Luke 5
5
1တနိန့်မာ ကိုယ်တော်ယေရှုက င်္ဂနေသရက်အိုင်အနားမာ ရပ်နီစိုင် လူထုပရိတ်သတ်တိက ဘုရားသျှင်၏နှုတ်ကပတ် တရားတော်ကို နားထောင်ဖို့ ကိုယ်တော်၏ပတ်ပတ်လည်ကို ဝိုင်းအုံလာကတ်ပါရေ။ 2ယေပြီးကေ ကိုယ်တော်က ကမ်းနားမာ ကပ်ထားရေ ငါးဖမ်းလောင်းနှစ်စီးကို မြင်တော်မူပါရေ။ တံငါသီရို့ကလည်း လောင်းထက်က ဆင်းဗျာလ် ငါးဖမ်းပိုက်တိကိုရာ ဆီးနီကတ်ပါရေ။ 3ယေခါ ကိုယ်တော်ယေရှုက ယင်းလောင်းနှစ်စီးထဲက ရှိမုန်၏လောင်းထက်ကို တက်လားပြီးကေ ရှိမုန်အားလောင်းကို ကမ်းနန့် တစီကေသျှေအကွာကို ရွိ့လိုက်ဖို့ မိန့်လီရေ။ ယေပြီးကေ ကိုယ်တော်က လောင်းထက်က ထိုင်ဗျာလ် လူတိကို ဟောပြောသွန်သင်တော်မှုပါရေ။ 4ကိုယ်တော်က ဟောပြောသွန်သင်ပြီးရေအခါ ရှိမုန်အား “လောင်းကို ရီအနက်ဘက်သို့ လှော်စီပြီးကေ ငါးဖမ်းဖို့အတွက် သင်၏ငါးဖမ်းပိုက်ကို ချလိုက်ပါ” လို့ မိန့်တော်မူလီရေ။ 5ရှိမုန်ကလည်း “ဆရာ၊ ကျွန်တော်ရို့က ညဇာကတညဉ့်လုံး ပပင်ပပန်း ကြိုးစားရှာကေလည်း ငါး တစ်ကောင်လည်း မရခပါ။ ယေကေလည်း ဆရာက ကျွန်တော်ကို ပြောရေအတွက်နန့် ငါးဖမ်းပိုက်ကို ထပ်လို့ချလိုက်ပါမေ” လို့ ဖြေလီရေ။ 6ယေပြီးကေ ငါးဖမ်းပိုက်တိကို ချလိုက်ရေအခါ ငါးဖမ်းပိုက်တိ စိတ်လောက်အောင် ငါးတိအများကြီးကို ဖမ်းလို့ရလီရေ။ 7ယေတွက်နန့် သူရို့က တစ်ခြားလောင်းထက်မာ ဟိရေအဖော်တံငါသီတိကို သူရို့ကိုကူညီဖို့အတွက် အချက်ပြလို့ ခေါ်လိုက်ပါရေ။ ယင်းသူရို့ ရောက်လာဗျာလ် လောင်းနှစ်စီးစလုံးမာ ငါးတိကို ထည့်ရေခါ သူရို့၏လောင်းတိပါ မြုပ်ချချင် ဖြစ်လားလီရေ။ 8ရှိမုန်ပေတရုက ဒေပိုင်အဖြစ်ပျက်တိကို မြင်တွိ့ရရေအခါ ကိုယ်တော်ယေရှု၏ခြီရင်းမာ ဒူးထောက်ဗျာလ် “အသျှင်၊ ကျွန်တော်က အပြစ်ဒုစရိုက်များရေလူ ဖြစ်တေအတွက်နန့် ကျွန်တော့်အနားက အဝီးကို ကြွတော်မူပါ” လို့ လျှောက်တင်လီရေ။ 9သူနန့်တစ်ခြားလူတိကလည်း သူရို့ဖမ်းရထားရေ ငါးအကောင်အရွီအများကြီးဖြစ်လို့ ကောင်းကောင်းအံ့လို့ မကျီ ဖြစ်နီကတ်လို့ဖြစ်ပါရေ။ 10ယင်းအထဲမာ ရှိမုန်၏အဖော်တိဖြစ်တေ ဇေဗေဒဲ၏သားနှစ်ယောက်ဖြစ်သူ ယာကုပ်နန့်ယောဟန်ရို့လည်း အံ့ဩကတ်ပါရေ။ ယေနန့် ကိုယ်တော်ယေရှုက ရှိမုန်ကို “မကြောက်ကေ့။ အဂုကစလို့ သင်က ငါးဖမ်းဖို့အစား လူတိကို