Tigidali Nai Gagalama Nigali Side 7
7
Genuai wę asali po
1Nosali Yawego Noabolo te po wai, “Eno nage deli naga nage te tigidali bidi tomode dolo bidibo sualio. Tama tibaso, megi nage te moni geba sip tomoba, naga we wai puluba tigidali dali tomoba bula sao. 2Tama nago te tigidali haniani hasa dabe, te ofa maiabo usu eyu, meda meni yai hasa dabe naga sobadi, te omai a naga olama, me badu nogo si badi, te so me a naga olama, me badu nogo si, te augwali selama, te sip tomoba muao. Tiali goli, te eno gedude wiegi yai isąyani hasa, te ofa maiabo usu meni yai hasa dabe, te nago omai dali, tama so dali, te si naga sao. 3Tama tiali goli, nago te tigidali haniani ba dabego te omai ba a naga me si sobadi, te so ba me a naga olama, me si sobadi yao. Nago tama tiyu da, teda augwali me isisąyu, tama nosali augwaligo wai dabe hauwa ma te tǫde dala pomainao,” wali.
4“Tama te nogo a naga olama, me badu nogo si, te tama si silama, tama eno te tǫba kulubage tagala palama, tama te kulubage tulaludubadi, te bidi sese si ulade me, te bidi sese si hulide bidibadi yaibao. Tama te kulubagego te eno te bidibo ula elalubo tigidali ena nigali nai te tǫ daide eno sela sąna silaibao,” te po wai. 5Tialima, Noago te tigidali sę te Yawego agabolo po wali gilama te sę ela silali.
6Tama Noa te kibu be 600 bidai elalubadi, tama te genuai wę te tǫde pedelai dao. 7Tama Noa we de bidi si dali, te aga ogwa dabe me, augwa we dabe dali, te geba sip tomoba bula sali, te wę asiyu, te augwali me dologobeo. #Mat 24:38-39; Luk 17:27 8Tama te tigidali haniani hasa, dwagi yai me te dwagi yai isiąwani hasa dabego te omai me so deli deli sesa pobadi, tama te ba dabego me, te dwasianu hasa dabe me, te tigidali omaigo siyu, sogo siyu elama, 9te sip tomoba Noa dali pali, te Godigo po wali gilama tama yalio. 10Tama tiyu, te nogo a naga olama, me badu nogo si sogo silama, tama te genuai ąį asiyu, te tǫ mesegelalio.
11Te Noa te kibu be hauwa mu 600 bidama, tama te si wabo polua, dei 17 nogo si olama, sągągo a naga, me badu sągągo si tama side, te tǫ dologode te tigidali genuai wę dabe te sunumi dala pela silama, tama wę ugwaba pedelali. Tama dagalude me te tigidali dedage dala pelama, tama wę aiyaba gelalio. #2 Pi 3:6 12Tama genuai kulubage mu tuludubadi, te hauwa sogo huliyu, posoyu yali, te ulade bidi sese si 40 dei, te hulide bidi sese si 40 sogo bidibadi, tama yali. 13Tama te genuai ąį asobo gagalali side naga, te Noa me aga we me, te aga ogwa sela Siem, me Ham, me Jafet dali badi, te augwa we dabe sibi dali, augwali te sip tomoba bula sali. 14Tama tigidali haniani bulu hasa dabe me, te bede bidibo hasa dabe me, te dwasianu hasa me, te tigidali haniani ba sibi me, augwali te sip tomoba Noago hani dali pali. 15-16Te tigidali bidibo ula elalubo haniani nai sibi te omai me so te deli deli naga selama, augwali Noa dali te sip tomoba pali, te Godigo wali po tiwai gilama yalio. Noa te sip tomoba bula sabode, tama Yawego te sip sunumi paliali.
17Tama te moni wę pedaludubadi, te bidi sese si sogo elama, tama bo dabo ugwaba mu holama, tama te geba sip ugwanu sela holali. Tama sipgo te tǫ taga holali. 18Tama wę genuai mu pedelama, tama sip te wę daide ugwadu biliduali. 19Tama wę bo dabo ugwanu mu holodu genama, tama tigidali moni bobage bulu du mesegelali. 20Tama pelama, tama te węgo tigidali bulu du aiyaba elalualima, tama ugwanu mu holodu geani, te usu ni sabo te 7 mita dao. 21Tama tǫde bidibo ula elaluali nai dabe tigidali isa silai, te ba dabe me, te be pąde bidalubo hasa dabe me, te dwasianu hasa dabe me, tama tigidali nai me, te we bidi dali tigidali isila silai. 22Te tǫde bidibo ula elaluali nai dabe tigidali isalio. 23Yawego te tǫde tigidali nai dolali, te we bidi dabe me, te be pąde bidibo hasa dabe me, te dwasianu hasa dabe me, te ba sibi dabe me, te tigidali dolai. Tama te hani me deli naga augwali te węgo me dolobe, te Noa aga hani dabe me, tama augwali dali te sip tomode bidali nai dabe dali, augwali dolobeo. 24Tama wę moni bage mu pedaludubadi, tama tǫ mesegelai elaludubadi, tama bidi sese a naga olama, me badu nogo si olama, te gasa bidigo nogo si sogo, 150 dei te wę elaludubadi geani.
المحددات الحالية:
Tigidali Nai Gagalama Nigali Side 7: mps
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2002, Wycliffe Bible Translators, Inc. All rights reserved.
