Tigidali Nai Gagalama Nigali Side 11
11
Babel bulude augwaligo te bobobage be sę yani
1Polobadu mu, te moni węgo bidi ela silai madi silama, tama te tǫde bidaluali bidi sibigo te wabo po deli naga elaluai dao. 2Augwali te giliga pedalubo badu kikili pelama, tama augwali te malu tǫ me deliba sabolali. Tialima, augwali te malu tǫ nogi Sina te bulu habu badu bidaluai, te bulu nogi me Babilonia.
3Nosali augwa hasi po minama, augwaligo tama tiwai po wai, “Awe, abagi dedeo! Dago te dwagi yai mama yai tǫ meba begelama, te siaba ulama, te masigi tiwai pedalumainu ilinao,” wai. Tama tilama, te be sę yabo masigi meni baso augwaligo te be sę ebo nai tama nigali. Tama te masigi dąų wabo simen meni baso, augwaligo te be sę eyu, dąų walobo nai kolta me selama, elaluai. 4Tialima, augwaligo te po wai, “Megi da, dago dena genuai hanu me dedeli niginao. Tama te tomode moni bobobage sigi be nigaibao. Tama te be sese holobo te bobage ugwa dagaluba mu usu nigi holaibao. Tama tialima, te we bidi dabego te sę ebo suyu da, teda augwaligo dago nogi ugwaba saibao. Tama tiyu da, da munu me tedela pelama, gasa tǫ pedai badu gasa gasaba me tedela pelama, me bidigi pogobeo,” augwaligo te po wai.
5Tialima, megi da Yawego te tǫde osogo bidibo bidi dabe augwaligo te nigila silali te masigigo sę ebo moni hanu dali, te moni bobage sigi be dali si, te suagasuyu dulalio. 6Tama tibadi, agai te po wai, “Megi da, te e bidalubo bidi hani te deli hani bage naga dao, tama augwaligo po te deli naga elalubao. Tama tilama, augwaligo e moni hanu nigibo sę deli naga te yabo homu eyu, tama te sę usu yaibao. Tiali goli, augwaligo tama tiyu da, teda te pąde sogo digi tama te augwa digi te augwaligo tigidali haniani sę nigibo homu eyu, tama augwaligo te sę ebo me usu yaibao, tede ususiąbo egobeo, te augwa homu naga wali peyu bidaibao. 7Tama tidali weyu, da te tǫba dulama, te augwaligo po dedeli wabo te augwali dogoni hasegelama, te mebago te mego wabo po te munu me odisiąmainu, te augwali hamena begela siligi pinao,” te po wai.
8Tama tiyu, Yawego te augwali gasa gasa tedali tǫ pedaiba tedela pomainu ilalima, tama augwaligo te moni hanu munu ma nigibeo. 9Tama augwaligo te hanu nogi Babel poai, magi baso meni, te Yawego te tigidali hani bagego po hasegelali, tama augwali hani bugulama, tama augwali tigidali tǫ pedaiba tedali tedali tedala pela silai dao. #11:9 Te Hibru pogo te hanu nogi Babel te gasa po tiwai pąde dao, tama te gasa po page te “po doloyu, tedali tedali pai,” tama wabo.
Te Siemgo hani dabe
10Te e dao te Siemgo wai hani dabe dao. Te genuai wę asali bidama, tama nosali te kibu be si bidai madi, te sogo Siem aga kibu be bidi sese a naga 100 yia elalubadi, tama aga te ogwa me deligo aya pedelali, te Arpaksat ame nani. 11Tama te ogwa Arpaksat ame nenama, tama te Siem te kibu be umabo mu, te 500 yia ma bidama, te agai gasa ogwa wegi me ame nenama, aga isai dao.
12Tama te Arpaksat te kibu be 35 kibu be elama, tama aga te ogwa me deli Selago aya pedelali. 13Tama nosali Arpaksat te kibu be umabo, te 403 kibu be ma bidama, tama agai gasa ogwa wegi me ame nenama, tama aga isai.
14Tama te Sela te kibu be bidi sese deli olama, nogo si kibu be bidalima, te aga Ebergo aya pedelali. 15Tama nosali te Sela te kibu be hauwa mu, te 403 ma bidalima, te agai gasa wegi ogwa me ame nobadi elama, te aga isai dao.
16Te Eber te 34 kibu be bidama, te aga ogwa me deli ame nenama, te ogwa Pelekgo aya pedelali. 17Nosali te Eber te kibu be umabo te 430 ma bidama, te aga gasa wegi ogwa me ame nenama, tama aga isali.
18Te Pelek aga te kibu be bidi sese olama, nogo si bidama, Reugo aya pedelali. 19Nosali Pelek te kibu be hauwa, te 209 ma bidama, tama agai gasa wegi ogwa me ame nobadi elama, te aga isai dao.
20Te Reu kibu be bidi sese deli olama, nogo si olama, me si, 32 bidama, tama aga ogwa me deli Serukgo aya pedelali. 21Tama nosali Reu te kibu be bidi sese hauwa 207 bidama, te agai gasa wegi ogwa me ame nobadi elama, te aga isai dao.
22Tama Seruk te kibu be bidi sese deli olama, nogo si bidama, tama aga ogwa me deli ame nani ogwa Nahorgo aya pedelai. 23Tama nosali Seruk te kibu be umabo 200 ma bidama, te aga gasa wegi ogwa me ame nenama, tama aga isali.
24Tama Nahor te 29 kibu be bidama, te aga ogwa me deli ame nani, te ogwa Terago aya pedelali. 25Nosali Nahor te kibu be hauwa, 119 kibu be ma bidalima, tama aga gasa ogwa me wegi ame nenama, tama aga isalio.
26Tama Tera te kibu be bidi sese sela olama, nogo si, 70 kibu be bidama, te aga Abram, me Nahor, me Haran, te tama sela ogwago aya pedelai.
27Te e da te Terago hani wai dabe dao. Tera te Abram, me Nahor, me Haran, te augwaligo aya da. Tama Haran te bidi Lotgo aya da, 28tama Haran te aga bulude isali, te Ur te Kaldia pedai badu, te aga aya bidibadi dao. 29Tama Abramgo te we nogi Sarai sali, tama Nahorgo te Harango wegi Milka sai. Haran te gasa wegi Iskago aya me dao. 30Tama Saraigo wai ame nabo usu me ebeo.
31Terago te aga ogwa Abram sali, tama Lot te aga wąį da, tama Sarai te aga wąį da. Lot te Harango ogwa, tama Sarai te Abramgo we da. Tama Tera dali, te hani bidi dabe dali, augwaligo te hanu Ur tagalama, te Kaldia pedai badu tedu peyu, tama te Kenan tǫ pedaiba bidigi pai. Augwali bidada pali, tama tomode te Kenan tǫba sabalisiąbadi, te Haran tǫ teba usu nama bidaluai.
32Tama Tera te kibu be hauwa 205 mu bidama, tama aga te bidali pesage Haran te bulude isai dao.
المحددات الحالية:
Tigidali Nai Gagalama Nigali Side 11: mps
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2002, Wycliffe Bible Translators, Inc. All rights reserved.
