San Mateo 14
14
Juan chi õor por choomie thõotarr
(Mr. 6:14-29; Lc. 9:7-9)
1Mag Jesús nem khĩir pogkhe õor dakhĩir wau nʉrrʉm jaar ĩchab Erodeta Galilea durr reikha sĩejim. Mag ag na õrau nem ooba aajempa ich Jesuu wau sim sĩi bĩi wejom chi Erodeeu ũr athaawai 2ich dʉi ãbam degam khʉʉnag, —Maan Juan chi õor por choomie khararrta deeu iiu phiidʉwia mag nʉrrʉmgui ajim anʉm; maguata mag õor mor masim khʉʉnpa monaau nʉrrabahab ajim anaabá.
3-4Irua mag sĩerran mʉga ajim aajem: Maata ich Erodeeu ich naam Felipe ʉʉi Erodías anʉmta khecheu auwi sĩejim anaabá. Mag atheeta Juanau chi reíg, “Pua pod pʉch naam ʉʉi khecheu auwi pʉch ʉʉikha auju khaba simgui” ajim anʉm. Mamʉ sĩi ichig magbaawai warag Juan pʉr aupi jaauwi, cárcel deg phãar sĩupinaa cadenau jʉ̃ sĩupijim anaabá.
5Ichig mag iekhatarr aawaita chi Erodeeu i thõopʉim iigjeejim anʉm. Mamʉ thumaam khʉʉnau Juanau Ẽwandam iekta jaau sim khaphʉ narr aawai, irua thõopʉikhiin, jũrr õrau ichta khaigbaju a khĩirjuwia pod thõoba aajeejim aajem. 6Mamʉ mag nʉm ee, biek ãb chi Erodes año cumpliitarr ag phiesta kha nʉm ee chi Erodías kha jemkhajim aajem, õor khapan thʉnʉm na. Mag i jemkha sim oowia, ich Erodeeu khõchkha thʉnʉisiwi, 7ich bãaurrag, “Pʉchdeu nem khõsim mʉrʉg jeeubá; mʉch imeerba mua deeb khaba deejugui” ajim anaabá. 8Mamʉ magbarm chi ãdaujã ũrtarr aawai ich chaai wawí sĩujim anʉm. Magbaawai chi chaairau ich bãaurr jooyag, “Magan mʉ athee Juan chi õor por choomie porta thep ee audeebá; jãata mua khõsi ʉmgui” ajim anʉm.
9Mamʉ mag Juan porta ichig jeeubaawai warre chi rey okhĩirjuu aadejim anaabá. Mamʉ ichdeu õor thʉ̃rkhʉʉitarr dʉi ãbam mes gaai nʉmuata mag ichig jeeubarm nem deeju a iekhatarr aawai 10chadcha Juan cárcel deg sĩerr aar õor pʉiwia thõonaa, chi por appai thep ee waibeepi jaaujim anaabá. 11Magbaawai i ipierr wetwi, chadcha ichdeu jaautarrjo thõonaa, chi por thʉapnaa aibeewi, chi daupeer mag chi jemkha sĩerrag deechejierram aajem. Magbaa ichdeu jũrr ich ãdag deejim anaabá. 12Mag chi Juan o thʉapbapʉim abaawai, i dʉi wenʉrraajerr khʉʉndamau beewi, arrwi, aukherjierram anaabá. Maimua ya mag amau i thõobapäaiwaita maar aig Jesuug jawaan beejierram.
Jesuu õor cinco mil jãhogtarr
(Mr. 6:30-44; Lc. 9:10-17; Jn. 6:1-14)
13Mag Juan o thʉap thõobarm ich aar jaaubaimam ũrwia, okhĩirjugau warag chawag õor chukag aar maju abaawai, marau i joo arrjim. Pari mag wetumua ya maar dojãrr paaukhabaadem õrau oopʉitarr aawai ag dakha phobor nʉnʉidʉm eem khʉʉnau jũrr khʉd garmua maar na ereubaadejim. 14Maimua ya jopimawia ooimaawai i na õor pooma thʉnaajim. Magbaawai am dau aug khaugwi am aaunaanjã monaaupʉimajim. 15Mag nʉm ee, ya kheeuraa aadeewai maach garmuata irig, —Mʉg õorjã chukag eeta ya kheeuraa aadem; amag wetpi jaaubá, phobor ee wetwi amach athee khojudam per aumkhĩir anaajim.
16Magbaawai, —Khoju jʉraanpai chan am wetju khaba nʉm. ¿Jãg pãachdeuta am jãhogbamma? ajim, ich Jesuu maachigta.
