San Lucas 23

Qui³cao⁴-le⁴ Pilato Jesús

(Mt. 27:1-2, 11-14; Mr. 15:1-5; Jn. 18:28-38)

1Ji³so¹tjen⁴ nca³tsˀi³ cho⁴ta⁴-ve⁴, qui³cao⁴-le⁴ Pilato Jesús. 2Tsa³cˀe¹tsˀia⁴cao⁴ nca³ tsa³ca¹nqui³, qui³tso²: Je²-vi⁴ coan³sjai³-na³jin⁴ nca³ xin²ntia⁴² fi²cao⁴ na⁴xi⁴na³nta¹-na⁴jin⁴, nca³ vˀe¹chjoa²-na³jin⁴ nca³ vˀai²-lai⁴jin⁴ taon⁴sa¹ César, nca³ tso² nca³ ti⁴je² ni¹ Cristo je² cho⁴ta⁴ti¹tjon². 3Cˀia⁴ Pilato qui³sco²na³nqui³-le⁴: A³ ji³ ni¹³ cho⁴ta⁴ti¹tjon²-le⁴ cho⁴ta⁴ judíos. Cˀia⁴ Jesús qui³tso²-le⁴: Cˀoa⁴tjin¹ xi³ si³-ve⁴. 4Cˀia⁴ Pilato qui³tso²-le⁴ cho⁴ta⁴ti¹tjon²-le⁴ na⁴ˀmi³ cao⁴ cho⁴ta⁴na⁴xi⁴na³nta¹: Ni⁴jme³-jin² je¹ xi³ ma³sjai³-na³ tˀa³tsˀe⁴ cho⁴ta⁴ je²-vi⁴. 5To⁴nca³ qui³nchja⁴qui³ti³-ni¹, qui³tso²: Vˀe¹tsˀia⁴ cjoa⁴-si³ nca³ va³co¹ya³ nca³qui³jnta² na³nqui³ Judea, vˀe¹tsˀia⁴cao⁴-cjoan²ni³ na³nqui³ Galilea sa³ˀnta³ i⁴-vi⁴.

Qui³cao⁴-le⁴ Herodes Jesús

6Cˀia⁴ nca³ Pilato qui³nčhˀoe¹ je² en¹ xi³ Galilea tso²-ve⁴, qui³tsi²na³nqui³-le⁴ tsa² je² cho⁴ta⁴-ve⁴ nchja⁴-ni³ Galilea. 7Cˀia⁴ nca³ nta³ ve³ nca³ vˀa³cao⁴-le⁴ cjoa⁴te¹xo³ma³-le⁴ Herodes, Pilato qui³si³ca³sen¹con³-le⁴ je² Jesús, nca⁴ Herodes cˀoa⁴²-ti⁴ ya⁴ ti¹jna³ Jerusalén coi³ ni⁴čhjin³-ve⁴. 8Cˀia⁴ nca³ Herodes tsa³ve³ Jesús, cjai¹nca³ tsjoa³ coan³-le⁴ nca³ coa²tse³ me³-le⁴ nca³ scoe⁴xcon³ Jesús, nca⁴ nˀion¹ tse³ cjoa⁴ qui³nčhˀoe¹ xi³ tˀa³tsˀe⁴. Ti¹co³ya³-le⁴ nca³ Cristo coa⁴co²-le⁴ jnco³ cjoa⁴xcon¹. 9Qui³tsi²na³nqui³-le⁴ tˀa³tsˀe⁴ ncjin² cjoa⁴, to⁴nca³ ni⁴to⁴jme³-jin² xi³ qui³nchja⁴ Jesús. 10Cˀia⁴ cho⁴ta⁴ti¹tjon²-le⁴ na⁴ˀmi³ cao⁴ cho⁴ta⁴ scribano xi³ tsa³ca³tio² ya⁴-ve⁴, tjio¹va¹nqui³. Cjai¹nca³ qui³ti²ˀa². 11To⁴nca³ Herodes cao⁴ so³nta²do⁴-le⁴ nˀion¹ taon³ tsa³ve³ Cristo. Tsa³qui³jno²que³. Qui³si³cˀa³cja¹ jnco³ na³jño³jnčho³ xi³ nˀion¹ nta³ cji³, cˀia⁴ qui³si³ca³sen¹ nqui²jnco³cˀa²-le⁴ Pilato. 12Ti⁴coi³-ni³ ni⁴čhjin³ coan³ mi²yo⁴-le⁴ xi¹ncjin¹ Pilato cao⁴ Herodes, nca³ nca³sˀa⁴ co²ntran⁴ tjio¹-le⁴ xi¹ncjin¹.

