Génesis 22
22
Ñim Lo'onatac 'Enauacna ỹe'eguen so Abraham
1Qaq co'ollaq mashe qaỹoqteguelo soua vi'iye, nache Ñim Lo'onatac 'Enauacna ỹe'eguen so Abraham, nache iỹaxana somaye, 'eeta':
«Abraham.»
Nache somaye ỹasat, 'eeta':
«Aja', aỹem soota'a ne'ena.»
2Nache Ñim Lo'onatac 'Enauacna, 'enapego' somaye, 'eeta':
«'Auacona qome ñi Isaac ñim 'oonolec 'aỹa'alec, ñim ỹataqta 'arauotaxat. Nache 'anqo'ona ye 'alhua Moriah. Qaq qom 'avita yemaye, nache 'auavigaxat aca 'arachetaqtaxanaqte da Aỹem 'aỹa'anot, huaña 'anqa'en aca qasoxonaxa maye 'am sachaxana qome.»
3Qaq so nte'etom so lỹa na'a'q, nache so Abraham ñesheguem, nache ỹo'oolec so lalo 'ashena, qataq iquesoq so qo'oipaqpi da yaqto' lalonaxat acam lachetaqtaxanaqte, nache jec da nqo'ona so 'alhua maye ỹachaxana Ñim Lo'onatac 'Enauacna, qaq nache lỹatac so Isaac, qataq soua dos lamaxa'she. 4Qaq co'ollaq mashe ivi' soua tres na'axa'te, nache so Abraham ila'a som 'alhua maye qaỹachaxanapec co'ollaxa, qalaxaye ñaq qaỹoqta. 5Qaq huaña nache so Abraham 'enapegalo' soua lamaxa'she, 'eeta':
«Qoviỹa'a qome ne'ena, qauachiỹapegue' ñi 'ashena, qaq aỹem qalaq iỹatac da nogotolec da ñeqo'onaxa yi'iye 'alhua. Huaña qome nache sho'oxorenaq Ñim Lo'onatac 'Enauacna. Qaq qom ime nache ñe'eguelaxasoq.»
6Nache so Abraham, ỹacoosop so qo'oipaqpi maye lalonaxat aca lachetaqtaxanaqte, nache ỹachalec na lallac so Isaac, ime nache ỹacona so ỹeelonec qataq so norec, nache je'c, nnaicapega't. 7Qaq co'ollaq mashe qaỹata'aguelo, nache so Isaac inat so Abraham, 'eeta':
«¡Taxare!»
Nache so Abraham 'enapeco': «¿Negue'tca, ỹalec?»
Nache so Isaac 'enapec:
«Qomi', huo'o na qanqo'oipaqpi qataq na qal-le', qalaxaye ¿hua'ague ca hueta'ague ca qagueta llalec da savigaxataq da yaqto' qarachetaqtaxanaxat?»
8Nache so Abraham, 'enapeco':
«Qomye Ñim Lo'onatac 'Enauacna maiche ỹauo'o ca qagueta llalec da yaqto' qarachetaqtaxanaxat, 'am ỹalcolec.»
Qaq soomaye nache quete', nnaictega't. 9Qaq co'ollaq ivitra som 'alhua maye ỹecapiguiña Ñim Lo'onatac 'Enauacna, nache so Abraham, ỹo'ot aso lca'atoxonaxalate, qataq ỹachalec asomaye so qo'oipaqpi. Qaq ime, nache ỹauo'o so lquet da icoñera't naua lhuaxaye qataq naua lapia'ate so llalec Isaac, nache ỹasaxalec aso lca'atoxonaxalate, ỹachalec so qo'oipaqpi. 10Qalaxaye co'ollaq ivita so laloqo' da ỹacona so lainec da ỹalauat so llalec da ỹauo'o lachetaqtaxanaxat, 11nache so lamaxashec Ñim Nataxala', chemqot na piguem, da deỹaxan, 'eeta':
«¡Abraham! ¡Abraham!»
Nache so Abraham 'enapeco':
«Aja', aỹem soota'a ne'ena.»
12Nache so namaxashec piguem le'ec, 'enapega somaye, 'eeta':
«Saishet qome da huo'o ca qona'ac na nogotolec, cha'aye mashe saỹaten da 'am ỹataqta huo'o naq 'enec 'anqa'en Ñim Lo'onatac 'Enauacna, cha'aye qaica ca 'ectega da aỹem 'aỹa'anot na 'oonolec 'aỹa'alec.»
13Nache so Abraham, namatasheguem nache ila'a so qagueta lhuaraic, ỹemaqtaiguilo soua lcoue so nshe'ela. Qaq huaña nache nqo'ona da ỹaconeua'a somaye, nache ỹavigaxat da ỹauo'o lachetaqtaxanaqte, nmeneguet naqa'en so llalec. 14Nache so Abraham ỹauo'o da le'enaxat se'eso 'alhua, 'eeta': «Ñim Nataxala' ỹan cam qaiuen.»
Qaq ỹoqo'oye ñaq 'eetalec nagui de'era na'aqtac naxa maye, 'eeta': «Aca qaỹoqotcheguemec 'alhua, huaña da Ñim Nataxala' ỹan cam qaiuen.»
15Nache so lamaxashec Ñim Nataxala' chemqot na piguem, da qaltaq iỹaxana so Abraham, 16nache 'enapega, 'eeta':
«Ñim Nataxala' 'enapec: Qaq cha'aye 'auo'ot de'era, qataq saishet da aỹem 'aullapeguem ñi 'oonolec 'aỹa'alec, qaq nagui san da ỹa'aqtac, 17da 'am saalec qome ca ỹataqta lta'araic ichoxonnataxanaxa. Aỹem so'ot qome da ỹataqta qalota ca 'am chegoxoguetpi, 'eeta'am ana huaqaañipi maye neto'ot na piguem, qataq 'eeta'am na lsoche na 'alhua maye hueto'ot na loigue aso auaxai. Qataq camayepi saq ỹet qome da loxonec ca mpa'aguenaxauapi, 18qaq 'enauac na ỹotta'a't shiỹaxauapi maye huetalec ana 'alhua, huo'o qome da nchoxonnataguec chegoqchigui camayepi, souaxat da aỹem 'aualaxaguet.»
19Qaq ime, nache so Abraham ỹe'eguelaxa som huetra'a soua lamaxa'she. Ime, nache 'enauaque nnaictega't da je'c, ỹe'eguelaxara ye Berseba, qaq so Abraham, nache naña co'ollaxa ye Berseba.
Soua llalqa so Najor
20Qaq co'ollaq mashe qaỹoqtegue de'era, nache so Abraham, la'axaỹaxac co'ollaxa da aso Milca nataqa'en huo'oi soua llalqa da deco'oiguet so Najor. 21Qaq so hua'auchiguiñi da ñiguiñi le'enaxat Uz, ime, qaltaq ñiguiyiñi soua lqaỹa't Buz, qataq so Kemuel, som lta'a so Aram. 22Ime co'ollaxa, nache qaltaq ñiguiyiñi soua Quesed, Jazó, Pildas, Yidlaf, qataq so Betuel. 23Qaq so Betuel, nacheso so lta'a aso Rebeca. Qaq 'esoua soua ocho llalqa aso Milca, co'ollaq deco'oiguet so Najor som lqaỹa so Abraham.
24Qaq so Najor, nataqa'en huo'oi soua llalqa maye late'e' aso Reúma, asom ỹaqauga lhua somaye. Qaq soomaye le'enaxa't da Teba, Gaján, Tajás qataq Macá.
Currently Selected:
Génesis 22: LÑLE13
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.