Matiyu 21
21
Abu Yeso è kwashi a Urishelima ángá
(Marku 11:1-11; Luka 19:28-40; Yohana 12:12-19)
1Abu Yeso ngge be ye è ba ye anga tangge be etsonchi mbwe è bwangga ara a Betafaji, e no a chu hwì a be fǝ́ anga Hwì mo Zetu, e no tenten a Urishelima ángá, gè tson be etsonchi mbwe fà chí jan be e kwafya e nya. 2Gè jan be jan, “Nye kwashi a tswa eten e no chafya mo nye nokǝ̀n, abu nye kwashi anga, nya di gwemo a be fǝ́ anga jaki be ti teno a zǝn ngge nwen ye. Nye fken be kpu bwa m. 3Ano ende akan jan nye fwa akan, nye e jan ye jan Etsodwe hon nda be anga a ge. Ga gwa nye, nye e kpu be e bwa, kè akan.”
4Mò ena è bwe tén abu Ehwya è jan chá kpevǝ mo efojan mbwe ekpe ekpe jan,
5“Nye jan be nobǝ a eten efifi a Siyona,
‘Nye di tì mo nye,
nyabwa a zǝn nye,
ga ya chu engǝm a sen.
Ge chuno a chu jaki, a chu mo nwen jaki.’ ”
6Be etsonchi fà hon è ken bwe tén nó abu Yeso è jan be ángá. 7Bè ti jaki hon ngge nwen ye kpu bwa nè twà be adanmo mo be a ju be, evǝa Yeso e chu a chu mo be. 8Be nobǝ embo è kpu be adanmo mo be twà a chu efǝ chafya mbwe, be ya ehwyà è kǝnbǝ be bu mo be tumo, kpu bwa twà a chu efǝ. 9Be nobǝ ya éè no chafya mbwe ngge ya éè no chashin mbwe ángá, è no tandwa anga jan,
“Etàn a ḿ mo Nwen Dawuda.
Esese a ende e nyabwa adi
ti mo Etsodwe hon ángá.
Etàn no ḿ mo Ehwya e no a kpe e cha ti ara.”
10Atan a Yeso è kwashi ara Urishelima ángá, tswa eten efifi hon è no ara echitkonm, be nobǝ è no ká wi eka anga jan, “Ende hon ena a ara?”
11Be nobǝ embo ya éè ba Yeso anga, è janfwe be jan, “Ende ena a Yeso, efojan mo Ehwya, ya a Nazarati a sǝnsen mo Galili.”
Yeso è kwashi a Àtá mo Ehwya
(Marku 11:15-19; Luka 19:45-48; Yohana 2:13-22)
12Kǝnggwa, Yeso è kwashi chuukwa mo Àtá mo Ehwya nè nyonvǝ́ gu be ya è no jwa be mò anga, ngge be ya è jwade be mò anga a zǝn ángá. Gè tsǝ fkabwi be teboro mo be ya tse efwem ngge be bò mo be ya è jwade be eba ángá. 13Gè jan be jan, “Ge no ebam a tswa Afketa mo Ehwya jan, ‘Ba fǝ́ àtá mam, àtá mo ebgo,’ tea nye twafwe ye nga ara zǝn engǝ̀tonm mo be ya moebufkwam.”
14Be ya fǝzǝn ebwibwi ngge ya è mbe anga embem ángá è bwa a zǝn ye, a zǝn Àtá mo Ehwya hon, gè matswa be. 15Tea atan a be Ekǝ́n echa ngge be etumo mo edon è di moeditanm a gè bwe ángá, nè fo mbǝgyashan ya éè no tandwa anga jan, “Etàn a ḿ mo Nwen Dawuda,” a tswa chuukwa mo Àtá mo Ehwya ángá, bè fku tsuruku àywá.
16Bè ká ye eka jan, “O fo mò a mbǝgyashan ena jan anga?”
Yeso è janfwe be, “Ee, m fo be anga. Nye chà ká didi nye adi Afketa mo Ehwya zǝn a be bá jan,
“ ‘Ehwya è tú mbǝgyashan ngge mbǝgya a mme,
abu ba tàn o esese enó ángá’ ra?”
