آيات مشهورة من الكتاب المقدس منམ་ཏི། 6

شارك

དག་པ་ཀབ་ཉི་ གོ་རང་ དཀོན་མཆོག་ག་ རྒྱལ་སྲིད་ལམ༌ཤོ། ཉི་དྲང་པུ་ཨ་ཉི་ཆོའི། ཉི་ཨོ་ཐ་བ་ ཐམས་ཅན་རང་ ན་ཧ་གནང༌མེ།

ཨོ་ཉི་ཨ་དེན་གེ་ ནམ་ནིང་ག་དེན་གེ་ སྡུག་བསྔལ་མ་ཨའི། ཧང་ཡ་དག་ནེ་ལ་ ནམ་ནིང་ག་དེན་གེ་ སྡུག་བསྔལ་ཨ་ལེ་ཁེ་ཝ་ག་ ནམ་ནིང་རང༌ཅ། ཐི་ནོང་ག་དེན་གེ་ ཐི་ནོང་ཏབ་མ་ཉམ་པ་ཤོ་ཁཱན་རང་ ཕྲིག་ཀིན༌ཅ༎

ཨོ་ཉི་ཨ་དེན་གེ་ ཇི་གི་ ན་ཧ་ཐྲང་ཉི་ཡེག་ཅ་ ན་ཧ་ཚེ་ག་ ཧང་ཟ་ལེ་ཡ་ ཧང་ཇ་མེ་ཡ་དག་ཉི་ སྡུག་བསྔལ་མ་ཨའི། ཉི་ན་ཧ་ལུས་པུ་ག་དེན་གེ་ ཧང་ཡེ་ལེ་ཡ་དག་ཉི་བུ་ སྡུག་བསྔལ་མ་ཨའི། ཚེ་ཤོ་ ཟཱན་ཇམ་གེ་ལག་པ་ ཁག་ཆི་ལུ་མང་གི་སྨོ། ཉི་ལུས་པུ་ཤོ་ ཁ་མུང་ས་རི་གེ་ལག་པ་ ཁག་ཆི་ལུ་མང་གི་སྨོ།

དག་པ་ཀབ་ཉི་ ན་ཤི་སྨོན་ལམ་ཏ་པ་ཀབ་ཉི་ ན་ཧ་ཕའི་ནང་ཀ་དི་ཉི་ ཀོ་དཔ་ཐཱན་ ཨི་བི་གི་རང་མ་སེ་ཝ་ཨ་ཉི་ ན་ཧ་ཡབ་ག་ཏཱན་ སྨོན་ལམ་ཏབ་ཅོ། ཉི་ན་ཤི་ ཨི་བི་གི་རང་ མ་སེ་ཝ་ཨ་ཉི་ སྨོན་ལམ་ཏབ་ཁཱན་ཁེ་པ་ ཡབ་གི་མཁྱེན་ཉི་ རོ་ཀི་ ན་ཧ་སེ་རབ་གནང༌མེ།

ན་ཤི་སྨོན་ལམ་ ཨོ་ཐེན་ཏབ་ཅོ། ཞིང་ཁམས་ག་བཞུགས་ཁཱན་ ཨ་ཧ་ཡབ། ན་ག་མཚན་དམ་པའི་ཤར༌ཤོ། ན་ག་རྒྱལ་སྲིད་བྱོན་ཆེན། ཉི་ཞིང་ཁམས་ག་ད་བུ་རང་ འཛམ་གླིང་ག་བུ་ ན་ག་ཐུགས་དང་ཏུ་ཉི་ ཇུང་ཆེན།

ཐི་ནོང་ག་ནོང་ཀ་ ཨ་ཧ་ཏ་བུ་ག་ལྟོ་གནང༌ཤོ།

ཨ་ཧ་ཏཱན་ངཱད་ཁཱན་བ་ཀ་ ཨ་ཤི་བཀའ་དྲིན་བསྐྱང་མ་པུརུས་ཀིན་ཨ་ཉི་ ནཱན་གི་ ཨ་ཤི་ངཱད་ཁཱན་བ་ཀ་བུ་ བཤགས་པ་གནང༌ཤོ།

