Génesis 44
44
Aso nỹomaxaqui so José
1Qaq co'ollaq ime de'era, nache so José ỹamaq so ilotague' so lma', 'eeta':
«'Auỹoxoguilo qome na trigo 'enauaque caua lachoxonaxaqui' ne'enaua shiỹaxau', maicheye cam tachiguiiña cam ishet da ỹache', qataq 'auachanguilo qome naua ala'api caua lachoxonaxaqui' aca alom ñi 'oonolec naamaye. 2Qataq nataqa'en 'auachangui qome na alap ca lachoxonaxaqui dam lqaỹa na'asa aca ñeỹomaxaqui maye chegaqaigui na plata, 'auauaxaỹaxaate' qome aca alom maye lsheetenaxanaqte da isheeten na trigo.»
Nache som ilotague' so nma', ỹo'ot co'ollaxa 'enauac nam ỹamaxalecpi so José. 3Qaq co'ollaq nnoxotcheguem aso nala' so lỹa na'a'q, nache so José ỹasheetrec soua lqaỹa't da je'c, lỹatrec soua lalo 'ashena. 4Qaq co'ollaq saxanaxa da qaỹoqteueeguelo soomaye da quera'ai yem huaqta'a't nỹecpi, nache so José 'enapego' so ilotague' so lma', 'eeta':
«'Aue qome, 'aucaaleguete se'esoua shiỹaxau', qaq qom 'avi't soomaye, nache qonapegalo, qoneta': Aỹem qami' so'oteque da ỹaỹamaqchiguiñi, qaq nagui qalaq ¿Ta'ainco' ye aỹem qauo'ochec da qauem? ¿Ta'ainco' da qaucachiỹai aca ỹomaxaqui maye chegaqaigui na plata, 5maye nỹomaxaqui naxa ñi ña'aco', qataq lo'onataxanaqte naxa da huotaique da huo'o ye ỹaỹaten? ¡Qami' ỹataqta qauem da qauo'oche!»
6Nache so ilotague' so nma', co'ollaq ivi't soomaye, nache ỹataqta ipagaqchiichigui som na'aqtac maye qoỹanem. 7Nache soomaye 'ena'apo':
«¿Ta'ainco' da qonetec de'era da qomi' qonapegalo? ¡ye qomi' saỹauano' da so'otaq ca 'eeta'am de'era! 8Ye qomi' soua lỹa't na'axa'te sachegoxosoqchiguiña ye Canaán da ñe'eguelaxataq aso anom maye selaqalec da huetanguilo naua ala'api soua qarachoxonaxaqui'. Qaq ¿taloxochiyo' taxa da secachaxa aca plata huo'otaq oro yem lma' som 'ana'aco'? 9Qaq no'on da qaỹalauat qome ca 'oonolec ne'enaua 'aramaxa'she da huo'otaq hueto'ot aca ỹomaxaqui, qaq qomi' nataqa'en ishet qome da 'auauo'oi qomi' 'arlataqa.»
10Qaq huaña nache so ilotague' so nma', 'enapeco':
«Aja', dam qoñiỹapec, nachera qome da qaỹo'ot. Qalaxaye nachaqcata qome ca hueto'ot aca ỹomaxaqui maye ishet da sauo'o ỹamaxashec, qaq caua lỹa't qalaq huesochiyiñi qome, qaica ca lasouaxashe't.»
11Nache ñi 'oonolec soomaye sa ỹaỹaloxo'n da nqaayiñi soua lachoxonaxaqui'. Ime, nache ỹauanguilo. 12Nache so ilotague' so nma', nmichigui ñi 'oonolec soua nachoxonaxaqui', ỹa'auaxaachiguiñi so lachoxonaxaqui so nqaỹa ỹe, nache ivitta'a so na'asa. Qaq huaña, nache ilalec aso ỹomaxaqui huetagui so lachoxonaxaqui so Benjamín. 13Nache soomaye ncolaxata'aisalo soua alogo, da la'anaxat da nqui'i'c. Qaq ime nache ñi 'oonolec soomaye ỹasaxalec so lla'ac soua lalo 'ashena, nache ỹe'eguelaxareua'a so huaqta'a't nỹecpi. 14Qaq so Judá qataq soua lqaỹa't co'ollaq ivildeua'a so lma' so José, nache somaye ñaq hueta'a so lma'. Qaq huaña, nache soomaye ỹa'alyiñi naua l-llecte, nache iviraxata'agueta naqa'en naua lata'api na 'alhua. 15Nache so José 'enapegalo', 'eeta':
«¿Ta'ainco' da aỹem qauo'ochec de'era? ¿Sa qauaỹaañiỹo' peta'a da ca shiỹaxaua maye 'eeta'am aỹem ishet da ilaviigui ca lỹa?»
16Nache so Judá 'enapeco':
«¿Hua'agom ca 'eetec ca qarasataxac da 'am sasataxaguet? ¿Qataq negue'tom ca qara'aqtac da shenaqpec da qaica ca sasouaxataq? Ye Ñim Lo'onatac 'Enauacna mashe ilalec da qarasouaxashet. Qaq nagui qomi' souaqta'a ne'ena, qaq ñañanaq da 'auauo'oi qomi' 'arlataqa, qarỹateuo dam hueto'ot aso ỹomaxaqui.»
