Luke 8
8
1အင်(မ်)ပါလ်နောလ် အီဝေ့ဓီယော် ကိုယ်တော်ခေါမ် သာဝက ကုလာနှိလှီ့ဓေါလ် လုလှီ့နာမ်(မ်)လှီ့အောလ် ဈာတ်ရောခ့်ထေ့နား ဖုလော်ရှင် သာသနားကြောင်းလှီ့ အဟောရောခ့်။ 2ကိုယ်တော်ဓေါလ် အဟှဓေါလ် အနာရောဂါခိတ်တိလှီ့နား နတ်ဆီးပူးကပ် ခံလောဒ့်ထေ့နား ခိလ်ဘွာလ်တိမုတောလှီ့ခါ ဟှတောလ် အာမ်လူး။ အင်(မ်)လှီ့ဒုလ်ကာလ် နတ်ဆီးလူဆိ့အဝင်ခံလောဒ့်ထေ့နား မောင်းထုတ်ခံလောဒ့်တိ 'မာဂဒလ' နာမ်(မ်)မာလ်ကိ မုတောစော မာရိခါ အလူး။ 3အင်(မ်)အပြင် ဟေရုတ်အမှုထမ်းရိုးထောလ်တိ ခုဇနား အပီဟာ ယောဟန္န၊ ရှုရှန္နနား အစွာမုတောလှီ့ခါ အင်(မ်)လှီ့စလိပ်ယေ ယေရှုနား အတပည့်လှီ့ဓေါလ် အာမ်ကူညီ။ 4လုလှီ့နာမ်(မ်)လှီ့အောလ်ကိ ခေါင်လှီ့ စုဝေးထေ့နား ကိုယ်တော်ယေရှု အနှုဝေါလ်အာမ်လူး။ အင်(မ်)ပါလ်နောလ် ကိုယ်တော်နား အင်(မ်)ခေါင်လှီ့အောလ် နီပုံဥပမာ အဟောင်ဟိလ့်။ 5ကိုယ်တော်နား "ဟမယ် လိုင်မို့ဘိုးပွလ်ဟှတ်နား လိုင်ကွင်းဒုလ်ကာလ် မျိုးစိကြဲဟိုင်ရိုး အဈာတ်။ အင်(မ်)လိုင်မိုဘိုးနား မျိုးစိအကြဲဟိုဝေါလ် အစွာမျိုးစိလှီ့စေ့ လာမ်းမယ်အကိုးဝေ။ အင်(မ်)မျိုးစိလှီ့ ခေါင်လှီ့နားလိထေ့နား ဟိုး(ရ်)လှီ့ လား အာမ်အေ။ 6အစွာမျိုးစိလှီ့စေ့ လုံးခုံငေါလ်ကိသပ့်ကာလ် ကိုးဝေါလ်ထေ့နား အထိင့်လှီ့အဈတ်လူး။ အင်(မ်)ဘော်နားခါ ဓွီမယ်ယခန်းနောလ် ဓီယော် အဇာလူးလာခ့်။ 7အစွာမျိုးစိလှီ့စေ့ ချုံနွယ်ကွားလှီ့အောလ် အကိုးဝေါလ်။ အထိင့်လှီ့ အဈတ်လူးနားခါ ချုံနွယ်ကွားဝေါလ်ယောင်း လောင်းရိပ်မိထေ့နား အမယ်ယေ။ 8အစွာမျိုးစိလှီ့စေ့ မြေဆီလွှာပွန်နောက်ဓိလ်နောလ် ကိုးဝေါလ်ခန်းနောလ် အထိင့်ဈာတ်လူးဟိုဝေါလ် အဆဖို့ဟှတ် အဌေ့လှီ့ပူနူးအဌေး။ အင်(မ်)ဘော် အမိန့်ပါလ်နောလ် "ငေဌဲ့တိ နှော်မယ်တိလှီ့အောလ် အာရုံစိုက်ထေ့နား ငေဘွတ်စူး" တိရို အကြွေးကြော်။ 9အင်(မ်)ပါလ်နောလ် အတပည့်လှီ့နား ကိုယ်တော်ယေရှုအောလ် ပုံဥပမာ(ခွီး)ဆိုလိုရင်း