San Mateo 15
15
Cátei le marúmadagüdünbaliña gürígia ligíbugiñe Búngiu
(Mr 7.1-23)
1Ába jayábin fiú fariséogu jáma arúfudajatiña lilúrudun Moisés, ñǘbintiña ubúrugugiñe Jerusalén lúmoun Jesúsu, ába jaríñagun lun.
2—¿Ánsan jájalachagunbalin báni disípulugu binádu jagáburi weíyaaña mútu? Magúnfuliruntiña láu lachibúniwa újabu lubá eígini, según wagáburi.
3Ába laríñagun Jesúsu joun.
—¿Ánti gíñe jájalachagunbalin lerérun Búngiu lun jafálaruni binádu jigáburi? 4Laríñajare Búngiu. “Inébe jamá bagǘbürigu bun, le anábagubaliña lagǘbürigu, jilála.” 5Ánjeinti jugúya, aríñagatün luágu gayára lan laríñagun ában gürígia lun lúguchi o tun lúguchu. “Siñáti níderagunibu ladǘga sun le númabei, aríñagaadina luágu lun lan níchuguni lun Búngiu”, 6luágu furúmieguarügü lan le aríñaguti ítara, mámaali lan lúnti líderaguniña lagǘbürigu. Láu líra mebégigüda jumáali lagúmadijan Búngiu lun jafálaruni binádu jigáburi. 7¡Biángua tigíbu jugúya le! Linárün proféta Isaías laríñagunbei juágu ítara.
8Jayumárurügü gürígia ja jíchiga inébesei nun, líña Búngiu,
ánjein tídan janígi, mebéresentiña náu.
9Málati jájuduragun nun,
ladǘga le rügǘñein jagúmadijan wügǘriña jarúfudaja.
10Ábati lagúarun joun gürígia, ába laríñagun joun.
—Agáamba jumá, gunfaráanda jugúyame. 11Máma eígini le leígubei gürígia adǘgübalin lun marúman lan ligíbugiñe Búngiu, dimúrei wuríbati le laríñagubei wügǘri, ligía adǘgübalin lun marúman lan.
12Ábati jayábin disípulugu lúmoun Jesúsu, ába jaríñagun lun.
—¿Subúditisan bun luángiu lun jafálaruni binádu jiggu wuríba lan láburujan dimúrei le baríñagubei joun fariséogu?
13Ába laríñagun joun.
—Furúmieguarügü nádü to máma lábunun Núguchi Búngiu le siélubei, lájulúba láu sun lílagüle. 14Ígira jumáña, maríjintiña ja adúndejatiña maríjintiña jáledi jagía. Áni ánjein adúndeja ában maríjinti ában maríjinti líledi, jeíguaduba biángubei jagía lídoun ában júyu.
15Ábati laríñagun Pédro lun Jesúsu.
—Furáangugüdabeí jémpulu le woun.
16Ába laríñagun Jesúsu.
—¿Úati gíñe gunfaráanda jumá? 17¿Úati gunfaráanda jumá luágu sun lan le ebélurubei lídoun iyúmaü, ába lídin lídoun urágei, lárigiñe ába láfuridun lídaangiñe úgubu? 18Ánjein dimúrei le áfuridubei lídaangiñe iyúmaü, tídaangiñe anígi liábin, ligíati ádügübalin wügǘri lun marúman lan ligíbugiñe Búngiu, 19ladǘga tídaangiñe anígi láfurida samínaü wuríbati, áfarajani, adultériu, salúfuri, íweru, iyéeni, marásualugu. 20Ligía buri cátei le adǘgübalin wügǘri lun marúman lan, ánjeinti leigíniwa machibúnga újabu según jagáburi juríu marúmadagüdün lumúti ligíbugiñe Búngiu.
Ában wǘri teréncha to afíñeruboun luágu Jesúsu
(Mr 7.24-30)
21Ába láfuridun Jesúsu ñígiñe, ába lídin lídoun buri fulásu geyégua láu fulásu le Tíro lúma Sidón. 22Ñíñoun ában wǘri jádaangiñetu Cananítagu aganoúti lídan fulásu ligía, ába tiábin luágun Jesúsu agúarajeina.
