Matai 1

Yesu Kerisi Yi Degwa

(Lk 3:23-38)

1 # 1Kro 17:11; Jen 22:18 Yesu Kerisi yi degwa lo sënë: Yesu saga sën Davit* yi mewis, geDavit saga sën Abraham yi mewis.

2Abraham ḳo Isaak, gIsaak ḳo Yakop, geYakop saga sën ḳo Yuda losho ari lo.

3 # Jen 38:29-30; Rut 4:18-22 GeYuda ḳo Peres luho avëhnö Sera, geluho ataj Tamar.

GePeres ḳo Hesron.

Ga, Hesron ḳo Ram.

4Ga, Ram ḳo Aminadap, gAminadap ḳo Nason, geNason ḳo Salmon.

5 # Rut 4:13-17 GeSalmon ḳo Boas, gata Rahap.

GeBoas ḳo Obet, gata Rut.

Ga, Obet ḳo Yese, 6#2Sml 12:24geYese ḳo Mehö-los-bengö Davit, geDavit ḳo Solomon, gata sën Uria venë wirek lo.

7Loga, Solomon ḳo Rehoboam, geRehoboam ḳo Abiya, gAbiya ḳo Asa.

8Ga, Asa ḳo Yosapat, geYosapat ḳo Yoram, geYoram ḳo Usia.

9Ga, Usia ḳo Yotam, geYotam ḳo Ahas ga, Ahas ḳo Hesekia.

10Ga, Hesekia ḳo Manase, geManase ḳo Amos, gAmos ḳo Yosia.

11 # 2Kin 24:14-15; 2Kro 36:10; Yer 27:20 GeYosia ḳo Yekonia losho ari lo, lob loḳ buk saga alam Babulon* deduu alam Israel vahi medeḳo sir ya denedo hir nyëġ.

12 # Esr 3:2 Deya denedo nyëġ böp Babulon* lom Yekonia ḳo nalu Sealtiel.

Lob Sealtiel ḳo Serubabel, 13lob Serubabel ḳo Abiut, gAbiut ḳo Eliakim, gEliakim ḳo Asor.

14GAsor ḳo Sadok, geSadok ḳo Akim, gAkim ḳo Eliut.

15GEliut ḳo Eleasar, gEleasar ḳo Matan, geMatan ḳo Yakop ngwë.

16GeYakop sënë ḳo Yosep sën Maria regga, lob Maria saga sën ḳo Yesu, sën denenër bë Kerisi* lo.

17Nebë saga lob sir pin Abraham yi mewis sir, beyam verup loḳ Davit saga, besir yu nemadluho-bevidek-lubeluu. Gevu Davit beyam verup loḳ buk sën deḳo sir ya denedo nyëġ böp Babulon*, saga sir yu nemadluho-bevidek-lubeluu. Lob vu buk sën deḳo sir ya denedo nyëġ böp Babulon* beverup loḳ Kerisi*, og sir yu nemadluho-bevidek-lubeluu nebë saga ving.

Maria Ḳo Yesu Kerisi

(Lk 2:1-7)

18 # Lk 1:27,35 Yesu ata ḳo yi lo degwa nebë sënë: Deggooin ata Maria raḳ in jaḳ vu Yosep, rëḳ luho yö nahën denedo, log Maria nalu loḳ raḳ Anon Vabuung. 19Yosep sën deggooin raḳ bë natu regga lo, yi mehö netetuu aggata niröp, lob su bë rëḳ nanër avëh yi ġaġek nimumsën ranġah vu alam pin rë. Gaḳ vonġin bë bepul Maria vunsën. 20Yosep nahën kwa nevo nebë sënë, loḳ Mehöböp yi angër yam vu yi loḳ pesepsën benër vu bë, “Davit* yi mewis Yosep-e! Gwenġo! Su nim dëlin Maria! Gaḳ gweḳo nök natu venëm. Hurmahen sën loḳ nare ayo lo, saga Anon Vabuung vonġ vu yi. 21#Lk 1:31Rëḳ geḳo nalu aġuu lom ġenanër arë nabë Yesu. In rëḳ geḳo yi alam vër in hir nipaya nyëvewen.”

22Nġaa pin sënë anon raḳ yoh vu ġaġek sën Mehöböp vonġ verup mehö-nenër-ġaġek-ranġahsën Yesaya avi lo nebë:

23 # Yes 7:14 “Ham gwenġo rë! Rëḳ avëh avö nalu doḳ, lom geḳo nalu aġuu. Lob rëḳ ġenanër arë nabë Emanuel.”

Arë sënë degwa nebë ‘Anutu nedo ving hil’.

24Lob Yosep ggëp mepesep ggovek gekedi raḳ, lom vonġ yoh vu sën Mehöböp yi angër nër vu yi lo. Ya beḳo avëh netu venë, 25#Lk 2:21rëḳ su neya aggata ving yi rë, gema rot, beya verup loḳ buk sën venë ḳo nalu aġuu lo. Lob tahi ggev raḳ nebë Yesu.

Currently Selected:

Matai 1: bzh

ማድመቅ

Copy