MATEO 17

Gu Jesuus na maakam tuꞌm jup jum duñiaꞌ gu buibsaꞌn gio gu jajannulhiꞌñ

(Mr. 9:2‑13; Lk. 9:28‑36)

1Baꞌ gatuuk jɨꞌk xijum maaꞌn jurniꞌñ kɨꞌn ma jii gu Jesuus maaꞌn kap na paiꞌr oidhaꞌ taꞌm nax ioꞌm jir tɇꞌkob, xi ja baidhak baik gu noonbiꞌñ, moo gu Peegro, gio gu Jakoobo, gio baꞌ gu Juan jaꞌnniꞌñ dhiꞌ jɨꞌ dhi Jakoobo. 2Baꞌ na mɨt paiꞌ dhuuk bhɨjɨmmɨ ba tɨɨtɨs daam dɨr gu oidhaꞌ, jotmodaꞌ maakam tuꞌm jup jum duu gu buibsaꞌn gu Jesuus, jaꞌp tuꞌm jum maaxiꞌñ na jax gu tanoolh, gio gu jajannulhiꞌñ joidham jix chooto totbikdam jup jum duu, jaꞌp tuꞌm jum maaxiꞌñ na jax gu tuꞌ noꞌ mɨichdhix na joidham tanoordaꞌ. 3Baꞌ ba ja tɨɨ mɨt gu noonbiꞌñ gu Jesuus gook gu jaꞌtkam na mɨt miꞌ bam maax, maaꞌn jir diꞌ gu Moisees, maaꞌn baꞌr Eliiyas. Baꞌ miꞌ guꞌkat tu aꞌgiꞌñ am gu Jesuus nam muiꞌ xi chɨ nɨiꞌñ. 4Baꞌ gu Peegro jotmodaꞌ cham jum matdaꞌ ɨr muiꞌ ba ñio, jup tɨtda gu Jesuus:

―Umri moor am jiñ jaduuñ nach kapbhaiꞌ yaꞌp tuꞌiiꞌ aap jum bui. Jɨꞌmaꞌn jach jam tuttuidhaꞌ gu oꞌnam, maaꞌn moor aap gaꞌn kaꞌ, maaꞌn baꞌr Moisees gaꞌn kaꞌ, maaꞌn baꞌr Eliiyas gaꞌn kaꞌ.

5Baꞌ na miꞌ puiꞌ ka kaiꞌch gu Peegro, jotmodaꞌ bhaiꞌ ji chɨbgɨr, jix chutuap tum duu miꞌ nam paiꞌp tuꞌiiꞌ. Baꞌ bhɨjɨ dɨr jaꞌp tɨbaaꞌñ chaꞌm bhaiꞌ ji chum ñio, jup tum kaiꞌch:

―Dhi Jesuus aañ jir jiñ mar, baꞌx ioꞌm jix dhaꞌ iñ. Aañiꞌ yaꞌ dɨr mu joot na pim baꞌ miꞌ puiꞌ xi jimɨi na jax jam tɨɨdaꞌ.

6Baꞌ na mɨt jax puiꞌ tɨ kai gu noonbiꞌñ guch Xoiꞌkam, mi jaꞌp ja oꞌlhia kɨꞌn pu guguu mɨt na mɨt bax chootoꞌn, dɨɨrap xi chu siisap gu ja moom. 7Baꞌ gu Jesuus jaꞌxpɨx mu jimɨɨk miꞌ xi ja joiñdhak jup ja tɨtda:

―Xi baapmiꞌ gor. Chaꞌpim totdon kaꞌ.

8Baꞌ na mɨt paiꞌ dhuuk gio muiꞌp ji chɨ tɨɨ, cham paiꞌ tu jaiꞌch am gu jaꞌtkam guiꞌ nam miꞌ ka guꞌkat, dai dɨɨlh gu Jesuus mi jaꞌp kɨɨk.

9Baꞌ giop ba jii mɨt bhaiꞌ dhɨr oidhaꞌ taꞌm. Baꞌ nammɨ paiꞌ aꞌnsap nam ba juurkichuꞌ, jup ja tɨtda gu Jesuus nam sap chakui jaroiꞌ aagiꞌñdhaꞌ gu puiꞌ na mɨt jax tɨ tɨɨ, jup kaiꞌch:

―Moo pim chakui jaroiꞌ aagiꞌñdhaꞌ gu dhiꞌ puiꞌ na pimɨt jax tɨ tɨɨ. Dai noꞌ ñich muukɨk giop ba dua na pim baꞌ ba tu aaꞌndaꞌ.

10Baꞌ moo jaꞌpni bhaiꞌp ba tɨkka am gu Jesuus gu noonbiꞌñ, jup kaiꞌch am:

―¿Jax kum baꞌp kaiꞌchdhaꞌ guiꞌ nam sap jix mat kaꞌ gu ñioꞌkiꞌñ gu Dios na gu Eliiyas bɨɨpɨꞌ yaꞌ aayaꞌ na baꞌ guch Xoiꞌkam yaꞌp ba aayaꞌ?

