San Mateo 4
4
Xi̱to ndoso kiti nǎꞌa Jesús
(Mr. 1:12-13; Lc. 4:1-13)
1Saa ndi̱kiꞌin Tachi Ndioxi Jesús kuaꞌan ra xiꞌin ya iku yuyu, nuu xi̱to ndoso kiti nǎꞌa ra. 2Uvi xiko kivi ndi̱xiyo ra iku yuyu ta ndi̱xiyo suꞌun ra, sindiꞌi ta ndi̱kaꞌun ini ra. 3Saa ndi̱xaa kiti nǎꞌa xíto ndoso ñaꞌa ri, káchi ri saa:
―Tá tu ndixa Seꞌe Ndioxi ku yóꞌo̱, ta vaꞌa kaꞌan un xiꞌin yu̱ú yóꞌó ná nduu ya xita vaꞌa ―káchi ri xiꞌin ra.
4Saa ndi̱kuiin Jesús ndi̱kaꞌan ra, káchi ra saa:
―Tuꞌun Ndioxi káchi ya saa: “Süvi ndisaa ya kuxi naꞌa saa kutaku na. Xíniñuꞌu tu na kandixa ni na tuꞌun Ndioxi va saa kutaku na”, káchi tuꞌun Ndioxi ―káchi Jesús xiꞌin kiti nǎꞌa.
5Sindiꞌi saa ndi̱kundaka ri Jesús kuaꞌan ra xiꞌin ri ñuu i̱í ya Jerusalén, ta nda̱a ri xiꞌin ra xiní veꞌe ñuꞌu nuu sukun vaꞌa ikán. 6Saa ndi̱kaꞌan ri xiꞌin ra, káchi ri saa:
―Tá tu ndixa Seꞌe Ndioxi ku yóꞌo̱, ta vaꞌa keta un yóꞌó iin saa ndikava un nda ni̱nu̱, saa káꞌan tuꞌun Ndioxi:
Ndioxi ta tiꞌvi ra na tatun ra ya kundaa na yóꞌo̱,
kunuu un nuu ndaꞌa na,
ya ná ndïkava un nuu yu̱ú ya ta tikueꞌe un, káchi tuꞌun ra ―káchi kiti nǎꞌa xiꞌin Jesús.
7Saa ndi̱kuiin Jesús, káchi ra saa:
―Saa tuku káchi tuꞌun Ndioxi: “Väꞌa koto ndoso naꞌa Ndioxi” ―káchi Jesús xiꞌin kiti nǎꞌa.
8Tá sindiꞌi saa ndi̱kundaka tuku kiti nǎꞌa Jesús kuaꞌan ra xiꞌin ri iin iku sukun ni. Ta ikán si̱naꞌa ri ndiꞌi ni kúu ñuu ya ndee ni, xiꞌin ya kuika ni, si̱naꞌa ndiꞌi ri ya nuu ra. 9Saa ndi̱kaꞌan ri xiꞌin ra, káchi ri:
―Tá tu ná kusiti un nuu i xaa toꞌo un yeꞌe, ta saa taxi i ichí ndaꞌa un koo un ra chee nuu ndiꞌi ñuu ivi yóꞌó xiꞌin ndiꞌi ya kuika kúu mií ya ―káchi ri xiꞌin ra.
10Saa ndi̱kuiin Jesús, ndi̱kaꞌan ra xiꞌin ri, káchi ra saa:
―¡Kuataꞌa, keta kuáꞌan, kiti nǎꞌa! saa chi tuꞌun Ndioxi káchi ya saa: “Ndisaa Ndioxi xaa toꞌo naꞌa, ta ndisaa mií ra kandixa na”, káchi tuꞌun ra ―káchi Jesús xiꞌin kiti nǎꞌa.
11Saa si̱ndikoo ri Jesús ta ke̱ta ri kuaꞌan ri, ñaa ndi̱xaa na tatun Ndioxi chi̱ndee na ra, ta̱xi ndiꞌi na ñaꞌa ya xíniñuꞌu ra ndaꞌa ra.
Xa̱á Jesús xáa suvi ra chiñu Ndioxi
(Mr. 1:14-20; Lc. 4:14-15)
12Tá xi̱ni soꞌo Jesús ya chi̱kaa na ra Juan veꞌe kàà, ta saa ndi̱ko koo ra kuanuꞌu ra chí Galilea. 13Ta köo ndi̱ndoo ra koo ra ñuu ra Nazaret, chi ikán ke̱e ra kuaꞌan ra koo ra ñuu Capernaum ya ndíkaa yati yuꞌu nduta ñûꞌu, ñaꞌñu nuu ndóo nda seꞌe sikua ra Zabulón xiꞌin ra Neftalí. 14Saa ndi̱xinu ya ndi̱kaꞌan ra profeta Isaías xinaꞌa, káchi ra saa:
15Ñuu nuu ndóo nda seꞌe sikua ra Zabulón xiꞌin ra Neftalí,
ndíkaa ya yati yuꞌu nduta ñûꞌu, inka ñaꞌñu yuꞌu ita Jordán.
