Traducción bíblica: Toba © Sociedad Bíblica de Argentina, 2012 Grabación de Toba ℗ 2017 Hosanna

Toba Qom - 2012 Edition (NT) Non Drama

Toba Qom - 2012 Edition (NT) Drama

Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.

Na fariseopi co'ollaxa ỹaỹaten da So Jesús nquictauec na lataxanatacpi qataq napacalec so Juan na lachelaxanatacpi. Qaq na'aictaxa da So Jesús saishet da nacheso so dachelaxanataxaatac, cha'aye nachesoua soua lapaxaguenataqa soua dachelaxanataxaata'ape. Qaq co'ollaq ỹaỹaten de'era So Jesús, nache ca'ai ye 'alhua Judea, nache ỹe'eguelaxa ye 'alhua Galilea.
Qaq de'era lle'eguelaxasoxoc Somaye, iuen da ỹa'axasoxoolec ye 'alhua Samaria. Qaq co'ollaq ỹa'axasoxoolec yi'iye 'alhua, nache ivita ye saq 'amaqtaq nỹecpiolec le'enaxat Sicar. Qaq yemaye saqaỹapeque aso lshere co'ollaxa so Jacob. Qaq co'ollaq mashe ileu so Jacob, nache se'eso dalaxaic lalamaxat se'eso 'alhua maye naña aso nshere somaye nacheso so llalec José. Qaq co'ollaq mashe laiñi so na'a'q, nache So Jesús ỹataqta nasamñi souaxat da lqueuoxoc. Ỹoqo'oye Somaye nso'oolec na laỹe aso nshere, qaq soua lapaxaguenataqa taua'alo so nỹecpiolec da desheenaxaraique ca alo'q. Huaña, nache huo'o aso 'alo lma' ye Samaria, nviraxaama aso nshere da nqatsheguem ca laquip. Nache So Jesús 'eetego' aso 'alo, 'eeta':