ငါ၏နောက်လိုက် တပည့်တော်တိဖြစ်ဖို့ စုစည်းကတ်ရလိမ့်မေ” လို့ မိန့်တော်မူပါရေ။ 11ယေပြီးကေ သူရို့က လောင်းတိကို ကမ်းထက်မာ ဆွဲတင်ပြီးကေ ဟိသမျှအားလုံးကိုစွန့်ဗျာလ် ကိုယ်တော်ယေရှု၏နောက်ကို လိုက်လားကတ်လီရေ။ 12ကိုယ်တော်ယေရှုက မြို့တစ်မြို့မာဟိနီစဉ် ယင်းမြို့မာ အနာကြီးရောဂါစွဲကပ်နီသူ ယောက်ကျားတစ်ယောက်ဟိလီရေ။ သူက ကိုယ်တော်ကို မြင်ရေခါ သူ၏ရှိ့မာ ဒူးထောက် ဖပြားဝပ်ပနာ “အသျှင်၊ အသျှင်ရာ ဆန္ဒဟိတော်မူကေ ကျွန်တော့်ရောဂါကို သန့်စင်လားအောင် ကုသပီးနိုင်ပါရေ” လို့ တောင်းပန်လီရေ။ 13ယေခါ ကိုယ်တော်က သူ၏လက်ကိုဆန့်ပနာ ယင်းသူ့ကို တို့ပြီးကေ “ငါ အလိုဟိရေ၊ သန့်စင်စီ” လို့ မိန့်တော်မူလိုက်စွာနန့် ဒိဌလက်ငင်း ယင်းသူ၏ရောဂါမာ သန့်စင်လားလီရေ။ 14ယေပြီးကေ ကိုယ်တော်က သူ့ကို “သင့်ရောဂါသန့်စင်လားရေအကြောင်းကို တစ်ယောက်ကိုလည်း မပြောပါကေ့။ ယေကေလည်း ပုရောဟိတ်ဘားကိုလားဗျာလ် သင့်ရောဂါသန့်စင်လားစွာကို စမ်းသပ်ခွင့်ပြုလိုက်ပါ။ ယေပြီးကေ သင့်၏ရောဂါသန့်စင်လားစွာကို လူတိဘားမာ သက်သီဖြစ်စီဖို့ မောရှေ ပညတ်ကျမ်းမာ ဖော်ပြထားရေအတိုင်း ပူဇော်ဖို့အမှုကိစ္စကိုလားဗျာလ် ဆောင်ရွက်ပါ” လို့ မိန့်တော်မူပါရေ။ 15ယေကေလည်း ကိုယ်တော်၏သတင်းက ပိုလို့ပျံ့နှံ့လားရေအတွက်နန့် လူအများကြီးကလည်း ကိုယ်တော်၏တရားတော်တိကို နာယူဖို့နန့် မကျိုင်းမာမှုတိကောင်းအောင် ရောက်ဟိလာကတ်ပါရေ။ 16ယေကေလည်း ကိုယ်တော်က လူသျှင်ကင်းရေနီရာမာ လုံးချင်းတည်း မကြာမကြာ လားဗျာလ် ဆုတောင်းလိဟိပါရေ။ 17တနိန့်မာ ကိုယ်တော်ယေရှု ဟောပြောသွန်သင်နီစိုင် ဂါလိလဲပြည်၊ ယုဒပြည်ရို့ဟိ ကျေးရွာတိနန့် ဂျေရုဆလင်မြို့မှ လာကတ်တေ ဖာရိရှဲတစ်ချို့နန့် ကျမ်းတတ်ဆရာတစ်ချို့ရို့လည်း ယင်းနီရာမာ ထိုင်နီကတ်လီရေ။ ဘုရားသျှင်က လူတိ၏အနာရောဂါတိ ကုသဖို့ ကိုယ်တော်ကို တန်ခိုးတိပီးအပ်ထားပါရေ။ 18လူတစ်ချို့က လီဖြတ်နီသူတစ်ယောက်ကို သပေါက်ထက်မာ တင်လို့ ထမ်းလာဗျာလ် အိမ်ထဲကိုသွင်းပနာ ကိုယ်တော်၏ရှိ့မာ ချထားဖို့ ကြိုးစားကတ်လီရေ။ 19ယေခါ လူထုပရိတ်သတ်အများကြီးဟိနီရေအတွက်နန့် သူ့ကို အိမ်ထဲကိုထမ်းလားဖို့ လမ်းမတွိ့ဖြစ်နီပါရေ။ ယေတွက်နန့် သူရို့က သူ့ကို အိမ်ခေါင်ထက်ကို