—¡Nabúreme, ladǘgawagun Davíd, gudémená bun! Níjein ában espíritu wuríbati tuágu nisáani, weíriti tasúfurirun lurúma.
23Moúnabun lumútu Jesúsu. Ábati jayábin disípulugu, ába jayúmuragun lun, ába jaríñagun.
—Adǘgabeí le tamúriajabei búma, ladǘga nuteíntia agúarajeina wárigi.
24Ába laríñagun Jesúsu.
—Joún rügǘñein gürígia féridijaña ja Israelítagu loúnajana Búngiu lun níderaguniña.
25Ába tiábin wǘri tugúya, ába tájuduragun ligíbugiñe, ába taríñagun.
—¡Nabúreme, íderagua bána!
26Ába laríñagun Jesúsu tun.
—Lúnti níderaguniña numútuniña ja juríu furúmiñe, mabuídunti lun tagídarúniwa fein jaweí isáanigu lun tíchugúniwa joun oúnli.
27Ába taríñagun.
—Ánja, Nabúreme, láu sun líra, gayáraati jeígini oúnli ífei le áburujati lueígiñe jadábulan jabúriña.
28Ábati laríñagun Jesúsu tun.
—Wǘri, ¡weíriti gíñe bafíñen! Susérelá le babúseerubei.
Lúmagiñe óra ligía, ába tareídagun tisáani.
Lareídaguagüdün Jesúsu sarágu sánditiña
29Ába láfuridun Jesúsu ñígiñe, ába lachǘlürün lárun dúna Galiléa, lárigiñe, ába laweínrun luágun ában wǘbü, ába lañúurun ñi. 30Ába jayábin sarágu gürígia le ñíjin lubeí barüína jagía meíbuguntiña, maríjintiña, maríñaguntiña, danímaati jarǘna, jáma sarágu jawúyeri sánditiña. Ába jíchuguniña lubádu lugúdi Jesúsu, ába lareídaguagüdüniña. 31Ába laweíridun janígi gürígia láu jaríjin adímurejaña jamá já meja maríñagadibaña, areídagua ja danímaabaña arǘna, eíbuga ja meíbuguñajabaña, aríja ja maríjiñajabaña. Ába jagúmeserun adímureja weírigu luágu Jabúngiute Israelítagu.
Líchugun Jesúsu eígini joun gádürü mílu wügǘriña
(Mr 8.1-10)
32Ábati lagúarun Jesúsu joun láni disípulugu, ába laríñagun joun.
—Gudémetiña gürígia ja nun ladǘga ǘrüwaali wéyu jáu núma ya áni úaali ni cáta jáma lun jeígin. Mabúseeruntina noúnajaniña jábiñoun meíginga, dagá líñein falálaü jawágu ǘmada.
33Ábati jaríñagun láni disípulugu lun.
—¿Ída lubáti wadárirun eígini joun sarágu gürígia ya lídan fulásu le ñí lumuti úa jamá aganoútiña?
34Ába lálügüdüniña Jesúsu.
—¿Átiriñoun fein júma?
Ába jaríñagun.
—Sédü, jáma biánraü úduraü.
35Ába laríñagun joun gürígia lun jañúurun múarugu, 36ába lanǘgünun sédü fein jáma úduraü jagía lújaburugu, ába leteíngiruni Búngiu. Ába lagúbachagunun fein, ába líchugunun joun láni disípulugu jáu sun úduraü, ába jafánreinjanun joun gürígia. 37Joútiña súngubei quimúle, buíngüda gíñe sédü faníñe táu to ígiraguboun. 38¡Gádürüñanu mílu wügǘriña eígitiña, mabájüdünga würíña jáma irájüñü! 39Lárigiñe, ába loúnajaniña Jesúsu gürígia águyu, ába ládinun tídoun ugúnein, ába lídin loúbawagun Mágdala.
Currently Selected:
San Mateo 15: cab
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2012, Wycliffe Bible Translators, Inc. All rights reserved.
