Luke 3
3
1ရောမဘုရင်ကြီးတိဗေရိ၏နန်းသက် တစ်ဆယ့်ငါးနှစ်ဟိနီရေအချိန်မာ ပုန္တိပိလတ်က ယုဒပြည်၏ဘုရင်ခံဖြစ်ပနာ၊ ဟေရုဒ်အန္တိပaက ဂါလိလဲပြည်၏အုပ်ချုပ်သူဖြစ်ပါရေ။ ဟေရုဒ်အန္တိပ၏ညီ ဖိလိပ္ပုက ဣတုရဲပြည်နန့် တရာခေါနိတ်ပြည်၏အုပ်ချုပ်သူဖြစ်ပနာ၊ လုသာနိကလည်း အဘိလင်ပြည်မာ အုပ်ချုပ်သူဖြစ်ပြီး 2အန္နနန့် ကယာဖရို့က အကြီးဆုံးပုရောဟိတ်b ဖြစ်ပါရေ။ ယင်းအချိန်မာ ဘုရားသျှင်၏နှုတ်ကပတ်တော်ကလည်း တောကန္တာရထဲမာ နီထိုင်လို့ဟိရေ ဇာခရိ၏သား ယောဟန်ဘားကို ရောက်လာပါရေ။ 3ယေတွက်နန့် ယောဟန်က ဂျော်ဒန်မြစ်တစ်လျှောက်ဒေသအားလုံးကို ပတ်လို့လားဗျာလ် လူတိကို သူရို့၏အပြစ်ဒုစရိုက်တိက ခွင့်ရွှတ်ခံရဖို့အတွက် နောင်တသံဝေဂရပနာ ရီနစ်မင်္ဂလာc ခံယူကတ်ဖို့အကြောင်းတိကို ဟောပြော နီခလီရေ။ 4ယင်းချင့်တိက ပရောဖက် ဟေရှာယကျမ်းမာ ယောဟန်အကြောင်းကို ကြိုတင်လို့ နိမိတ်ဖတ်လို့ရီးထားခစွာက “တောကန္တာရထဲမာ တစ်ယောက်ယောက်က အသံအကျယ်ကြီးနန့်ဟစ်အော်နီစွာက ‘အသျှင် ကြွလာဖို့လမ်းကို ပြင်ဆင်ကတ်ပါ။ အသျှင်၏လမ်းကို ဖဖြောင့်ဖြစ်စီပါ။ 5တောင်ကြားဂျိုင့်ဝှမ်းတိုင်းကို မြီဖို့ဗျာလ် တောင်ကုန်း၊ တောင်တန်းတိကို ညီလို့ ဟိစီပါ။ ကောက်နီရေလမ်းတိကို ဖြောင့်အောင်လုပ်ပနာ ကြမ်းနီရေလမ်းတိကိုလည်း ချောအောင် လုပ်စီပါ။ 6ယေပြီးကေ ဘုရားသျှင်စီလွှတ်တေ ကယ်တင်သျှင်ကိုလည်း လူအများရို့က မြင်တွိ့ကတ်ရဖို့’ လို့ ဖြစ်တေ” လို့ ဖြစ်ပါရေ။ 7ယေတွက်နန့် ယောဟန်က သူ့ဘားမာ ရီနစ်မင်္ဂလာခံယူဖို့ ရောက်လာရေလူတိကို “သင်ရို့က အဆိပ်ဟိရေမြီအုပ်ကြီးရာ၊ ရီနစ်မင်္ဂလာခံလိုက်စွာနန့် သင်ရို့၏အပြစ်ဒုစရိုက်တိကို ဘုရားသျှင် အပြစ်ပီးစွာက လွတ်လားဖို့လို သင်ရို့စိတ်ကူးနီစွာက မှားရေ။ 8ယေတွက်နန့် သင်ရို့နောင်တသံဝေဂရဗျာလ်ဆိုစွာကို အလုပ်နန့်သက်သီပြကတ်။ သင်ရို့ကိုသင့်ရို့ ‘ငါရို့က