San Mateo 13
13
Jémpulu luáguti ábunaguti
(Mr 4.1-9; Lc 8.4-8)
1Wéyu ligía, ába láfuridun Jesúsu múnadagiñe, ába lañúurun láru dúna. 2Quei jagíbedagun gürígia le ñí lubei, ába ládinun tídoun ában ugúnein, ába lañúurun, ába jeréderun sun gürígia láru dúna. 3Ába larúfudajan sarágu cátei joun láu jémpulu, ába laríñagun.
—Ñíñein ában ábunaguti, ába láfuridun ábunagua. 4Lídan afúrujeina láani líla nádü, ába láburujan lídaangiñe luágun ǘma, ába jayábin dunúru, ába jeígini. 5Líbiri, ába láburujan labádinaguoún dǘbü le ñí lumuti úa lan sarágu múa, ába laboúchun furése ladǘga majúlilin lan múa. 6Dan le lásüdün wéyu, ába lásaürün queíti málagüle lan, ába loúnwen. 7Líbiri ílaü, ába láburujan labádinaguoún jíyu, ába laweínamudun jíyu úara lúma, ába láfaruni. 8Ñíñein lídaangiñe, áburujati lídoun múa buíti, alúbajoúati buídu, níjein lídaangiñe, íchuguti san águu luágu cáda ában águu, líbiri rúti ǘrüwa-wein, líbiri darándi. 9Jugúya le garígeirugubei lun jagáambun, agáamba jumána.
Ca lan laníchigubei jémpulu le
(Mr 4.10-12; Lc 8.9-10)
10Ábati jayábin disípulugu, ába jaríñagun lun Jesúsu.
—¿Cásan uágu badímureja joun gürígia láu jémpulu?
11Ába laríñagun joun.
—Jugúya, subúdigüda láali Búngiu sun cátei arámudaguati le lánina larúeijan jun, ánjein jagía, siñáti jasúbudiruni. 12Le agúnfuliruti lúma inárüni le lagáambubei, líchugúba lánwoun lun, ánjein le maténirunti lun, gidáwarügübei murúsun larúgounga le lúmabei lueí. 13Ligía nadímurejanbei joun láu jémpulu ladǘga aríja jamáni le nadǘgübei, ába jeréderun camá maríjintiña, agáamba jameí le naríñagubei, ába jeréderun úaga gunfaráanda jamá camá jamuga magáambuntiña. 14Jawágu lagúnfulira lé meja laríñagubei proféta Isaías dan laríñagunbei.
Jugúya, jagáambuba, úabei gunfaráanda jumá,
jaríjuba, ibídiñebei jun ca lan lílabei le jaríjubei,
15ladǘga deréeru janígi,
wuríbaaliti jagáambun,
murúñu líña jágu,
lun maríjin jumá láu,
magáambun láu jarígeirugu,
úa gunfaráanda jumá táu janígi,
magáraragun jugúyame nun lun nareídaguagüdünün.
16‘Ánjeinti jugúya le nánigubei, fuleíseiwatün ladǘga aríjatün láu jágu, agáamba jugúya láu jarígeirugu. 17Ninárün jáu, sarágu jañá meja profétagu jáma ámu gürígia gúnfulitiña lúma Búngiu abúseerutiña jamúga jaríjinina quei jaríjinina jugúya guetó, maríjin jamútina, buséntiña jamúga meja jagáambuni le jagáambubei jugúya, magáambun jamúti.
Lafúnraanguagüdüni Jesúsu jémpulu luáguti ábunaguti
(Mr 4.13-20; Lc 8.11-15)
18‘Agáamba jumeíti le lílabei jémpulu luáguti ábunaguti. 19Ja agáambubalin ugánu luáguti arúeijani le lánina siélu áni úati gunfaráanda jamáni, ítara jáña quei ǘma le ídounbei láburuja lídaangiñe líla nádü, ába liábin Máfia, ába laságaruni ugánu buíti le ábunúbei tídaangiñe janígi. 20Dǘbü le ñíjin lubeí láburuja ílaü, ítara líña quei gürígia ja agáambubalin ugánu, ába jerésibiruni láu ugúndani, 21quei márügüdün lubeí buídu tídan janígi, madúrati jádan. Dánti le lachǘlürün dan lun joúchawagún lúma jeíbaajoún lueígiñe ugánu ligía, ába leíguadun jarǘna. 22Jíyu le ñíjin lubeí láburuja ílaü, ítara líña quei gürígia ja agáambubalin ugánu, weíritimaati jafúudun luágu cátei le lánina ibágari le, ába leyéeduniña irísini. Sun le, ába láfaruni ugánu tídaangiñe janígi, mígiruntiti lun lalúbajoún jádan gürígia jagía. 23Múa buíti le ñíjin lubeí láburuja ílaü, ítara líña quei gürígia ja agáambubalin ugánu, ába gunfaráanda jamáni, ába jíchugun ában alúbajoúni buíti. Añájein, ítara jáña quei ílaü le íchugubei san águu luágu ában, jíbiri quei le íchugubei ǘrüwa-wein, jíbiri quei le íchugubei darándi.
