Madiu 4
4
Yesu 'ana tohona Seitani 'oinega
(Maki 1:12-13; Luke 4:1-13)
1Bewa 'oinega Yehoba Yaluyaluwana Yesu 'itoeya ma 'itauyeya tupwa balabala 'awawa ma 'abehega 'ana tohona Seitani 'oinega 'iloba. 2Ma sabwelo poti 'alona geya 'i'ai, ma 'igomaleya madouna.
3Ma totohoina 'ilatuma ma 'igwaeya, “Ceguma 'owa Yehoba Natuna, dimwa bewa 'uloinaedi ma sihe'e'ahai.”
4Ma Yesu 'igwaeya, “Buki He'asisi 'alona loina 'imiyamiya 'abehega,
‘Tomota yawasidi geya 'e'ahaimo 'oinega, ma hesi Yehoba 'ina gwaeyao mabwaiyadi 'oidiyega.’”
5Coinega Seitani Yesu 'itoeya ma 'itauyeya Yelusalema, ma Hada He'asisi* tabwana moisa 'oina 'ihetoholoya, 6ma 'ihegwaeya, 'igwae, “Ceguma 'owa Yehoba Natuna, bewa 'oinega 'ulataheya, ma geya'abwa 'uhesihesilae. Weyahina Buki He'asisi 'igwae pwaiya 'igwae,
‘Yehoba 'ina anelose 'iloinaedi ma si'itayahigo,’
ma wete 'igwae,
‘Nimadiyega si'ahaligo, ma 'oinega sahena 'uhesihesilae dimwa 'oidiya.’”
7Ma Yesu wete 'igwaeya, “Caigeda wete gwae Buki He'asisi 'oina 'imiyamiya, 'igwaeya,
‘Sahena 'ino Bada Yehoba 'utohotoho.’”
8Ma Seitani Yesu 'itoeya 'oya madouna tabwanina, ta nage 'oina 'ebe loina wasawasa bale'uwa mabwaiyana Yesu 'oina 'ihe'itediya, 9ma wete 'itohohileya, 'igwae, “Tupwa nage mabwaiyadi yada 'ebwaego, 'eguma 'ube'u sulu ma 'oiguwa 'utuluha, nata 'ebe loinaedi ya'ebwaego.”
10Coinega 'iheliyeya 'igwae, “Seitani 'u'ebesinegau. Buki He'asisi 'alona loina 'imiyamiya 'abehega,
‘Cino Bada Yehoba namo 'oina 'u'etuluha ma taunamo 'ina gwae 'uhematamatanedi.’”
11Ma Seitani Yesu 'i'ebesineya, ma muliyega aneloseyao silatuwa ma silemeya.
Yesu 'ina paihowa 'ihegaineya tupwa Galili 'oina
(Maki 1:14-15; Luke 4:14-15)
12Ma muliyetega Yesu wasa 'ihesagoheya 'abehega Yoni deliya silaguluhuweya, 'oinega 'ihila ma Galili 'oina 'itauya. 13Coinega Nasaleta 'i'ebesineya ma 'ilo'asa Kapaneumi holai, beno susu Sebuloni ma Napitalai 'idi bale'uwa. 14Ginaula bewa weyahina palopita Aiseya mwalohene 'ihepwaila ta Buki He'asisi 'oina 'ileleya, 'igwae,
15“Sebuloni ma Napitalai, 'idi gogo beno hola ma we'aha Yolidani gamwagamwanidiya, taudi ganamuli 'idi tupwa, sanina Galili. 16Taudi guguyou 'ina tupwa 'oina simiyamiya, ma hesi bewa tuwa maedana madouna si'ita pwaiya, weyahina mwalo 'amasa 'ina tupwa galana 'oina simiyana, ma bewa tuwa 'asilala 'oidiya 'isaehaneya.”
17Tuta nage 'oina Yesu 'ina lohatoto 'ihegaina ta 'igwae, “Cimi paihowa galadi 'oidiyega wanuwabui, weyahina nata ma Yehoba 'ihetoloina 'oida.”
Togomana 'ehata Yesu 'ibwauwedima
(Maki 1:16-20; Luke 5:1-11)
18Coinega 'aigeda tuta Yesu Galili holai 'ihasahasane, ta togomana siteluwa matasina 'i'itediya 'idi gomana siyahuyahuwe, 'aigeda Saimoni, tauna wete sihesaniyeya Pita, ma tasina sanina Andulu. 19Coinega 'ibwauwediya, ta 'igwae, “Wamuliyegau ma tomota wa'onadi.”
20Nage 'oina 'idi gomana si'ebesineya ma Yesu simuliyeya.
21Coinega wete 'ihasahasane, ma togomana sitetoi wagai 'idi gomana sigibugibubudi 'i'ita lobediya, taudi Yemesa ma Yoni matamadiu, tauna sanina Sebedi. Eema Yesu Yemesaina ma tasina 'ibwauwedima, 22ma sitoholowa, ma waga ta tamadiu si'ebesinediya, ta Yesu simuliyeya.
Yesu tomota mabwaiyadi 'ilemediya
(Luke 6:17-19)
23Yesu Galili mabwaiyana 'isakowasiyeya, ma 'idi hada tapwalolo 'oidiya 'ilohatotowa, ma tetela bwebwe'ana Yehoba 'ina loina weyahina 'ihehepwaila, ma wete tomota 'adi lohalao 'oidiyega 'i'abi hebwebwe'anediya mabwaiyadi. 24Coinega Yesu tetelina 'isaweyaneya Siliya gogonao mabwaiyadi 'oidiya, 'oinega tolohalao mabwaiyadi sitautauyedima 'oina, taudi silohala madouna ma wahidi simuyamuya, ma taudi hi'ahi'a* si'abi hebuwediya, ma taudi 'adi lohala hebwasubwasumo ma wete tobelu, ma Yesu 'i'abi hebwebwe'anediya mabwaiyadi.
25Bewa weyahina boda madouna Yesu simuliyeya, Galiliyega ma Dikapoliyega ma Yelusalemega ma Yudiyega ma wete Yolidani hali tupwega.
المحددات الحالية:
Madiu 4: bddNT
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 1991, Wycliffe Bible Translators, Inc. All rights reserved.