17Magbaawai marau, —Maar khoju chukhu nʉmgui ajim amag deeg. Ãba pandamta cinco wai nʉm dʉi ãwarrdamta dau numpai wai nʉm ajim irig.
18Magbaawaita ichdeu, —Makhʉʉndam mʉ aig aipidut ajim.
19Mag chadcha ich aig aipierrwai õor pom mag thʉnarrag, —Phũak ee ohood abat ajim.
Maimua mag pandam cinco narr dʉi chi ãwarrdampa phe auwia ʉ̃gthaag eerpanaa, Ẽwandamag ag paar ʉu ajim anaa, ichdeupai chi pan thorreunaa marag ʉapʉimajim. Magbaawai jũrr maachdeuta õrag jigmajim. 20Mag jigmamua, jigmamua, ich iiu aawai thumaam khʉʉnau amachdeu khom aig khotarrjã dʉrr apiwi, pan pom sobjim, chi ãwarrjã agjo. Mag chi sobtarr phe aunaa oowai thʉbʉt khapan docen ãb oberjim chi ipiirkham. 21Mag ed mag Jesuu jãhogtarr khʉʉn chi khapanag cinco mil naajim, emkhooin appai, ʉʉin beerba ni chaainjã beerba.
Jesús dojã ʉ̃r nʉrrarr
(Mr. 6:45-52; Jn. 6:16-21)
22Mag õor pom thach khopiwi jũrr maachta ich na maach dʉrbagkhatarr jap ee wetpi jaaujim, ich na thoom igar naaimamkhĩir. Maagwai ichin agtha ich aig sĩsijim õor oopäaiwai. 23Maimua õor thum ereuwia ich appai aadeewaita, i iek buchag gaai ich appai ich Ayag jewaan majim aajem. Maagwai ya edau kheubaadeewaijã mam ich appai chirajim aajem.
24Magʉmich maran ya dojãrr naajim. Mamʉ maar khĩir garmuata phũ we thʉnarr aawai maar japan phũasau oppherta jiir ahau khajim. 25Maimua ya ãspa urumuata ich Jesús maar ẽudee beejim. Pari mag urumjã sĩi dojã ʉ̃rta jẽb thetag gayamjo urajim. 26Mag dojã ʉ̃rta jẽb gayamjo maachig urum oobaawai jãphierrwi maar ähäi khaphobaadejim. Mag jãphierrnaa ähäikhamua, —Keena, akhaar khabahaba anaajim marau.
27Pari magbaawai ich Jesuu, —Keena, oob jãphierrmiet; mʉ khabahab ajim marag.
28Magbaa Pedroou irig, —Señor, chadcha pʉchta Jesús khai, magan mʉjã pʉchjo dojã ʉ̃r pʉch aar mapibá ajim.
29Magbaawai irig, —Beejuma ajim Jesuu.
Magbaawai chadcha Pedroou jap eemua waaidʉbaadewi Jesús khĩirphee dʉdʉrgmaa ajim, dojã ʉ̃rta durramjo. 30Pari phũas dau dapag oowi jãphierrbaadejim. Mag jãphierrbaadem ee ĩchab ya ierrpamajim. Magbaawaita maach Porog, —Señor, mʉ oobahur, mʉʉn ierrpamamgui ajim.
31Magbarm bʉrre Jesuu i jua gaai pʉrnaa, —¿Khanthee pua pʉch ierrpaju khĩirjujĩ? Jãgan pua chan mua pʉchig nem mag aawaijã mʉ iek ʉkhaba chirabma ajim irig.
32Maimua ya am jap ee waaidʉtkhabaadee chi phũ meuu aadejim. 33Mag chi Jesús jap ee pabaadee i khĩirphee kanieu phõbkhanaa, —Chadcha pʉʉta Ẽwandam Iewaau anaajim, marau irig.
Genesaretpien Jesuu monaaukhatarr
(Mr. 6:53-56)
34Mag wetumua thoom igar Genesaret durr phẽeubaimajierram. 35Mag Jesús barbaimam õrau khaugphobaadee, sĩi ag perás bĩi joisijim. Mag amachdeu khaugphobaadee i aig õor mor masim khʉʉn aibeenaa irig, 36—Maar aaunaanag pʉch khajũahidam gaaipai khãijã pʉrpibá aajeejim, monaaumkhĩir.
Mag chadcha thum i khajũa gaai pʉrmam khʉʉnan warre monaaukha maajeejim, mag sĩi pʉrbarmuapai.
المحددات الحالية:
San Mateo 14: noaA
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2011, Wycliffe Bible Translators, Inc. All rights reserved.
