Luke 2
2
1အင်(မ်)ချိန်ငေါလ် ဆောင်ဖလောင်ဧကရာဇ်ဩဂုတ္တုခေါမ် ရောမအင်ပါယာ အုပ်စိုးမှုဒေါင်ငေါလ် မယ်တိခေါင်တိုင် အိမ်ထောင်စုစာရင်းငေါလ် စာရင်းသွင်းငယ်လောဒ်အိုက်တိရို တရာဝင်အမိန့် အထုတ်ဟိလ့်။ 2နီအိမ်ထောင်စုစာရင်း စအယ်နားကောက်ခေါမ်ချိန်ငေါလ် ကုရေနိခေါမ် ဆီးရီးယားဘီရိုး ဘုရင်ခံရိုးအထောလ်။ 3အင်(မ်)ခန်းနောလ် ခေါင်တိုင် အာမ်ဇာတိအောလ် စာရင်းသွင်းဟိုင် အာမ်ဈာတ်လောဒ့်။ 4တုအောလ် ယောသပ်ခါ ဂါလိလဲခရိုင် နာဇရက်လုအောလ်ကိဈာတ်ထေ့နား ဆောင်ဖလောင်ဒါဝိဒ်ဇာတိလု ယုဒဘီဗက်လင်လုအောလ် အဈာတ်လောဒ့်။ ဘော်ဟိုင်ရိုနောက်ဟိုဝေါလ်စေ့ ယောသပ်နောက်ခေါမ် ဆောင်ဖလောင်ဒါဝိဒ် မိသားစုဝင်ပွလ်ဟှတ်တောလ် အထောလ်ခန်းနောလ်။ 5အင်(မ်) မာရိဓေါလ်ဟှတောလ် စာရင်းသွင်းငယ်ဟိုင် အဟီဈာတ်လောဒ်။ ဟိဘော်ဟိုင်ရိုးနောက်ဟိုဝေါလ်စေး အင်(မ်)မုတောစောခေါမ် ယောဟန်ဓေါလ် စပ်စေ့ထေ့နား အဟြွလ်မယ်ပါလ် ခန်းနောလ် 6အင်(မ်)ဟွဒ် ဗက်လင်လု အဟီခိုက်ယေဟိုဝေါလ် မာရိ ဒိပ်စောညှာယေဟိုင် အချိန်ငို့လူးပါလ်။ 7အင်(မ်)ပါလ်နောလ် မာရိနား စိုစိပ်ပုတောစော အဇောနောက်။ အင်(မ်)ချိန်ငေါလ် တည်းခိုနောက်အိမ်(မ်)မာလ် အင်(မ်)ဟွဒ်တွက် အခန်းအလွတ် မယ်တိယခန်းနောလ် မာရိနားဒိပ်စိုးခေါမ် ဟူးဒွါ့အောလ်ပတ်ထေ့နား ဆာအေခွက်ဒုလ်ကာလ် အဟီတောဒ့်လောဒ့်။ 8အင်(မ်)မီဝေါလ် မိစောင်(င်)တိလှီ့နား ဗက်လင်လုကာလ်ဝေါလ်ကိ လာပြင်ငေါလ် မိအာမ်စောင်(င်)။ 9ဖုလော်ရှင်နတ်ဒေဝါပါးဟှတ်ခေါမ် အင်(မ်)လှီ့မော်ဝေါလ် စါစ်နောက်မုတ်ကာလ် ပေါ်လူးထေ့နား ဖုလော်ရှင်တန်ခိုးလှီ့ဓေါလ် အင်(မ်)လှီ့ကာဝေါလ် ထွန်းလင်းအတောက်ပလူး။ မိစောင့်တိလှီ့နားခါ အာမ်ကိအယ်တောင်(င်)ကြ။ 10အင်(မ်)ပါလ်နောလ် အင်(မ်)နတ်ဒေဝါနား "ကိကော့စူးအား။ ကေးနား ခေါင်လှီ့ကိမ်ကိမ်တွက် ပျော်နောက်ဟိုင် ဆတင်းလှီ့ဖုလော်ရှင်စငေါလ်ကိ ကလူ။ 11ဘော်ခုနှိုပ်ပွန်ရိုး ကယ်တင်ရှင်မေရှိယ ဆောင်ဖလောင်ဒါဝိဒ်လုအောလ် အညှာယေဟိလ့်ပါလ်။ 12ဗက်လင်လုအောလ် ဟူဒွါ့ဓေါလ်လှော်(မ်)မယ်နား ဆာအေခွက်ဒုလ်ကာလ် ဟြမ်းငယ်တိဒိပ်စော