–Aỹem 'aỹa'anem ca qapio'olec 'etaxat.
Qalaxaye na judiopi ye saishet da nhuoone' na Samaria le'ecpi, nache aso 'alo inat So Jesús, 'eeta':
–¡Qalaxaye 'am judío le'ec! ¿Ta'ainco' ye aỹem 'auỹaxaatacot ye aỹem Samaria lashe?
Nache So Jesús 'enapeco':
–'Am saishet da 'auaỹaten dam huotaique 'am ỹanem Ñim Lo'onatac 'Enauacna, qataq nataqa'en saishet da Aỹem 'auauatton. Cha'ayectaxa da 'auaỹaten, nache 'am Aỹem 'auỹaxanot taxa ca 'etaxat, nache Aỹem 'am sanem ca 'etaxat maye chegaqaigui da nca'alaxa.
Nache aso 'alo 'enapeco':
–'Am Nataxala', qaica ca 'arasaxasoxonaxat da 'anqatsheguem ca 'etaxat, qataq anam ñi'illoxoqui ye ỹataqta qaỹoqtegue. Qaq ¿chaq hua'ago' ca 'auachegoxota'ague que'eca 'etaxat maye nca'altauec da Aỹem 'aỹa'anem? Som hua'au qarta'a Jacob co'ollaxa qomi' no'onaxata'agueta ana'ana lli'illoxoqui. Anamaye, nachana co'ollaxa ana nỹomtapigui qataq soua llalqa, qataq som na'atetpi. Qaq ¿'am peta'a 'anapacaleco' somaxa?
Nache So Jesús 'enapeco':
–'Enauac nam nỹomtapigui ana'ana, namayepi qaltaq ỹe'eguelaxalec da huo'o na laquip. Qaq cam nỹomgui ca 'etaxat maye sanem, camaye saishet da ỹe'eguelaxalec da huo'o na laquip. Cha'aye cam 'etaxat maye sanem, 'eeta'am na 'etaxat maye npaxaatasheguem, da huetaigui camaye. Qaq nacheca ca iviraxata'a cam nca'alaxa maye chochaq tatec.
Nache aso 'alo 'enapega Somaye, 'eeta':
–'Am Nataxala', aỹem 'aỹa'anem taxa que'eca 'etaxat, yaqto' aỹem saishet da qaltaq huo'o na ỹaquip, qataq sa iuen da ñanaxaama ana'ana ñi'illoxoqui da ñeqatsheguem ca 'etaxat.
Nache So Jesús 'enapega asomaye, 'eeta':
–'Asoma qome, 'avi'iguena'ata ca 'arhua, nache 'anauegaxaama ne'ena.
Nache aso 'alo 'enapeco':
–Aỹem qaica ca ihua.
Nache So Jesús 'enapeco':
–Ỹataqta 'eesa de'era qonapec da qonetega qaica ca 'arhua. Cha'aye 'am maye ivi' cinco co'ollaxa soua 'arhua't. Qaq ñim qoneta'aguet nagui ñaqaiyeta saishet da ỹoqta 'arhua. Qaq ỹoqo'oye de'era qonapec, damaye ỹataqta 'eesa.
Qaq co'ollaq hua'axaỹa de'era aso 'alo, nache 'enapeco':
–'Am Nataxala', aỹem sela'a da ỹoqta 'eesa da 'am la'aqtaxanaxanec Ñim Lo'onatac 'Enauacna. Qaq som hua'au qarta'alpi co'ollaxa maye lma' na Samaria, somayepi co'ollaxa da natamnot Ñim Lo'onatac 'Enauacna, qalaq hualec añi qaỹoqotcheguemec 'alhua. Qalaxaye qami' judío lashe' qoñiỹapec da nacheye ye Jerusalén yem huaña da ñatamnaqot Ñim Lo'onatac 'Enauacna.
Nache So Jesús 'enapeco':
–'Am 'alo, Aỹem 'aua'amaqten nagui, ten anacta ca na'a'q da qami' saishet da iuen da qanqo'oñiisheguemec añi qaỹoqotcheguemec 'alhua, huo'otaq da qanqo'oñiỹa ye Jerusalén, da qavio'oxoyiñi Ñim Lo'onatac 'Enauacna. Qami' Samaria lashe', qami' saishet da qauauattoñiita cam qavio'oxoyiñiitac. Qomi', qalaxaye ỹataqta saỹaanaqta ñim sho'oxorenaqtac. Cha'aye ca Nta'a Nca'alaxaqui camaye chegoqtoigui na judiopi. Ñim Lo'onatac 'Enauacna saqcha'a, ỹoqo'oye cam ỹo'oxoren Ñimaye qalaq iuen da chegoqchigui da ltaunaxanaxac So Saqcha'a La'añaxac Ñimaye. Yaqto' da ỹo'oxoren qalaq ipacchigui da lataxac maye ỹaỹamaxareeta Ñimaye. Mashe nayeetai' ca laloqo' da nam ỹo'oxoren Ñim Lo'onatac 'Enauacna maye Nta'a, ipagaqchiichigui dam ỹataqta lataxac da qaỹo'oxoren Ñimaye, chegoqchigui da ltaunaxanaxac som saqcha'a la'añaxac, cha'aye Ñim Nta'a huotaique da, nache 'eetec da qaỹo'oxoren. Qaq yi'iye laloqo' mashe ivita.