11Baꞌp ja tɨtda gu Jesuus:

―Dho guꞌr puiꞌ dho na bɨɨpɨꞌ yaꞌ aayaꞌ gu Eliiyas na yaꞌ ja sɨlhkadaꞌ gu jaꞌtkam na baꞌ miꞌ dhɨr yaꞌp ba aayaꞌ guch Xoiꞌkam. 12Ku baꞌ guꞌ jaꞌp moo gu tuꞌx matgɨm nañ yaꞌ jam aagiꞌñdhaꞌ, matgɨm gu Eliiyas yaꞌ ba ai ji, guꞌ ji na mɨt guꞌ cham jɨꞌxkat maat gu jaꞌtkam noꞌ moop jir diꞌ, dai na mɨt tuꞌ pɨx ɨlh. Baꞌ aañ nañ xib yaꞌ oirɨ aapiꞌm jam bui nat bhañ joot guñ Gɨꞌkoraꞌ, puꞌñi tuꞌ pɨx jup jiñ ɨlhdhaꞌ am gu jaꞌtkam.

13Bax maatɨt ba kai mɨt gu Jesuus gu noonbiꞌñ na gu Juan jaꞌtkam bopkondam aagɨt jup kaiꞌch nar diꞌ gu Eliiyas.

Gu Jesuus na ba duaꞌñdhaꞌ maaꞌn gu biapmaꞌ na kax ñaanbiꞌ kaꞌ na bhaan jup tuiꞌñgɨdaꞌ gu cham kɨɨꞌ iiꞌmdaꞌ

(Mr. 9:14‑29; Lk. 9:37‑43)

14Baꞌ na mɨt paiꞌ dhuuk mummɨ ba ai nam paiꞌ daraa gu muiꞌ jaꞌtkam, maaꞌn miꞌ dhɨr jaꞌp muiꞌ ji ai buiñor gu Jesuus, baꞌ mi jaꞌp oꞌlhiaꞌn kɨꞌn xi kɨkbok soiꞌ ba tɨtda, jup kaiꞌch:

15―Aañ jaꞌp tɨi kaiꞌchidhat jiñ jaduuñ nap gɨt iam duaꞌñdhaꞌ dhiñ alhii chuk na giilhim jum tulhiiñ na tu kaammukdaꞌ. Jɨꞌx tai chɨr ba gɨxiaꞌ piam suudaiꞌ chɨr. 16Tɨi ñich ya ja aichulh dhiꞌ nam jum kaichuꞌ, guꞌ ji na mɨt guꞌ cham jɨꞌxkat duaꞌñ, na guꞌ chix xijai jax ña jaꞌk.

17Baꞌp kaiꞌch gu Jesuus:

―¿Moo jaꞌp chakui bɨɨx jam jujur kɨꞌn jix biiñak japim aa buiñor gu Dios? ¿Jɨꞌx jañ baꞌ yaꞌ pu oirɨt jup jam aagiꞌñdhaꞌ? Bhaiꞌ gor jiñ baiꞌñxiꞌñbop gux koꞌkkam yaꞌni jaꞌk.

18Baꞌ guiꞌ xi baiꞌñpuk miꞌp ba aichulh jamɨt. Baꞌ ba ñiok gu Jesuus gu cham kɨɨꞌ iiꞌmdaꞌ na bhaan jup tuiꞌdhiꞌ gu biapmaꞌ, jup tɨtda:

―Mup buusniaꞌ bhaiꞌ dhɨr bhaan dhi biapmaꞌ. Chaꞌp bhaiꞌ pu tuiꞌñgɨdaꞌ.

Baꞌx kɨɨꞌp jum duu gu biapmaꞌ miꞌ jotmodaꞌ nat jax pu tɨɨꞌn gu Jesuus.

19Baꞌ gatuuk mu jaꞌp dɨlhkob ba tɨkka am gu Jesuus guiꞌ nam kaichuꞌ, jup tɨtda am:

―¿Jax baꞌr jum duukam chi ku chich baꞌ aach cham jɨꞌxkat maiꞌ joot gu cham kɨɨꞌ iiꞌmdaꞌ bhaiꞌ dhɨr bhaan gu biapmaꞌ?

20Baꞌp ja tɨtda gu Jesuus:

―Dho na pim cham bɨɨx jam jujur kɨꞌn tɨ jɨɨgiꞌñ dho buiñor guñ Gɨꞌkoraꞌ. Na guꞌ noꞌ pim bɨɨx jam jujur kɨꞌn tɨ jɨɨgiꞌñdhaꞌ gɨt buiñor, sia ku pim guꞌ panaas cham tuꞌ bhaigɨm tuꞌiiꞌ, jaꞌp na jax gu mostaasa kai na panaas cham tuꞌ bhaigɨm tuꞌiiꞌ, aañ pu jam tɨtda na sia dhi oidhaꞌ jix bhaaiꞌ na pim pu tɨɨdaꞌ na maakam jaꞌk jimiaꞌ, puiꞌ dho ji chu buusniaꞌ noꞌ pim moo tuꞌ sɨlhkam tɨ jɨɨgiꞌñ buiñor guñ Gɨꞌkoraꞌ. 21Baꞌ gu pu chuutuꞌm cham kɨkɨɨꞌ iꞌiiꞌmdaꞌ, saabuix kam jum aaꞌ na baꞌx bhaaiꞌn kaꞌ nañ maiꞌ ja jootosdaꞌ, gio baꞌ nañ gammɨjɨ xi tu daanɨt buiñor gu Dios.

