Tepehuán del Norte - GP (NT) NonDrama

Tepehuán del Norte - GP (NT) Drama

Dai ka miadaimitadai go bagimi ix makïdï go Pan Mai Kopodakami Bagimi tïgidu. Dai Kïïgakïrï Bubaidaragai aagaiña odami go bagimi ïpï. Dai go bhaitï gukakamigadï go dadaxdadami ïmadï go tïtïgiadami sïïrhikami gaagaitadai ix dukatai ïxtotai muagi go Suxi. Dïï mai tïtïgaiña ïgai ixdukatai. Duduadikoitadai ïgai ix bhakoikagi go óídakami kaxkïdï.

Daidi go Diabora baa Udaxi ïrana aidï gatïanïda agaitai. Go Udaxi ïr ïmoko go bhaibuxtama dan goka ojotosadï Suxi dai óídakami Iskariote aagaiña ïpï. Dai baakïkai go Diabora ïgiïrï sai jii go Udaxi mïï nïidi go bhaitï gukakamigadï go dadaxdadami ïmadï go sandadaru ix makïdï nukadai go gïï kiupai. Mïï aataga ïgai ïmadï dai bhai dui ñoki ixdukatai tïïgida agai go Suxi xako mai nïijadagi odami. Dai bhai gïn ïrhidi go bhaitï gukakamigadï dadaxdadami dai aagidi sai aa namïida agai dai go Udaxi bhai aa. Dai abhiadïrï bhaitiakoga nukadatadai ïgai go Suxi. Gaagaitadai ïgai ixdukatai tïïgidagi go Suxi xako mai nïijadagi go gaa odami.
Dai bhodïrï ka ayi go tasai ixtuigako ibuadana go odami go bagimi ix makïdï go Pan Mai Kopodakami tïgidu. Dai aidï go ïpïgadï tasïrï bagimiïrï kodaiña ïgai go arhi kañiñiru ixtukïdï tïtïitoiña odami go Kïïgakïrï Bubaidaragai ix makïdï ïpï duitadai ïïki. Dai Suxi maigo dakatadai lachi Jerusalenañdïrï. Dai potïtïdai ïgai go Piduru ïmadï Juan,
—Bapakibïrai amïka Jerusalenana dai ami abïr bhai buada go kuadagai go Kïïgakïrï Bubaidaragai bagimi bïïtarï sai ugana aatïmï— itïtïdai.
Dai go Piduru ïmadï Juan potïtïdai,
—¿Bakopïrï ipïrhidi aapi xi ibuadagi aatïmï?— itïtïdai.
Dai Suxi potïtïdai,
—Mïx xudu aiyagi Jerusalenïrï gïn buidïrï ayimu ïmo kïïrhi baigiadami sudagi ïmo ayiïrï. Baakimu ïgai ïmo kiiyïrï ami. Bïrai oida tudu. Dai tïkakabïrai go oidakami ami xako baakiagi ïgai sa xako kïïka go tukabi xako gaugia iñagai go Kïïgakïrï Bubaidaragai kuadagai aapimï gin mamaatïrdamiga ïmadï. Dai ïgai gïn tïïgidamu ïmo gïdukami tukabi ka bhai duñixikami. Tïkabika agai gobai ïmo baaki gokoadaamarhikamiïrï. Ami tudu abïr bhai duñi go kuadagai— itïtïdai.
Dai iji go Piduru ïmadï Juan dai bïïxi tïï ixdukatai aagiditadai go Suxi. Dai ami bhai dui ïgai go Kïïgakïrï Bubaidaragai kuadagai.