Ta estado Galilea ndóo sava naꞌa, ta süvi na judío ku na.
16Nda tá íin na ndóo nuu naá ni, saa íin na, tá káa ñuu ndíi saa káa nuu ndóo na.
Sundi vitin ta ndee ni ndi̱yeꞌe nuu na xiꞌin nima na,
káchi tuꞌun Ndioxi, ya ta̱a ra Isaías.
17Saa xa̱á Jesús káꞌan ndoso ra tuꞌun Ndioxi xiꞌin naꞌa, káchi ra saa:
―Ndiko koo ini ndo xaꞌa ya väꞌa íkan ndo, chi xa yati ni íyo ichí ya xáꞌnda chiñu Ndioxi nuu kutaku ndo ―káchi Jesús xiꞌin na.
Ka̱na Jesús kumi nda xáꞌni tiaka ya kundikun ñaꞌa nda
(Mr. 1:16-20; Lc. 5:1-11)
18Tá xíka Jesús yuꞌu nduta ñûꞌu Galilea ikán, saa xi̱ni ra uvi nda taa, iin ra náni Simón, ta káꞌan tu na xiꞌin ra Pedro va xiꞌin ra Andrés ta iin ñani uvi saa nda. Saa táan uvi saa nda ñunu nda ini nduta ñûꞌu, chi nda tíin tiaka ku nda. 19Saa ndi̱kaꞌan Jesús xiꞌin nda, káchi ra saa:
―Naꞌa ndo kundikun ndo yeꞌe, ta sinaꞌa i ndóꞌo̱ ndá kuꞌva ndikaya ndo naꞌa kundikun na ichí Ndioxi ―káchi Jesús xiꞌin nda.
20Saa ndikun si̱ndoo nda ñunu nda, ta ndi̱kundikun nda kuaꞌan nda sata Jesús.
21Saa xíka ka Jesús kuaꞌan ra ta xi̱ni ra uvi nda taa, ta iin ñani uvi saa nda, ra Jacobo xiꞌin ra Juan, ñani ra, seꞌe ra Zebedeo ku nda. Ndóꞌni nda ini barco síndaꞌa nda ñunu nda. Saa ndi̱kaꞌan Jesús xiꞌin nda, káchi ra saa:
―Naꞌa ndo kundikun ndo yeꞌe ―káchi ra xiꞌin nda.
22Saa ndikun si̱ndoo nda iva nda tin itun barco nda, ta ndi̱kundikun nda kuaꞌan nda sata Jesús.
Kuaꞌa ni na kúꞌvi síndaꞌa Jesús
(Lc. 6:17-19)
23Saa xíka Jesús ndiꞌi ni kúu ñuu ya ñúꞌu estado Galilea, ta sínaꞌa ra ini veꞌe ñuꞌu sinagoga, saa káꞌan ndoso ra tuꞌun vaꞌa xaꞌa ichí ya xáꞌnda chiñu Ndioxi, ta si̱ndaꞌa ra naꞌa, na ndee ndóꞌo̱ xiꞌin ndiꞌi saa nuu kueꞌe. 24Saa ndi̱xita tuꞌun xaꞌa ra ndiꞌi ni kúu ñuu Siria, ta ndáka naꞌa na taꞌan na, na kúꞌvi, na ndóꞌo ndiꞌi ni kúu nuu kueꞌe, xiꞌin na kúu mií tachi nduvaꞌa tin na xíꞌi ndiuu xiꞌin na küvi kaka. Ndi̱xaa na nuu ra ta si̱ndaꞌa ndiꞌi ra na ikán. 25Ta kuaꞌa ni na ke̱e estado Galilea xiꞌin na ke̱e ñuu náni Decápolis, na ke̱e ñuu Jerusalén xiꞌin ñuu ya ñúꞌu estado Judea xiꞌin na ke̱e inka ñaꞌñu yuꞌu nduta ita Jordán, ndi̱kitaꞌan na kuaꞌan na sata Jesús.
Currently Selected:
San Mateo 4: xta
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Active: ©Wycliffe Bible Translators, Inc. All rights reserved.
