘i he fonua ‘i he kuonga ko ia.
8Pea lea ‘a ‘Epalame kia Lote, ‘Ā, ‘oua na‘a ta kē kitaua, pe ko ‘eta kau tauhi manu; he ‘oku ta kāinga. 9‘Ikai ko ena ‘a e fonua kotoa ke ke fa‘iteliha ki ai? Ta māvae mu‘a mo au: kapau te ke fakato‘ohema koe, pea u to‘omata‘u au; pea kapau te ke fakato‘omata‘u, pea te u fakato‘ohema.
10Pea tāngaki hake ‘a Lote, ‘o ne vakai ki he Seakale ‘o Soatani, ‘o fakapehē atu ki Soa, tā ‘oku mohu vai hono kotoa (kuo te‘eki maumau ‘e Sihova ‘a Sōtoma mo Komola);#Sēn 2.10 ‘io, na‘e hangē ko e ngouetapu ‘a Sihova,#13.10 ko e ngouetapu ‘a Sihová; ko e fakalika eni ki he Ngouetapu ‘i ‘Ītení. pe hangē ko e fonua ko ‘Isipite. 11Pea fili ‘e Lote mo‘ona ‘a e Seakale ‘o Soatani, pea na‘e hiki ‘a Lote ki hahake, ‘o na māvae. 12Ko ‘Epalame na‘a ne nofo ‘i he fonua ko Kēnani, ka ka nofo ‘a Lote ‘i he ngaahi kolo ‘o e seakale, pea ne hikihiki tēniti ‘o a‘u ki Sōtoma. 13Ka ko e kakai Sōtoma ko e fa‘ahinga na‘e kovi mo fai angahala ‘aupito kia Sihova.
Ko e Hiki ‘a ‘Epalahame ki Hepeloni
14Pea folofola ‘a Sihova kia ‘Epalame, hili ‘a e mahu‘i ‘a Lote meiate ia, Siini! Tāngaki hake, ‘o sio mei he potu ‘oku ke ‘i ai ki he tokelau mo e tonga mo hahake mo hihifo: 15he ko e fonua kotoa ‘oku ke sio ki ai te u ‘atu mo‘ou, pea mo ho hako ‘o ta‘engata.#Ngā 7.5 16Pea te u ngaohi ho hako ke hangē ko e efu ‘o e fonua: ‘io, ka toki lava ‘e ha taha ke lau ‘a e efu ‘o e fonua, pea ‘e toki malau ho hako foki. 17Tu‘u, pea foli ‘a e fonua, ‘a hono lōloa mo hono māukupu; he te u ‘atu ia mo‘ou. 18Pea hikihiki tēniti ai ‘e ‘Epalame, ‘o ne ha‘u ‘o nofo ‘i he ‘ulu ‘oke ‘o Mamilī ‘a ia ‘oku ‘i Hepeloni; ‘o ne langa ai ha ‘ōlita kia Sihova.
المحددات الحالية:
KO SĒNESI 13: TMB
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Tongan Moulton Bible © Bible Society of the South Pacific, 2011.
