Pinongurugan 8
8
Minosak su Loni'
1Inondom-a nu Kinoringan si Nuu om kulos-kulos so kapal iiri. Indadi pouoso yo sono nu Kinoringan, om tumimpuun-o mosak su loni'. 2Tombolo yo sono Niyo kiawi' mato nu sungoi om potoduo yo Niyo su uran. Notodu' yo po uran-i, inumosak-o sono su loni'. 3Nokotalib po maatus limo nopulu runat, dai yo sono olalom bana su sungoi. 4Iya nu onom naatus toun, turu noulan, opulu om turu runat umur ni Nuu, nokotangun-o sono kapal-i so timpak nu ido bulud so kobubuludan nu Ararat. 5Mosak-osak-o sono su loni' om iya nu umur ni Nuu onom naatus toun, opulu noulan om sondunat, osiou-o sono timpak nu kobubuludan.
6Nokotalib po opat nopulu runat, sukabo yo ni Nuu jondila nu kapal-i om potuludo yo niyo su okak. 7Dai yo minululi' okak iiri so kapal-i, nga mulud-tulud-a musingkoosak nu loni' ri. 8Potuludo yo ni Nuu su asang, pongilaan nu noosak-o ka loni' ri ko' dai po, 9nga pagka kakal po kisungoi so pilolongkop nu wonuo tu, dai nokooyang asang iiri nu songkadan. Indadi mululio ya sono so kapal-i, okomo yo ni Nuu, om owito yo masuw koimbagu. 10Minongimat po si Nuu koturuan, om nopotulud-o iyo nu asang. 11Awi-awi ri, nokopululi' yo bombolog-i dii so iyo minongowit sondoun nu kayu jaitun oiyau so tinduk niyo ri. Noilaan-o sono ni Nuu nu noosak-o sobana. 12Nologa' po koturuan, nopotulud-o iyo nu asang, nga dai yo sono minululi'.
13Iya nu onom naatus om ido toun umur ni Nuu, noosak-o sobana su loni'. Sukabo yo ni Nuu taap nu kapal-i monsiou so pililiwut-i, om otuuw-o sono kosiowan niyo su tana'. 14Iya nu onom naatus om ido toun, duo noulan om duo nopulu om turu runat umur ni Nuu, okotou-o sono su tana'.
15Mutongaro yo Kinoringan so si Nuu, 16“Labus-o kiat so kapal-o maid nu anak sawo mu om nokotakin so ikau-o. 17Owito yo lumabus kiawi' bombolog om kulos-kulos wokon-o, maayo oworos, su' rumayat nosiro so wonuo tu,” koo. 18Lumobuso yo si Nuu maid nu anak sawo niyo om nokotakin so iyo ri. 19Kiawi' bombolog om kulos-kulos so tindal linumabus-o kiat so kapal-i soro songginis-ginis.
Mongusaa' si Nuu nu Kinoringan
20Momaalo yo sono si Nuu nu ranggar watu, pongusaa'an so TUHAN, om mongolapo yo iyo nu bombolog om kulos-kulos naanid su ginis kowasa okanon, om tunui yo niyo so timpak nu ranggar-i, niusaa' so Kinoringan. 21Nosudu'an sobana TUHAN nu koolanung nu niusaa' iiri, om mutongaro yo so inawo nu, “Dai Ku yo sono sumpaan wonuo tu pudi pona kikoraayan lobuw tu. Oilaan Ku nu kiat nu omulok po lobuw, oraai-o laid pikiran niyo. Dai Ku yo sono raagon kiawi' miau, soko winaal Ku so wagu tu ri.
22Laid nu kakal po wonuo tu,
otantu yo iya
nu mutanom om momaroi,
osogit om maamut,
mimpuas om kodarun,
runat om awi,”
koo Kinoringan.
Currently Selected:
Pinongurugan 8: TomPWPgLgPn
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2023 (Active), Wycliffe Bible Translators, Inc. All rights reserved.