Jesús a³xo⁴ Barrabás

(Mt. 27:15-26; Mr. 15:6-15; Jn. 18:38—19:16)

13Cˀia⁴ Pilato qui³nchja⁴ma³ña³-le⁴ cho⁴ta⁴ti¹tjon²-le⁴ na⁴ˀmi³ cao⁴ cho⁴ta⁴xa¹, cˀoa⁴ cao⁴ na⁴xi⁴na³nta¹. 14Qui³tso²-le⁴: Ca²ni²qui³ncha¹va³sen³-nao¹³ je²-vi⁴ jo³-ni³ tsa² cho⁴ta⁴ xi³ xin²ntia⁴² fi²cao⁴ na⁴xi⁴na³nta¹. Coe⁴-ni³, an³ ca²si³tso²ˀa³ nqui³xcon³ nca³ jon²-vi⁴, ni⁴jme³-jin² je¹ xi³ ca²ma³sjai³-na³ xi³ tˀa³tsˀe⁴ cho⁴ta⁴, jña³-le⁴ je¹ xi³ ti³ma³cja³nquio³. 15Ni⁴ nta³ tsa² Herodes ca²ma³sjai³-le⁴, nca⁴ Herodes qui³si³ca³sen¹ nqui²jnco³cˀa²-no³ Jesús. Coe⁴-ni³, ni⁴jme³-jin² qui³sˀin³ xi³ va³quin²-le⁴ cjoa⁴vi³ya³. 16Coa³-cjoan²la²le⁴, cˀia⁴ sca³ni³nte¹³. 17Tjin¹ne²-le⁴ nca³ si⁴²cˀe¹jna³ntai¹ jnco³ cho⁴ta⁴ xi³ ti¹jna³nˀion¹ nca³ xqui⁴ sˀoi¹. 18To⁴nca³ cho⁴ta⁴na⁴xi⁴na³nta¹ to⁴jnco³ qui³squi³ˀntia¹ nca³tsˀi³: Chja⁴ˀa²xin² je²-vi⁴, ti⁴cˀe¹jna³ntai¹-na³jin⁴ Barrabás. 19Je² cho⁴ta⁴-ve⁴ qui³cha³ni² nto⁴ya¹ xi³ to⁴cjoa⁴-le⁴ cjoa⁴-si³ xi³ qui³tjo²mi³tjen⁴ ya⁴ na⁴xi⁴na³nta¹-ve⁴, cˀoa⁴ nca³ cˀen³ qui³si³cˀen³. 20Cˀia⁴ Pilato qui³nchja⁴ nqui²jnco³cˀa²-le⁴, nca⁴ me³-le⁴ nca³ si⁴²cˀe¹jna³ntai¹ Jesús. 21To⁴nca³ je² tsa³cˀe¹jta³ nqui²ntia³: Cro² tja³tˀai³, cro² tja³tˀai³. 22Cˀia⁴ Pilato qui³tso²-le⁴ xi³ ma³jan²-ni³ cˀa³: Cˀoa⁴ jme¹ cjoa⁴tsˀen⁴ qui³sˀin³-ˀni³. Ni⁴jme³-jin² je¹ xi³ coan³sjai³-na³ xi³ tˀa³tsˀe⁴ xi³ va³quin²-le⁴ cjoa⁴vi³ya³. Coa³-le⁴ tso²cˀoa⁴, sca³ni³nte¹³-ˀni³. 23To⁴nca³ to⁴jo³ nˀion¹ tsa³cˀe¹jta³qui³ti³-nca¹ni³ nca³ cro² sˀe⁴tˀa³ Jesús. Jta⁴-le⁴ cho⁴ta⁴ cao⁴ tsˀe⁴ cho⁴ta⁴ti¹tjon²-le⁴ na⁴ˀmi³ qui³njen²-le⁴. 24Cˀia⁴ Pilato tsa³ca³te¹xo³ma³ nca³ ca²tji³tjo³son² jña³-le⁴ xi³ qui³si³je¹ nca³ je². 25Qui³si³cˀe¹jna³ntai¹-le⁴ je² cho⁴ta⁴ xi³ qui³cha³ni² nto⁴ya¹ xi³ to⁴cjoa⁴-le⁴ cjoa⁴si³ xi³ ji³tjo³mi³tjen⁴, cˀoa⁴ nca³ cˀen³ qui³si³cˀen³. Cˀia⁴ qui³sca³ni¹tˀa³-le⁴ Jesús nca³ cˀoa⁴si⁴²cao⁴ jo³-sˀin² me³-le⁴.