Nache aso 'alo 'enapeco':
–Aỹem saỹaten da anac qome ca Lca'aguishec Ñim Lo'onatac 'Enauacna maye qaiuattaique, maye na griegopi da iỹaxana qalaq Cristo. Qaq qom ivita da nvi' camaye, nache qomi' da'aqtaxanema 'enauac na lataxaguesat.
Nache So Jesús 'enapega asomaye, 'eeta':
–Que'eca 'aua'axattac, camaye Nachaỹem maye 'am setaqtague'.
Huaña, nache nvi't soua lapaxaguenataqa So Jesús, nache soomaye ỹataqta huo'o da la'aalaqa' co'ollaq ila'alo Somaye da detaqtague' aso 'alo. Qalaxaye qaica ca ishet da inat Somaye da chaq negue't ca 'eetapeguec qataq chaq negue't ca na'aqtaxaatrapigui. Nache aso 'alo no'onaxatchigui aso laco'oña da jec da nqo'oneua'a so nỹecpiolec. Nache da'aqtaxaatapeguem qataq 'eetega na shiỹaxauapi, 'eeta':
–Ña qauanaqui, ña qameenaxañeuga da ỹale maye ỹa'axataua'a 'enauac nam so'otpi co'ollaxa. ¡Peta'a nachera da Lca'aguishec Ñim Lo'onatac 'Enauacna maye qaiuattaique!
Nache anac nam chegaqaua'a ye nỹecpiolec, da nauga ca hueta'a So Jesús. Nache soua lapaxaguenataqa ỹoqopitaxaata'ape da nachoxoreetracot Somaye, 'eetra':
–'Am Napaxaguenataxanaq, ña cara'ac 'auque'e.
Qalaxaye So Jesús 'enapeco':
–Aỹem huo'o da anoq maye qami' sa qauaỹaañi.
Nache soua lapaxaguenataqa nnattega't, 'eetra':
–¿Ỹoqta da huo'o co'ollaxa ca ndoi' ca aloq damaxa?
Qalaxaye So Jesús 'enapeco':
–Dam anoq, nachera da 'eetapeguec Ñim Aỹem namaq qataq da yaqto' semat da lo'onataxanaxac. Da ime naxa da qaỹa'añiiñi na trigo, nache qoñiita' naxa da qara'aqtaqui: «Saxanaqcaua caua cuatro ca'agoxoiqa, nache iviteuga ca laloqo' da qanqat na ala na nañiguishec.» Qalaxaye Aỹem qami' shenapegalo: qanamachiỹasheguem, qataq qauloilec na nañiguishec da mashe ỹe na ala, da yaqto' qanqat. Qaq cam deqataxaatac, camaye ỹaconeguet ca nsheetenaguec. Qaq nam ala na nañiguishec maye nqattac namaye naigui ca nca'alaxa maye chochaq tatec. Yaqto' cam danaxaatac qataq cam deqataxaatac ishet da 'eeta'a't da ntootapigui'salo. Cha'aye ỹataqta 'eesa de'era 'enapec da na'aqtac naxa maye 'eeta': «Huo'o cam danaxaatac, qataq huo'o ca deqataxaatac.» Aỹem qami' sama'q, da yaqto' qanqache na ala na nañiguishec maye saishet co'ollaxa da qanque'etaxañi da qaỹa'añiitapiguiñi. Qaq ỹaqa'a co'ollaxa som do'onataxaatacpi, qaq qami' choche qauacoñiitelec dam lo'onataxanaxac somayepi co'ollaxa.
Qaq ỹataqta qalota nam lma' yi'iye nỹecpiolec maye huaigui ye 'alhua Samaria nam ỹa'amaqten So Jesús, souaxat de'era la'aqtaxanaxac asa'aso 'alo co'ollaq 'eeta': «Ỹa'axataua'a 'enauac nam so'otpi co'ollaxa.» Nache som lma' yi'iye nỹecpiolec maye huaigui ye 'alhua Samaria, nauga So Jesús, nache nachoxoreetacot Somaye da ñaq no'onaisop somayepi. Nache So Jesús dos na'axa'te da hueta'a yi'iye nỹecpiolec yi'iye 'alhua. Nache qalota so laỹepi shiỹaxauapi da da'amqaanataxan co'ollaq maiche na'axaỹaxaatega na la'aqtacpi Somaye. Nache somayepi 'eetega aso 'alo, 'eeta':
–Nagui saishet da nachaqrata da 'ara'aqtaxanaxac da sa'amaqtenaq, cha'aye qomi' nataqa'en maiche ña'axaỹaxanaqtega damaye qataq saỹaanaqta da ỹoqta 'eesa da nachera da Nta'a Lca'alaxaqui nam shiỹaxauapi maye huetalec ana 'alhua.