အာဗြဟံ၏မျိုးဆက်တိဖြစ်လို ဘုရားသျှင်က ငါရို့ကို အပြစ်ပီးဖို့မဟုတ်ပါ’ လို့ မပြောကတ်ပါကေ့။ ဇာတွက်နန့်ဆိုကေ သင်ရို့ကို ငါ ပြောမေ။ ဘုရားသျှင်က ဒေကျောက်ခဲတိကိုတောင် အာဗြဟံ၏မျိုးဆက်တိအဖြစ် လုပ်နိုင်ရေ။ 9အဂုအချိန်မာ ဘုရားသျှင်က နောင်တသံဝေဂမရရေလူတိကို အပြစ်ပီးဖို့ အလိုက်သင့်ဟိနီရေ။ ယေတွက်နန့် နောင်တသံဝေဂမရဘဲ ကောင်းရေအရာကို မလုပ်သူတိက ဘုရားသျှင်အပြစ်တင်စွာကို ခံရပနာ မီးထဲမာ အထည့်ခံရလိမ့်မေ” လို့ ပြောလီရေ။ 10ယေပြီးကေ လူထုပရိတ်သတ်တိက ယောဟန်ကို “ဒေပိုင်ဆိုကေ ကျွန်တော်ရို့က ဇာပိုင်လုပ်ရပါဖို့လဲ” လို့ မိန်းကတ်လီရေ။ 11ယောဟန်ကလည်း “သင်ရို့ထဲက အင်္ကျီနှစ်လုံးဟိရေလူက တစ်လုံးလည်းမဟိရေလူကို တစ်လုံးပီးရဖို့။ သင်ရို့မာ စားဖို့၊ သောက်ဖို့ဟိကေ မဟိရေလူတိကို ဒေပိုင်ဝီလို့ ပီးစားရဖို့” လို့ ဖြေလီရေ။ 12တစ်ချို့အခွန်ကောက်ရေလူတိကလည်း ယောဟန်ဘားကို ရီနစ်မင်္ဂလာခံယူဖို့ ရောက်လာပြီးကေ သူရို့က “ဆရာ၊ ကျွန်တော်ရို့ ဇာပိုင်လုပ်သင့်ပါလဲ” လို့ မိန်းကတ်တေခါ 13ယောဟန်က “သင်ရို့ အခွန်တိကို ကောက်ရဖို့စွာထက် ပိုလို့မကောက်ကတ်ကေ့” လို့ ပြောလီရေ။ 14တစ်ချို့စစ်သားတိက ယောဟန်ကို “ကျွန်တော်ရို့ကလည်း ဇာပိုင်လုပ်ရပါဖို့လဲ” လို့ မိန်းရေခါ ယောဟန်က “သင်ရို့ကလည်း လူတိဘားကဒင်္ဂါးကို အတင်းအဓမ္မ မတောင်းကတ်ပါကေ့။ တစ်ယောက်ကိုလေ့ မဟုတ်တဟုတ် စစွပ်စစွဲ မလုပ်ကတ်ပါကေ့။ သင်ရို့ရရေလုပ်အားခနန့် မျှတအောင် နီကတ်ပါ” လို့ ပြန်လို ဖြေလိုက်လီရေ။ 15လူအများရို့က မကြာခင် မေရှိယ ကြွလာဖို့ဗျာလ်ဆိုစွာကို မျှော်လင့်ချက် ကြီးကြီးနန့် စောင့်လို့နီကတ်စွာဖြစ်လို့ လူအများကြီးက ကယ်တင်သျှင်မေရှိယစွာ ယောဟန် ဖြစ်နိုင်ဖို့လားလို့ စဉ်းစားနီကတ်ပါရေ။ 16ယေတွက်နန့် ယောဟန်က သူရို့ကို “ငါက လူတိကို ရီနန့် ရီနစ်မင်္ဂလာ လုပ်ပီးစွာက မှန်ပါရေ။ ယေကေလည်း ငါထက် ကြီးမြတ်သူတစ်ယောက်လာနီဗျာလ်။ ငါက သူ၏ဖိနပ်ကြိုးကိုပင် ဖြုတ်ပီးဖို့တောင် မထိုက်တန်ပါ။ သူက လူတိကို ဉာဏ်အလင်းတော်နန့် ရီနစ်မင်္ဂလာပီးပြီးကေ မီးနန့်သန့်စင်ပီးလိမ့်မေe။ 17သူက ကောက်လှိုင်းနယ်ရေတလင်းမာ သူ၏လက်ထဲက သူ၏ကောက်ဆွနန့် ယှင်းပစ်ပနာ စပါးတိကို စုဗျာလ် သူ၏ရိုင်ထဲမာ သိမ်းထားလိမ့်မေ။ ယေကေလည်း ကောက်ရို့တိကို တခါလေ့ မသီရေ မီးထဲမာ လောင်လားစီလိမ့်မေ” လို့ ပြောလီရေ။ 18ယောဟန်က ဒေပိုင်နည်းလမ်းတိအများကြီးနန့် မင်္ဂလာသတင်းကောင်းကို ဟောပြောပနာ လူအများကြီးကို နောင်တသံဝေဂရဖို့ တိုက်တွန်းနှိုးဆော်လီရေ။ 19ယေပြီးကေ ယောဟန်က ဂါလိလဲပြည်ကို အုပ်ချုပ်သူဟေရုဒ်အန္တိပက သူ့ ညီမယား ဟေရောဒိကို ယူလိုက်တေအကြောင်းနန့် သူလုပ်လိုက်တေ အရာမကောင်းစွာတိအများကြီးအတွက် အပြစ်တင်ယှုံ့ချလီရေ။ 20ယေတွက်နန့် ဟေရုဒ်က ယောဟန်ကိုဖမ်းပနာ အချုပ်ချလိုက်စွာရေ သူ၏တစ်ခြားအပြစ်တိထက် ကောင်းကောင်းဆိုးရေ အပြစ်တစ်ခုကို ထပ်လို့ကျူးလွန် လိုက်စွာဖြစ်ပါရေ။ 21ယောဟန်က ထောင်မာ အချုပ်ကျ မခံရခင် သူ့ဘားကိုလာရေ လူအများကြီးကိုလည်း ရီနစ်မင်္ဂလာလုပ်ပီးခပါရေ။ ကိုယ်တော်ယေရှုက ယောဟန်ဘားမာ ရီနစ်မင်္ဂလာခံယူဗျာလ် ဆုတောင်းနီစိုင်မာ အာကာစွာ ဟင်းလင်းပွင့်လားပနာ 22ဉာဏ်အလင်းတော်က ဂြိုးငှက်အသွင်နန့် ကိုယ်တော်ဘားကို လာနားလီရေ။ ရွှီမြို့တော်မှ ဘုရားသျှင်ကလည်း “သင်က ငါ သျှစ်မြတ်နိုးတော်မူရေ ငါ၏သားဖြစ်တေ။ ငါက သင့်ကို ကောင်းကောင်းနှစ်သက် အားရတော်မူရေ” လို့ အသံထွက်လာလီရေ။ 23ကိုယ်တော်ယေရှုက ဘုရားသျှင်အကြောင်းကို စလို့ဟောပြောချိန်မာ သက်တော်သုံးဆယ်လောက် ဟိတော်မူပါရေ။ သူက လူတိ၏အထင်အမြင်အရ ယောသပ် ၏သား ဖြစ်ပနာ ယောသပ်က ဧလိ၏သား ဖြစ်ပါရေ။ 24ဧလိက မဿတ်၏သား၊ မဿတ်က လေဝိ၏သား၊ လေဝိက မေလခိ၏သား၊ မေလခိက ယန္န၏သား၊ ယန္နက ယောသပ်၏သား၊ 