17Gè gwa be a zǝn,
nè vǝ́ a je mo
eten efifi hon,
nè ken a Betani,
ken dwa ngga zǝn a zǝn.
Yeso è to tu engǝtsǝn ebwe a ju
(Marku 11:12-14,20-24)
18Anofon tàtà, abu Yeso è twabǝ nyaken a Urishelima ángá, mbe è fu ye anga. 19Gè di tu engǝtsǝn a buetkwa mo efǝ. Gè ken a zǝn tumo hon, tea gè ben ye ga akan a ju mo nó ra, gè di kpwà be ekpezǝmo. Kǝnggwa gè jan tumo hon jan, “Wa gwa a didi mbo ga efwe ra.” Kè akan tumo hon è ngǝ́ fǝ ara.
20Atan a be ye è ba ye anga è di enò ángá, bè tàn ebwikpe nè jan, “Bwe engǝ tu engǝtsǝn hon ngǝ tén engǝm myan myan enó?”
21Kǝnggwa Yeso è janfwe be, “M jan nye ebi, ano nye no ngge chaebi, ngge nye tsen nye tsuruku ra, a kpwà ye mò e bwe tu engǝtsǝn ena a nya bwe ángá ra. Nye jan a ti hwì ena, ‘Vǝ chu o etkyen, ken twashi a tswa sǝn,’ ga bwe a tén enò. 22Ano nye no ngge chaebi a chu Ehwya, nya ben egwa egwa mo mò a nye nda adi ebgo ángá.”
Bè ká Yeso eka a chu emwentì mbwe
(Marku 11:27-33; Luka 20:1-8)
23Atan a Yeso è twabǝ bwa kwashi a chuukwa mo Àtá mo Ehwya, nè no tú mò anga, be Ekǝ́n echa ngge be atkwen nobǝ è bwa a zǝn ye, nè ká ye eka jan, “Adi emwentì ani o bwe be mò ena anga? Ara no o emwentì ena a ge?”
24Yeso è janfwe be jan, “Ma ká nye eka akan èé me. Ano nye janfwe m, ma jan nye zǝn a m ben emwentì nwone a m ti bwe be mò a m bwe anga na. 25Zǝn a Yohana ya Batisǝma è ben emwentì a gè ti bwe batisǝma anga no a che? Gè ben nó chá zǝn Ehwya a kpe nè, a chá zǝn be nobǝ?”
Bè pa pyoro e sojube jan, “Ano je jan, ‘Gè vǝ chá zǝn Ehwya bwa,’ ga ká eka jan, ‘Bwe engǝ nyè tsǝ́ nye ekǝ̀n a chu ye ra?’ 26Tea ano je jan, ‘Gè vǝ bwa chá be nobǝ,’ je tsen be nobǝ anga, adia binbin mo be tsǝ́ekǝ̀n jan Yohana è no efojan mo Ehwya.”
27Enona, bè janfwe Yeso jan, “Je yi je ra.”
Kǝnggwa gè jan be, “A me gaten, ma jan m nye zǝn a m ben emwentì ti bwe be mò a m bwe anga na ra.”
Hufwa a chu mbǝgya ndedon fà
28“Mò a nye ka ángá, ano? Nobǝ akan è no ngge mbǝgya ndedon fà. Gè ken a zǝn nwenfi nè jan, ‘Nwen m, ken bwe m mochi a wá enabi nòmo.’
29“Nwen hon è janfwe ye, ‘Ma ken m ra,’ tea beti bishi, gè twafwe tsuruku mbwe, nè ken.
30“Kǝnggwa, ate be è ken a zǝn nwen ye nwenbwa, nè jan ye abu gé jan nwen nwenfi ángá. Nwen hon è janfwe ye jan, ‘Ma ken, àtà,’ tea gè ken ye ra.
31“Engga mo mbǝgya fà ena, ara bwe mò a ate be è dgyan ángá a ge?”
Bè janfwe ye, “Nwen nwenfi hon.”