Qaq co'ollaq mashe inoxoore'c soua dos na'axa'te, nache So Jesús ca'ai ye 'alhua Samaria, nache taỹa ye 'alhua Galilea. Cha'aye Somaye maiche la'aqtaxanaxac co'ollaxa da 'eeta': Qaica ca la'aqtaxanaxanec Ñim Lo'onatac 'Enauacna da qaỹo'oxoreetac da hueta'a ca maiche lalamaxat lma'. Qaq co'ollaq mashe ivita ye 'alhua Galilea, nache na lma' yi'iye 'alhua, ỹataqta huo'o da lqochoxo da ilo'oguet Somaye. Cha'aye somayepi nataqa'en ỹalectaua'a so naponaxac le'enaxat da Lapascua maye huaña ye Jerusalén, qataq ỹauaachigui 'enauac nam ỹo'otpi So Jesús co'ollaq huaña yemaye.
Nache Somaye qaltaq nqo'ona ye Caná, maye huaigui yi'iye 'alhua Galilea, yem huaña co'ollaq so 'etaxat da nañigui naqa'en na lataxa Somaye. Qaq huo'o so ỹo'oxoraic huataxanaq lta'a maye ltaua so nta'a Herodes Antipas, somaye huo'o so llalec sa no'on, hueta'a ye Cafarnaúm. Qaq se'eso huataxanaq lta'a co'ollaq la'axaỹaxac So Jesús da chegaqa'ague da 'alhua Judea da mashe nvita ye 'alhua Galilea, nache nqo'ona cam hueta'a, nache nachoxoreetacot Somaye, da yaqto' taỹa ca lma' da nataren so llalec maye mashe ileetapigui'. Nache So Jesús 'enapega somaye, 'eeta':
–Qami' saishettaxa da qaua'amqaanataxañi da huo'otaq saxanaxa da qauauañiichigui na na'anecpi qataq nam sa qaỹauanapigui.
Qalaxaye se'eso huataxanaq lta'a 'enapeco':
–'Am Nataxala', sa 'anaỹaloxon da qojec da 'anqo'ona ye ima', yaqto' 'aviralec ye ỹalec da saxanaxa da ileu.
Nache So Jesús 'enapeco':
–'Aue, 'avi'eguelaxa ca 'arma'; ca 'aỹa'alec nca'alec.
Nache se'eso ỹale ỹataqta ỹa'amaqten da la'aqtac So Jesús. Nache jec. Qaq co'ollaq mashe nayeetaua'a so lma', nache so l-latacpi huaqata'aguet somaye, nache da'aqtaxaatapeguem, 'eeta':
–Ye 'aỹa'alec, mashe nca'alec.
Nache somaye ina't soua l-lataqa da chaq ñichiguiña co'ollaxa aso nala' da ỹaỹamaxañi so llalec. Nache soomaye, 'eetra':
–Qomye shecait so dasheta añi nala', nache ỹaxanec so le'eraxa.
Nache so lta'a so nsoqolec ỹaỹaten da nacheso so huetoigui co'ollaq So Jesús 'enapega somaye, 'eeta': «Ca 'aỹa'alec, camaye nca'alec.» Nache somaye qataq 'enauac so netaña ye lma' ỹa'amaqten So Jesús.
Qaq 'era da lỹa na'anec sa qaỹauanapega maye ỹo'ot So Jesús co'ollaq huaña ye 'alhua Galilea, co'ollaq chegoqta'a ye 'alhua Judea.

استمع إلى Juan 4