နာမုဟိုဝေါလ် နာ(င်)မီနား အင်(မ်)နာမ်စုတ်(င်)ကိုက်" တိရို အဟောင်။ 13စါစ်နောက်ကုံးငေါလ် အစွာနတ်ဒေဝါလှီ့ခါ ဟြားလုအောလ်ကိ ကမ်း(မ်)လူးထေ့နား ဖုလော်ရှင်ဂုဏ်တော် အာမ်ချီးမွမ်း။ 14"ဟြားလုအောလ်မယ်တိ ဖုလော်ရှင် ဂုဏ်တော်ကချီးမွမ်း။ နီဆုမ်သပ့်ခုံငေါလ်မယ်တိ ဖုလော်ရှင် ဆည်းကပ်တိ ခေါင်လှီ့ကိမ်ကိမ်ငေါလ် ငြိမ်းချမ်းသာယာခေါမ် မယ်ဆီးလိုင်" တိရို အာမ်ဟောင်။ 15အင်(မ်)ပါလ်နောလ် နတ်ဒေဝါလှီ့ ဟြားလုအောလ် အာမ်ကြွဘွာလ်ပါလ်နောလ် မိစောင်တိလှီ့နား " ဟမီးရိုး အရှင်ဆိန်ဟိလ့်ခေါမ် အဖြစ်ပျက်လှီ့ ဓေါ်ဝေဟိုင်ရိုး ဗက်လင်လုအောလ် ဈာတ်လူးပီး" တိရို အချင်းချင်းအာမ်ခေဝေတောင်။ 16အင်(မ်)ခန်းနောလ် အင်(မ်)လှီ့ မာရိလားယောသပ် တည်းခိုနောက်ဓိလ်နောလ် အာမ်ခိုက်ယေဟိုဝေါလ် ဆာအေခွက်ဒုလ်ကာလ်ကိ ဒိပ်စောဟွမ်နေခေါမ် အမုလောဒ့်။ 17မိစောင်တိလှီ့နား အင်(မ်)ဒိပ်စော အမုဟိုဝေါလ် နတ်ဒေဝါလှီ့နား အာမ်ဟောင်ဟိလ့်ခေါမ် ဒိပ်စောဓေါလ်ပါတ်သတ်တိ အကြောင်းအရာလှီ့ မာရိနားယေသပ်အောလ် အာမ်ဆိုက်ဘွာလ်။ 18မိစောင်တိလှီ့နား အာမ်ဟောင်ခေါမ် အကြောင်းရာလှီ့ ငေတိလှီ့ခေါင်လှီ့နား အာမ်စါစ်နောက်ကြ။ 19အင်(မ်)ဘော်နားခါ မာရိနား အကြောင်းရာလှီ့ သတိလောဒ့်ထေ့နား ထပ်ခါ ထပ်ခါ အစဉ်းစားယေ။ 20မိစောင်တိလှီ့ မိစောင်နောက်လာပြင်ငေါလ် အခိုက်ဘွာလ်ဟိုဝေါလ် ဖုလော်ရှင်ဂုဏ်တော်လှီ့ချီးမွမ်းဗာန် နတ်ဒေဝါလှီ့နား အင်(မ်)လှီ့အောလ် ဟောင်ဟိလ့်ခေါမ် စါစ်နောက်ဟိုင် အဖြစ်ပျက်လှီ့ အမှန်နောက်ခေါမ် အချင်းအချင်းအာမ်ဟောင်ဝေတောင်။ 21နှိုပ်ဆာတ်ဓိလ်ပါလ်နောလ် မာရိလားယောသပ်နား မောရှေ ဥပဒေဘော်တိုင်ငေါလ် ဒိပ်စောခေါမ် အရေးပြားလှီ့မင်္ဂလာ စိုင်းဟိုင် အချိန်ကျလူဟိုဝေါလ် မာရိလား ယောသပ်နား ဒိပ်စောခေါမ် မာရိနား အဟွလ်နောက်ဟွမ်းယဟိုဝေါလ်ကထု နတ်ဒေဝါနား အဟောင်ဟိလ့်ဘော်တိုင်ငေါလ် ယေရှုတိရို အမိန်အဟီဆူလ်။ 22မောရှေ ဥပဒေတိုင်ငေါလ် သန့်စင်ခေါမ်စိုင်းပါလ်နောလ် ယောသပ်လားမာရိနား ဒိပ်စောခေါမ် ဖုလော်ရှင်စငေါလ်ဆည်းကပ်ဟိုင် ဂျေရုဆလင်လုအောလ် အဟီဈိပွီနောက်။အင်(မ်)ဟွဒ် နီဘော် အာမ်လူးလောဒ့်ခေါမ်စေ့ အရှင်ဥပဒေရိုးဖော်ပြအယ်ဟိလ့်တိဘော် " စိုးစိပ်ပုတောစောတိုင် စင်ကြယ်မှုမယ်ဟိုင်ရိုး ဖုလော်ရှင်စငေါလ် ဆည်းကပ်လောဒ့်အိုက်" လား 23အင်(မ်)ဟွဒ်နား နီဘော် အာမ်လူးလောဒ့်ခေါမ်စေ့ ပညတ်ကျမ်းရိုး ဖော်ပြအယ်ဟိလ့်တိဘော် " စိုးစိပ် ပုတောစောတိုင် ဖုလော်ရှင်စငေါလ် ဆည်းကပ်လောဒ့်အိုက်" လား 24"ခိုခူလူနှိခါဆီးဆတ် ခီစောလူနှိုခါဆီးဆဲ့ ပူဇော်လောဒ့်အိုက် "တိရို ဟောင်ဘော် ပူဇော်လောဒ့်ဟိုင်ရိုး အထောလ်။ 25အင်(မ်)ချိန်ငေါလ် ဂျေရုဆလင်လုအောလ် ရှုမောင်တိရို မိန်နိုးတိ ခေါင်ပွလ်ဟှတ်အမယ်။ အင်(မ်)ခေါင်နား ဖုလော်ရှင် နှစ်သက်ခေါမ်လှီ့ စိုင်းထေ့နား ဖုလော်ပညတ်တော်ဥပဒေလှီ့ခါ အနာခံ။ ဖုလော်ရှင်နား အစ္စရေးခေါင်ယှီလှီ့အောလ် ကယ်တင်ပက်ဟိုင် စောင်ငယ်တိ ခေါင်ပွလ်ဟှတ်တောလ် ထောလ်ခန်းနောလ် ဉာဏ်အလင်းတော်ခေါမ် အင်(မ်)စငေါလ် ဆင်းသက်လူးထေ့နား 26အင်(မ်)နောလ် "နာ(င်)နောက်ခေါမ် ကယ်တင်ရှင်မေရှိယ ဖူးလောဒ့်ယကော ဘလ်လောဒ့်ဟိုင်ဆီးရိုတိ "တိရို ဉာဏ်အလင်းတော်နား အမိန့်ဟိလ့်။ 27မာရိလားယောသပ်နား ပညတ်တော်ဝေါလ် ဖော်ပြအယ်တိဘော် ဆည်းကပ်ပူဇော်ဟိုင် ဒိပ်စောခေါမ် ဗိမာန်တော်ဒုလ်ကာလ် အဟီလူးပွီနောက်ဟိုဝေါလ် ရှုမောင်ခေါမ် ဗိမာန်တော်ဝေါလ်ဝင်ဟိုင် ဉာဏ်အလင်းတော်နား လာမ်းအဓေါင်ဟိလ့်။ 28အင်(မ်)ပါလ်နောလ် ရှုမောင်နား ဒိပ်စောယေရှုခေါမ် အကွတ်တောလ်ပိလ်ထေ့နား ဖုလော်ဂုဏ်တော် နီဘော်အချီးမွမ်းဟိလ့်။ 29"အရှင်၊ တုအောလ် အရှင်ပက်ခေါမ် ကတိဘော်တိုင် နာ(င်)အစေခံ ကေး ဘာလ်ခွင့်ပက်သား။ 30ဟိဘော်ဟိုင်ရိုနောက်ဟိုဝေါလ်စေ့ ခေါင်လှီ့ကယ်တင်ဟိုင် နာ(င်)စေလွှတ်လူးခေါမ် အရှင် ကေးနားကမုလောဒ့်ပါလ်။ 31ခေါင်လှီ့တွက် နာ(င်)နား နာမာန်(န်)ဟိလ့်ပက်ခေါမ် 32နာ(င်)လီခေါမ်ဘော် တိုင်းတပါးဆော်လှီ့နား မုဟနောလ်၊ နာ(င်)ခေါင်ယှီဝေါလ်ထောလ်တိ အစ္စရေးလှီ့အောလ် ဘုန်းသရေဆောင်ခေါမ် အဝြာပက်ဟိလ့်ပါလ်" တိရို အထောလ်။ 33ယေရှုအနူးလားအပေါလ်နား ရှုမောင် ဟောင်ခေါမ်ခေခေါ အဟီယှောက်ဟိုဝေါလ် အဟီစါစ်နောက်။ 