Yeso è jan be jan, “M jan nye ebi, be ya tse-eten echam ngge be ndegwa ya e tse ba be ndedon anga, kwafya a kwa a tswa zǝnotì mo Ehwya sangǝ́ nye chà a kwa. 32Adia Yohana è bwa evǝa ge e tú nye efwa mo zǝno esese enom, tea nyè tsǝ́ nye ekǝ̀n a chu ye ra. Tea be ya tse-eten echam ngge be ndegwa ya e tse ba be ndedon anga, è tsǝ́ekǝ̀n a chu ye. A nye, bi adia nyè di mò a bè bwe na, nyè twa nye etwa, nye e tsǝ́ekǝ̀n a chu ye ra.
Hufwa a chu ya wá ewakpwam ya ehwyà
(Marku 12:1-12; Luka 20:9-19)
33“Nye buton fo hufwa efki. Yagwamo mu akan è no ngge wá enabi mbwe. Gè mbwe èkwà ngàhwya kpèn hon, nè gu zǝn a be ti a kon mbǝ enabi hon a tswa mo nó ngge gè tsa etwà echacha mo edgonzǝn no a zǝn. Kǝnggwa gè ti kpèn hon du be ya wá ewakpwam a bu, nè nya echan a zǝn efki. 34Atan a ekpengga mo ga enabi ebgam è defǝ ara ángá, gè tson be ya mochi mbwe ken a zǝn be, evǝa be e no be mò a be kwa nyino ḿ mbwe ángá.
35“Tea be ya wá ewakpwam hon, è fu be ya mochi hon nè bu akan, gu akan, nè twa adi e ta mo be ten. 36Efwe, gè tson be ya mochi mbwe ya è fi tkyan be ya è kwafya ángá, ken a zǝn be. Be ya wá ewakpwam hon, è bwe be abu bè bwe be ya mochi ekwafya ángá. 37Ekǝn-etkyen, gè tson nwen ye ken a zǝn be, nè ka anga jan be di a gǝ̀n nwen ye hon.
38“Tea atan a be ya wá ewakpwam hon, è di nwen hon ángá, bè jan e sojube jan, ‘Ena a edefǝ́n mo yagwamo mu hon. Nye bwa, je e gu ye evǝa mofǝ́n mbwe a nga ḿ mo je.’ 39Enona, bè nyi etkyen, nè fu ye vǝ́ chá je mo kpèn hon, nè gu ye.
40“Enona, Yeso è ká be nobǝ ya è no a zǝn ángá eka jan, ‘Asuswana, atan a yagwamo wá enabi hon ma twabǝ bwa ara, ano a ga bwe ngge be ya wá ewakpwam hon?’ ”
41Be janfwe ye jan, “Ga gu a gu be ya wá ewakpwam ya mofǝ̀ hon ena, na ti kpèn hon ti a du be ya wá ewakpwam efki, ya e no a bwi ye mò a be kwa nyi ḿ mbwe adi ekpengga mo moebǝm.”
42Yeso è jan be, “Nye chà ká nye adi be Fwaebam ra? Fwa e jan,
“ ‘Ten hon nwone a be ya moembwem
è segwa ara ángá,
twanga nga ara ten nwone e tefu
àtá hon no ángá.
Ena a mò a Ehwya bwe a ge,
ge no moeditanm a fǝzǝn mo je’?
43“Enona, m jan nye ebi, ba ti zǝnotì mo Ehwya a zǝn nye ti a no be nobǝ ya a gwa be ga ángá. 44Ende e kpo twa a chu ten ena, ju ye a cho a kwa nwofyan nwofyan. Tea ende nwene a ten hon twa ye a ju, ge fya a no ye efyam.”
45Atan a be Ekǝ́n echa ngge be Farisi è fo be hufwa mo Yeso ángá, bè yi jan gè jan fwa anga a chu be. 46Enona, bè nda efwa evǝa be e fu ye, tea bè tsen be nobǝ embo hon anga adia be nobǝ hon è tsǝ́ ara ekǝ̀n jan Yeso na efojan mo Ehwya.
Currently Selected:
Matiyu 21: ICH
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2024 Luke Initiative for Scripture Translation