17Qalaxaye so José 'enapeco':
«'A'i, saishet da nache sheetec de'era. Nachecata qome cam hueto'ot aca ỹomaxaqui da sauo'o ilatac. Qaq naua lỹa't, qalaq ishet qome da ỹe'eguelaxalo ca lma' ca lta'a, nda'a't qome da qaica ca machaqca.»
So Judá nachoxoreelec so Benjamín
18Nache so Judá nquicot so José, nache 'enapega 'eeta':
«'Am ñachoxonnot, 'am ỹataxala', da aỹem 'auasheetem da huo'o catai' ỹa'aqtacolec da 'am sesoxootot. Aỹem 'arqouaguec qome, saishet da aỹem 'aualemataỹa, cha'aye 'am nache qoneta'am ñi Faraón. 19'Am qomi' 'aunatta'ape co'ollaxa soua lỹa't na'axa'te, da huo'o ca qarta'a qataq da huo'o ca lỹa qarqaỹa, 20nache qomi' 'am sasataxaguet da ñaq huo'o ñi qarta'a maye mashe ỹa'axaiquiolec, qataq ñi qarqaỹa maye ñaq nsoqolec. Ñim ñiguiñi co'ollaq mashe ỹa'axaiquiolec ñi qarta'a. Qataq nataqa'en 'am sa'axataqtapeguem da ñi qarta'a ỹataqta lauotaxat ñimaye, cha'aye Nacheñita ñimaye da no'onañi llalec aso lhua, cha'aye so lỹa lqaỹa mashe ileu. 21Qaq huaña, nache 'am qomi' 'auỹaxanoto da ishet da ñauegaq ñimaye, cha'aye 'auauotaique da 'auauatton. 22Qaq qomi' 'am sa'axataqtapeguem co'ollaxa da ñi'iñi nsoqolec saishet da ca'ai ñi lta'a, cha'aye da ca'ai, nache ñi lta'a ishet da ileu. 23Qalaxaye 'am qomi' qonapegalo co'ollaxa da saishet da qomi' nca'ateguelo ñimaye, nache saishet da qaltaq qomi' 'aulo'ogueta.
24Qaq ỹoqo'oye co'ollaq she'eguelaxasoq, nache sa'aqtaxanaqtapeguem ñi qarta'a 'enauac nam 'ara'aqtacpi co'ollaq qomi' qonetegalo. 25Qaq ỹoqo'oye ñi qarta'a qomi' 'enapegalo, 'eeta': Qavi'iguelaqai qome da qausheenaxañiỹaique ca saq 'amaqtaq trigo, 26qalaxaye qomi' shenaqtega ñimaye, shenaqta': Qomi' saishet da qolaq qom saishet da qomi' ca'ateguelo ñi qarqaỹa na'asa, cha'aye ñimaye da saishet da qomi' nnaicapegueto, nache saishet qome da qaltaq ñauanaxai' ñi'iñi ỹale. 27Qaq ñim ita'a qomi' 'enapegalo, 'eeta': Qami' qauaỹaañeta da aso ihua doosolqa naqa'en naua ỹalqa. 28Qaq 'oonolec so mashe jec da aỹem ca'ai, qaq nache chegoqta'a so jec, da saishet da qaltaq sela'a. Qaq ỹataqta sepeta'a da ito ca huauec shiguiỹac maye dequi'iỹapec. 29Qaq da qaltaq qauaviqui ñi lỹa ỹalec, nache da huo'o ca huaigui qauem, nache qami' qauasouaxache qome da ne'ena ỹa'axaiquiolec ilem da laquicoxo.
30Qaq ỹoqo'oye da nachaalataxac ñi ita'a ỹataqta na'atta'aguet da nachaalataxac da nsoq, qaq ỹoqo'oye dam nsoq da huo'otaq saishet da ñenaigaqtague' qom she'eguelaq, 31nache ñi qarta'a ishet qome da ileu souaxat da sa ila'a damaye. Qaq huaña nache qomi' qarasouaxashet da ñim ỹa'axaiquiolec maye qarta'a, ilem da laquicoxo. 32Qaq aỹem shenapega co'ollaxa ñi ita'a, da aỹem maiche selo'ogue da nsoq. Qaq nataqa'en shenapega, sheeta': Qom saishet da 'am ñe'eguelaxata damaye, nache da ỹasouaxashet 'am hueto'ot qome 'enauaque naua vi'iye da ñachaalataxac. 33Qaq ỹoqo'oye 'am ñachoxonnot da aỹem 'auaconeguet qome da ño'onañi da yaqto' 'auauo'o aỹem 'arlatac, da ñemeneguet da nsoq. Qaq 'aua'aqta'a qome damaye da ca'ateguelo daua lqaỹa't. 34Cha'aye ¿ca 'eeteco' da she'eguelaxa ca ita'a da saishet da ñenaictague' da nsoqolec? Cha'aye aỹem sa saỹamaxaren da selotagui qome ca nque'eenaxac ca ita'a.»
Currently Selected:
Génesis 44: LÑLE13
ማድመቅ
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fam.png&w=128&q=75)
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.