Эхин 9
9
Бурхан Нойтой хэлсээ батална
1Бурхан Нойе ба хүбүүдыень үреэбэ:
– Үри хүүгэдээр үнэр үдхэн боложо, энэ дэлхэйе хүн амитадаар дүүргэгты. 2Газар дайдын бүхы ан амитад, тэнгэриин жэгүүртэд, далайн загаһад хүн таанадһаа айжа һүрдэжэ байг: эдэнэр булта танай захирал мэдэлдэ үгтэнэ. 3Урда тээнь ногоо ургамал таанадта үгэһэн мэтээр бүхы хүдэлэгшэ амитадые таанадта эдеэ хоол болгон үргэнэб. 4Зүгөөр хорюултай нэгэл юумэн байха: шуһатай мяха бү эдигты. Энээниие хориноб, юундэб гэхэдэ, амитанай амин гээшэ шуһан соонь оршодог. 5Харин хүнэй ами наһа таһалдуулһанай түлөө Би шуһа адхагшые – арьяатаншье байг, аха дүүгээ хорооһон хүншье байг, хатуугаар хэһээхэб. 6Хэрбээ хэн нэгэн хүниие алаа һаа, өөрөө алуулха. Юундэб гэхэдэ, хүн гээшэ Минии, Бурханай, түһөөгөөр бии болгогдоо. 7Олошорон, үнэржэн ябагты, түби дэлхэйе эзэмдэн ажаһуухатнай болтогой!
8Бурхан Нойдо, тэрэнэй хүбүүдтэ айладхаба:
9– Би таанадтай болон таанадай үри һадаһадтай хэлсээ баталнаб. 10Мүн баһа ханза-онгосо сооһоо гараһан хамаг амитадтай: шубуудтай, адууһа мал, ан арьяатадтай – түби дэлхэйн бүхы амитадтай хэлсээ баталнаб. 11Соносогты: энээнһээ сааша үерэй уһан болбол ажамидаралые үрэбхихэгүй, энээнһээ сааша уһан галаб газар дэлхэйе хохидоохогүй. 12Минии таанадтай мүн бүхы амитадтай хэтэ мүнхын хэлсээнэй һүлдэ тэмдэг иимэ байха: 13үүлэд соо Өөрынгөө номо-һолонго үлгэбэб. Энэ болбол газар дэлхэйн амитадтай Минии баталһан хэлсээнэй гэршэ тэмдэг. 14Газар дээгүүр үүлэдые бөөгнэрүүлэн суглуулхадам, дундуурнь һолонго толорхо. 15Тиихэдэнь Би таанадтай ба хамаг амитадтай баталһан Өөрынгөө хэлсээн тушаа һанахаб – амитан олониие хосороогшо асари үер дахин тохёолдохогүй. 16Үүлэн соогуур һолонгын толорхые харахадаа, түби дэлхэйдэ ажамидарагшадтай хэһэн Өөрынгөө хэтэ мүнхын хэлсээе һанахаб. 17Энэ болбол түби дэлхэй дээр ажамидарагшадтай Минии баталһан хэлсээнэй гэршэ тэмдэг мүн.
Нойн хүбүүн Хаамай нүгэл
18Ханза-онгосо сооһоо гараһан Нойн хүбүүд гэбэл, Шээм, Хаам ба Яапэт. Хаамынь хожом Ханаһаан гэдэг хүбүүтэй болоо һэн. 19Нойн эдэ гурбан хүбүүдһээ түби дэлхэйн хүн түрэлтэн үнэржэһэн юм.
20Ной газар элдүүрилжэ, үзэм модоной сэсэрлиг таряад, 21нэгэн удаа үзэмэй дараһан архи уужа, һогтоһондоо хубсаһаа тайлажа хаяад, гэртээ нюсэгэн унтажа байгаа ха.
22Ханаһаанай эсэгэ болохо Хаам нюсэгэн эсэгэеэ хараад, аханартаа дуулгаба. 23Тиихэдэнь Шээм Яапэт хоёр нэмэргэнүүдые хэдэрээд, ара нюргаараа майхан руу ороод, эсэгынгээ нюсэгэн бэедэ нэмэргэ хаяба. Тэдэнэр хажуу тээшээ зорюута хаража, эсэгынгээ нюсэгые обёороогүй һэн. 24Ной тэлэрхэдээ, бага хүбүүн Хаамайнгаа юу хэһые мэдэжэ, 25иигэжэ хэлэбэ:
– Хаам, шинии хүбүүн Ханаһаанай уг удам хараалда хүртэбэ!
Тэдэ Шээм, Яапэдай үри һадаһадай богоол болохо!
26Шээм, Эзэн Бурхан шамайе үреэхэнь болтогой!
Ханаһаанай бүхы уг удам шинии үри һадаһадай богоол болохо.
27Бурханай хүсөөр Яапэдэй уг удам үнэр үдхэн боложо,
Шээмэй үри һадаһадтай хамта нэгэн амин бүлэ болон амидаржа,
Хаамай хүбүүн Ханаһаанай үриие богоолшолхо.
28Галаб эрьеһэнэй һүүлээр Ной үшөө гурбан зуун табин жэл ажаһуугаа. 29Юһэн зуун табин наһатайдаа тэрэ наһа бараа һэн.
Currently Selected:
Эхин 9: BurBBL2024
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