Dai ka aïkai kaduku sai go Suxi ïmadï mamaatïrdamigadï ka daraiba dai ka ugiagai. Dai Suxi potïtïdai mamaatïrdamigadï,
—Biakamu aanï xi soimaaxi taatagi dai sïïrhikïdï ipïrhidiña aanï xi gïn ïmadï ugiagi idi Kïïgakïrï Bubaidaragai kuadagai mai kaï soimaaxi taatakai aanï. Dai xibi ka ayi gobai. Daiñi, xibi aanï aagai sai ka maita gaugimu aanï idi kuadagai ïpamu asta xïxkadï ka naatorhikagi go kïïgakïrï bubaidaragai. Asta xïïxkadï ka kïïgakïrï gatïanïdagi Diuxi tudu— itïtïdai.
Dai bhodïrï bhïiyi ïgai ïmo baso biakami bino dai aagidi ïmo Diuxi aatanamïidaragai Diuxi dai oidi ïgai go mamaatïrdamigadï dai potïtïdai,
—Ka mai yïïdamu aanï bino ïpamu asta xïxkadï ka kïïgakïrï gatïanïi Diuxi. Kaxkïdï abïr gïn takoida gobai xibi— itïtïdai.
Dai bhodïrï bhïiyi ïgai ïmo pan dai ïpïpï aagidi ïmo Diuxi aatanamïidaragai Diuxi dai saasarai go pan dai oidi mamaatïrdamigadï. Daidi potïtïdai,
—Aanï gatïïgida iñagai gin tukuga aapimï gïn bïïtarï dai idi pan ïr ïmo maaxidaragai duu gin tukuga bïïtarï. Podukai abïr gïn takoidada aapimï pan ix dukai ibuayi aanï xibi dai podukai abïr gin tïtïitoda— itïtïdai.
Dai gokiïrï ka ugakai ïgai sai bhïiyi ïgai go tasa biakami bino ïpamu dai potïtïdai ïgai mamaatïrdamigadï,
—Idi bino ïr ïmo maaxidaragai aagaitai gin ïra ix makïdï gï aaxta agai mukukai aanï gïn bïïtarï. Podukai aaxtakai gin ïra namïatulda iñagai go utudui ñoki ix makïdï bhai duña agai Diuxi odami ïmadï gïn kïïgakïrï bubaidaragai bïïtarï— itïtïdai.
—Dïï gia daiñi, tami gïr ïmadï gakuayi ïgai ix makïdï gin tïïgida agai. Aanï ïr otosadï Diuxi tudu ix makïdï ïmo kïïrhi busai. Dai bia aanï xi mukiagi. Ka podukai dáí Diuxi kaxkïdï. Dïï gia kabami soimaaxi taata agai ïgai ix makïdï gin tïïgida agai— itïtïdai Suxi go mamaatïrdamigadï.
Daidi go mamaatïrdamigadï ïïgi gïn tïkakaitadai xorai ïgai dai gatïïgida agaitadai go Suxi.

Dai gokiïrï go mamaatïrdamigadï ïïgi gïn bupui ñiño aagaitai ix makïdï ïgai bamioma ïr gatïanïdamika agai. Daidi Suxi potïtïdai,
—Daiñi, go gïïgïr dudunukami tami oidigi daama óídakami kabami gïgïrdukïdï gïn ïrhidiña dai kabami tïanïiña óídakami. Dai xïxkadï odami ñokada agadagi buidïrï ïgai bia xi kïïga xadutudaitai ñokadagi dai Soikïdami Kïï Tuigakami aagagi. Dïï gia aapimï maiti gï agai xi ïpïan buadagi go dudunukami ïgai. Aapimï bhaiyoma ix makïdï bamioma gatïanïi gï agai xi mai tïanïdami dukai ibuadagi buidïrï go gaa. Aapimï ix makïdï ïr gabhaitïkïakamikagi gï agai xi ïr bïïxkatai pioñigadï dukaikana tudu— itïtïdai.
—Gï agai xi gin ïpïan dukai ibuadagi aapimï tudu. Daiñi, aapimï mesa buidïrï daraja dai aanï ïgai dai gabiajai. Gin aagidabïrai tudu ¿Ix makïdï ïgai dai bamioma gatïanïdan buayi, ix makïdï mesa buidïrï daraja dai nïnïraka sai ïmai bhidana? ¿Ix makïdï gabhibhidi go mesa buidïrï darakïdï xio? ¿Mai ix go mesa buidïrï darakïdï bamioma gatïanïdan buayi? Dïï gia aanï mos gïn bhibhidimi gïn pioñi dukaikatai aanï. Podukai abïr gïn buidada aapimï aipakoga ïpï ix dukai ibuayi aanï— itïtïdai.
—Daiñi, Diuxi gin dáí saidi ïr Reykana aanï sai gatïanïna aanï. Dai aapimï gin ïmadï darakana dai maiti gin dagito aidïxi soimaaxi taatamaiña aanï. Kaxkïdï gïn maakimu aanï sïïrhikami sai daraibagi aapimï gin mesaga buidïrï ami gatïanïitai aanï. Gin ïmadï gakuadamu aapimï tudu dai gayïdamu. Dai gïn maakimu aanï sïïrhikami sai gïgïr daraikaruïrï daraibana aapimï dai ami darakatai aagadamu aapimï ix makïdï go Israelitas ïgai dai kïï dui dai ix makïdï mai kïï dui ïpï— itïtïdai.