Qui³ jña³ sˀe⁴tˀa³ cro²

(Mt. 27:32-56; Mr. 15:21-41; Jn. 19:17-30)

26Cˀia⁴ nca³ qui³cao⁴ Jesús, qui³tsoa³ jnco³ cho⁴ta⁴ xi³ Simón ˀmi², xi³ cho⁴ta⁴ cireneo, xi³ ti¹nčhoa¹-ni³ nqui³chao³. Tsa³ca¹jna³ne²-le⁴ cro² nca³ coai⁴cao⁴ jton³-le⁴ Jesús. 27Qui³tjen⁴nqui³-le⁴ ncjin² cho⁴ta⁴ na⁴xi⁴na³nta¹ cao⁴ ya¹nchjin¹ xi³ tjio¹si¹jtsin³tˀa³ ni⁴ma⁴-le⁴, xi³ tjio¹cji³ˀntia¹va³. 28To⁴nca³ Jesús qui³si³cˀo¹fa³ya³tˀa³-le⁴, qui³tso²-le⁴: Ja⁴xti³ ya¹nchjin¹ Jerusalén, a³li² an³ chi¹ˀnta¹ntjai²-nao¹³, to⁴nca³ chi¹ˀntao¹³ xi³ ti⁴tˀa³tsaon⁴³-nio³ cao⁴ xi³ tˀa³tsˀe⁴ ˀnti¹xti³-no³. 29Coe⁴-ni³ cjoa⁴ˀai¹ ni⁴čhjin³ cˀia⁴ nca³ coi⁴tso⁴: Jo¹ to⁴nta³-le⁴ xi³ ˀnti⁴, je² tsˀoa⁴ xi³ tsi² ˀnti¹ tsa³cˀa³, cˀoa⁴ je² chi³qui³ xi³ tsi² ˀnti¹ qui³si³jcha¹. 30Cˀia⁴ cˀoe⁴²tsˀia⁴cao⁴ nca³ coi⁴tso⁴-le⁴ ni³nto³: Ca²ta³ca³ne²son²-na³jin⁴, cˀoa⁴ coi⁴tso⁴-le⁴ xi⁴nqui⁴ tja³jtsa³ˀma³-na³jin⁴. 31Cˀia⁴ tsa² cˀoa⁴²sˀin⁴² je² cjoa⁴, cˀia⁴ nca³ xcoen¹ cjoan³ ya¹, jme¹ xi³ coan⁴ cˀia⁴ nca³ qui³xi². 32Cˀoa⁴-ti⁴ qui³cao⁴tˀa³ nqui²jao² cho⁴ta⁴ xi³ chˀao³ cjoan³, nca³ si⁴²cˀen³. 33Cˀia⁴ nca³ ja³ˀai³ ˀnte³ jña³ nca³ ˀnte³jco⁴cˀen³ ˀmi², tsa³ca¹tˀa³ cro² ya⁴-ve⁴, cˀoa⁴ cao⁴ cho⁴ta⁴ xi³ chˀao³ cjoan³, jnco³ xi³ nca³qui²xi⁴-le⁴, cˀoa⁴ xi³jnco³ nca³scon¹-le⁴. 34Cˀia⁴ Jesús qui³tso²: Nˀai³, ti⁴cha³tˀa³-lai⁴ nca³ tsi² coi³ ve³ jme³ xi³ sˀin¹. Qui³si³cˀa³vi¹ na³jño³-le⁴, qui³si³sca¹cao⁴ ˀya³-ni³ xi³ cˀoa⁴cao⁴-le⁴. 35Cho⁴ta⁴ na⁴xi⁴na³nta¹ tjio¹co³tsen³. Cho⁴ta⁴xa¹ tjio¹vi³jno²que³, qui³tso²: Xi³ cja⁴ˀai¹ tsa³cˀa³sje³ntjai², ca²ta³vˀa³sje³ntjai² yao³-le⁴ nca³ ti⁴je²-ni³, cˀia⁴ tsa² je²-vi⁴ xi³ Cristo xi³ tsˀe⁴ Ni³na¹, xi³ Ni³na¹ tsa³cja³ˀa¹jin³. 36Je² so³nta²do⁴-ve⁴ qui³tsjoa³tˀain³, ji³cho²nčhˀoe² ji³cho²cao⁴-le⁴ vinagre. 