San Mateo 9

Jesús ombogüera ava ndoguatai vahe

1Ipare Jesús oha carite pɨpe osasa iri ɨpa rovai oso güecua Capernaum ve. 2Aheve, ava ndoguatai vahe omboyovai seraso imbaheasɨ vahe rɨru pɨpe yuvɨreco chupe. Ahe oicuase co ava yuvɨrecoi vahe oyese yeroya, aipo ehi imbaheasɨ vahe upe:

—Che rahɨr, eyemopoase, che ñero nde angaipa rese ndeu —ehi.

3“¡Co mbɨa oyemboɨvate ai tẽi vahe, Tũpa ñehe nungar pɨpe tẽi oñehe!” ehi Moisés porocuaita rese oporombohe vahe yuvɨreco chupe. 4Jesús rumo oicua ipɨhañemoñetasa, sese aipo ehi chupe:

—¡Mahera pepɨhañemoñeta rai pe yapɨsacasa rereco! 5¿Uma rupi vo ñehesa ndayavaimi catu: ‘Nde angaipa rese che ñero ndeu’ hesa pĩha, anise, ‘Epũha, eguata’ hesa tie? 6Tapeicua ru che, Ava Rɨquehɨr, areco mborerecuasa co ɨvɨ pɨpe ava angaipa upe che ñero ãgua —ehi.

Evocoiyase aipo ehi imbaheasɨ vahe upe:

—Epũha, esupi nde rupa seraso nde rẽtave —ehi.

7Ahese opũha voi, oso güẽtave. 8“¡Too! ¿Mara ehi rutei vo?” ehi ava rehɨi yuvɨreco imboeteisave. “Esepia, ahe niha ombou opĩratasa ava upe” ehi yuvɨreco chupe.

Jesús, “Erio che rupi” ehi Mateo upe

9Ichui osose Jesús, che repia, che Roma pendar mborerecuar guasu upe guarepochi rerocuasa mesave che rẽise. Ipare aipo ehi cheu:

—Erio che rupi —ehi.

Evocoiyase apũha, aso voi supi.

10Ahe arɨ pɨpeve Jesús güemimbohe reseve yuvɨroique che rẽtave. Ambocaru setá ambuae ava guarepochi Roma pendar mborerecuar guasu upe monuhasar reseve, ava angaipa viyar yuvɨrecoi vahe reseve avei. 11Co nungar repiase, fariseo oporandu semimbohe upe yuvɨreco:

—¿Mahera ru pe mbohesar ocaru evocoi nungar ava angaipa viyar pãhuve tẽi? —ehi seroɨ̃rosa pɨpe yuvɨreco chupe.

12Jesús rumo, osenduse oyesendar ñehesa, aipo ehi:

—Ava nimarai vahe ndosecai eté oporopõsano vahe; imbaheasɨ vaheño rumo oseca yuvɨreco. 13Peyapɨsaca icuachiaprɨ aracahendar aipo ehi vahe rese: ‘Poroparaɨsuerecosa aipota; ndaipotai mbahe cheu serocuavẽheprɨ tẽi’ ehi. Esepia, ndayui ava seco catuprɨ vahe reca, ẽgüe ehi rumo ayu ava angaipa viyar reca —ehi Jesús ava eta upe.

Yecuacu rese ñehesa

14Ipare Juan Oporoãpiramo vahe rupindar yugüeru oporandu Jesús upe:

—Ore iyavei fariseo eta oroyecuacu yepi, ¿mahera ru evocoiyase nde remimbohe eta ndoyecuacui yuvɨreco yepi? —ehi yuvɨreco chupe.

15Ahe rumo omboyevɨ ahe ava upe:

—¡Ndiyai eté ichohoprɨ mendasave ndoyembovɨhai yuvɨreco imer oicovese ipãhuve! Oimera rumo arɨ imer reraso ãgua ichui curi. Ahese ramo oyecuacura yuvɨreco cute —ehi.

16“Ndipoi chietera revo que ava oturucuar cuacua oyapete vahe turucuar ipɨasu vahe pɨpe. Esepia niha, yapetesa ipɨasu vahe oichohoño turucuar cuacua imondoro. Ichorosa evocoiyase tuvicha catu-catuño ité. 17Iyavei ndiyai ava uva rɨcuer pɨasu oyapocatu sɨru mbahe pirer cuacua vahe pɨpe. Ẽgüe ehise, mbahe pirer opura viña, ocañɨ tẽira, uva rɨcuer avei evocoiyase ocañɨ tẽi aveira viña no. Acoi uva rɨcuer ipɨasu vahe mbahe pirer ipɨasu vahe pɨpe yapocatuprɨ rumo oyoya ndoyemomarai yuvɨreco” ehi.