Dai bhodïrï maa Suxi ïmo ñoki go Ximuñi dai potïtïdai,
—Daiñi aapi Ximuñi, go diabora gatáí oigaragai xi gïn duiñdagi naana maaxi soimaaxi sa bhai ka mai buaboitudada aapimï dai podukai ïkobai gïn darasana ïgai aanïañdïrï. Ïpïan duñimu ïgai xïïxkadï odami gigidagi kosadï tïrhigi sai ïkobai biïna go kosadï. Soimaaxi gïn taatamitulda agai ïgai tudu— itïtïdai. —Dïï gia gï daanturhiña aanï aapi Ximuñi Piduru sai mai ugitïna gï buaboidaraga. Dai xïïxkadï ka daibuñagi ixtumaxi daibuña agai ka ïmadukai gï tïgitomu aapi ïpamu. Dai amaxi ipïrhidi aanï xi soikïdagi aapi gï suskurhi dai gï xixïgi Diuxi amadïrï sai kïïga gubuakada ïgai buaboidaradï— itïtïdai.
Dai go Piduru potïtïdai Suxi,
—Gin Tïanïdamiga, aanï bhai gin duu xi gï oidagi toma xakoga imïdagi aapi, tomaxi gin maixatudagi aanï xiïpï xi gin muatudagi aanï gï oiditai— itïtïdai.
Dïï gia Suxi potïtïdai,
—Gï aagidamu aanï ixtumaxi Piduru. Xibi mai kia kujuitai takuku kïrhiadï aapi baikojo potïimu sai maiti gin maatï— itïtïdai.

Dai bhodïrï Suxi potïtïdai go mamaatïrdamigadï,
—Gïn tïgitobïrai baasïki aidïxi aipakoga gïn otoi aanï dai gïn aagidi sai mai bhïkana aapimï gïn morarhi dai tomarhi gïn tuminxiga. ¿Ix gïn biïgatadai ixtumaxi aidï, aipakoga iimïkai aapimï?— itïtïdai.
—Cho maiti gïr biïgatadai ixtumaxi— itïtïdai go mamaatïrdamigadï.
Dai Suxi potïtïdai,
—Daiñi, xibi gia soi dukai gïn nïijadamu óídakami dai kaxkïdï xibi abhiadïrï bhaitiakoga ka ïma dukai gï agadamu xi ajiopadagi aapimï. Xibi ix biakagi aapimï tuminxi gï agai ix bhïkia aapimï ïmadï gïn morarhiga. Dai xorai mai biakagi ïmo maxtai sai gagarana ïmo baasaradï dai sabïdana ïmoko. Daiñi, ka poduu ojixi sai,
Soi dukai gin nïijadamu óídakami ïmo soimaaxi ibuadami dukai
Ka podukai ojixi dai kaxkïdï gï maatï sai soi dukai gin nïijadamu óídakami. Dai kaxkïdï ïpï ka ïma dukai gï agai xi ajiopadagi aapimï xibi. Kaxkïdï tudu soi dukai gïn nïijadamu óídakami gin mamaatïrdamigakatai aapimï— itïtïdai Suxi.
Dai mamaatïrdamigadï potïtïdai,
—Gïr Nukadakami, tami daraka goka mamaaxtai— itïtïdai.
Dai Suxi potïtïdai,
—Gokïdï ka kïïgadu— itïtïdai.