34အင်(မ်)ပါလ်နောလ် ရှုမောင်နား အင်(မ်)ဟွဒ်ရိုး ဆုတောင်းပက်ထေ့နား မာရိအောလ် "ဖုလော်ရှင်နား နာ(င်)စိုးဝေါလ် အစ္စရေးခေါင်ယှီလှီ့အောလ် ဖုလော်ရှင် နာခံဟိုင်လား နာခံယတိလှီ့ ခွဲခြားဟိုင် အရွေးချယ်။ နာ(င်)စိုးနောက်ခေါမ် ဖုလော်ရှင်နား ခေါင်လှီ့အောလ် သတိပက်နောက် နိမိတ်လက္ခဏာ ပွာလ်ဟှတ်တောလ် ထောလ်ထေ့နား ခေါင်လှီ့နား အင်(မ်) အာမ်ဆန့်ကျင်ငိုက်။ 35ခေါင်လှီ့ နှလုံးသားဒုလ်ကာလ်ကိ အတွေးအခေါ်လှီ့ခါ အရှိကိုအရှိတိုင်း ထွက်ပေါ်လူးထေ့နား နာ(င်)နှလုံးသားခေါမ် ချွန်ထက်တိစီမ်(မ်) ဆုလ်ခေါမ်ဘော် ပြင်းပြင်းထန်ထန် နာခံစားလောဒ့်အိုက်" တိရို အဟောင်။ 36အင်(မ်)ဓိလ်နောလ် အာရှာမျိုးနွယ်ဝင် ဖနွေလနားအစိုး ပရောဖက်အန္နခါ ဗိမာန်တော်ဝေါလ် အမယ်။ အင်(မ်)မုတောခေါမ် အိမ်(မ်)ထောင်အယ်ထေ့နား အပူတောဓေါလ်ဟှတောလ် ဂုမ်ဆိဘောင် ဟီမယ်ဟိလ့်ဟပါလ်နောလ် 37ဆာ့ကိပ်ဆီးနားကုမ်(မ်)ပလှီဓီဝေ့ မှာလ်နူးပွလ်ဟှတ် အဖြစ်ရိုးအမယ်။ အင်(မ်)မုတော ဗိမာန်တော်ဝေါလ်ကိ အီဟိုခါ ထွက်ယကော၊ ဖုလော်ခခ်ခေါမ်၊ အေအောဟာ ဥပုသ်စောင်ခေါမ်လှီ့ နှိုပ်တောလ်၊ မီတောလ်၊ စိုင်းတိရို အထောလ်။ 38အင်(မ်)ဒိပ်စိုးဆက်ကပ်ချိန်ငေါလ် အန္နခေါမ် အင်(မ်)လှီ့စငေါလ် ခိုက်လူးထေ့နား ဖုလော်ရှင်ဂုဏ်တော်ချီးမွမ်းဗာန် ဂျေရုရှလင်လုကယ်တင်ဟိုင် စောင်ငယ်တိခေါင်လှီ့အောလ် ဒိပ်စောအကြောင်းလှီ့ လိုက်လံထေ့နား အဟောင်ရောခ့်။ 39အင်(မ်)ပါလ်နောလ် မာရိလားယောသပ်နား ဖုလော်ရှင်ချမှတ်ဟိလ့်ခေါမ် ပညတ်တော်လှီ့ ကျေပွန်ဟနောလ် အဟီဆောင်ရွက်ပါလ်နောလ် အဟီအိမ်မယ်နောက် ဂါလိလဲဘီ နာဇရက်လုအောလ် အဟီဈာတ်ဘွာလ်။ 40အင်(မ်)ဒိပ်စော အလန်လူးဟိုဝေါလ် ကျန်းမာသန်စွမ်းထေ့နား ဉာဏ်ပညာတောလ် ပြည့်စုံခန်းနောလ် ဖုလော်ရှင်ကေားချီးပက်ခေါမ် အခံစားလောဒ့်။ 41ကုမ်တိုင်ကုမ်တိုင် မာရိလားယောသပ်ခေါမ် ပသခါပွဲတွက် ဂျေရုဆလင်လုအောလ်မယ်တိ အဟီဈာတ်ဆော်။ 42ကိုယ်တော်ယေရှု အဆောက်(င်) ကုမ်ကလာနှိအရွယ်ရိုး အင်(မ်)လှီ့ကိမ်ကိမ် ဈာတ်ဆော်ဘော်တိုင်ငေါလ် ပသခါဆုတောင်းပွဲစိုင်းဟိုင် အင်(မ်)လုအောလ် အာမ်ဈာတ်။ 