मत्ती 10

बारह चेला

(मरकुस 3:13-19; लूका 6:12-16)

1पछु ईशु आपसा बारा चेलान क पास बुलावीन, उन चेलान क विटळ आत्मा पर हक आपियो, कि उना क निकाले आरू सब भातिन बीमारी आरू सब भातिन कमजोरी क दूर करे। 2उन बारा चेलान क नाव या छे पहलो शमौन, जो पतरस कहवाये, आरू ओको भाई अन्द्रियास; जबदी पोर्‍यो याकूब, आरू ओको भाई यहुन्ना 3फिलिप्पुस आरू बरतुल्मै, थोमा आरू फाळो लेनेवाळो मत्ती, हलफई सन पोर्‍यो याकूब आरू तद्दै। 4शमौन कनानी, आरू यहूदा इस्करियोती, जो ईशु क धरायो।

बारा चेलान की सेवा

(मरकुस 6:7-13; लूका 9:1-6)

5उन बारा चेलान क ईशु यी सलाह आपीन मोकल्यो, “गैरयहुदी तरफ नी जानो, आरू सामरिया न काहना भी नगर मा नी भरायनो 6बाकुन इस्राएल क घरानान खुवायला गाडरान क पास जाजो। 7आरू चालता–चालता परचार करिन कयजो कि सोरगदूत राज साते आवी गयलो छे। 8बीमार लोगहन क आरगा करो: मरला क जीवाड़ो, कुड़ावा क चुखा करो, साहळा क निकल्यो। तुमू फोकट मा लिदला छे, तो फोकट मा आपो।” 9तुमरा बटवा मा नी तो सोनो, आरू नी रूपो, आरू न तांबा रखना। 10#1 कुरन्थियो 9:14; 1 तीमुथियुस 5:18वाट्ये जुगु न झोलो राखु, नी दूय सुटर, नी खासड़ा आरू नी लाकड़ी राखु, काहकि दाहड़क्यान क उको खानो जुड़नो जुवे।

11“जिना काहना भी नगर मा या गाँव मा जावो तो पतो लागावे कि वा कुन योग्य छे? आरू जव तक वा सी नी निकलो, उना क या रहवजो।” 12आरू घर मा भरायता टेमे ओको बरकत देजो। 13कदाम उना घर क लोगहन योग्य हुयसे तो तुमरो बरकत उना घर पर पुगसे बाकुन त्या योग्य नी हय तो तुमरो बरकत तुमरे पास पछो आय जासे। 14#प्रेरितन 13:51आरू जो कोय तुमरो आव भाव नी करे, आरू तुमरी वात क नी सुने, उना घर या नगर सी निकलता जाईन तुमरा पायन धुल झाटकी देजो। 15#मत्ती 11:24#लूका 10:4-12हाव तुमरे सी सच कहवो, कि नियाव क दिन उना नगर की हालत सी सदोम आरू गमोरान क नगरो की हालत जादा झेलने जुगु हयसे।

आवने वालो सताव

(मरकुस 13:9-13; लूका 21:12-17)

16 # लूका 10:3 “देखो, हाव तुमूक गाडरान जसो लेन्डीया बीच मा भेजो अतरानकरीन करीन घड़सान जसा अकल वाला आरू पेरवान जसा भला बनो।” 17#मरकुस 13:9-11; लूका 12:11,12; 21:12-15बाकुन लोगहन सी चौकचोळिया रहवो, काहकि त्या तुमक क मिटिंग मा सौप देसे, आरू उको आराधना घरो मा मार न्हाख से। 18तुमू म्हार करता आधिकारिया आरू राजान क सामने उना पर आरू गैरयहुदी पर गवाय हुयने क करता हजुर करिया जासो। 19जव त्या लोगहन तुमूक धरावसे तो यी चिंता नी करनो कि कसा बोलनो आरू काय कयसु; काहकि जो काय तुम क कयनो छे त्यो उना टेमे तुमूक कय दियो जासे। 20काहकि बोलनेवाला तुमू नी बाकुन तुमरा बासन चुखलो आत्मा लारे बुलसे।

21 # मरकुस 13:12; लूका 21:16 भाई आपसा भाई क आरू बास आपसा पोर्‍या क, मारने करीन सौप देसे, आरू पोर्‍या पारी माता–पिता क विरोध मा उठीन माराय देसे। 22#मत्ती 24:9; मरकुस 13:13; लूका 21:17; मत्ती 24:13; मरकुस 13:13म्हार नाव क कारण सब लोगहन तुमरे सी बैर राखसे, पर जो आखरी तक गम राखसे उना क छुटकारो हुयसे। 23जव त्या लोगहन तुमूक एक नगर मा सतावसे, तो दिसरा नगर क भाग जाजो। हाव तुमरे सी सच कहवो, तुमु ओका पोर्‍या क आवने सी पेहले इस्त्राएली न सब नगर मा सी गया भी नी हुयसे।

