Lo'o ndye ngua'ni ngu' msaa, li' nchcuane Jesús ji'i̱ Simón Pedro:
―Simón, sñi' Juan ―nacui̱ Jesús ji'i̱―, ¿ha ntsu'u la tyiquee nu'u̱ ña'a̱ jna'? ¿Ha ntsu'u la tyiquee nu'u̱ ña'a̱ ji'i̱ tya'a tso'o nu'u̱?
Li' nguxacui̱ Pedro cha' ji'i̱ Jesús:
―Cua jlo ti' nu'u̱, Xu'na, cha' ntsu'u tsa tyiquee na' ña'a̱a̱ jinu'u̱ ―nacui̱ Pedro ji'i̱.
―Culu'u nu'u̱ cha' 'na ji'i̱ ñati̱ nu ngusñi ca ti cha' bi' lacua, ñi'ya̱ lo'o ña'a̱si̱i̱ nu'u̱ ji'i̱ na'ni cuañi' scu̱' nu'u̱ ―nacui̱ Jesús ji'i̱ Pedro.
Xa' nchcui' Jesús lo'o chaca quiya':
―Simón, sñi' Juan ―nacui̱―, ¿ha chañi cha' hi̱ cha' ntsu'u tyiquee nu'u̱ ña'a̱ 'na?
―Xu'na̱, cua jlo ti' nu'u̱ cha' ntsu'u tsa tyiquee na' ña'a̱a̱ jinu'u̱ ―nacui̱ Pedro ji'i̱ Jesús.
―Ña'a̱si̱i̱ nu'u̱ ji'i̱ ñati̱ 'na lacua ―nacui̱ Jesús ji'i̱ li'.
Cua ngua sna quiya' nu nchcuane Jesús ji'i̱:
―¿Ha chañi hi̱ cha' ntsu'u tyiquee nu'u̱ ña'a̱ 'na?
Cua xñi'i̱ ti' Pedro cha' cua sna quiya' nchcuane Jesús ji'i̱ si chañi cha' ntsu'u tyiquee ña'a̱ ji'i̱ yu, bi' cha' nchcui' ndi'ya̱:
―Lcaa ca cha' jlo ti' nu'u̱, Xu'na ―nacui̱ Pedro ji'i̱ yu―. Cua jlo ti' nu'u̱ cha' ntsu'u tsa tyiquee na' ña'a̱ na' jinu'u̱.
―Culu'u nu'u̱ cha' 'na ji'i̱ ñati̱ 'na lacua ―nacui̱ Jesús ji'i̱―.