Madiu 8

Yesuea dolö gudubu hamoi afädë wahilasi

(Maga 1.40-45, Ulugu 5.12-16)

1Yesu e segebidaia amila digasebegi, udia dolö yafie nefolalo amoli e bëgëla asi. 2Amala awäha nebegi, dolö afädë gudubu hamoi nelo amo Yesu neebea maalahilä, emo gumu sasagaia idogola salea sähalea, Dafidilo Geloi-e, dia ne wahimäiala helësëseda, hä dia ne wahilasimolöi nebegola säi.#8.2 Yu ilile Ado säla negei ameada, afädë olo amo gadoi gudubu hamoi galëda, eda Godeïe siigi nigime baaila sälo. Hä, hï helësësalea, e olo amo hogosa helesa maadeila helësëseda, gobela ïlo neebe amo bea aulo. Ilia beahaleamelële, oloi wahi galëda, ilia sähalea, Dolö amoda Godeïe siigi hä hëimelëla sälo. Gobela Ïlo 13-14gi bimalo. 3Amala säsebegi, ïe naabo mogodigia gala, dolö amo diigisa nea sähalea, Na amala helësësa, wahimola säi. Amala säsebegi, dolö gudubu hamoi amo hä fodolofalï wahi.#8.3 Yu ilile ado afädë säla negei amea sähaleada, Dia gudubu hamoi amoma diigiseda, dige Godeïe siigi nigime baaila sälo. Amala sälo gasoda, amo gala Yesuïe naaboea dolö amoma diigisebegi, hï eda nigime made baai. Eada dolö amoïe olo amomu wahilasila nigime hëi. 4Amala hamolahilä, Yesuea ema sähalea, Dofä asiala elöma säloeo. Gobela ïlo dolö neebea ami di siia bimäia olemolö mosalo. Amalahilä, di wahi go udia dolöma olemolöïe, Mosesea nelebo odala ïmalola säla negei dibe amo gadola, nelebo amo odala ïmalola säla ï.

Yesuea ami sigi aligilo afädëïe hamoi hamolasilo wahilasi

(Ulugu 7.1-10)

5Amila awälahilä, Yesu e Gabaniama besela galasebegi, Olomo ilile ami hädali afädë beaha aligilo afädë Yesu neebea maalahilä, ema hähäfilïla sähalea, 6Dafidilo-o, nïe hamoi hamolasilo e nïe mosöa oloi dialea. Ïe naabo emo baagola së edefademalä sëlahilä, fologomolö ulï dialeamelëla säla ï. 7Amala säsebegi, Yesuea ema sähalea, Na e wahilasimolö awähamelëla säi.#8.7 Yu ilida dolö fii odoaïe mosöada aulo made. Mida, Godeïe siigi ilima nigime baalola helësësalea. Abosolo 10.28 bimalo. Amalo gaso, Yesuea amogi fudugila made helësëla, ea Olomo dolöea mosöa awähala säi. 8Amala säsebegi, ami sigi aligilo amea säla obëgësalea, Ai. Dafidilo-o, neda dofea made. Na mosöa di nogila digamolö holöbö dofea made gabugi, dia adoeamu sämäia. Säseda, nïe hamoi hamolasilo amo wahimolö. 9Nage ami beahamu aligilo geloi nefolalebe amoli hawa aligilomelë. Amase, ami dolö odoa nefolalebe amoliage ne hawala aligilomelë. Na afädëma mosöla säseda, e aulomelë. Amase, elöma misiëla säseda, e mulomelë. Na nïe galabaia hamoi gadoi hamolasiloma gowe hamomola säseda, amo hamolomelëla säi. 10Amala säi amo nabala Yesu e edefademalä fudugilahilä, udia dolö e bëgëla maaha difolalo amolima sähalea, Na dilima dofä sähago. Isilale segea afädëa asigi afädë egowe gadola gelola negei neebe na made melï neawe. 11Na dilima gowe sähago. Udia dolö yafie sege eso maasidolage, amase, eso digasidolage maala, ilia Hebeni Beaha Maadela Sigi Neebea ami Abalahamala Aisagala Yeigabala ilibalä molö gegedola naha sefolamolömelë. 12Gasoda, Hebeni Beaha Maadela Sigi Neebe amoïe malö nefolalebe amoli gasimi sagai dibea ami, segea sogobala sadia idogomolömelë.#8.12 Hebeni Beaha Maadela Sigi Neebe amoïe malöla säi amolida Isilale udia dolöïe säi. Amida, ili dïisalea bese ali nalëgësa namolömelëla säi.

13Amala sälahilä, Yesuea ami sigi aligilo amoma sähalea, Hä, mosalo. Dia asigi afädë negei neebe go gadola hamomolömelëla säi. Amala säi amole, ami sigi aligilo amoïe hamoi hamolasilo amo hä, wahi.

Yesuea udia dolö yafie wahilasisa nelo

(Maga 1.29-34, Ulugu 4.38-41)

14Yesu e Fidaïe mosöa awälahilä, Fidaïe esöa hëgï olo oloi dibe melï. 15Bealahilä, ea udia amoïe naabogi diigisebegi, dafidi hëgï olo dilo amo damulebe, udia amea nowelahilä, Yesu e molö muäia neala ï.

