Mpiin 10

Nowa aajapɔtiib aamaal aabɔr

(1 Bibɔrb Aabɔr 1.5-23)

1Nowa aajapɔtiib le nan ye Sem, ni Ham, ni Jafef. Nnyun aah nan jin dulnyaa wee ki jer na, bi mu nan ma mbim.

2Jafef aajapɔtiib le nan ye Gomer, ni Magog, ni Madai, ni Jafann, ni Tubal, ni Mesek, ni Tiras. Binib bee aamaal nan di biyaajatiib aayimbil, le ki di yin baanibol aayimbil. 3Gomer aayaabitiib le ye Askenas yaab, ni Rifaf yaab, ni Togama yaab. 4Jafann aayaabitiib le ye Elisa yaab, ni Speenn yaab, ni Saiprus yaab, ni Rodes yaab; 5biyaabitiib nan bi ŋidik pu, ni nnyusakpem aagbaan la. Jafef aayaabitiib ngbaan nan bi baatim ni, le bi mɔmɔk aanibol bi, kaa kpaa iliin.

6Ham aajapɔtiib le nan ye Kus yaab, ni Ijipt yaab, ni Libia yaab, ni Kanaann yaab. Binib bee aamaal nan di biyaajatiib aayimbil le ki di yin baanibol aayimbil. 7Kus aayaabitiib le ye Seba yaab, ni Hafila yaab, ni Sabata yaab, ni Raama yaab, ni Sabateka yaab. Raama aayaabitiib le ye Seba yaab, ni Dedann yaab. 8Kus nan ma ujapɔɔn ubaa, bi yin u ke Nimrod, uma le nan pue ye njan aanii u tooh butɔb ki nyaŋni binib na. 9Uwumbɔr aah nan ter u pu na, le u nan nyi kikpaŋ aabɔr pam, nima le binib len ke, “Cha Uwumbɔr ŋa si ukpakpaan ke Nimrod na.” 10Njan, waah nan jin nnaan ntim mu ponn ni na le nan ye Babiloŋ, ni Erek, ni Akad; ntim mutaa ngbaan mɔmɔk nan ye Babiloŋ aatim la. 11Waah nan nyan Babiloŋ aatiŋ ni na, u nan buen Asiria aatiŋ ni, le ki ti maa ntikpaam bi yin mu ke Ninefa, ni Rehobof Ir, ni Kala, 12ni Resenn. Resenn aatiŋ nan bi Ninefa ni kitikpaan Kala aakaasisik ni la.

13Binib bi nyan ni Ijipt aamaal ponn ni na le ye Lidia yaab, ni Anam yaab, ni Lehab yaab, ni Naftu yaab, 14ni Patrus yaab, ni Kaslu yaab, ni Krete yaab; Krete aayaabitiib le ye Filistia yaab aanibol.

15Kanaann aabim le ye Saidonn u ye upol na, ni Hef. Biyaabitiib nan di bima aayimbil le yin baanibol. 16Kanaann le nan ki ye Jebus yaab, ni Amor yaab, ni Girgas yaab, 17ni Hif yaab, ni Arka yaab, ni Sinn yaab, 18ni Aafad yaab, ni Semar yaab, ni Hamaf yaab aayaaja. Kanaann aanibol mɔmɔk nan yaa, 19ki ti ker Saidonn mɔk, ki yoor kina ti saa Gerar, Gasa chee, ki cha liwipuul, ki ti pii Sodom, ni Gomora, ni Adma, ni Seboyim ki bi gbɔk Lasa aatiŋ na. 20Bima le nan ye Ham aayaabitiib, bi mɔmɔk nan ye ŋinibol aabɔŋ, le ki bi baatim ni, le kaa kpaa iliin.

21Sem u nan ye Jafef aakpel na le nan ye Hiibru yaab mɔmɔk aayaaja. 22Sem aajapɔtiib le nan ye Elam, ni Asur, ni Apaksad, ni Lud, ni Aram; biyaabitiib nan di baayimbil le ki di yin baanibol aayimbil. 23Aram aajapɔtiib le nan ye Us, ni Hul, ni Gefer, ni Mesek. 24Apaksad aajapɔɔn le nan ye Sela, le Sela aajapɔɔn mu nan ye Eber. 25Eber mu nan ma mbijabim mulee la, bi nan yin ubaa ke Peleg, bi nan yin u kina; ba pu? buyoonn bi nan ma u na, le dulnyaa aanib nan yakr;#10.25: Baaliin ni, “Peleg” ni “yakr” naan la. bi nan yin uken ke Joktann. 26Joktann aayaabitiib le nan ye Almodad yaab, ni Selef yaab, ni Hasamafef yaab, ni Jera yaab, 27ni Hadoram yaab, ni Usal yaab, ni Dikla yaab, 28ni Obal yaab, ni Abimael yaab, ni Seba yaab, 29ni Ofir yaab, ni Hafila yaab, ni Jobab yaab. Joktann le nan ye bi mɔmɔk aayaaja. 30Joktann aamaal ngbaan mɔmɔk nan kal Mesa aatiŋ pu, ki yoor kina ki ti saa Sefar aatiŋ, ki bi liwipuul wɔb, ŋijoo aah bi nin chee na. 31Bima le nan ye Sem aayaabitiib, bi mɔmɔk nan ye ŋinibol aabɔŋ, le ki bi baatim ni, le kaa kpaa iliin.

32Binib bimina mɔmɔk nan ye Nowa aayaabitiib la, bi mɔmɔk ni baanibol. Nnyun aah jin dulnyaa wee ki jer na, ŋinibol ŋimɔk bi dulnyaa wee ni dandana na mɔk ye Nowa aayaabitiib la.

المحددات الحالية:

Mpiin 10: xonB

تمييز النص

نسخ