Dai bhodïrï jii go Suxi abhiadïrï dai imi agai Olibo gidiamu. Dudatai gamoko aimïraiña ïgai tudu. Dai xibi mamaatïrdamigadï oi ïpï. Dai aïkai ïgai ami gidiïrï sai Suxi potïtïdai mamaatïrdamigadï,
—Daanïdabïrai Diuxi sai gïn soiñana ix mai gïpiïrï surhigïna aapimï— itïtïdai.
Dai bhodïrï maigo jii go Suxi mai xii mïkaxi. Parï ïpïan ïï mïkaxi xi aituldagi ïmoko ïmo odai xïxkadï daitudagi. Dai ami totonakïdï kïkibakai daanïi ïgai Diuxi. Dai potïtïdai,
—Gin Oga— itïtïdai. —Ix ipïrhiadagi aapi, maiti gin dagito xi soimaaxi taatagi aanï xibi. Dïï gia gï duna ix dukatai aapi ipïrhidi dai mai xu xi ixdukatai aanï ipïrhidi— itïtïdai.
Dai ïmo tïañikarudï Diuxi dibia ami tïbagiañdïrï dai gï maaxitu ami buitapi go Suxi dai maa gubukarhigai. Dai Suxi apia kabamioma daanïi Diuxi aidï. Dai kabami soimaaxi taata ïgai dai kabami bajurai. Bajuradï otaitadai dïbïrapi ïpïan dukai ïrai.
Dai ka naato daanïkai ïgai Diuxi sai kïkiba ïgai dai jii xako darajatadai go mamaatïrdamigadï dai ïgai kokoi. Ayitadai soi ïrhiaragai xi kaxkïdï kokoi ïgai. Dai Suxi potïtïdai,
—¿Ix tuixi kokosïi aapimï? Bapaigibïrai tudu dai abïr daanïda Diuxi sai gïn soiñana sai mai gïpiïrï surhigiagi aapimï— itïtïdai.

Kia ñokaitadai go Suxi aidï dai ami ayi mui odami dai bhaitïki imïitadai go Udaxi aidï. Dai miadïrï ayi ïgai Suxi dai usupiga agai kaamadïrï. Idi Udaxi ïr ïmoko go bhaibuxtama dan goka mamaatïrdamigadï Suxi.
Dai Suxi potïtïdai,
—Aapi Udaxi, aanï ïr Diuxi Otosadï ix makïdï ïmo kïïrhi busai ¿Dai ïmo usupigaikïdï pïx gin tïïgida agai go gaa?— itïtïdai.
Daidi go mamaatïrdamigadï go Suxi potïtïdai aidï,
—¿Gïr Nukadakami, agai pïxi xi bui surhigia aatïmï ïgai gïr mamaaxtaigakïdï?— itïtïdai.
Dai ïmadutai go mamaatïrdamigadï bui gïi go pioñigadï go dadaxdadami bhaitï kïakamigadï ix makïdï ami gasaagida imïitadai. Dai maxtaikïdï guikuta ïgai naakadï sïïrhixapadïrï.
Dai Suxi potïtïdai,
—Dagitobïrai, maiti abïr pobuada— itïtïdai.
Dai Suxi mïï taata naakadï go pioñi dai mos taatakai duayi gobai.
Dai ami gukatadai dadaxdadami bhaitï gukakamigadï dai sandadaru ix makïdï nukadai go gïï kiupai. Dai ami gukatadai bhaitï gukakamigadï go judidiu ïpï. Bïïxkatai ïgai ami dadatadai bui surhiga agaitai go Suxi. Dai Suxi potïtïdai,
—¿Їmo omarhigami mïx gin ïrhidi dai bukatai mamaaxtai dai uxi ixtukïdï gin bui surhigiagi gin bhïiyi agaitai? Bïïx tasai gïn ïmadï dakana aanï go gïï kiupiana di. Kïï bhaigakatadai aapimï xi ami gin bhïiyagi tudu— itïtïdai. —Dïï maiti gin taata aapimï ami. Dai xibi gia ka ayi xuduku xi gïn maa oigaragai Diuxi xi gin bhïiyagi. Dai ka maa ïgai ïpï go diabora oigaragai ix makïdï tukapi dukai gatïanïi— itïtïdai.