ཨ་ཧ་བ་ བར་ཆད་ནང་ཀ་ ཚུད་པེ་མ༌གེ། དག་པ་ཀབ་ཉི་ ངན་པ་གེ་ ཨ་ཧ་བ་ སྐྱབས་གཟིགས་ཉི་གནང་ཤོ་ དག༌ཉི།

ན་ཧ་ཏཱན་སྡིག་པ་ཨ་ཁཱན་བ་ ན་ཤི་བཀའ་དྲིན་བསྐྱང་ནེ་ཤ་ ཞིང་ཁམས་ག་བཞུགས་ཁཱན་ ན་ཧ་ཡབ་གི་བུ་ ན་ཧ་བཤགས་པ་གནང༌མེ།

ངབ་ཀེ་ཕེན་ཁཱན་ ཁ་བ་ཀ་གོད་ཅོ། རོག་ཏེ་བ་ཀི་ ཐོག་ཡ་ཕུ་མཱན༌ཅ། ཉི་ཐོག་དུས་ཐཱན་ རུང་ནང་ཀ་ གོ་ཉི་ཐ་ལུ་བུ་མཱན༌ཅ། ཨོ་ཉེ་རང་གི་ནེ་བུ་ ན་ཧ་ཞིང་ཁམས་ག་བཞུགས་ཁཱན་ ཡབ་གི་ རོག་ཏེ་བ་ཀ་གནང༌ཅ། ཧང་ན་ཧ་བ་ཏ་ ཁ་བ་ཀེ་ལག་པ་ཁག་ཆི་ལུ་མང་གི་སྨོ༎

རང་ཏེན་ག་དེན་གེ་ ཨོ་ཐ་འཛམ་གླིང་ག་ རྒྱུ་མ་སག་ཅོ། ཧང་ཡ་དག་ནེ་ལ་ ཨོ་ཉ་རྒྱུ་ཤོ་ བུ་དང་ཙག་ཀི་ཅོན་མེ་རེ༌བེ། ཉི་དྲོ་ཝཱན་པ་ནུབ་ཐཱན་ དྲོ་ཝཱན་ཨ་ཉི་བུ་ལེ་རེ༌བེ། དག་པ་ཀབ་ཉི་ ན་ཧ་རྒྱུ་ ཞིང་ཁམས་ག་སག་ཅོ། ཧང་ཡ་དག་ནེ་ལ་ ཞིང་ཁམས་ག་ བུ་དང་ཙག་ཀི་ཅོན་མེ་མར་བ། ཉི་དྲོ་ཝཱན་པ་བུ་ ཤེག་པེ་མར་བ། ཧང་ཡ་དག་ནེ་ལ་ ན་ཧ་རྒྱུ་ ཨོ་ག་ཆོ་ཝ་ཐུར་ ན་ཧ་སེམས་བུ་ ཨོ་ཉ་ག་རང་ཨོ་ཕེ༎

ཨི་བི་གི་རང་ སྦྱིན་བདག་ཉིག་ཙིང་ག་ ཕྱག་ཞུ་ལེ་མར་བ། རོ་ཀི་སྦྱིན་བདག་ཐུར་ཀབ་ཉི་ ཤོ་ནང་ཕེ་ཝ་ཆོ་ནེ་བུ་ སྦྱིན་བདག་ཐུར་ཀབ་ཉི་ ཤོ་ནང་མ་ཕེ་ཝ་ཨོ་ཕེ། ཨུ་ཉུ་མ་ནེ་ལ་ རོ་ཀི་སྦྱིན་བདག་ཐུར་ག་ དམ་ཚིག་ཙུང་ཉི་ཕྱག་ཞུ་ལེ་ དག་པ་ཀབ་ཉི་ རོ་ཀི་སྦྱིན་བདག་ཐུར་ག་ གུས་ཞབས་མ་ཨ༌ལ། ཨུ་ཉུ་པུརུས་ཀིན་ཨ་ཉི་ ན་ཤི་དཀོན་མཆོག་དང་ ཏི་རུ་ཉིག་ཙིང་ག་རང་ ཕྱག་ཞུ་ལེ་མར་བ༎