37Qui³tso²-le⁴: Cˀia⁴ tsa² ji³ ni¹³ cho⁴ta⁴ti¹tjon²-le⁴ cho⁴ta⁴ judíos, chˀa⁴sje³ntjai² yao³-li⁴ nca³ ti⁴ji³-ni³. 38Cˀoa⁴-ti⁴ tji¹tˀa³son²-le⁴ jnco³ en¹ cao⁴ letra griega, latina, cao⁴ hebrea xi³ tso²: Je²-vi⁴ cho⁴ta⁴ti¹tjon²-le⁴ cho⁴ta⁴ judíos. 39Jnco³ xi³ jao²-ve⁴ xi³ chˀao³ cjoan³, xi³ cjio³ tjen⁴vˀa³nqui³tˀa³-le⁴, qui³nchja⁴ti³cao⁴: A³ tsi² tsa² ji³ ni¹³ Cristo, chˀa⁴sje³ntjai² yao³-li⁴ nca³ ti⁴ji³-ni³, cˀoa⁴ cao⁴ jin⁴-jin⁴. 40Xi³jnco³ qui³nchja⁴ti³cao⁴: A³ tsi² jcon³-lai⁴ Ni³na¹, nca⁴ ti⁴coi³-ni³ cjoa⁴ñˀain³ xi³ ti¹sˀe³-li². 41Ña¹-vi⁴ nta³ va³quin²-na¹ nca³ ti¹vˀai²-na¹ cjoa⁴ñˀain³, nca³ chjoe¹-nia¹ jme³ xi³ va³quin²-le⁴ xi³ qui³nˀian², to⁴nca³ je²-vi⁴ ni⁴jme³-jin² xi³ chˀao³ qui³sˀin³. 42Cˀoa⁴qui³tso²-le⁴ Jesús: Ti⁴cja³ˀai³tsjen³-nai¹³ cˀia⁴ nca³ cjoa²ˀai⁴coai⁴ cjoa⁴te¹xo³ma³-li⁴. 43Cˀia⁴ Jesús qui³tso²-le⁴: Cjoa⁴qui²xi⁴ xi³ xin³-le²³, ntˀai⁴-vi⁴ntai⁴ coi⁴jna³cao⁴-nai¹³ jña³ na³sca¹ chon³ ncˀa³jmi³. 44Cˀia⁴ nca³ ji³cho²ca³ nchi³sen³-la⁴, coan³njion² nca³qui³jnta² son³ˀnte³ sa³ˀnta³ las tres nca³ ma³xon². 45Je² tsˀoi¹ coan³njion², cˀoa⁴ qui³xi³jnta²jen³ va³sen³ je² na³jño³ xi³ qui³tjen⁴chjoa² nca³va³sen³-le⁴ yo⁴nco⁴. 46Cˀia⁴ Jesús nˀion¹ qui³nchja⁴, qui³tso²: Nˀai³ ja⁴ya³ ntsai⁴ vˀe³jna²³ espíritu-na⁴ ntˀai⁴. Cˀia⁴ nca³ je³cˀoa⁴qui³tso² qui³cha³jta³. 47Cˀia⁴ nca³ je² xi³ nca³jco⁴-le⁴ so³nta²do⁴ tsa³ve³ je² cjoa⁴ xi³ coan³, tsˀa³sje³je³ya³ Ni³na¹, qui³tso²: Xi³ cjoa⁴qui²xi⁴ je² cho⁴ta⁴ je²-vi⁴ cho⁴ta⁴cjoa⁴qui²xi⁴ ni¹. 48Je² nca³tsˀi³ cho⁴ta⁴xcon¹ xi³ tjio¹va³sen³ je² cjoa⁴ je²-vi⁴, tjio¹co³tsen³-le⁴ jme³ xi³ coan³, qui³ nqui²ntia³ ni³ˀya³-le⁴, jo³ to⁴tjio¹si¹jtsin³tˀa³ ni⁴ma⁴-le⁴. 49To⁴nca³ cjin³ tjio¹co³tsen³-le⁴ cjoa⁴ je²-vi⁴ nca³tsˀi³ xi³ ve³xcon³ Jesús cao⁴ ya¹nchjin¹ xi³ ji³nčhoa³tjen⁴nqui³-ni³le⁴ Galilea sa³ˀnta³ Jerusalén.

