ZLI VIRZI 6
6
Buymisemuŋ muwuɗ ngizla mizli titrahay
1Akẽh na, mizli a zlaka, ara jam haɗa asi ruwuyo, yo ara yam ziri mongosohoy. 2Zirii mizile ngi Bumbulvuŋhoy#6.2 Mbiɗeˀvra ngi ziri ngi Buymisemuhoy na, a bun ta, asinta i modro mekelemey kwani a puraka na, ziri mongoso ngi mizli titrahaya taŋ kuyu gwatta, a hĩyãm a wuzla taŋ, a zuɓaka taŋ ngi ngwasa. 3Dar Bumbulvuŋ a ɓi: «Musuwun ya muˀufo di da mburo, naŋ anta sa ndir ngi caˀa ta, na zle naŋ ti mungra: i dumvu ngataraŋ. Zle dana, hin ngi siifa taŋ anta sa funa vi skat ti kukur cuwo ta.» 4Hirak ti nah vuna, i mizli gambara, suburohoy misi asi ruwuyo, yo a dirba ziri mizile ngi Buymisemuŋhoy mujumom ati ziri mongoso ngi mizli titrahay tuwa na, a yam ti taŋ ziri le. Mizli bugawla misi zleˀehey i taŋ vuna, slimiɗ taŋ a zil le. 5Bumbulvuŋ a pura na, mizli titrahay ara gam malambaˀ nga mbuŋ nga mbuŋ asi ruwuyo, yo a vam hiipas ti wuluk a mevel taŋ ngi gi malambaˀ tewle, 6Bumbulvuŋ a lik haɗa ar naŋ miga mbur na, ɓi naŋ a giraŋ haɗa a mevele. 7Dar a ɓi: «Sey i ngizla mizli ya miga taŋ na, leɗeɗ wãˀ asi ruwuyo, waɗ gwat misi titiri mimeɗ meɗ ati madiɗahay, ko ɗiyuwoy. Asi yi ra zil marava vur ya miga taŋ na.»
8Amma Nowe, Buymisemuŋ a ɗuwulaŋ mi.
Buymisemuŋ a wuɗ ɓa a laha Nowe
9Mizli ngi hay Noweheye t'ani: Nowe i mbur mijeŋŋe, a wuzla mizli misi ti di nah na, naŋ kaslsla a mbuŋ Buymisemuŋ. A sipa jiviɗ ngi Buymisemuŋ le kuy kuy. 10A yi ziri mizilehey makir: Sem, kam waɗ Zafet. 11Amma mizli gar a hiryam le a mbuŋ Buymisemuŋ, ara gam moˀore ti gidaŋ. 12Buymisemuŋ a pura hirwuyo keɗ keɗ na, a hiryi le, mizli ngi raˀahay gar, gwat ngi gi taŋ i malambaˀ wãˀ. 13Dar Buymisemuŋ a ɓa Nowe na: «Hin ngi kiɗa mi ngi gwat mamusuwunamay gar a ndila le! Asi a nahaka hirwuyo le ti moˀore taŋ na, i wuɗ i ngizla taŋ pay asi ruwuyo. 14Ɗiyi palalam madiɗaŋ ti dum ngi widis ma gi mukuturɓuy. Ki sa ɗiyi viŋhey mbeˀmbeˀ a huroˀo. Ki sa sluruɓa huroˀo naŋ ati duba naŋ gar ti tebeɗe. 15Pura ɗi, kisa ɗiya ani: jek naŋ metir skat ti kukur zlum, sliprik naŋ, metir kukur cuw nga zlum, yo gil naŋ kwana, metir kuruˀ nga zlum. 16Ki sa dira hirnga nah yoŋ ka viŋ, waɗ kisa pul li njoŋ, reta metir ar wala ngi viŋ ati mi ngi palalama. Ki sa pula miviŋ naŋ tir cakay naŋ. Ki sa wuɗuka gil naŋ, ɓa a gi hay jirngasl jirngasl makir. 17I sa ga ɓa mekepel a zuɓawa ngi ngizla gwat misi titirihey gar misi asi ruwuyo. Ko mike gar misi titiri a ruwuyo a sa micam leɗeɗ wãˀ. 18Amma i sa jumˀay ati ka, kisa cam ng'ar palalama, ka ati ziri ɗikey, ngwas ɗik waɗ ngwas ngi ziri ɗikeye. 19Sukwi ngi gwat misi titirihey gar, gwat misi dumvu gar, kisa ci taŋ nga hur palalama, mizile zlaɓ ati mongoso, mizile zlaɓ ati mongoso, ɓa a ndiram titiri avu ka. 20Sukwi ngi ɗiyuwoy, sukwi ngi gwat misãmihey, sukwi ngi gwat memeɗehey makurmuɗom a ruwuy, a sa soko mizile zlaɓ ati mongoso, mizile zlaɓ ati mongoso ɓa a ndiram titiri avu ka. 21Na, ka so na, wuɗ sukwi ngi gwat ngi zumoy gar, wi taŋ vu weˀ, ngi sa zum da ka waɗ da gwat misãmiheye ma.» 22Gwat Buymisemuŋ miɓa da Nowe ɓa a ga na, a ga le kasl kasl kanah.
Currently Selected:
ZLI VIRZI 6: BEGDC
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Bible en Langue Guiziga © L’Alliance Biblique du Cameroun, 2011.
