Mwanduso 9
9
Imulungu koilagana na Nuhu
1Imulungu kalagusa moyo unogile kwa Nuhu na wanage, kalonga, “Mulele wana wengi, muimemeze isi yose. 2Wanyama wose na ndege wose na wang'onyo wose otambala mwiisi na somba wose wa mwiibahali owadumba mweye. Wose wammakono genu. 3Kila kinhu kili na ugima chokuwa ndiya yenu kamba viniwagwelele mijani yose na mbogamboga. Sambi nowagwaa vinhu vose. 4Lakini sikumuje nyama kuno ing'hali na damu kwavija ugima wa mwiidamu. 5Damu ya ugima wenu noilonda, noilonda damu ya kila mnyama na kila munhu. Yonda yamkome miyage noudai kumwake ugima wa munhu yamkomile. 6Munhu yonda yamkome miyage na heyo kokomigwa, kwavija munhu kalumbigwa kamba viyeli Imulungu. 7Mweye mulele wana wengi ili mwengezeke ng'hani mwiisi yose.”
8Imulungu kamulongela Nuhu na wanage, 9“Sambi notenda lagano na mweye na wanhu wa ulelo wenu, 10na vose vili na ugima, ndege wose na wanyama ofugigwa na wanyama wa kumuhulo na kila kinhu kilawile mdisafina hamoja na gweye. 11Kwa mbuli zino notenda lagano jangu na gweye na nolonga vino, vinhu vose vili na ugima honda nivibanange bule kabili kwa mazi mengi. Mazi mengi honda gaibanange bule isi yose kabili. 12Kamba kilaguso cha lagano dino dilibule uhelelo, dinitenda na gweye na vinhu vose vili na ugima, 13nokwika pinde jangu kuulanga, dokuwa kilaguso cha lagano jangu na isi yose. 14Kipindi chochose chonda niugubike ulanga na mawingu, pinde da Imulungu dokoneka, 15nokumbuka gaja ganongile kumwako na wanyama wose, kamba mazi mengi honda gavibanange kabili vinhu vose vili na ugima. 16Pinde jangu vonda dilawilile kuulanga nojona, baho nokumbuka lagano jangu dilibule uhelelo kumwangu niye na vinhu vose vili na ugima mwiisi. 17Kino acho kilaguso cha lagano dinitenda kwa vinhu vose vili na ugima.”
Nuhu na wanage
18Wanage Nuhu walawile mdisafina wakala Shemu na Hamu na Yafeti. Hamu kakala tata wa Kanaani. 19Wana awo wadatu wa Nuhu wao wakalile wahenga wa wanhu wose wa mwiisi.
20Nuhu ayo yasongile kulima mgunda wa mizabibu. 21Viyang'wile divai, kakoligwa na kasaula viwalo vake, kawasa mwazi mkibanda chake. 22Hamu, tata wa Kanaani, viyamone tatake ka mwazi, kalawa kunze na kuwalongela ndugu zake wabili. 23Abaho Shemu na Yafeti wasola kiwalo, wakika kukisogo mmaega gao. Watembela kisengele nyuma, wengila mkibanda na kumgubika tatao, kuno vihanga vao walola kumgwazo ili sikuwamone tatao viyakalile mwazi. 24Nuhu viyalamuke na kujuwa kiyamtendele mwanage imdodo, 25kalonga,
“Kanaani yaduwiligwe na Imulungu!
Kokuwa mtumwa wa ndugu zake.
26Yatogoligwe Mndewa Imulungu wa Shemu!
Kanaani yawe mtumwa wa Shemu.
27Imulungu yamwengezele Yafeti!
Ulelo wake ukale na wanhu wa Shemu!
Kanaani kokuwa mtumwa wa Yafeti.”
28Mazi mengi viganyalile Nuhu kakala miyaka magana madatu na malongo matano. 29Nuhu kafa viyakalile na miyaka magana tisa na malongo matano.
المحددات الحالية:
Mwanduso 9: King'hutu
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
NT: © 2014 Pioneer Bible Translators and The Word for the World
OT: © 2019 Pioneer Bible Translators