Gu Jesuus na gio puiꞌp ba tɨꞌyaꞌ nam muꞌaaꞌ

(Mr. 9:30‑32; Lk. 9:43‑45)

22Baꞌ nam pui maap miꞌ ka oipo na paiꞌ bhaan bipioꞌ gu Galilea dɨbɨɨr, jup ja tɨtda gu Jesuus gu noonbiꞌñ:

―Jum aayaꞌ nam paiꞌ dhuuk jiñ dhagiaꞌ guiꞌ nam jiñ oꞌbhagiꞌñ aañ nat bhañ joot guñ Gɨꞌkoraꞌ. 23Miꞌ dhɨr baꞌ dai nam ba tu chiñiaꞌ nam jiñ muꞌaaꞌ, ku baꞌ guꞌ aañ baik tanoolh kɨꞌn yaꞌ ji nañ jax ba oirɨdaꞌ.

Baꞌ bhaiꞌx buam jim ɨlh jamɨt gu noonbiꞌñ na mɨt puiꞌ jɨꞌ kai gu Jesuus.

Nam jaroiꞌ aagix nam tu namkiꞌñdhaꞌ guiꞌ na jɨꞌk bhaan bipioꞌdaꞌ gu gɇꞌ chiop

24Baꞌ nat paiꞌ dhuuk mummɨ jaꞌk jup ba ai gu Jesuus na paiꞌr Kapernaum ja bɨɨm guiꞌ nam kaichuꞌ, miꞌ ba ji bubua mɨt buiñor gu Peegro guiꞌ nam tu taandaꞌ gu tuumiñ na jɨꞌk aagix nam tu maakdaꞌ bhammɨ gɇꞌ chiop. Baꞌ jaꞌpni bhaiꞌ ba tɨkka am:

―¿Tu namkiꞌñ aa guiꞌ na pim kaichuꞌ na jɨꞌk bhaan bipioꞌ gu gɇꞌ chiop?

25Baꞌp ja tɨtda gu Peegro:

―Tu namkiꞌñ ji matgɨm.

Baꞌ xi mɨɨ nat tɨkkam gu Jesuus na jax jaꞌk jix bhaiꞌ gu dhiꞌ puiꞌ. Baꞌ na kiaꞌpɨx muiꞌ ji baakim mɨjɨ baꞌk chɨr, bɨɨpɨꞌ kat bhaiꞌ ba ñio gu Jesuus, jup kaiꞌch:

―¿Aap jax ɨlhiiꞌñ Simoon ja bui gux ioꞌm gɇꞌgɇrkam jum aaꞌndam nam jix jaiꞌch yaꞌ dhi oiꞌñgaꞌn bhaan? ¿Jaroom aagix nam ja namkiꞌñdhaꞌ, gu dɨɨlh ja jaꞌtkam tuk aa, kaꞌ gu jaiꞌ aa momkoran kam noꞌm ja daam kɨɨk?

26Baꞌp kaiꞌch gu Peegro:

―Dho guiꞌ dho nam jir momkoran kam.

Baꞌp tɨtda ɨp gio gu Jesuus:

―Jir puiꞌ dho nap jax kaiꞌch, guꞌ baꞌ guiꞌ nam jir ja jaꞌtkam tuk tɨi cham tuꞌ aagix nam ja namkiꞌñdhaꞌ gɨt. 27Baꞌ aach puꞌñi ɨp, tɨi cham tuꞌ aagix nach tu namkiꞌñdhaꞌ gɨt, nach guꞌ puiꞌp jir ja jaꞌtkam tuk. Ku baꞌ guꞌ ea nap mu jimiaꞌ mummɨ na paiꞌ gɇꞌ suuꞌn gu suudaiꞌ xi bhɨɨji ap gu bhaiꞌchdhakar, mup baꞌ xi buaꞌ suudaiꞌ chɨr. Baꞌ gu jax chuꞌm na bɨɨpɨꞌ miꞌ saꞌyaꞌ gu batoop, maaꞌn tɨgiaꞌ ap gu tuumiñ na mi jimdaꞌ chiñiꞌran, aixkam na jɨꞌk jum aaꞌ nach kɨꞌn tu namkidhaꞌ aap gio aañ. Baꞌ xi bhɨɨji ap kɨꞌn mu xi ja namkiꞌñmɨraꞌ guiꞌ nam puiꞌ bham taan nam baꞌ cham tuꞌ kɨꞌn kach juandaꞌ.

Currently Selected:

MATEO 17: stp

ማድመቅ

Copy