Currently NT is Published. OT is in progress

Bagheli

यीसु के बपतिस्मा के बाद पबित्र आत्मा उनहीं सुनसान जघा माहीं लइगा, जउने सइतान से उनखर परिच्छा होय। अउर यीसु, चालिस दिन अउर चालिस रात बिना खाए पिए रहे हँय, तब उनहीं भूँख लाग। तबहिन परिच्छा लेंइ बाला सइतान उहाँ आबा अउर कहिस, “अगर तूँ परमातिमा के लड़िका आह्या, त ईं पथरन से कहि द्या, कि रोटी बन जाँय।” तब यीसु ओही जबाब दिहिन, “पबित्र सास्त्र माहीं लिखा हय:
‘मनई केबल रोटिन भर से जिन्दा न रही, बलकिन परमातिमा के मुँहे से निकरँइ बाले हरेक बचन से जिअत रही।”
पुनि सइतान उनहीं पबित्र सहर यरूसलेम माहीं लइगा, अउर मन्दिर के गुम्मट माहीं ठाढ़ किहिस,
अउर उनसे कहिस, “अगर तूँ परमातिमा के लड़िका आह्या, त अपने-आप काहीं इहाँ से नीचे गिराय द्या, काहेकि पबित्र सास्त्र माहीं इआ लिखा हय: ‘परमातिमा तोंहरे खातिर अपने स्वरगदूतन काहीं हुकुम देइहँय, अउर ऊँ पंचे तोंहईं तुरन्तय लोक लेइहँय; कहँव अइसा न होय कि तोंहरे गोड़ेन माहीं पथरा से चोंट लगि जाय’।” तब यीसु ओही जबाब दिहिन, कि “पबित्र सास्त्र माहीं इहव लिखा हय, कि: ‘तूँ अपने प्रभू परमातिमा के परिच्छा न किहा’।”
पुनि सइतान यीसु काहीं एकठे खुब ऊँच पहार माहीं लइगा, अउर संसार के सगला राज अउर ओखर बैभव देखाइके, उनसे कहिस, “अगर तूँ हमरे गोड़न गिरिहा, त इआ सगला हम तोहईं दइ देब।” तब यीसु ओसे कहिन, “हे सइतान हमसे दूरी होइजा, काहेकि पबित्र सास्त्र माहीं लिखा हय, कि
‘तूँ अपने प्रभू परमातिमा के गोड़न गिरा, अउर केबल उनहिन के अराधना करा’।” तब सइतान उनखे लघे से चला ग, अउर देखा, स्वरगदूत आइके यीसु के सेबा-सहाई करँइ लागें।


जब यीसु सुनिन कि यूहन्ना बपतिस्मा देंइ बाले पकड़बाय दीनगे हँय, तब ऊँ गलील प्रदेस माहीं चलेगें। अउर नासरत गाँव काहीं छोंड़िके, यीसु कफरनहूम सहर माहीं जाइके रहँइ लागें, जउन झील के किनारे जबूलून अउर नपताली लोगन के इलाका माहीं हय। जउने उआ बचन पूर होय, जउन परमातिमा के सँदेस बतामँइ बाले यसायाह कहिन रहा हय।
कि
“जबूलून अउर नपताली लोगन के इलाका, झील के गइल से यरदन नदी के उआ पार गैरयहूदी लोगन के गलील प्रदेस।
अउर जउन मनई अँधिआर माहीं जीबन जिअत रहे हँय ऊँ पंचे महान जोति देखिन; अउर जउन मउत के छाया माहीं रहत रहे हँय, उनखे ऊपर जोति चमकी।”
उहय समय से यीसु इआ प्रचार करब सुरू कइ दिहिन, कि “पाप करब छोंड़िके परमातिमा के लघे आबा, काहेकि स्वरग के राज लघेन आइगा हय।”


जब यीसु गलील प्रदेस के झील के किनारे-किनारे जात रहे हँय तब ऊँ दुइठे भाइन काहीं देखिन अरथात समौन जेखर नाम पतरस घलाय रहा हय, अउर उनखे भाई अन्द्रियास काहीं झील म जाल डारत देखिन; काहेकि ऊँ पंचे मछुआरा रहे हँय। अउर यीसु उनसे कहिन, “हमरे पीछे चले आबा, त हम तोंहईं मनइन काहीं परमातिमा के लघे लइ आमँइ बाला बनाउब।” तब ऊँ पंचे तुरन्तय जालन क छोंड़िके यीसु के पीछे चल दिहिन।
अउर उहाँ से कुछ दूरी चले के बाद, यीसु जब्दी के लड़िका याकूब अउर ओखे भाई यूहन्ना काहीं, अपने बाप के साथ नाव माहीं चढ़े जालन काहीं सुधारत देखिन; तब उनहूँ काहीं घलाय बोलाइन। अउर ऊँ पंचे तुरन्तय नाव अउर अपने बाप काहीं छोंड़िके यीसु के पीछे चल दिहिन।
अउर यीसु सगले गलील प्रदेस माहीं जाइ-जाइके उनखे सभाघरन माहीं उपदेस देत अउर स्वरगराज के खुसी के खबर के प्रचार करत, अउर उहाँ के मनइन के हरेकमेर के बिमारिन अउर कमजोरिन काहीं दूर करत रहिगें। अउर सगले सीरिया देस माहीं उनखर नाम मसहूर होइगा; एसे खुब मनई बिमारन काहीं जउन अनेकव प्रकार के बिमारिन से दुख माहीं परे रहे हँय, अउर जउनेन माहीं बुरी आत्मा रही हँय, अउर जिनहीं मिरगी आबत रही हय, अउर जिनहीं लोकबा मारे रहा हय, उन सगलेन काहीं यीसु के लघे लइ आएँ, तब यीसु उनहीं पंचन काहीं नीक कइ दिहिन। अउर गलील प्रदेस से अउर दिकापुलिस से अउर यरूसलेम सहर से अउर यहूदिया प्रदेस से अउर यरदन नदी के दुसरे पार से बड़ी भारी भीड़ उनखे पीछे चल दिहिस।

استمع إلى मत्ती 4