Jémpulu luáguti jíduru wuríbati labádinagua türígu
24Ábaya líchuguni Jesúsu jémpulu le joun.
—Arúeijani le lánina siélu, ítara líña quei ában wügǘri le ábunagubei ílaü buíti lídan lufúlasun, 25dan añája lan sun ja ñíbaña arúmuga, ába lebélurun ában lágani labúreme fulásu ligía, ába lábunun jíduru wuríbati labádinagua türígu, ába lídin. 26Dan le laweínamudun türígu ába legélewejan, ába gíñe lachǘlaagun jíduru wuríbati. 27Ába joúdin músu, ába jaríñagun lun jayúbudiri. “Wayúbudiri, ánjein buídu lubeí ílaü le bábunagubei bumúanrugu, ¿jalíagiñésan lasálira jíduru wuríbati le?” 28Ába laríñagun iyúbudiri joun. “Ladǘga ában ágani le.” Ábati jaríñagun músu lun. “¿Buséntibu lun wájulajani jíduru wuríbati le?” 29Ába laríñagun joun. “Uá, ladǘga dánme jájulajani jíduru wuríbati, julá jíñein lin gíñe türígu úara lúma. 30Ígiragubei jumeí lun laweínamudun úara daríme lidáani alúbajani, ábame naríñagun joun ñadágimeintiña lun jájulajani jíduru wuríbati furúmiñe, ábame jagǘraguni lun lágudúniwa, lárigiñeme, ábame jareíduni türígu tídan lágei.”
Jémpulu luáguti tíla mostása
(Mr 4.30-32; Lc 13.18-19)
31Rúlumuti gíñe Jesúsu jémpulu le joun.
—Ítara líña arúeijani lánina siélu quei ában tíla mostása le lábunubei ában wügǘri lufúlasunrugu. 32Tíla mostása, ligía ílaü ñǘraütimaabei lídaangiñe sun ílaü, áni dan laboúchun, ligía weíritimaabei lídaangiñe sun nádü, ába liábin lun ábanbei lan wéwe weíriti darí lun jayábin dunúru adǘga jádibu luágu lilímun.
Jémpulu luáguti ísi
(Lc 13.20-21)
33Rúlumuti gíñe jémpulu le joun.
—Ítara líña arúeijani le lánina siélu quei ísi le tagúbudubei ában wǘri tídan ǘrüwa líburu fulúwaaru, ába terésirun sun fulúwaaru tugúya.
Ca lan lébunabei líchuguni Jesúsu jémpulu buri le
(Mr 4.33-34)
34Láu jémpulu laríñagei Jesúsu sun cátei le joun gürígia, maríñagunti ni cáta joun mayúsurunga jémpulu. 35Sun cátei le, lun lagúnfulirun le laríñagubeí meja Búngiu liyúmulugugiñe proféta.
Nadímurejaba láu jémpulu jun,
nafúnraanguagüdübei cátei lé buri meja arámudaguabei jun lúmagiñe nadǘgüni uboú.
Lafúnraanguagüdüni Jesúsu jémpulu le luáguti jíduru wuríbati labádinagua türígu
36Ába loúnajaniña Jesúsu gürígia jábiñoun, ába lebélurun múnadoun, ába jayábin láni disípulugu, ába jaríñagun lun.
—Furáanguagüdabeí jémpulu le luáguti jíduru wuríbati woun.
37Ába laríñagun Jesúsu joun.