ཐི་ནོང་ཆོན་ཐཱན་ ནམ་ནིང་ད་བུ་ མི་ག་གོག་ཁཱན་ངོན་ག་ཆང་ དཀོན་མཆོག་གི་ ཁ་མུང་ཡེན་གནང་ནེ་ལ་ ཧང་རོ་ཀི་ ན་ཧ་ཨོ་ཉ་གེ་ལག་ཉི་ མ་གནང་མ་སྨོ། ན་ཧ་དད་པ་ཤོ་ ཧང་ཨ་ཉི་ ཨོབ་ཏུར་རང་ཟེ་མུ་ཅ་ཡ།

ཨོ་ཉི་ཨ་དེན་གེ་ ན་ཤི་དུག་པུ་སོ་ངོ་བ་ཀ་ བི་ལ་ཀབ་ཉི་ ན་ཧ་ག་དང་ལ་ཉོང་གི་ ཨ་ཁཱན་ཁེ་པ་ ག་དང་མི་ཉོང་གི་ སེ་ལེ་མ་བི། ན་ཤི་བི་ལ་ཀབ་ཉི་ ཨི་བི་གི་རང་ མ་སེ་ཝ་ཨ་ཉི་བི། ཉི་ཨི་བི་གི་རང་ མ་སེ་ཝ་ཨ་ཉི་བི་ཁཱན་ཁེ་པ་ ན་ཧ་ཡབ་གི་མཁྱེན་ཉི་ རོ་ཀི་ ན་ཧ་སེ་རབ་གནང༌མེ༎

རིག་པ་སྒྲིམ་ཅོ། ན་ཤི་ཨ་ཁཱན་ལའི་ལེག་པུ་བ་ སོ་ངོ་བ་ཀི་ཐོང་ཆེན་དག་པ་གི་ མ་ཨའི། ཨུ་ཉུ་ད་བུ་ཨ་ནེ་ལ་ ཞིང་ཁམས་ག་བཞུགས་ཁཱན་ ན་ཧ་ཡབ་གེ་ ན་ཤི་སེ་རབ་ཧང་རང་མ་ཉོང་པ།

ཉི་ན་ཤི་སྨྱུང་གནས་ཆོ་ལ་ཀབ་ཉི་ འུ་དྲ་པ་བ་ད་བུ་མ་ཨའི། སོ་ངོ་བ་ཀི་ རོག་ཏེ་བ་ སྨྱུང་གནས་ཆོ་ཝ་ལ་ཨ་ཉི་ སེན་ཆེན་དག་པ་གི་ རོག་ཏེ་བ་ཀི་ རོག་ཏེ་བ་ཀ་ ཟུག་འགྱུར་བ་ཅོད་ཉི་ཆོན༌ཅ། ཇི་གི་ན་ཧ་ཐྲང་ཉི་ཡེག་ཅ་ རོག་ཏེ་བ་ཀི་ རོག་ཏེ་བ་ཀ་སེ་རབ་ ཐམས་ཅན་རང་ ཉོང་པ༌ཅ། དག་པ་ཀབ་ཉི་ ན་ཤི་སྨྱུང་གནས་ཆོ་ལ་ཀབ་ཉི་ ན་ཧ་གུམ་ཟིག་ཉི་ ཚམ་ག་སི་སོག་ཅོ། ཉི་ཤ་ སོ་ངོ་བ་ཀི་ ནའི་སྨྱུང་གནས་ཆོ་ཝ་ག་མ་སེ༌ལ། དག་པ་ཀབ་ཉི་ སོ་ངོ་བ་ཀི་མ་སེ་ཁཱན་ཁེ་པ་ ན་ཧ་ཡབ་གི་མཁྱེན་ཉི་ ཉི་རོ་ཀི་ ན་ཧ་སེ་རབ་གནང༌མེ༎