Jairo rayrɨ iyavei cuña Jesús turucuar rese opoco vahe

18Jesús oporombohe vɨteseve, ou mborerecuar oñenopɨha sovai aipo ehi chupe:

—Che rayrɨ mo cũritei omano pota ité. Yaso, nde eremondose rumo nde po sese oicovera —ehi chupe.

19“Avɨye” ehi. Evocoiyase opũha yuvɨraso güemimbohe reseve supi. 20Ahe pɨpeve cuña doce aravɨter rupi suvɨ ndopai vahe opoco saquɨcuei cotɨ iturucuar popɨ rese. 21Esepia, ahe aipo ehi opɨha pɨpe: “Yepe que iturucuar popɨ resemi tẽi apocora, acuerara rumo” ehi. 22Jesús evocoiyase oyemboyere cuña rese aipo ehi chupe:

—Che rayrɨ, eyemopoase, erecuera cũritei nde yeroyasa pɨpe —ehi.

Aipo ihe ramoseve, cuña ocuera voi eté.

23Oyepotase Jesús mborerecuar rẽtave, osepia omimbɨ vahe iyemoingatupase omano vahe tɨ̃ ãgua, ava yaseho atɨse avei no. 24Ahese aipo ehi ava oyaseho vahe upe:

—Pesẽpa cohave sui. Co cuñatai nomanoi; oque tẽi ou —ehi.

Ahe ava rumo opucaete atɨño seroyaẽhɨsave yuvɨreco. 25Ichui opa ava omose, ahese oique oɨ pɨpe oipopɨsɨ cuñatai. Evocoiyase ahe oñarapuha voi. 26Co sembiapo evocoiyase oyandupa voi opacatu tecua rupi yuvɨreco.

Jesús ombogüera ñuvɨrío ava ndasesapɨsoi vahe

27Acoi osẽse evocoi oɨ sui Jesús, ahese ñuvɨrío ndasesapɨsoi vahe osaquɨcue moña, osapucai yuvɨreco chupe aipo ehi:

—¡Jesús, David suindar, ore paraɨsuerecomi tẽi eve! —ehi pucu-pucu yuvɨreco chupe.

28Oɨ pɨpe seiquese, oyemboya ndasesapɨsoi vahe yuvɨreco sese. Ahese Jesús oporandu chupe:

—¿Che reroya ité vo pe mbogüera ãgua rese peye? —ehi.

—Nde reroyasa ité, ore Yar —ehi yuvɨreco.

29Aipo oyeupe hese, opoco sesa rese, aipo ehi chupe:

—Tayapo pe che reroyasa pɨpe mbahe pẽu —ehi.

30Aipo ihe ramoseve osareco tuprɨ voi yuvɨreco. Ipare,

—Peicua catu. Peicua ucai rene ambuae ava upe —ehi chupe viña.

31Ahe rumo ichui oyepepɨ pare, yuvɨraso opacatu tecua rupi, “Jesús ore mbogüera” ehi-ehiño ité yuvɨreco.

Jesús ombogüera niñehengatui vahe

32Ichɨrɨ ramoseve rumo, ambuae ava vɨroyepota ava niñehengatui vahe caruguar rerecosar Jesús upe yuvɨreco. 33Ichui omosese caruguar, iñehengatu cute. Sepiase opacatu ava,

—¡Too! —ehi—. ¡Ndasepiasai vahe ité co nungar mbahe yande recua pɨpe yepi! —ehi tẽi yuvɨreco.

34Fariseo eta rumo aipo ehiño yuvɨreco:

—Caruguar rerecuar pĩratasa pɨpe co mbɨa omose caruguar ava sui —ehi tuprɨ tẽi yuvɨreco chupe viña.

Jesús oiparaɨsuereco ava

35Ichui opacatu tecua rupi Jesús oguata oporombohe tũparo yacatu. Omombehu tecovesa avɨye vahe Vu mborerecuasa resendar iyavei oporombogüera opacatu-catu tẽi mbaherasɨsa sui avei no. 36Osepiase ava rehɨi, oiparaɨsuereco yuvɨreco. Esepia, ahe oñemosaño tẽi mbahe rasɨcuer pãhuve inungar ovesa ndovɨrecoi vahe guãrosar yuvɨreco 37Evocoiyase aipo ehi güemimbohe upe:

—Supi eté mbahe mitɨ imonuhapɨrã setá iteanga; sese oporavɨquɨ vahe rumo movɨromi tẽi. 38Sese peporandu mbahe mitɨ Yar upe, ahe tomondo ava imonuha ãgua —ehi güemimbohe eta upe.

Currently Selected:

San Mateo 9: gyr

ማድመቅ

Copy