—Áu le Wügǘri Garaǘwarügüti, áu le ábunagubalin ílaü buíti, 38múa, ligía uboúbei, ílaü buíti, jagía gürígia ja lílana larúeijan Búngiu, jíduru wuríbati, jagía gürígia ja lánigu Máfia, 39áganiti le ábunubalin jíduru wuríbati, Máfia méme, alúbajani, ligía lagúmuchunbei uboú, ja alúbajabaña, ánjeligu. 40Ítara quei labúdajoúniwa jíduru wuríbati ába lágurún wáturugun lun lágudun, ítara lúba gíñe lasúseredun dánme lagúmuchun uboú, 41áu le Wügǘri Garaǘwarügüti, noúnajabaña náni ánjeligu aságaraña sun ja afígoungüdübaña ámu, jáma ja adǘgübaña wuríbati, lídaangiñe narúeijan, 42ábame jácharaguniña lídoun wátu geméti lánina máfiougati. Ábame jayájuajan ñi, ábame lacǘnrinjan jári. 43Jámeti adǘgübalin le lubeíbei Búngiu, ábame jámiridun quei wéyu lídan larúeijan Wáguchi Búngiu. Agáamba jumána, jugúya le garígeirugubei lun jagáambun.
Jémpulu luáguti irísini le arámudúañubei
44‘Ítara líña arúeijani le lánina siélu quei irísini le arámudúañubei lábugiñe múa. Ladárirei ában wügǘri irísini ligía, ábaya larámuduni ñi méme, le luweírin lugúndan, ába lídin, ába lalúguruni sun le lúmabei, ába lagáñijani fulásu ligía.
Jémpulu luáguti pérla le weíribei ebégi
45‘Ítara líña gíñe arúeijani le lánina siélu quei ában alúgurajati le eíbugañajabei áluaja pérla fínuti, 46dánti ladárirun ában le weíriti lebégi, ába lídin, ába lalúguruni sun le lúmabei, ába lagáñijani pérla ligía.
Jémpulu tuáguti séni
47‘Ítara líña gíñe arúeijani le lánina siélu quei ában séni to agurúboun baránaja, ába tañúgun sun jawúyeri úduraü. 48Dan tabuínchun, ába jacháwarunun esénijatiña lárun béya, ába jañúurun ñi anúadajaña úduraü, ába jareíduniña ja buídubaña, ába jachágaruniña ja wuríbabaña. 49Ítara lúba dánme lagúmuchun uboú, jayábiba ánjeligu lun jafánreinruniña ja buídubaña jádaangiñe ja wuríbabaña. 50Ábame jádaruniña ja wuríbabaña lídoun wátu geméti lánina máfiougati, ñíba lubeí jayájuaja, acǘnrijame jári.
Irísini buri iséri lúma binádu
51Ábati lálügüdüniña Jesúsu, laríñaga joun.
—¿Gunfaráanda jumútisan sun cátei le?
Ába jaríñagun.
—Ánja, Wabúreme.
52Ábati laríñagun joun.
—Dan le liábin ában arúfudajati lilúrudun Moisés lun gunfaráanda láni luáguti arúeijani le lánina siélu, ába ítara lan quei ában iyúbudiri le gaságaraditi cátei iséri buri lúma cátei binádu buri lídaangiñe lirísin lun líchuguni joun tílana lúban dan le jemégeiruni, queígubeirügü, gayáraati larúfudajan joun gürígia luágu lilúrudun Moisés lúma gíñe luágu cátei le narúfudajabei, áu le Jesúsu.
Jesúsu lídan fulásu le gíribei Nazarét
(Mr 6.1-6; Lc 4.16-30)
53Dan lagúmuchunbei líchuguni Jesúsu jémpulu buri le, ába lídin ñígiñe, 54ába lachǘlürün lageíroun. Ába lagúmeserun arúfudaja tídan jalígilisin juríu to lídaanboun fulásu ligía, ába laweíridun janígi gürígia, ába jaríñagun.
—¿Jalíasan lafúnrendeirei wügǘri le sun lichú áu le? ¿Ída liñásan gayára láani miláguru buri le adǘga? 55Liraǘga saráfangei le, María lúguchuboun, líbugaña Jacóbo, José, Simón lúma Júdas, 56ya gíñe jagánawa lamúlenu jáma lítunu wádan. ¿Jalíagiñeti lasúbudirei sun le?
57Ába jamájarun lun jerésibiruni. Ába laríñagun Jesúsu joun.
—Sun gürígia jínsiñeti ában proféta joun, mámarügaali ligía lídaangiñeti fulásu le ñí jabeí o tílana lan jában.
58Madǘgüntiti sarágu miláguru ñi ladǘga mafíñen jamá luágu.
Loúnwen Juan le abásteragüdajabei
(Mr 6.14-29; Lc 9.7-9)
Currently Selected:
San Mateo 13: cab
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2012, Wycliffe Bible Translators, Inc. All rights reserved.