Dai go odami bhïiyi go Suxi dai baidaja kiidïrï go tïanïdamigadï go dadaxdadami. Dai go Piduru oidi bhai mïïkaxdïrï. Dai ka aïkai go odami ami kiiyïrï sai náí ïgai táí ami tuixikana dai ami xikorhi daraiba. Dai go Piduru ami gasaagida dakatadai ïpï. Dai ïmo kuxñirui tïï go Piduru ami taikobai dakatai ïgai. Dai kabami nïnïidi daidi ikaiti,
—Idi kïïrhi ïmadï dakatadai go ix makïdï gï bhïitu— ikaiti.
Dïï go Piduru potïtïdai,
—Aapi oki, maita an maatï aanï ïgai— itïtïdai.
Dai laachkïdï ïmai kïïrhi tïï daidi potïtïdai,
—Aapi ïr ïmo aduñdï go maixpikïdï— itïtïdai.
Dai go Piduru potïtïdai,
—Cho. Xadïrï— itïtïdai.
Dai bhodïrï parï ïmo horakïdï sai ïpï ïmai kïïrhi ix makïdï ami dakatadai ikaiti,
—Gia ïr buaboi sai idi kïïrhi urabakatadai go maixapikïdï. Maatiga maaxi sai gobai ïr Galileañdïrï oidakami ïpïan dukai go maixapikïdï di— ikaiti ïgai aagaitai go Piduru.
Dai Piduru potïtïdai,
—Cho aapi kïïrhi— itïtïdai. —Maita an maatï aanï tomarhi ix tïiya ïrhidi aapi— itïtïdai.
Dai kia ñokaitadai go Piduru bai kujui takuku kïrhiadï. Daidi go Suxi bui nïnïaba go Piduru aidï. Daidi go Piduru gï tïgito ix tïtïdaitadai Gïr Nukadakami ïgai, sai ïkioñdïrï aagiditadai sai mai kia kujukai takuku sai baikako mai maaxi aaga agai ix maatï. Dai busai go Piduru abhiadïrï dai suakimi kabami soi gï ïldakai.
Daidi go kïkïïrhi ix makïdï nukadakatadai go Suxi gïikarai dai parunaitadai. Iiña ïgai bupuidï dai bhodïrï kapixaiña buibasodï daidi ikaitiña,
—Maatïñi xorai gï gïïgï— ikaitiña.
Dai mui naana maaxi surhigai ïgai kabami galnaaxi ñoki.

Dai ka maaxiko oidigi sai gïn ïmpagi go bhaitï gukakamigadï go judidiu ïmadï go tïtïanïdamigadï go dadaxdadami dai go tïtïgiadami sïïrhikami. Gïn ïmpagi ïgai dai ami baan gï kïïsatu go Suxi ïgai buidïrï. Dai potïtïdai ïgai go Suxi,
—Gïr aagidañi ix bhai aapi ïr Diuxi Otosadï Tïanïdami— itïtïdai.
Dai Suxi potïtïdai,
—Xadïrï gin buaboitudana aapimï tomaxi gïn aagidi aanï— itïtïdai. —Dai ix gïn tïkakagi aanï ixtumaxi, maiti gin aagida antaada aapimï ïpï— itïtïdai. —Dïï gia aanï aagai sai Diuxi Otosadï aanï ix makïdï kïïrhi busai dai xibi bhaitiakoga sïïrhixapadïrï dakamu aanï Diuxi biakatai aanï ïmo sïïrhikami— itïtïdai.
Dai go gaa potïtïdai,
—¿Aidï gia pokaiti aapi saidi aapi ïr Diuxi Maradï?— itïtïdai.
Dai Suxi potïtïdai,
—Podukai aba ixdukai aagai aapimï. Aanï ïr Diuxi Maradï— itïtïdai.
Daidi go gaa itïi aidï,
—¿Duna aatïmï jaa nïijadami xorai aagagi sai soimaaxi idui gobai? Ka bïïxkatai aatïmï kaï ix ka gïpiïrï gïi gobai ïïgi ñokidïkïdï di— ikaiti ïgai.

استمع إلى Lukas 22