25ယောသပ်က မတ္တသိ၏သား၊ မတ္တသိက အာမုတ်၏သား၊ အာမုတ်က နာဟုံ၏သား၊ နာဟုံက ဧသလိ၏သား၊ ဧသလိက နဂ္ဂဲ၏သား၊ 26နဂ္ဂဲက မာအတ်၏သား၊ မာအတ်က မတ္တသိ၏သား၊ မတ္တသိက ရှေမိ၏သား၊ ရှေမိက ယောသပ်၏သား၊ ယောသပ်က ယုဒ၏သား၊ 27ယုဒက ယောဟန္န၏သား၊ ယောဟန္နက ရေသ၏သား၊ ရေသက ဇေရုဗဗေလ၏သား၊ ဇေရုဗဗေလက ရှာလသေလ၏သား၊ ရှာလသေလက နေရိ၏သား၊ 28နေရိက မေလခိ၏သား၊ မေလခိက အဒ္ဒိ၏သား၊ အဒ္ဒိက ကောသံ၏သား၊ ကောသံက ဧလမောဒံ၏သား၊ ဧလမောဒံက ဧရ၏သား၊ 29ဧရက ယောရှု၏သား၊ ယောရှုက ဧလျေဇာ၏သား၊ ဧလျေဇာက ယောရိမ်၏သား၊ ယောရိမ်က မဿတ်၏သား၊ မဿတ်က လေဝိ၏သား၊ 30လေဝိက ရှိမောင်၏သား၊ ရှိမောင်က ယုဒ၏သား၊ ယုဒက ယောသပ်၏သား၊ ယောသပ်က ယောနန်၏သား၊ ယောနန်က ဧလျာကိမ်၏သား၊ 31ဧလျာကိမ်က မေလေ၏သား၊ မေလေက မဲနန်၏သား၊ မဲနန်က မတ္တသ၏သား၊ မတ္တသက နာသန်၏သား၊ နာသန်က ဒါဝိဒ်၏သား၊ 32ဒါဝိဒ်က ယေရှဲ၏သား၊ ယေရှဲက ဩဗက်၏သား၊ ဩဗက်က ဗောဇ၏သား၊ ဗောဇက စာလမုန်၏သား၊ စာလမုန်က နာရှုန်၏သား၊ 33နာရှုန်က အမိနဒပ်၏သား၊ အမိနဒပ်က အဒ်မိန်၏သား၊ အဒ်မိန်က အာရံနိ၏သား၊ အာရံနိက ဟေဇရုံ၏သား၊ ဟေဇရုံက ဖာရက်၏သား၊ ဖာရက်က ယုဒ၏သား၊ 34ယုဒက ယာကုပ်၏သား၊ ယာကုပ်က ဣဇက်၏သား၊ ဣဇက်က အာဗြဟံ၏သား၊ အာဗြဟံက တေရ၏သား၊ တေရက နာခေါ်၏သား၊ 35နာခေါ်က စေရောက်၏သား၊ စေရောက်က ရာဂေါ၏သား၊ ရာဂေါက ဖာလက်၏သား၊ ဖာလက်က ဟေဗာ၏သား၊ ဟေဗာက ရှာလ၏သား၊ 36ရှာလက ကာဣနန်၏သား၊ ကာဣနန်က အာဖာဇဒ်၏သား၊ အာဖာဇဒ်က ရှေမ၏သား၊ ရှေမက နောဧ၏သား၊ နောဧက လာမက်၏သား၊ 37လာမက်က မသုရှလ၏သား၊ မသုရှလက ဧနောက်၏သား၊ ဧနောက်က ယာရက်၏သား၊ ယာရက်က မဟာလေလ၏သား၊ မဟာလေလက ကာဣနန်၏သား၊ 38ကာဣနန်က ဧနုတ်၏သား၊ ဧနုတ်က ရှေသ၏သား၊ ရှေသက အာဒံ၏သားဖြစ်ပြီးကေ၊ အာဒံက ဘုရားသျှင်ဖန်ဆင်းထားရေသား ဖြစ်လီရေ။
This translation of the Northern Rakhine Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