Qui³sca³ni¹sˀen³nqui³ tsjo¹

(Mt. 27:57-61; Mr. 15:42-47; Jn. 19:38-42)

50Coe⁴-ni³ jnco³ cho⁴ta⁴ xi³ José ˀmi², xi³ tsˀe⁴ Arimatea jnco³ na⁴xi⁴na³nta¹-le⁴ Judea, xi³ tsˀe⁴ cho⁴ta⁴jchi¹nca³. Je² ni¹ jnco³ cho⁴ta⁴nta³, cˀoa⁴ cho⁴ta⁴cjoa⁴qui²xi⁴. 51Je² li²coi³ tjin¹jnco³-le⁴con³ cjoa⁴ xi³ tsa³cˀe¹nta³, ni⁴je²-jin² cjoa⁴ xi³ qui³sˀin³. Cˀoa⁴ je² qui³sco²ya³-le⁴ cjoa⁴te¹xo³ma³-le⁴ Ni³na¹. 52Je²-vi⁴ ji³cho²con³-le⁴ Pilato, qui³si³je¹-le⁴ yao³-le⁴ Jesús. 53Cˀia⁴ nca³ je³tsa³cˀa³jen⁴tˀa³ cro², sábana tsa³cˀe¹jte¹jin³. Qui³sca³ni¹sˀen³nqui³ tsjo¹ xi³ qui³tjo³ˀa²cja¹ na⁴xi⁴, ya⁴ jña³ nca³ ni⁴-sa³ ˀya³-jin² xi³ sˀe³jna³ya³. 54Coi³ ni⁴čhjin³ víspera-le⁴ sˀoi¹ pa²xco⁴, cˀia⁴ nca³ ja⁴me³ tsa³cˀe¹tsˀia⁴ ni⁴čhjin³ ni²cja¹ya³. 55Je² ya¹nchjin¹ xi³ ña³tjen⁴ ji³nčhoa³-ni³ Galilea, qui³tjen⁴nqui³-le⁴, qui³sco²tsen³ tsjo¹-ve⁴ cˀoa⁴ jo³-sˀin² nca³ qui³sˀe³jna³ yao³-le⁴. 56Qui³-ni³, tsa³ca³tio²nta³ xqui³ xi³ na⁴sca¹ njen⁴ cao⁴ xqui³xi¹ne¹, cˀoa⁴ ni⁴čhjin³ ni²cja¹ya³ qui³si³cja¹ya³ jo³ tso² cjoa⁴te¹xo³ma³.

Currently Selected:

San Lucas 23: mauDBL

ማድመቅ

Copy