24 # लूका 6:40; यहुन्ना 13:16; 15:20 चेला आपसा गुरू सी मटो नी; आरू नी दास आपसा मालिक सी। 25#मत्ती 9:34; 12:24; मरकुस 3:22; लूका 11:15चेला क गुरू क, आरू दास क मालिक न बराबर हुयनो बैस छे; जव त्या लोगहन घर मालिक क बालजबुल कयो तो उका घर वाला क काँ नी कहवसे?

कुनी सी डरनो

(लूका 12:2-7)

26 # मरकुस 4:22; लूका 8:17 अतरानकरीन उना सी मा बीहयो, ओसो काहय भी गुप्त नी छे, जो खुलियो नी जाय; जो उजावा मा नी लायो जासे आरू ओसो काहिज लिकाड़लो नी जासे, जो सामने नी लाव जासे। 27जो हाव तुमरे सी कहवो, उको विजाळा मा कहवो; आरू जो कानो सी सुनो, उना क छतो पर सी परचार करो। 28जो डील क मार सके, बाकुन आत्मा क नी मार सके, उना सी मा बीहयो; पर उना सी बीहयो जो आत्मा आरू डील दूयन क नरक मा नाश कर सके। 29काय एक पयसिया मा सी दूय चिल्‍ला नी वेचाये? पछु भी तुमरो बास इच्छान बिना उना मा सी एक भी धरती पर नी पड़ सके। 30तुमरा माथा क झोठा भी सब गिनला छे। 31अतरानकरीन करीन, बीहयो मा; तुमू बैस चिल्लान सी भी जादा मुवन छे।

ईशु क माननो आरू नी माननो

(लूका 12:8-9)

32“जो कुई मखे लोगहन क सामने मेखे मान देसे, उका हाव भी म्हार सोरगीय बासन क सामने मान लिस। 33#2 तीमुथियुस 2:12पर जो कोय मनुस क सामने मखे मना करसे उना क हाव भी म्हार सोरगीय बासन क सामने मना करीस।”

शांती नी पण तलवार

(लूका 12:51-53; 14:26-27)

34“यो मा समझु, कि हाव धरती पर शांती करवाने आवलो छे; हाव शांती करावने नी, पर तलवार चलाड़ने क आवलो छे। 35हाव तो आयो, कि मानुस क उका बास सी, आरू पोराय क ओकी माय या बास सी, आरू ववड़ी क ओकी सास सी अलग कर दियोव। 36मानुस क दुस्मन उका घर कोत लोगहन हुयसे।”

37“जो आश या बास क म्हार सी जादा मोंगाळो जाने, त्यो म्हार योग्य नी आरू जो पोर्‍या या पोराय क म्हार सी जादा मोंगाळो जाने, त्यौ म्हार योग्य नी हय” 38#मत्ती 16:24; मरकुस 8:34; लूका 9:23आरू जो आपसो कुरूस लीन म्हार पछोळ नी चाले त्यौ म्हार योग्य नी हय। 39#मत्ती 16:25; मरकुस 8:35; लूका 9:24; 17:33; यहुन्ना 12:25जो आपसा जीव क वाचाड़े, त्यौ उना क खुय देसे; आरू जो म्हार कारण सी आपसा जीव क खुय देय, त्यौ उना क पाय लेसे।

हर फोव

(मरकुस 9:41)

40 # लूका 10:16; यहुन्ना 13:20; मरकुस 9:37; लूका 9:48 जु तुमरो स्वागत करे, त्यौ मखे माने; आरू जो मखे माने, त्यौ मखे भेजने वाला क माने। 41ओ कागळीयान क कागळिया जानीन माने, उको कागळीयान क बदलो मुवसे; आरू जो न्यायी जानीन न्यायी क माने, त्यो क न्यायी क बदलो मुवसे। 42जु कुई उन नाना मा सी एक क चेलो जानीन केवल एक कटोरो ठण्डो पानी पिलावे, हाव तिमरे सी सच कहवो, त्यो उको इनाम कदी नी खुवे।

Currently Selected:

मत्ती 10: NTDii20

ማድመቅ

Copy