43ပသခါ ပွဲနှိုပ်ကာပါလ် နောလ်မာရိလားယောသပ်နား ဒိပ်စိုးယေရှု ဂျေရုဆလင်လုအောလ် အမယ်ဟိလ့်ခေါမ် စူးယကောအဟီလူးဘွာလ်။ 44ဒိပ်စိုယေရှုခေါမ် အင်(မ်)လှီ့ဓေါလ်ဟှတောလ် အိမ်(မ်)မာလ်လူးဘွာလ်နောက်လာမ်းမာလ် ခေါင်အုပ်ဒုလ်ကာလ် အပူလ်လူးတိရို အာမ်တော်ခန်းနောလ်၊ နှိုပ်ဟှတ်လုံးလုံး ခရီးအာမ်ဈာတ်။ အင်(မ်)ပါလ်နောလ်ယောင် အင်(မ်)လှီ့နား ဒိပ်စိုးယေရှုခေါမ် ယှီယောင်လှီ့နား ခီပွီလှီ့စငေါလ် အာမ်ဆူလ်ယေဘွာလ်။ 45အမုယဟိုဝေါလ် ဒိပ်စိုးယေရှု ဂျေရုဆလင်လုအောလ် ဆူလ်ဟိုင်ရိုး အာမ်လူးဘွာလ်။ 46နှိုပ်ထုမ်ဓီပါလ်နောလ် အင်(မ်)နီလှီ့နား ဒိပ်စိုးယေရှု ဗိမာန်တော်ဝေါလ် ဂျူးဘာသာရေးဆရာလှီ့ကာဝေါလ် အငွာခေါမ်အမုဘွာလ်။ အင်(မ်)နား ဘာသာရေးဆရာလှီ့ ဟောင်ခေါမ်လှီ့ငယ်ဗန် အင်(မ်)လှီ့အောလ် မေးခွန်းလှီ့ အဟိ့ဘွာလ်။ 47ဒိပ်စိုးယေရှုခေခေါ ယှောက်လောဒ့်တိခေါင်လှီ့နား အသိပညာဓေါလ် အဖြေဘွာလ်ခေါမ်လှီ့ အာမ်စါစ်နောက်လှလ်။ 48မာရိလားယောသပ်နား ဒိပ်စိုးယေရှု အဟီမုဘွာလ်ဟိုဝေါလ် အဟီစါစ်နောက်လှလ်။ အနူးနား "စိုးဝြား၊ ဟိဘော်ဟိုင်ရိုး ကေးမီးနီဘော်နာစိုင်းလောဒ့်။ ကေးမီးနား ဆဆော်ဗာန် နာ(င်)ကမ်ဆူလ်ရောခ့်" တိရို အဟောင်။ 49ဒိပ်စိုးယေရှုနား "ဟီဘော်ဟိုင်းရိုး ကေးနာဆူလ်ရောခ့်၊ ကေးစေ့ ခမည်းတော်အိမ်(မ်)မာလ် ကေမယ်ခေါမ် စူးယော်စုအာ" တိရို အဟောင်ဘွာလ်။ 50အင်(မ်)ဘော်နားခါ အင်(မ်)လှီ့နား ဒိပ်စိုးယေရှု အဟောင်ဘွာလ်ခေါမ် ရောဇူးယော်ဟ။ 51အင်(မ်)ပါလ်နောလ် ဒိပ်စိုးယေရှုနား ယောသပ်လားမာရိခေခေါငယ်ထေ့နား အင်(မ်)ဟွတ်ဓေါလ်ဟှတောလ် နာဇရက်လုအောလ် အဈာတ်ဘွာလ်။ အနူးနား ထောလ်ဟိတိ အကြောင်းအရာလှီ့ကိမ်ကိမ် အလုန်ဒုလ်ကာလ်ယောင် အတောဒ့်ကာလ်။ 52အင်(မ်)ပါလ်နောလ် ကိုယ်တော်ယေရှု အလန်လူးဟိုဝေါလ် ဉာဏ်ပညာဓေါလ် ပြည့်စုံထေ့နား ကျန်းမာသန်စွမ်းခန်းနောလ် ဖုလော်ရှင်စငေါလ်ကိခါ ကောင်းချီးမင်္ဂလာလောဒ့်ထေ့နား ခေါင်လှီ့နားခါအာမ်နှစ်သက်။
This translation of the Chin-Songlai Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