အာမ်ဟိ့။ 10အင်(မ်)ဘော်ခန်းနောလ် ကိုယ်တော်နား " နာ(င်)မီးရိုး ဖုလော်ရှင်သာသနာတော် လျှို့ဝှက်ချက်ခေါမ် ကေရှင်းပြပါလ်ယောင်။ အင်(မ်)ဘော်နားခါ အစွာခေါမ်လှီ့အောလ် ပုံဥပမာ(ခွီး)အသုံးပြုထေ့နား အရှင်းပြလောဒ့်။ နီခေါင်လှီ့နား ဓေါ်နားခါ မုခွတ်ယော်ဟာ့ ရောနားခါ ရော စီးခွတ်ယော်ဟာ့ခန်းနောလ်" တိရို အမိန့်။ 11ကိုယ်တော်နား "ပုံပမာ(ခွီး)ဆိုလိုရင်း အဓိပ္ပါယ်စေ့ မျိုးစိခေါမ် ဖုလော်ရှင်နှုတ်ကပါတ်တော် တရားလှီ့အောလ်အထောလ်။ 12လာမ်းမယ်ကိုးတိ မျိုးစိလှီ့စေ့ ဖုလော်ရှင်နှုတ်ကပါတ်တော် တရားလှီ့ ကြားနာလောဒ့်တလှီ့ အာမ်ဆိုလို။ အင်(မ်)ဘော်နားခါ မာရ်နတ်ဆီးလူးထေ့နား အင်(မ်)ခေါင်လုန်ငေါလ်ကိ ဖုလော်ရှင်နှုတ်ကပါတ်တော တရားလှီ့ အဈီ့အင်(မ်)ခန်းနောလ် ယုံကြည်ခြင်းပျက်စီးထေ့နား ကယ်တင်ခြင်းခံလောဒ့်ယော်ဟ။ 13လုံးခုံငေါလ်ကိ သပ်ကာလ်ကိုးဝေတိ မျိုးစိနောက်ခေါမ်စေ့ ဖုလော်ရှင်နှုတ်ကပါတ်တော် တရားလှီ့ ကြားနားလောဒ့်ဟိုဝေါလ် ချက်ချင်း ဝမ်းမြောက်ဝမ်းသာ လက်အခံ။ အင်(မ်)ဘော်နားခါ ဓီဟနောလ် အရုန်းလှီ့ တွယ်ကပ်အယ်ယော်ဟာ့။ အင်(မ်)လှီ့နား ဝှေ့စောယောင်လက်အာမ်ခံ။ ဘဝအောလ် ခက်ခဲကြမ်းတမ်းတိလှီ့ဓေါလ် ရင်ဆိုင် ကြုံတွေ့လောဒ့်ဟိုဝေါလ် ချက်ချင်းကုံး အင်(မ်)နှုတ်ကပါတ်တရားလှီ့ လက်အာမ်လွှတ်။ 14လှိန်တူဒုလ်ကာလ် ကိုးဝေါလ်တိ မျိုးစိနောက်ခေါမ်စေ့ နှုတ်ကပါတ်တော် တရားဓေါလ် နားကြားလက်ခါမ်နားခါ ဘိုလ်ထေ့နား သာယာချမ်းမြေ့မှုလှီ့ လောဘလန်လွန်ခန်းနောလ် နှုတ်ကပါတ်တော် တရားလှီ့ အီဟိုဝေါလ်ခါ တိုးပွါးဟနောလ် ဆောင်ရွက်ခွတ်ယတိလှီ့အောလ် အာမ်ထောလ်။ 15မြေဆီလွှာပွန်နောက်ဓိလ်နောလ် ကိုးဝေါလ်တိ မျိုးစိနောက်ခေါမ်စေ့ နှုတ်ကပါတ်တော်တရားလှီ့ ကြားနာလောဒ့်ပါလ်နောလ် အင်(မ်)လှီ့ရိုးသားဖြူစင်တိ လုန်ဒုလ်ကာလ် အာမ်စိမ်း(မ်)မယ်။ အဆုံးငေါလ်စေး အင်(မ်)လှီ့နား အဌေ့အပါလှီ့ ဆိပ်ခွင့်အာမ်လောဒ့်။" 16အင်(မ်)ပါလ်နောလ် ကိုယ်တော်ယေရှုနား "မေးအိမ်ထွန်းထေ့နား တောင်း(င်)ငေါလ်ကုပ်(ပ်)လားခါဆီးဆပ် ကုတင်ဓေါင်ငေါလ်ခါဆီးဆပ် စိမ်း(မ်)တိရို အူခါ မယ်ရို။ မေးအိမ်ခေါမ် မေးတိုင်(င်)ငေါလ် ပို့အယ်လားတောဒ့်ဟိုယောင် အိမ်ဒုလ်ကာလ်ဝင်လူးတိလှီ့နား အလင်းရောင် အာမ်မုအိုက်။ 17ဆူလ်ရိုးလောဒ့်ယဟနောလ် ထုအောလ်လောဒ့်ခေါမ် အီခါမယ်ယော်။ ခေါင်လားစုတ်(င်)ယခေါမ် လျို့ဝှက်ချက်နောက်ခေါမ်ခါ မယ်ယော်။ 18အင်(မ်)ခန်းနောလ် အာရုံစိုက်ထေ့နား ငေရိုး။ အူဟှဟှတ်မယ်တိ ခေါင်တိုင်(င်)နား အလှလ်ရို ပက်ခေါမ် ခါမ်လောဒ့်အိုက်။ အင်(မ်)ဘော်နားခါ အီခါတောဝေယတိ ခေါင်စငေါလ်ကိ အမယ်တိရို ခိလ်လောဒ့်ခေါမ်အရာလှီ့ကုံးခါ ဆုံးရှုံးလောဒ်အိုက်" တိရို အမိန့်။ 19နှိုပ်ဟှတ်တောလ် ကိုယ်တော်ယေရှု အနူးနားအနောင်(င်)လှီ့ ကိုယ်တော်ဓေါလ် ခမ်း(မ်)မယ်ဟိုင် အာမ်ခိုက်လူး။ အင်(မ်)ဘော်နားခါ ခေါင်ထုလှီ့ ပူနူးအမယ်ခန်းနောလ် ကိုယ်တော်စငေါလ် ခိုက်ခွတ်ယော်ဟ။ 20အင်(မ်)ခန်းနောလ် ခေါင်ပွလ်ဟှတ်နား ကိုယ်တော်ဝေါလ် "ကိုယ်တော်ယေရှု နူးနားအနောင်(င်) နာ(င်)ဓေါလ် ခမ်း(မ်)မယ်ဟိုင် အဟိလီခန်းနောလ် အပြင်ငေါလ် အဟိစောင်(င်)" တိရို အလျှောက်တင်။ 21အင်(မ်)ဟိုဝေါလ် ကိုယ်တော်နား "ဖုလော်ရှင် နှုတ်ကပါတ်တော်တရားလှီ့ နားကြားထေ့နား လိုက်နာတိလှီ့ကိမ်ကိမ် ကိုယ်တော်နား အနူးနားအနောင်(င်)လှီ့ယောင်" တိရို အဟောင်။ 22အထာနှိုပ်ဟှတ်တောလ် ကိုယ်တော်ယေရှုနား အတပည့်လှီ့ဓေါလ်ဟှတောလ် လောင်(င်)စင်း(င်)ဟှတ်တောလ် ကွာလ်ထေ့နား "နီအိုင်(င်)ကောတ်လူးဘူး"တိရို အမိန့်။ 23အင်(မ်)လှီ့ အင်(မ်)ဓွီအိုင်(င်)အာမ်ကောတ်ဟိုဝေါလ် ကိုယ်တော်ယေရှု လောင်(င်)ခုံငေါလ် အအိပ်။စါစ်နောက်မုတ်ကာလ် လေပြင်းမုန်တိုင်းလူးထေ့နား လောင်(င်)ကိတ်ဟိုင်ရိုထောလ်လူ။ 24အင်(မ်)ဘော်ခန်းနောလ် အင်(မ်)လှီ့နား