ZLI VIRZI 11
11
Mizli mindiram hay suburo a ruwuy Babel
1Zlezle zleˀe na, asi gazlavay kurzluˀ gara, mizli a ɓam mi purla, a zilaka gwata misi purla. 2Ti taŋ maram kini ngir tisi pas ngi miprik na, a lumam li mifaw a ruwuy Babiloŋ, dar a pam a diga. 3A zlaka a ɓam ar wala taŋ: «Yawwa! Kuɗukum brik, zlumukum di ar vu!» Brike ar deɗe ngi ɗugur, a caka wala naŋ ti gudroŋ. 4Dar a ɓam ma: «Yawwa! Pukum walahay madiɗaŋ, yo ndurukum hay musubur, misi hirnga naŋ a wusa muŋ, ɓa slimiɗ ndra a zil, yo ɓa i zliɗam hirnga asi ruwuy gar ta.» 5Bumbulvuŋ a po sar ɓa a pura berne ati hay musubur mizli titrahay mandiraka tuwaŋ. 6Joˀ Buymisemuŋ a ɓi: «Ani taŋ gar ara jumom, ɓa a tiram sukwi purla, ɓa a ɓam mi purla! Da a zlaka le kahana na, naɓa gwat taŋ majuwaka le ngi gi gar na, gwat masa tika taŋ ngi gi naŋ anta mata. 7Yawwa! Pukum sar, juhuɗukum mingiɓi taŋ wurenna, ɓa mbur a cine ngi cala mata!» 8Bumbulvuŋ a zliɗa taŋ hirnga ti kẽh asi ruwuy kurzluˀgar, a pulaka pi walahaya. 9A zilaka walahay nah Babel na vurˀe, asi Bumbulvuŋ mijihiɗa mi ngi mizli ngisi ruwuy gar na a diga, yo naŋ mizliɗa hirnga ngi mizli ng'asi ruwuy fuk gar na, baɗ a diga.
Tizer, zle avu Sem hã avu Abram
10Dideˀ ngi Semeye t'ani: Sem miya Arpakzat na, vi cuw a dirba mekepel madiɗa, naɓa naŋ ti vi skat. 11Sem a gi vi skat skat zlum, a dirba naŋ miya Arpakzata, a yi ziri mizile mekelemey ati mongosohoy le ma. 12Arpakzata, ti naŋ misi ti vi kukur makir nga zlum na, a yi Sela. 13Arpakzata, a dirba naŋ miya Sela, a gi vi skat skat mufaɗ ti makir. A yi ziri mizile mekelemey ati mongosohoy le ma. 14Sela, ti naŋ misi ti vi kukur makir na, a yi Eber. 15Sela, a dirba naŋ miya Ebere, a gi vi skat skat mufaɗ ti makir. A yi ziri mizile mekelemey ati mongosohoy le ma. 16Ebere, ti naŋ misi ti vi kukur makir nga mufaɗ na, a yi Peleg. 17Ebere, a dirba naŋ miya pelege, a gi vi skat skat mufaɗ ti kukur makir. A yi ziri mizile mekelemey ati mongosohoy le ma. 18Pelege, ti naŋ misi ti vi kukur makir na, a yi Reˀu. 19Pelege, a dirba naŋ miya Reˀu na, a gi vi skat skat cuw ti ngoltir. A yi ziri mizile mekelemey ati mongosohoy le ma. 20Reˀu, ti naŋ misi ti vi kukur makir nga cuw na, a yi Serug. 21Reˀu, a dirba naŋ miya Serugo, a gi vi skat skat cuw ti tarnaˀa. A yi ziri mizile mekelemey ati mongosohoy le ma. 22Serugo, ti naŋ misi ti vi kukur makir na, a yi Nahor. 23Serugo, a dirba naŋ miya Nahoro na, a gi vi skat skat cuw. A yi ziri mizile mekemey ati mongosohoy le ma. 24Nohoro, ti naŋ misi ti vi kukur cuw nga ngoltir na, a yi Tera. 25Nahoro, a dirba naŋ miya Tera na, a gi vi skat ti kuruˀ nga ngoltir. A yi ziri mizile mekelemey ati mongosohoy le ma. 26Tera mindila vi kukur tarnaˀ na, a yi Abram, Nahor waɗ Haraŋ. 27Dideˀ ngi Terahay anihĩ: Tera a yi Abram, Nahor waɗ Haraŋ. Haraŋ a yi Lot. 28Haraŋ a muc, naɓa Tera naŋ da ar siifa aruŋ, a muc ar walahay Ur, hirwuy Babiloŋ. 29Abram ati Nahor a zuɓam ngwasay. A zilaka ngwas ngi Abrama Saray, yo ngwas ngi Nahoro kwana, a zilaka Milka, zuŋ ngi Haraŋ. Haraŋ i cine ngi Milka ati Yiska. 30Saray i dirlay, a yi ta. 31Tera a zuɓa mangal naŋ Abram ati dideˀ naŋ Lot mangal ngi Haraŋ, waɗ Saray dideˀ naŋ, ngwas ngi Abram. Taŋ gar a slikiɗam baɗ a Ur, hirwuy Babiloŋ nga hirwuy Kanaˀan. A ndilam a Haraŋ, pam a diga 32Tera a gi vi skat skat cuw ti zlum a dirba nah, a muc a Haraŋ.
Currently Selected:
ZLI VIRZI 11: BEGDC
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Bible en Langue Guiziga © L’Alliance Biblique du Cameroun, 2011.
