San Mateo 2

Wat piantuzne us tukin aat kit Jesústa wakpuj wainñamtu

1Jesús Belén pɨpulukin kawimɨzkane, Herodesne Judea sura mikwa azi. Sun payu wat piantuzne, pãn puzmumans attuzne, katsa Jerusalén pɨpulura piannara. Kɨma izat akwa, uspane anza wat piankamara. 2Uspane ka mɨmaara:

—¿Mɨntama sun pashpa mɨlta? Usne Judío awaruza ɨninnanazi. ¿Mɨntama tui? Aune paiña kɨma pãn puzmukin izanash. Sun akwa aune apain aanash, ussa wakpuj wainñana.

3Katsa mikwa Herodeskas wan Jerusalén pɨpulukin uztuzkas sun mɨat kit ishkuara. 4Suasne Herodesne wan pariya ɨnintuzakas Moisés kaizta aizpa kamtamtuzakas akwanara, Cristo mɨnta kawishina kiz mɨmana. 5Uspane ka kaizara:

—Belén pɨpulukin, Judea sukin kawinazi. Sunkanain Dios kainammmikane ka parɨt:

6“Belén pɨpulune Judea sukin ainki pɨpulu i.

Akkwan awa an ainki pɨpulukin uzamtuchikas,

anza katsa mikwane sun pɨpulukin kawinazi,

ap Judío awaruza kiwainanapa.”#Mi 5.2

7Suasne Herodesne kɨma iztaruza puintain akwanat kit ka mɨmanara:

—¿Chi payuma kɨma izanash? Mɨmarawane, usne kɨma kai izpanka piankamta. 8Suasne usparuza Belén pɨpulura ɨninnat kit ka kaiznara:

—Ta ɨat kit an pashpa sairain. Ussa wanmaltawane, apain kail kit nawa kainanaka, nakas ussa wakpuj wainna, kiznara.

9Mikwa kaizta aizpa mɨarawane, kɨma izmuruzne ɨamɨzta. Paiña suras puztachasmin, pashpa tura ɨarachasmin, uspane sun kɨmara pãn puzmukin ñamin izarɨt. 10Kɨma iztuasmin, uspane kwisha wat minñat kit 11yalta nappat kit pashparakas Maríarakas, paiña akkuhshta, izara. Suasne uspane pashpa tukin wakpuj wainñara. Kwiztane uspa kara aizpa azpiz kit urukas inciensokas mamaz mirra piamkas ukkat kit ussa mɨlaara. 12Kwiztane kɨmu izmuruz kainkizpamtuasmin, pittamtuasmin, Diosne usparuza kurunnara, Herodes tuwara kaiyamanpa. Suasne uspane uspa sura mamaz miwarain kaiyamɨzta.

Uspane Jesústa Egipto sura mɨlpailtu

13Kɨmu izmuruz kaiyarawane, Joséne kainkizpamtuazi. Anpatpa ángelne ussa izpan kit ka kaizta: “Kuhsakti. Nukas pashparakas paiña akkuhshtakas Egipto sura azain ɨrain. Sua nukkulti, na kaiznakima. Herodesne pashpara sainanpain, ussa piantana,” kizta.

14Joséne kuhs kit pashparakas paiña akkuhshtakas munat kit amtawara pɨpulukis puzat kit Egipto surakima ɨara. 15Suain nukkulara, Herodes inakima. Egipto sura nukkultɨt akwa, uspane Anpatpa kainammmika kaizta aizpa kiarɨt. Sunkana kaizta: “Nane ap painkulta Egipto suras akwarau.”#Os 11.1

Herodesne akkwan pashaparuza piantana ɨninnara

16Herodes wat pianturuz awa kaiyarachi piankamtawane, usne kwisha pilchapuzta, uspa ussa kutkwarɨt akwa. Suasne Herodesne wan ampu pashparuza, kuna asmin paas añokima, Belén pɨpulurakas kasharuzakas piantana ɨninnara. Sun kɨma izaruzne, sun wat piantuzne, “paas año pɨnnapain,” kizara. 17Suasne Jeremías kainammmikane parat aizpa sunkana kirɨt:

18“Akkwan ashampa tɨnta azamtuasmin,

wan ashampane Rama pɨpulukin mɨara.

Wan Israel ashamparuzne azara, uspa painkul akwa.

Uspa tayaltɨt akwa, mɨnminkas usparuza kiwainnasachi,

uspa painkultuz iarɨt akwa.”#Jer 31.15

Uspane Egipto suras kaiyamtu

19Herodes irawane, Joséne kainkizpanmɨzta Egipto sura. Suasne Anpatpa ángelne ussa izpan kit ka kaizta:

20“Kuhs kit pashparakas paiña akkuhshtakas mɨl kit kail kit Israel surakima, pashpara piantashimtuz iarɨt akwa.”

21Suasne Joséne kutpat kit pashparakas paiña akkuhshtakas mɨl kit Israel sura kaiyara. 22-23Arquelaone papihshkanain mikwa namɨz kit Judea sura ɨninmɨzta. Usne Herodespa painkul azi. Joséne Arquelaowa sun piankam kit Judea sura ɨn ishkwarɨt. Mamasa José kainkizpamtuasmin, Diosne ussa Galilea sura ɨnka kizta. Galilea sura pianatpane, usne Nazaret pɨpulura uzna ɨrɨt. Dios kainammmika parɨt aizpa sunkana kirɨt: “Awane ussa Nazaret pɨpulukis atmika mun munanazi”.

المحددات الحالية:

San Mateo 2: kwi

تمييز النص

نسخ