16Deadi eso digase gaalu, udia dolö nefolalo amolia mugabe fedai nefolalo amoli Yesu neebea sigi mofiai. Sigi mofiasebegi, Yesuea ado säi ameamu mugabe yafie nesila didigila digi. Amase, udia dolö oloi difolalo amoli sulubadela wahisa maadesa nelo. 17Ea amala hamoi amoda, Godea ïe bea sälo Aisaeama aligila, bea säla negei amo gausiala digai.

Nilïle oloi amo hï neala gaui.

Olo elö elöla nilïma baai amoli ea neala gaula asila

säi amo dëdëla negei dialea. Aisaea 53.4

Yesuea e bëgëla moholöïe mala säi

(Ulugu 9.57-62)

18Udia dolö yafiea e amalela nefolalebe amo bealahilä, Yesuea sähalea, Ödä edefade dibe gowe dëgëla alogodigogi afiadila säi. 19Amala säsebegi, mala dawadigi afädë Yesu neebea maalahilä, ema sähalea, Säla Olelelo-o, di awäsebe go gadola, ne di bëgëla maahagola säi. 20Amala säsebegi, Yesuea ema säla obëgësalea, Ilua ügülo sefolalebe amolida, naga hagali hawa dilo galea. Amase, haea sefolalebe amolige, dilo mosö galea. Amalo gaso, Dolöïe Malö eda busa fugulo negela dilo mosöda, maademelëla säi. 21Amala säsebegi, bëgëla aulo elöea ema nabahalea, Dafidilo-o, na nïe naado dafidi baumolö obëgëmalamolö dofealela nabi. 22Amala nabasebegi, Yesuea ema säla obëgësalea, Baagoi difolalebe amolia hilile baagoi baumäia. Dida ne bëgëla misiëla säi.

Yesuea fole ödälema nemoi

(Maga 4.35-41, Ulugu 8.22-25)

23Yesu e ödä duugi awäsebegi, ïe bëgëla aulo amolige e bëgëla asi. 24Awäha dibegi, oeabo amogi fo edefademalä fodolofalï gelola maalahilä, ödä aidagula maala, du dabedelä hamosebe melï. Amasebegi gaso, Yesu e adi elaboi dilo. 25Adi elaboi dibegi, ïe bëgëla aulo amolia awälahilä Yesu e didiigisalea, Dafidilo Geloi-e, ödäea nilï hä nudulä hamosebegi, dia ugila negemola säi. 26Amala säsebegi, ea säla obëgësalea, Asigi holöfalï negei nefolalebela dili-e, edogi bedäha dialeala säi. Amala sälahilä e nowela, fole ödälema nemosebegi, hä, dofä gadaeala aumalasi. 27Dolö amolia fudugilahilä sähalea, Dolö goweda nowë gadoidu. Folea ödäleada ïe ado nabelo gabula säi.

Yesuea dolö äudä mugabe fedai nebegi nesila digi

(Maga 5.1-20, Ulugu 8.26-39)

28Hä, oeabo amo dëgëla näiadodi awäla, e Gadala segea besela galai. Besela galaha nebegi, baagoi baulo igi äbä difolalebeamadila, dolö äudä mugabe fedai maaha nebegi, Yesuea gausiala digai. Dolö äudä amolea udia dolö nufudala ïalalemolöi gabugi, idi amogida udia dolö aulo made. 29Elea Yesu gausialahilä, gelola üalala sähalea, Godeïe malö, dia alïma abilia hamomolö misi. Së ïmolö segeyo fu aso, made besela galaia, alïdale hä, së dafidi ïmolö misilela säi.

30Amo gaalu, holöbö ga madela amida sugua yafie moosa nefolalo. 31Hä, dolö äudä amolema mugabe fedai amolia Yesuma sähalea, Dia nilï nesila digimolö galëda, nilï sugua nefolalebe gagowelima nogila fedamolö mosöla sämola säi. 32Amala säsebegi, ea mugabe amolima mosöla säi. Amala säsebegi, mugabe amolia dolö äudä amole amilahilä, sugua amolima fedai. Fedasebegi, sugua nefolalo amoli sulubadela gau domaladi gelola baluluia digafulahilä, oeabogi digafusebegi, ödäea naha maadei. 33Amo bealahilä, sugua sigi aligilo nefolalo amoli baluluia fisäla asi. Fisäla awäla, gaamugi besela galalahilä, hamoi amo sulubadela säla ïalahilä, dolö dafidi mugabe fedai äudä amolege, säla ïaha maadei. 34Säla ï amo nabalahilä, udia dolö gaamugi nefolalo amoli sulubadela Yesu neebea ami afiai. Afiala e bealahilä, ilia ema sähalea, Dida nilïle segeawi namolö made. Bahïla mosöla säi.

المحددات الحالية:

Madiu 8: etr

تمييز النص

نسخ