Pin'ilʋg 2
2
1Ala ka Wina'am da maal agɔl nɛ teŋ, nɛ bʋn linɛ bɛɛ ani la wʋsa naae. 2#Hib 4:4, 10 Ka daba ayɔpɔi la daar o da naae o tʋʋma la wʋsa ka vʋ'ʋs daakan la. 3Ka Wina'am niŋ daba ayɔpɔi la daar zug bareka ka kɛ ka li an kasi, bɔzugɔ on da maal agɔl nɛ teŋi naae la daakan ka o da vʋ'ʋs.
Wina'am da maal dau nɛ pu'a si'em
4Agɔl nɛ teŋ maaligʋ da pin'il si'em nwa'.
Zugsɔb Wina'am da maal agɔl nɛ teŋ la, 5tiis nɛ mɔɔd wʋsa da nam pʋ yi teŋ la zugɔ, bɔzugɔ Zugsɔb Wina'am da nam pʋ kɛ ka saa ni teŋ la zugɔ, ka ninsaal mɛ da nan kae na kua teŋ la. 6Amaa ku'om da bunnɛ wʋ'ʋgid teŋ la. 7Ka Zugsɔb Wina'am gbin'e tanni ya'ab dau ka vʋ'ʋs o mɛŋ vʋ'ʋsʋm niŋ o nyɔnya ni, ka dau la lieb ninsaal#2:7 Hibiru pian'adin, ba buon ninsaal nwɛnɛ bam buon teŋgbauŋ si'em la. ka vʋ'ʋsid.
8Ka Zugsɔb Wina'am maal lɔmbɔn'ɔg Eden teŋin la lɛbid ya-nya'aŋ baba, ka nɔk dau kanɛ ka o maal la niŋ anina. 9Ka Zugsɔb Wina'am kɛ ka tiis nɛ ba buudi yii nɔbigi pɛ'ɛl lɔmbɔn'ɔg la. Tiis la da vɛnl ka an sʋ'ʋŋa nɛ diib. Ka nyɔvʋr tiig nɛ tikanɛ kɛt ka nid baŋid dinɛ an sʋm nɛ bɛ'ɛdi bakid da zi'e lɔmbɔn'ɔg la teŋsʋk.
10Ka Kɔldatita'ar naan Eden pʋʋgin zɔt ka li ku'om dɔn'ɔsid lɔmbɔn'ɔg la. Li da pʋdignɛ zin'isa anaasi. 11Yiiga kɔldaug la anɛ Pison. Kɔldaug kan pʋbidnɛ giligid Havila teŋ la ka sanlima bɛɛ ani. 12Teŋ kan sanlima la da anɛ sʋ'ʋŋa ka an nyain, kugvɛnla nɛ tudaari banɛ nyuugi malis hali mɛ da la'am bɛɛ anina. 13Kɔldaug linɛ paas ayi' la anɛ Gihon. Lin da pʋbidnɛ giligid Kus#2:13 Teŋkan la ka ba buon Itopia nannanna. teŋ la. 14Linɛ paas atan' la anɛ Tigiris ka mɛ pʋbidi dɔl Asuor teŋ nya'aŋ. Ka linɛ paas anaasi an Efiritis.
15Ka Zugsɔb Wina'am nɔk dau la niŋ Eden lɔmbɔn'ɔg la ni ye o tʋm ka gɔsidi li. 16Ka Zugsɔb Wina'am bas dau nɔɔr ye, “Fʋ tun'e di tiis wala banɛ bɛ lɔmbɔn'ɔgin la wʋsa, 17amaa mid ka fʋ di tikanɛ kɛt ka fʋ baŋid linɛ an sʋm nɛ bɛ'ɛd la! Fʋ ya'a dii li fʋ na kpi.” 18Ka Zugsɔb Wina'am yɛl ye, “Li ka' sʋ'ʋm ye dau bɛɛ o kɔn'ɔɔ. M na maal sʋŋid onɛ zemis nɛ o tis o.” 19Saŋkan ka Zugsɔb Wina'am pʋn maal bʋnkɔnbid wʋsa nɛ niis banɛ bɛɛ agɔl ka mɔri ba na tis dau la ye o gɔs on na pʋd o ba yʋda si'em. Ka dau la da pʋd yʋ'ʋsi'a wʋsa la da aan ba yʋda.
20Ka dau la pʋd bʋnkɔnbid la wʋsa yʋda, nɛ niis banɛ bɛɛ agɔla. Amaa Adam da pʋ paam sʋŋid onɛ zemis nɛ o. 21Ka Zugsɔb Wina'am kɛ ka dau la gbis, ka o yis dau la sapirig ka maali lɛbis on yis lɔsi'a la. 22Anina ka Zugsɔb Wina'am nɔk on yis sapirsi'a la maal pu'a mɔr na tis dau la. 23Ka dau la yɛl ye, “Ɛnhee, kɔnbkaŋa anɛ mam kɔnbir ka niŋgbiŋ la mɛ an mam niŋgbiŋ. M na buol o ye pu'a, #2:23 Hibiru pian'adin la, bam buon pu'a si'em la nwɛnɛ bam buon dau si'em nɛ. bɔzugɔ o yinɛ man dau la san'an na.” 24Dinzug, dau na bas o ba' nɛ o ma ka la'as nɛ o pu'a ka babayi' la na lieb niŋgbiŋ yinne.
25Dau la nɛ o pu'a la da anɛ biel, ka mɛ pʋ zɔt nyannɛ.
Currently Selected:
Pin'ilʋg 2: kus_gh
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2023, Ghana Institute of Linguistics, Literacy and Bible Translation