ကိုယ်တော်ယေရှု လှပ်ထေ့လား "အရှင်၊ ရှင် ဟမီးဟဘာလ်တိုက်ဟိလ့်" တိရို အာမ်လျှောက်။ ကိုယ်တော် အိပ်နောက်ကာလ်ကိ ထုလ်ထေ့နား လေပြင်းမုန်တိုင်းလှီ့ ရပ်တန့်ဟိုင်ရိုး အမိန့်ပက်။ အင်(မ်)ဟိုဝေါလ် လေပြင်းမုန်တိုင်းလှီ့ အငြိမ်ကျဘွာလ်။ 25ကိုယ်တော်ယေရှုနား အတပည့်လှီ့အောလ် "နာ(င်)မီးယုံကြည်ချက်စေ့ ဟအီ"တိရို အဟိ့။ အင်(မ်)လှီ့နား အာမ်စါစ်နောက်ကြ။ အင်(မ်)လှီ့နား "နီခေါင်စေ့ဟီဘောင်ခေါင်" လှိုင်းနား ခီလှီ့ကုံးနားခါ နီ အင်(မ်)အမိန့် အာမ်နာခါမ်လောဒ်ဆီ" တိရို အာမ်ဟောင်ဝေတောင်။ 26အင်(မ်)ပါလ်နောလ် ကိုယ်တော်ယေရှုလား အတပည့်လှီ့ ဂါလိလဲ ဓွီအိုင်(င်)ငေါလ် လောင်စင်းဟှတ်တောလ် ရွက်လွှင့်ထေ့နား အာမ်လူးဟိုဝေါလ် ဂါရစလုကာဝေါလ်ကိ ဂုမ်း(မ်)ကာဝေါလ် အာမ်ခိုက်ယေ။ 27ကိုကိုယ်တော် လောင်ဟြှလ်နောလ်ကိ ကာမ်းဟိုဝေါလ် အင်(မ်)လုအောလ်ကိ ခေါင်ပွလ်ဟှတ် ကိုယ်တော်ဓေါလ် အခမ်း(မ်)မယ်။ အင်(မ်)ခေါင်ခေါမ် နတ်ဆီးပူးကပ်တိခေါင်ပွလ်ဟှတ်တောလ် အထောလ်။ အင်(မ်)ခေါင် အိမ်မယ်ခါ မယ်ယော်၊ ဆူးဆောက်ခေါမ် ခုအယ်ကော စူလှီ့ကြားဝေါလ် လှည့်လည်ထေ့နား မယ်တိပွလ်ဟှတ်တောလ်အထောလ်။ 28အင်(မ်)ခေါင်နား ကိုယ်တော် အမုဟိုဝေါလ် ပိုင်ထေ့နား၊ ကိုယ်တော်မော်ဝေါလ် ကျိုးနွံထေ့နား ဒူးအထောက်။ အင်(မ်)နား "ဖုလော်ရှင်စိုး ယေရှု၊ ကေးစငေါလ်ကိ ဟအီနာလီ၊ ကေးနှိပ်စက်ကော့အား၊ ကေတောင်းပန်" တိရို အလျှောက်။ 29အင်(မ်)ဘော်လျှောက်လောဒ့်ခေါမ်စေ့ ကိုယ်တော်နား အင်(မ်)နတ်ဆီး အင်(မ်)ခေါင်စငေါလ်ကိ ထွက်လူးဘောင်ဟိုင်ရိုး အမိန့်ပက်ခန်းနောလ်အထောလ်။ အင်(မ်)ခေါင်ငေါလ် နတ်ဆီးနား ကွလ်မှန်ဆိတ်အပက်ဆော်။ အကွတ်ခူလှီ့ ထီးရွေးလှီ့အောလ် ခူလ်နားခါ အင်(မ်)နား ထီးရွေးလှီ့ ပါက်ကိုတ်(တ်)ထေ့နား ခေါင်ဟိန်း(င်)နောက်ဓိလ်နောလ် နတ်ဆီးနား အဈိအယ်ခေါမ်အခံလောဒ့်။ 30ကိုယ်တော်ယေရှုနား အင်(မ်)နောလ် "နာ(င်)မိန်စေ့ ဟအီ" တိရိုဟိဟိုဝေါလ် အင်(မ်)ပုန်းဒုလ်ကာလ် နတ်ဆီး ပူးနူးပူးကပ်အယ် ခန်းနောလ် အင်(မ်)နား လေဂေါင်" တိရို အလျှောက်ဘွာလ်။ 31အင်(မ်)နတ်ဆီးလှီ့နား ကိုယ်တော်ယေရှုဝေါလ် "နတ်ဆီးလှီ့ အပစ်ပက်နောက် တွင်း(င်)ထုတ်ဟုမ်(မ်)တိဒုလ်ကာလ် ထောက်ကော့အား" တိရို အခို့အယ်။ 32အင်(မ်)ဟိုဝေါလ် ဝက်လှီ့ဖွဲ့ဟှတ် ကုမ်း(မ်)ဟြှလ်နောလ် အမယ်ယေ။ အင်(မ်)နတ်ဆီးလှီ့နား အင်(မ်)ဝက်လှီ့ဒုလ်ကာလ် ဝင်ဟိုင်ခွင့် ပြုဟိုင်ကိုယ်တော်ဝေါလ် အာမ်ခို့အယ်။ ကိုယ်တော်နား ခွင့်အပြုဟိလ့်။ 33အင်(မ်)ပါလ်နောလ် အင်(မ်)နတ်ဆီးလှီ့ ခေါင်လှီ့စငေါလ်ကိ ထွက်ဘွာလ်ထေ့နား ဝက်လှီ့ဒုလ်ကာလ် အာမ်ဝင်ငယ်။ အင်(မ်)ဟိုဝေါလ် ဝက်လှီ့ကိမ်ကိမ် လော်ရိုကိ ဓွီအိုင်(င်)ငေါလ် ဆိုလ်ထေ့နား သွီးအာမ်စူမ်းကြ။ 34အင်(မ်)ဟိုဝေါလ် ဝက်စောင်(င်)တိလှီ့နား ဝက်လှီ့အဖြစ်ပျက်အာမ်မုလောဒ်ဟိုဝေါလ် ဈာလ်ထေ့နား အင်(မ်)ဆီးတင် လုတိုမ်နာမ်(မ်)တိုမ်ငေါလ် အာမ်ဆိုက်ရောခ့်လှလ်။ 35ခေါင်လှီ့ လား အင်(မ်)အဖြစ်ပျက်လှီ့မုလောဒ်ဟိုင်ရိုး လုအင်(မ်)ကိထွက်လူးထေ့နား ကိုယ်တော်ယေရှုစငေါလ် အာမ်ခိုက်လူး။ အင်(မ်)ဟိုဝေါလ် နတ်ဆီး ပူးကပ်ထေ့နား ခိလ်ဘွာလ်တိခေါင် ဆူဆောက်ခုအယ်ထေ့နား ကိုယ်တော်ခူဇောဝေါလ် ခေါင်ပွန်ပကတိဘော် အငွာခေါမ် အာမ်မုဟိုဝေါလ် အာမ်စါစ်နောက်။ 36အင်(မ်)ပါလ်နောလ် အင်(မ်)အဖြစ်ပျက် မုလောဒ့်တိ ခေါင်လှီ့နား အင်(မ်)ခေါင် နတ်ဆီး စွဲကပ်ယေခေါမ်ငေါလ်ကိ ခိတ်ဘွာလ်ခေါမ် အာမ်ဆိုက်ရောခ့်။ 37ခေါင်တိုင်နား အကိလှလ်ခန်းနောလ်၊ ကိုယ်တော်ယေရှု 'ဂါရစ' အောလ်ကိ ဈာတ်ဘွာလ်ဟိုင် အာမ်ခို့အယ်၊ ကိုယ်တော်ယေရှုခါ အတပည့်လှီ့ဓေါလ် လော်ခုံငေါလ်ကွာထေ့နား အင်(မ်)အရပ်အောလ်ကိ အဈာတ်ဘွာလ်။ 38နတ်ဆီး ပူးကပ်ခံလောဒ့်ထေ့နား ခိလ်ဘွာလ်တိ ကိုယ်တော်ကိုနောလ် ရုန်းဟိုင်အခို့အယ်။ အင်(မ်)ဘော်နားခါ ကိုယ်တော်နား အင်(မ်)ခေါင် ခွင့်ပြုယော်၊ 