ထမ်းလားဗျာလ် အိမ်ခေါင်မိုးကိုခွာပြီးကေ လူတိအလယ်ကောင်မာဟိရေ ကိုယ်တော်ယေရှု၏ရှိ့ကို သပေါက်နန့် အသာအသာ ချလိုက်ပါရေ။ 20ယင်းသူရို့၏ယုံကြည်ချက် ခိုင်မာစွာကို မြင်ရေအခါ ကိုယ်တော်က လီဖြတ်နီရေလူကို “မိတ်ဆွီ၊ သင်၏အပြစ်ဒုစရိုက်တိကို ငါ ခွင့်ရွှတ်ပီးလိုက်ဗျာလ်” လို့ မိန့်တော်မူလီရေ။ 21ယေခါ ဖာရိရှဲတိနန့် ကျမ်းတတ်ဆရာတိက “ဘုရားသျှင်ကို မထီလေးစားပြောနီစွာ ဇာသူလဲ။ အပြစ်ဒုစရိုက်တိကို ဘုရားသျှင်တစ်ပါးတည်းရာ ခွင့်ရွှတ်နိုင်ရေ” လို့ သူရို့၏စိတ်ထဲမာ တွေးနီကတ်လီရေ။ 22ကိုယ်တော်ယေရှုက ယင်းသူရို့ ယင်းပိုင်တွေးနီစွာကို သိဟိလို့ ယင်းသူရို့ကို “သင်ရို့ ဇာဖြစ်လို့ ယင်းပိုင်တွေးနီရစွာလဲ။ 23‘သင်၏အပြစ်ဒုစရိုက်တိကို ခွင့်ရွှတ်လိုက်ဗျာလ်’ ယေမှမဟုတ် ‘ထပြီးကေ လမ်းလျှောက်ပါ’ လို့ ပြောစွာမာ ဇာက ပိုလို့လွယ်ဖို့လဲ။ 24ယေကေလည်း လူ့သားတော်က ဒေကမ္ဘာလောကမာဟိရေ အပြစ်ဒုစရိုက်တိအားလုံးကို ခွင့်ရွှတ်နိုင်ရေ အာဏာဟိစွာကို သင်ရို့ကို သက်သီပြမေ” လို့ မိန့်တော်မူလီရေ။ ယေပြီးကေ ကိုယ်တော်က လီဖြတ်နီသူကို “သင့်ကို ငါ ပြောမေ၊ ထဗျာလ်၊ သင်၏သပေါက်ကိုယူပနာ အိမ်ကို လားဖိ” လို့ မိန့်တော်မူလီရေ။ 25ယင်းပိုင် ပြောလိုက်စွာနန့် ဒိဌလက်ငင်း ယင်းသူက လူတိအားလုံးရှိ့မာ ထရပ်လိုက်ပြီးကေ သူလှဲနီခရေသပေါက်ကို သိမ်းလို့ ဘုရားသျှင်ကို ချီးမွမ်းပူဇော်ဗျာလ် အိမ်ကို ပြန်လားခလီရေ။ 26လူထုပရိသတ်တိကလည်း အံ့ဩပနာ ဘုရားသျှင်ကို ချီးမွမ်းပူဇော်ကတ်လီရေ။ သူရို့ကလည်း ကြောက်လန့်ပနာ “ငါရို့ ဒေနိန့်မာ ထူးဆန်းအံ့ဩဖို့ကောင်းရေ အကြောင်းအရာကို မြင်တွိ့ရဗျာလ်” လို့ ပြောကတ်လီရေ။ 27ယေပြီးကေ ကိုယ်တော်ယေရှုက ယင်းနီရာက ထွက်လားခပြီးကေ လေဝိနာမယ်ဟိရေ အခွန်ကောက်သမားတစ်ယောက်က အခွန်ကောက်ရေတဲထဲမာ ထိုင်နီစွာကို တွိ့ရေခါ “ငါ့နောက်ကိုလိုက်ပါ” လို့ မိန့်လိုက်တေ။ 28ယေတွက်နန့် လေဝိကလည်း သူ၏အခွန်ကောက်သမားဘဝကို စွန့်ထားခပြီးကေ ကိုယ်တော်၏နောက်ကို လိုက်လားလီရေ။ 29ယေပြီးကေ လေဝိက သူ့အိမ်မာ ကိုယ်တော်အတွက် ကောင်းကောင်းသားနားရေ စားသောက်ပွဲနန့်ကျင်းပပီးလို့ အခွန်ကောက်သူတိနန့် တစ်ခြားအာဂန္တုတိလည်း သူရို့နန့်တတူ စားသောက်ကတ်လီရေ။ 30ဖာရိရှဲတိနန့် သူရို့ထဲမှ ကျမ်းတတ်ဆရာတိက ကိုယ်တော်၏တပည့်တော်တိကို “သင်ရို့က ဒေအခွန်ကောက်သူတိ၊ အပြစ်ဒုစရိုက်သမားတိနန့်တတူ ဇာတွက်နန့် စားသောက်နီကတ်ရစွာလဲ” လို့ ဝေဖန်ပြောဆိုကတ်လီရေ။ 31ကိုယ်တော်ယေရှုက သူရို့ကို ဖြေလိုက်စွာက “ကျိုင်းမာရေလူမာ ဆီးဆရာမလို။ ယေကေလည်း မကျိုင်းမာရေလူတိမာရာ ဆီးဆရာလိုပါရေ။ 32သူတော်ကောင်းတိအတွက် နောင်တရစီဖို့ ငါ လာစွာမဟုတ်။ ယေကေလည်း အပြစ်ဒုစရိုက်သမားတိ နောင်တရစီဖို့အတွက်ရာ ငါလာရစွာဖြစ်တေ” လို့ မိန့်တော်မူလီရေ။ 33ယေပြီးကေ လူတစ်ချို့က ကိုယ်တော်ယေရှုကို “ယောဟန်နန့် သူ၏တပည့်တော်တိက အစာမစားဘဲ ဥပုသ်စောင့်ခြင်းနန့် ဆုတောင်းခြင်းကို မကြာခကြာ လုပ်လိဟိကတ်ပနာ ဖာရိရှဲရို့၏တပည့်တော်တိကလည်း ဒေအတိုင်းဗျာလ် လုပ်လိဟိပါရေ။ ယေကေလည်း သင်၏တပည့်တော်တိက မကြာမကြာ စားနီသောက်နီကတ်တေ” လို့ ပြောလီရေ။ 34ကိုယ်တော်ယေရှုက “သမက်တက်ပွဲကို လာရေ မိတ်ဆွီတိက သမက်သျှင်နန့်တတူ ဟိနီရေအချိန်မာ သင်ရို့က သူရို့ကို အစာမစားအောင် လုပ်နိုင်လို့လား။ ယင်းပိုင် လုပ်နိုင်လိမ့်မေ မဟုတ်။ 35ယေကေလည်း သမက်သျှင်ကို သူရို့ဘားက ခေါ်လားရေအချိန် ကျလာရေအခါ သူရို့တိက မစားမသောက်ဘဲ နီကတ်လိမ့်မေ” လို့ မိန့်တော်မူပါရေ။ 36ယေပြီးကေ ကိုယ်တော်ယေရှုက သူရို့ကို ပုံဥပမာတစ်ခုနန့် မိန့်တော်မူပါရေ။ ယေပြီးကေ ကိုယ်တော်က “ဇာသူလေ့ အဝတ်အသစ်မှ အချာစကို ဆုတ်ပနာ အဝတ်ဟောင်း၏အပေါက်ကို မဖာကတ်ပါ။ ယင်းပိုင်လုပ်ကေ အဝတ်အသစ်ကပျက်ဆီးလားဖို့ စွာမကလို့ ဖာလိုက်တေ အချာစအသစ်လည်း အဝတ်ဟောင်းနန့် ကိုက်ညီဖို့မဟုတ်ပါ။ 37စပျစ်ဝိုင်အသစ်ကို သားရီဗူးအဟောင်းထဲမာ တစ်ယောက်လည်း မထည့်ပါ။ ထည့်လိုက်ကေ စပျစ်ဝိုင်အသစ်က သားရီဗူးကို ပေါက်လားစီဗျာလ် စပျစ်ဝိုင်ကလည်း ဖိတ်လားပနာ သားရီဗူးလည်း ပျက်စီလားပါလိမ့်မေ။ 38ယေတွက်နန့် စပျစ်ဝိုင်အသစ်ကို သားရီဗူးအသစ်မာရာ ထည့်ရပါဖို့။ 39စပျစ်ဝိုင်အဟောင်းကို သောက်ပြီးရေ လူတိုင်းက ‘စပျစ်ဝိုင်အဟောင်းစွာ ပိုလို့ကောင်းရေ’ လို့ ဆိုပနာ စပျစ်ဝိုင်အသစ်ကို သောက်ချင်ဖို့ မဟုတ်ပါ” လို့ မိန့်တော်မူလီရေ။
This translation of the Northern Rakhine Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