39"နာအိမ်မယ်ဈာတ်ဘွာလ်ထေ့နား ဖုလော်နား နာ(င်)ငေါလ် အီဟို့ဘောင် ကောင်းကြိုးအပြုပက်ဟိလ့်ခေါမ် ခေါင်တိုင်ငေါလ် ဆိုက်(က်)ရောခ့်ဘွတ်" တိရို အဟောင်ဟိလ့်။ အင်(မ်)ဟိုဝေါလ် အင်(မ်)ခေါင်နား လုတက နာမ်တကအောလ် ဈာတ်ရောခ့်ထေ့နား ကိုယ်တော်ယေရှုနား အပုန်းဟိုးအပေါ်ဝေါလ် ကောင်းကြိုးအပြုခေါမ် အဆိုက်ရောခ့် 40ခြောင်တိုင်နား ယေရှုအကြွလူးဘွာလ်ဟိုင် အစောင်(င်)၊ကိုယ်တော် အကြွလူးဘွာလ်ဟိုဝေါလ် ခြောင်လှီ့နား အာမ်ကြိုဆို။ 41အင်(မ်)ဓိလ်နာလ် ယာဣရု မိန်နိုးတိ ယုဒခြောင်ယှီ ဓမ္မာရုံတာဝန်ခံ ပွလ်ဟှတ်အမိလ်။အင်(မ်)ခြောင်နား ဒူးထောက်ထေ့လား ကိုယ်တော်ဝေါလ် အအိမ်မာလ်ကြွလူးပက်ဟိုင် အပင့်ဖိတ်။ 42အီဘော်ဟိုင်ရိုနောက်ဟိုစေ့ အစိုး ကုမ်ကုလာနှိမိလ်တိ ဒိပ်စောပွလ်ဟှတ် ဘလ်ဟိုင်ထုအထောလ်ခန်းနာလ်။ကိုယ်တော် အင်(မ်)အိမ်မာလ် အကြွနောက်လာမ်းမာလ် ခြောင်လှီ့နား ကိုယ်တော် နှုဝေါလ် အာမ်ရုလ်လူ။ 43အင်(မ်)ခြောင်လှီ့ဒုလ်ကာလ်ကိ မုတောပွလ်ဟှတ် ထီးဘူးရောဂါအထောလ်ခါလ် ကုမ်ကုလာနှိ အမိလ်ပါလ်။အင်(မ်)မုတောနားနောက်ခါလ် မိလ်တိဒေါင်းဂိုတကအဘွဲခါမ်ထေ့လား ဓူဆလိုလှီ့တောလ် ဒူဝေါလ်နားခါ အီဘောင်ဆလိုလားခါ ခိင်ဘွာလ်ဟနာလ် ဓူဟိလ့်ခွတ်ယော်ဟ။ 44အင်(မ်)မုတောနား ကိုယ်တော်ယေရှုအနှုဝေါလ် ချဉ်းကပ်ထေ့နား ကိုယ်တော်ဝတ်ရုံ အကွတ်တောလ် အလှမ်းဘွတ်တောလ် ချက်ချင်းကုံး အင်(မ်)မုတော ထီးဘူးခါလ် အခိင်ဘွာလ်လှလ်။ 45ကိုယ်တော်နား "ကေးဟအူနားအလှမ်း"တိရို အဟိ့။အင်(မ်)ချိန်အတောတွင်းငေါလ် ခြောင်တိုင် အနက်တလ်တောင်၊ပေတရုနား "အရှင် ကီးကာဝေါလ် ခြောင်လှီ့စေ့ ပူးနူးအမိလ်"တိရို အလျှောက်ဘွာလ်။ 46အင်(မ်)ဘော်နားခါ ကိုယ်တော်ယေရှုနား "ပွလ်ဟှဟှတ်နား ကေးအာမ်လှမ်း။ ဘော်ဟိုင်ရို နောက်ဟိုဝေါလ်စေ့ ကေးစငေါလ်ကိ တန်ခိုးအထွက်ခါလ် ကေဘီယေ"တိရို အဟောင်ဘွာလ်။ 47အင်(မ်)မုတောနားခါ ထုအယ်ခွတ်တိယခန်းနာလ် စောန်ဗာန် ကိုယ်တော်မော်ဝေါလ် ဒူးထောက်ထေ့နား ကေးနား ကလှမ်းလားကေရောဂါ ချက်ချင်းကုံး အခိတ်ဘွာလ်တိရို ခြောင်လှီ့အာလ် အဆိုက်(က်)ဘွာလ်။ 48ကိုယ်တော်နား အင်(မ်)မုတောဝေါလ် "နာ(င်)တုအာလ် နာခိင်ဘွာလ်ခါလ်နာ(င်)ယုံကြည်မှုကြောင့်ယောင်၊ဖုလော်ရှင်နား နာ(င်)ငေါလ်ငြိမ်းချမ်းမှုအပက်ပါလ်"တိရို အဟောင်လှာလ်။ 49ကိုယ်တော်ယေရှုနား နီဘော်အမိန့်ဟိုဝေါလ် 'ယာဣရု'အိမ်မာလ်ကိ ခြောင်ပွလ်ဟှတ်ခိုက်လူးထေ့နား "နာ(င်)စိုးအဘလ်ပါလ်၊ကိုယ်တော် နှောက်ယှက်တိကောအား"တိရို 'ယာဣရ'အာလ် လူးထေ့နား အဟောင်လူး။ 50အင်(မ်)ခင်(င်)ခေါ ကိုယ်တော်ယေရှုနား အယှောက်ဟိုဝေါလ် 'ယာဣရ'ရို "ဆဆော်ကောအား၊ယုံကြည်မှုယောင်တောဝြား၊နာ(င်)စိုးအစာင်းလူးဘွာလ်ဟိုင်ယောင်"တိရို အဟောင်။ 51ကိုယ်တော် ယာဣရု အိမ်မာလ်အကြွဟိုဝေါလ် ပေတရု၊ယောဟန်၊ယာကုပ်နားဒိပ်စော နူးပေါလ်ပနှိရိုကိလွဲထေ့နား ကျန်တိခြောင်လှီ့ အိမ်ဒုလ်ကာလ် ဝင်ခွင့်ပက်ယော်။ 52ခေါင်တိုင်နား ဒိပ်စော အဘာလ့်ပါလ် တိရို အာမ်ကာပ်။ အင်(မ်)ဘော်နားခါ ကိုယ်တော်နား "နီဒိပ်စော ဘာလ့်ယော်။ အအိပ်ယောင်” တိရို အမိန့်လား 53ခြောင်လှီ့နား ကိုယ်တော်ယေရှု အာမ်လှောင်ပြောင်။ဘော်ဟိုင်ရိုနောက်ဟိုစေ့ အင်(မ်)ခြောင်လှီ့လား အင်(မ်)ဒိပ်စော အဘလ်ခါလ် အာမ်စုတ်ပါလ်ခန်းနာလ်။ 54ကိုယ်တော်ယေရှုနား အင်(မ်)ဘလ်တိမုတောစောကွတ်နှိုမ်(မ်)ကတ်ထေ့နား "ဒိပ်စောဝြား ထုလ်ဟိလ့်ယောင်"တိရို အဟောင်။ 55အင်(မ်)ချိန်ငေါလ် ဒိပ်စော ချက်ချင်းအဆောက်ဝင်လူးဘွာလ်ထေ့နား အငွား။ကိုယ်တော်နား ဒိပ်စောဝေါလ် အေဟိုင်အုဟှဟှတ်ပက်ဟိုင် အဟောင်။ 56အင်(မ်)ဒိပ်စောနူးပေါလ်လှီ့နား အာမ်အံ့ဩကြ။အင်(မ်)ဘော်နားခါ ကိုယ်တော်နား နီအဖြစ်ပျက်လှီ့ အူဝေါလ်ခါ ဆိုက်(က်)ယဟိုင် အဆိန်ဟိလ့်။
This translation of the Chin-Songlai Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
